ರಾಯಚೂರು ಜಿಲ್ಲೆಯ ದೇವದುರ್ಗ ತಾಲೂಕಿನ ಹದ್ದಿನಾಳ ಗ್ರಾಮದ ಬಿಎಸ್ಪಿ ಜಿಲ್ಲಾಧ್ಯಕ್ಷ ಭೂಮಾನಂದ ಅವರ ಹತ್ಯೆಯನ್ನು ಖಂಡಿಸಿ ದಲಿತಪರ ಸಂಘಟನೆಗಳು ಪ್ರತಿಭಟನೆ ನಡೆಸಿದರು. ಕೂಡಲೇ ಹತ್ಯೆ ಮಾಡಿದ ಆರೋಪಿಗಳಿಗೆ ಗೆಲ್ಲು ಶಿಕ್ಷೆ ವಿಧಿಸಬೇಕೆಂದು ಆಗ್ರಹಿಸಿ ಮನವಿ ಪತ್ರ ಸಲ್ಲಿಸಿದರು.
ಭೂಮಾನಂದರವರಿಗೆ ಜೀವ ಬೆದರಿಕೆ ಕುರಿತು ಗಬ್ಬೂರು ಪೊಲೀಸ್ ಠಾಣೆಯಲ್ಲಿ ದೂರುಗಳು ದಾಖಲಾಗಿದ್ದರೂ ಸಹ, ಅವರಿಗೆ ಸೂಕ್ತ ಪೊಲೀಸ್ ರಕ್ಷಣೆ ಒದಗಿಸದಿರುವುದು ಆಡಳಿತದ ಗಂಭೀರ ವೈಫಲ್ಯವಾಗಿದೆ. ಈ ನಿರ್ಲಕ್ಷ್ಯದಿಂದಲೇ ಅಮೂಲ್ಯ ಜೀವ ಬಲಿಯಾಗಿರುವುದು ಅತ್ಯಂತ ವಿಷಾದನೀಯ ಎಂದು ಆರೋಪಿಸಿದರು.
ಇತ್ತೀಚಿನ ದಿನಗಳಲ್ಲಿ ರಾಯಚೂರು, ಯಾದಗಿರಿ ಹಾಗೂ ದಾವಣಗೆರೆ ಜಿಲ್ಲೆಗಳಲ್ಲಿ ಪರಿಶಿಷ್ಟ ಜಾತಿಯ (ಮಾದಿಗ ಮತ್ತು ಹೊಲೆಯ) ಸಮುದಾಯದವರ ಮೇಲೆ ನಿರಂತರವಾಗಿ ಜಾತಿ ಆಧಾರಿತ ದೌರ್ಜನ್ಯಗಳು, ಹಲ್ಲೆಗಳು, ಸಾಮಾಜಿಕ ಬಹಿಷ್ಕಾರ ಹಾಗೂ ಮಾನವ ಹಕ್ಕುಗಳ ಉಲ್ಲಂಘನೆ ನಡೆಯುತ್ತಿರುವುದು ಅತ್ಯಂತ ಆತಂಕಕಾರಿ ಬೆಳವಣಿಗೆಯಾಗಿದೆ. ಇಂತಹ ಘಟನೆಗಳು ಸಂವಿಧಾನದ ಸಮಾನತೆ, ನ್ಯಾಯ ಹಾಗೂ ಮಾನವ ಗೌರವದ ಮೌಲ್ಯಗಳಿಗೆ ವಿರುದ್ಧವಾಗಿವೆ ಎಂದು ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸಿದರು.
ಭೂಮಾನಂದ ರವರ ಹತ್ಯೆ ಪ್ರಕರಣದಲ್ಲಿ ಭಾಗಿಯಾಗಿರುವ ಎಲ್ಲಾ ಆರೋಪಿಗಳನ್ನು ಹಾಗೂ ಸಂಚು ರೂಪಿಸಿದ ಸೂತ್ರಧಾರರನ್ನು ತಕ್ಷಣ ಬಂಧಿಸಿ, ಪ್ರಕರಣದ ತನಿಖೆಯನ್ನು ವೇಗಗೊಳಿಸಬೇಕು. ಕೊಲೆಗಾರರು ಹಾಗೂ ಸಂಚುಕೋರರಿಗೆ ಮರಣದಂಡನೆ ಶಿಕ್ಷೆಯಾಗುವಂತೆ ಕ್ರಮ ಜರುಗಿಸಬೇಕು ಮತ್ತು ಆರೋಪಿಗಳ ಆಸ್ತಿಯನ್ನು ಮುಟ್ಟುಗೋಲು ಹಾಕಿಕೊಳ್ಳಬೇಕು. ಸಂತ್ರಸ್ತ ಕುಟುಂಬಕ್ಕೆ ಭದ್ರತೆ ಹಾಗೂ ಪರಿಹಾರ ನೀಡಬೇಕು ಮತ್ತು ಕುಟುಂಬದ ಸದಸ್ಯರು ಹಾಗೂ ಪ್ರಕರಣದ ಪ್ರತ್ಯಕ್ಷ ಸಾಕ್ಷಿಗಳಿಗೆ ಸಮರ್ಪಕ ಪೊಲೀಸ್ ಭದ್ರತೆ ಒದಗಿಸಬೇಕು ಎಂದು ಮನವಿ ಸಲ್ಲಿಸಿದರು.
ಈ ಸುದ್ದಿ ಓದಿದ್ದೀರಾ? ದೇವದುರ್ಗ | 10ನೇ ತರಗತಿ ವಿದ್ಯಾರ್ಥಿಗಳಿಗೆ ವಿತರಣೆಯಾಗದ ಕನ್ನಡ ಪಠ್ಯಪುಸ್ತಕ: ಕಲಿಕೆ ಹಾಗೂ ಪರೀಕ್ಷಾ ಸಿದ್ಧತೆಗೆ ಹೊಡೆತ
ಪ್ರತಿಭಟನೆಯಲ್ಲಿ ಕುಪ್ಪಣ್ಣ ಹೊಸಮನಿ, ಮೋಹನ್ ಗೋಸ್ಲೆ ಕರಡಕಲ್ಲ್, ಹನುಮಂತ ಕುಣೇಕಲ್ಲರು , ನಿಂಗಪ್ಪ ಪಂರಗಿ, ರಮೇಶ್ ಗೋಸ್ಲೆ, ದುರುಗಪ್ಪ ಅಗ್ರಹಾರ, ಗ್ರಾನಪ್ಪ ಆನೆಹೊಸೂರ, ವಿಜಯ್ ಕುಮಾರ್ ಹಟ್ಟಿ,, ಯಲ್ಲಪ್ಪ ಮಾಚನೂರ, ಶರಣಪ್ಪ ಕಟ್ಟಿಮನಿ, ಉಮೇಶ್ ಐಹೋಳಿ, ಅಂಬರೇಶ್ ವೆಂಕಪೂರು, ಜಮ್ಮದಗ್ನಿ ಕೋಟಿ , ಹುಸೇನಪ್ಪ ಕಳ್ಳಿಲಿಂಗಸಗುರು, ಆದೇಶ ನಗನೂರ, ರವಿಕುಮಾರ್ ಕಟ್ಟಿಮನಿ ಮುದ್ಗಲ್, ನಿಂಗಣ್ಣ ಹಟ್ಟಿ, ಸಂಜೀವಪ್ಪ ಛಲವಾದಿ , ಶರಣಪ್ಪ ಹುನಕುಟ್ಟಿ, ಶಿವಪ್ಪ ಮಾಚನೂರ, ಸಿದ್ಧು ಮೇದನಪೂರು , ನಾಗರಾಜ್ ಮ್ಯಾಳಿ, ಅರುಣ್ ಕುಮಾರ್ ಚಿಕ್ಕಹೆಸರುರೂ, ನಾಗರಾಜ್ ಯರಡೋಣ್ ಇನ್ನಿತರರು ಇದ್ದರು.
