ಧಾರವಾಡದ ಹಲವೆಡೆ ಪಾದಚಾರಿ ಮಾರ್ಗದಲ್ಲಿ ಒಎಫ್‌ಸಿ, ಎಫ್‌ಟಿಟಿಎಚ್‌, ಫೋನ್‌, ಟಿ.ವಿ ಹೀಗೆ ವಿವಿಧ ಕೇಬಲ್‌ಗಳು ನೆಲಕ್ಕೆ ಬಿದ್ದಿವೆ. ಕೆಲವುಕಡೆ ತುಂಡಾಗಿವೆ, ಇನ್ನು ಕೆಲವೆಡೆ ಕೈಗೆಟುಕುವ ಅಂತರದಲ್ಲಿವೆ. ಕೆಲವು ಕಡೆ ವಿದ್ಯುತ್‌ ಕಂಬಗಳು, ಬಡಾವಣೆಯ ರಸ್ತೆ ಫಲಕಗಳಲ್ಲಿ ಕೇಬಲ್‌ ಸಿಂಬೆಗಳು ಜೋತುಬಿದಿದ್ದು, ಜನರ ಓಡಾಟಕ್ಕೆ ತೊಂದರೆಯಾಗಿವೆ.
ಡಿ.ಸಿ. ಕಂಪೌಂಡದಲ್ಲಿನ ನೀರಾವರಿ ಎಂಜಿನಿಯರ್‌ ಕಚೇರಿ ಬದಿ, ಎದುರಿನ ಕಚೇರಿಯ ಕಾಂಪೌಂಡ್‌ ಬದಿ, ಈ ಪ್ರದೇಶದಲ್ಲಿನ ಮರಗಳಲ್ಲಿ ಕೇಬಲ್‌ಗಳು ಬಿದ್ದಿವೆ. ಬಿಡಾಡಿ ದನಗಳು, ಪಾದಚಾರಿಗಳು ಕೇಬಲ್‌ ತುಳಿದು-ಎಡವಿ ಬಿದ್ದಿರುವ ನಿದರ್ಶನಗಳು ಇವೆ. ಕೆಲವು ಕಡೆ ರಸ್ತೆಯಲ್ಲಿ ಅಡ್ಡಲಾಗಿಯೂ ಕೇಬಲ್‌ ಅಳವಡಿಸಲಾಗಿದೆ.
ನಗರದ ಡಿ.ಸಿ ಕಂಪೌಂಡ್‌ ಸುತ್ತಮುತ್ತ, ಜಯನಗರ, ಸಪ್ತಾಪೂರ, ಸಹಿತ ಬಹಳಷ್ಟು ಕಡೆ ಪಾದಚಾರಿ ಮಾರ್ಗಗಳಲ್ಲಿ ಈ ಸಮಸ್ಯೆ ಇದೆ. ಬಿಆರ್‌ಟಿಎಸ್‌ ವಿಭಜಕದಲ್ಲಿ ಅಳವಡಿಸಿರುವ ಬೇಲಿಯಲ್ಲೂ ಕೇಬಲ್‌ಗಳು ಸಿಕ್ಕಿಹಾಕಿಕೊಂಡಿವೆ.
ಮಳೆ, ಗಾಳಿ ಸಂದರ್ಭದಲ್ಲಿ ಯಾವ ವಾಹನ, ವ್ಯಕ್ತಿಯ ಮೇಲೆ ಕೇಬಲ್‌ಗಳು ಬೀಳುತ್ತವೆಯೋ ಹೇಳಲಾಗದು. ಹೆಸ್ಕಾಂ ಮತ್ತು ಮಹಾನಗರ ಪಾಲಿಕೆ ಈ ಕೇಬಲ್‌ಗಳವಿಷಯದಲ್ಲಿ ಜಾಣ ಕುರುಡರಾಗಿದ್ದಾರೆ. ಪಾದಚಾರಿ ಮಾರ್ಗದಲ್ಲಿ ಕೇಬಲ್‌ಗಳ ಸಮಸ್ಯೆ ಗೊತ್ತಿದ್ದರೂ ಅದನ್ನು ನಿವಾರಿಸಲು ಕ್ರಮ ವಹಿಸಿಲ್ಲ ಎಂದು ಸಾರ್ವಜನಿಕರು ದೂರುತ್ತಿದ್ದಾರೆ.
ಹೆಚ್ಚು ಕೇಬಲ್‌ ಹಾಕಿರುವ, ಕೇಬಲ್‌ ಸಿಂಬೆ ಜೋತು ಹಾಕಿರುವ ವಿದ್ಯುತ್‌ ಕಂಬಗಳು ಕೆಲವುಕಡೆ ವಾಲಿವೆ. ಶಿಥಿಲವಾಗಿರುವ ಕಂಬಗಳಲ್ಲಿನ ಸಿಂಬೆಗಳು ಮಳೆ ರಭಸವಾಗಿ ಬಂದರೆ, ಜೋರು ಗಾಳಿ ಸಂದರ್ಭದಲ್ಲಿ ತೂಗಾಡುತ್ತವೆ ಇದರಿಂದ ರಸ್ತೆಗಳಲ್ಲಿ ಓಡಾಡುವವರು ಅಪಾಯದ ಪಕ್ಕದಲ್ಲೇ ಸುಳಿದಾಡುವಂತಾಗಿದೆ.
ರಸ್ತೆ ಬದಿ ಪಾದಚಾರಿ ಮಾರ್ಗದ ವೃಕ್ಷಗಳು, ಕಟ್ಟಡಗಳ ಕಾಪೌಂಡ್‌ಗಳು ಸಹಿತ ಎಲ್ಲೆಂದರಲ್ಲಿ ಕೇಬಲ್‌ ಅಳವಡಿಸಬಾರದು. ಅವಾಂತರಗಳಿಗೆ ಪಾಲಿಕೆ ಮತ್ತು ಹೆಸ್ಕಾಂನವರ ಬೇಜವಾಬ್ದಾರಿತನ ಕಾರಣ. ಈ ಬಗ್ಗೆ ಹಲವು ಬಾರಿ ಪಾಲಿಕೆಯವರಿಗೆ ದೂರು ನೀಡಿದರೂ ಸರಿಯಾಗಿ ಕ್ರಮ ವಹಿಸಿಲ್ಲ. ನಿಯಮಿತವಾಗಿ ಮಾರ್ಗ ನಿರ್ವಹಣೆ ಮಾಡಬೇಕು. ಅನಧಿಕೃತ ಕೇಬಲ್‌ ತೆರವಿಗೆ ಸಂಸ್ಥೆಗಳು ಕ್ರಮ ವಹಿಸಬೇಕು ಎಂದು ಹುಬ್ಬಳ್ಳಿ-ಧಾರವಾಡ ನಗರದ ಜನತೆ ಒತ್ತಾಯಿಸುತ್ತಿದ್ದಾರೆ.
