ಹೊನ್ನಾವರ: ತಾಲೂಕಿನ ಖರ್ವಾ ಗ್ರಾಮದ ವಲ್ಕಿ ಪ್ರದೇಶದಲ್ಲಿ ನಡೆದ ಸ್ಥಳೀಯ ಕ್ರಿಕೆಟ್ ಪಂದ್ಯವೊಂದರಲ್ಲಿ ಅಂಪೈರ್ ತೀರ್ಪಿನ ವಿಚಾರವಾಗಿ ಉಂಟಾದ ಜಗಳವು ವಿಕೋಪಕ್ಕೆ ತಿರುಗಿ, ಮಧ್ಯಪ್ರವೇಶಿಸಿದ ವೃದ್ಧರೊಬ್ಬರ ಮೇಲೆ ಬ್ಯಾಟ್ನಿಂದ ಭೀಕರವಾಗಿ ಹಲ್ಲೆ ನಡೆಸಿದ ಘಟನೆ ವರದಿಯಾಗಿದೆ.
ಘಟನೆಗೆ ಸಂಬಂಧಿಸಿದಂತೆ ಇಬ್ಬರು ಯುವಕರ ವಿರುದ್ಧ ಹೊನ್ನಾವರ ಪೊಲೀಸ್ ಠಾಣೆಯಲ್ಲಿ ಕ್ರಿಮಿನಲ್ ಪ್ರಕರಣ ದಾಖಲಾಗಿದೆ. ವಲ್ಕಿ ನಿವಾಸಿ, 58 ವರ್ಷದ ರೈತ ಶೇಖ್ ಮಹಮ್ಮದ್ ಜುಬೇರ ಹಲ್ಲೆಗೊಳಗಾದವರು. ಮಂಗಳವಾರ (ಮೇ 5) ಸಂಜೆ ಕೊಳಗದ್ದೆ ಶಾಲಾ ಮೈದಾನದಲ್ಲಿ ಪಂದ್ಯ ನಡೆಯುತ್ತಿದ್ದಾಗ ಈ ಅಹಿತಕರ ಘಟನೆ ಸಂಭವಿಸಿದೆ.
ಘಟನೆಯ ವಿವರ: ಪಂದ್ಯದ ವೇಳೆ ಅಬ್ದುಲ್ ರೆಹಮಾನ್ ಎಂಬ ಆಟಗಾರ ಔಟ್ ಎಂದು ಅಂಪೈರ್ ತೀರ್ಪು ನೀಡಿದ್ದರು. ಈ ನಿರ್ಧಾರವನ್ನು ಒಪ್ಪದ ಸುಬಾನ್ ಖಾಜಾ ಫಕರ್ದೀನ್ (24) ಮತ್ತು ಮೇಹದಿ ಖಾಜಾ ಫಕರ್ದೀನ್ (21) ಎಂಬ ಯುವಕರು ಮೈದಾನದಲ್ಲೇ ಅಂಪೈರ್ ಜೊತೆ ಕಿರಿಕ್ ಶುರು ಮಾಡಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಉತ್ತರ ಕನ್ನಡ | 73 ಹೊಸ ನ್ಯಾಯಬೆಲೆ ಅಂಗಡಿಗಳ ಸ್ಥಾಪನೆಗೆ ಜಿಲ್ಲಾಧಿಕಾರಿಗಳಿಂದ ಪ್ರಸ್ತಾವನೆ ಸಲ್ಲಿಕೆ
ಮಾತಿನ ಚಕಮಕಿ ಜೋರಾಗಿದ್ದನ್ನು ಗಮನಿಸಿದ ಶೇಖ್ ಮಹಮ್ಮದ್ ಜುಬೇರ ಅವರು, ಜಗಳ ಶಾಂತಗೊಳಿಸಲು ಪ್ರಯತ್ನಿಸಿ ಯುವಕರಿಗೆ ಬುದ್ಧಿವಾದ ಹೇಳಿದ್ದಾರೆ. “ಅಂಪೈರ್ ತೀರ್ಪು ಸರಿಯಾಗಿದೆ, ಸುಮ್ಮನೆ ಗಲಾಟೆ ಮಾಡಬೇಡಿ” ಎಂದು ಹೇಳಿದ್ದೇ ಆರೋಪಿಗಳ ಆಕ್ರೋಶಕ್ಕೆ ಕಾರಣವಾಗಿದೆ.
ಅಂಪೈರ್ ಮೇಲಿದ್ದ ಕೋಪವನ್ನು ಜುಬೇರ ಅವರ ಮೇಲೆ ತಿರುಗಿಸಿದ ಆರೋಪಿಗಳು, ಏಕಾಏಕಿ ಕ್ರಿಕೆಟ್ ಬ್ಯಾಟ್ಗಳಿಂದ ಅವರ ಮೇಲೆ ದಾಳಿ ನಡೆಸಿದ್ದಾರೆ. ಸುಬಾನ್ ಎಂಬಾತ ಬ್ಯಾಟ್ನಿಂದ ಜುಬೇರ ಅವರ ತಲೆಗೆ ಬಲವಾಗಿ ಹೊಡೆದರೆ, ಮೇಹದಿ ಬೆನ್ನಿನ ಭಾಗಕ್ಕೆ ಹೊಡೆದು ತೀವ್ರವಾಗಿ ಗಾಯಗೊಳಿಸಿದ್ದಾನೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಹಲ್ಲೆಗೊಳಗಾದ ಜುಬೇರ ಅವರು ನೀಡಿದ ದೂರಿನನ್ವಯ ಹೊನ್ನಾವರ ಪೊಲೀಸರು ಆರೋಪಿಗಳ ವಿರುದ್ಧ ಬಿಎನ್ಎಸ್ ಕಲಂ 118(1), 352 ಹಾಗೂ 3(5) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.
