ತೆಂಕುಬಿರ್ತಿ, ಬ್ರಹ್ಮಾವರದ ಆದಿದ್ರಾವಿಡ ಸಹಕಾರ ಸಂಘ ನಿಯಮಿತದ 9ನೇ ವಾರ್ಷಿಕ ಮಹಾಸಭೆ ಅಂಬೇಡ್ಕರ್ ಭವನದಲ್ಲಿ ಸಂಘದ ಅಧ್ಯಕ್ಷ ಸುಧಾಕರ್ ಗುಜ್ಜರ್ಬೆಟ್ಟು ಅವರ ಅಧ್ಯಕ್ಷತೆಯಲ್ಲಿ ನಡೆಯಿತು.
ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಸುಧಾಕರ್ ಗುಜ್ಜರ್ಬೆಟ್ಟು ಅವರು ಸಂಘದ ವಾರ್ಷಿಕ ವರದಿಯನ್ನು ಮಂಡಿಸಿ, ಸಂಘವು ಸತತ 9ನೇ ವರ್ಷವೂ ಲಾಭ ಗಳಿಸಿದ್ದು, ಈ ಬಾರಿ ಸದಸ್ಯರಿಗೆ ಶೇ.15ರಷ್ಟು ಡಿವಿಡೆಂಡ್ ನೀಡಲಾಗುವುದು ಎಂದು ಘೋಷಿಸಿದರು.
ಸಂಘದ ಆಂತರಿಕ ಲೆಕ್ಕ ಪರಿಶೋಧಕ ಸುರೇಶ್ ಬಿರ್ತಿ ಅವರು ಸಂಘದ ವಿವಿಧ ಚಟುವಟಿಕೆಗಳು ಹಾಗೂ ಬಜೆಟ್ ಮಂಡಿಸಿದರು. ದಶಮಾನೋತ್ಸವದ ಕೊಡುಗೆಯಾಗಿ ಸಂಘದ ವತಿಯಿಂದ ‘ಭೀಮಾ ಲಕ್ಷಾಧಿಪತಿ’ ಮತ್ತು ‘ಭೀಮಾ ಮಾಸಿಕ’ ಎಂಬ ಎರಡು ಉಳಿತಾಯ ಯೋಜನೆಗಳಿಗೆ ಇದೇ ಸಂದರ್ಭದಲ್ಲಿ ಚಾಲನೆ ನೀಡಲಾಯಿತು. ಪ್ರಭಾರ ಸಿಇಒ ಪ್ರಶಾಂತ್ ಬಿರ್ತಿ ಅವರು ಲೆಕ್ಕಪತ್ರಗಳನ್ನು ಮಂಡಿಸಿದರು.
ಕಳೆದ ವರ್ಷ ಮೈಸೂರು ದಸರಾ ಜಂಬೂಸವಾರಿಯಲ್ಲಿ ಭಾಗವಹಿಸಿದ್ದ ಅಂಕದಮನೆ ಜಾನಪದ ಕಲಾ ತಂಡದ ಸದಸ್ಯರನ್ನು ಸಭೆಯಲ್ಲಿ ಗೌರವಿಸಲಾಯಿತು.
ಕಾರ್ಯಕ್ರಮದಲ್ಲಿ ಬ್ರಹ್ಮಾವರ ವ್ಯವಸಾಯ ಸೇವಾ ಸಹಕಾರಿ ಸಂಘದ ನಿರ್ದೇಶಕ ಎಸ್. ನಾರಾಯಣ್, ಸಾಹಿತಿ ಹಾಗೂ ಚಿಂತಕ ಪೆರೂರು ಜಾರು, ಬ್ಯಾಂಕ್ ಆಫ್ ಬರೋಡದ ಅಧಿಕಾರಿ ಸುಬ್ರಮಣ್ಯ ಪ್ರಸಾದ್, ಲೇಖಕ ಹಾಗೂ ಅಂಕಣಕಾರ ರವಿ ಪುತ್ತೂರು, ಭೋಜರಾಜ್ ಕೆ., ಅಂಬೇಡ್ಕರ್ ಯುವಕ ಮಂಡಲದ ಅಧ್ಯಕ್ಷ ಸಂಪತ್ ರಾಜ್ ಹಾಗೂ ಹರಿಶ್ಚಂದ್ರ ಕೆ.ಡಿ. ಉಪಸ್ಥಿತರಿದ್ದರು.
ಸಂಘದ ಉಪಾಧ್ಯಕ್ಷ ವರ್ಣ ವಿಶ್ವನಾಥ್, ನಿರ್ದೇಶಕರಾದ ಜಗನ್ನಾಥ್ ಬಿ., ಸಂತೋಷ್ ಬಿರ್ತಿ, ಅನಿಲ್ ಕುಮಾರ್, ಚೈತನ್ಯ ಬಿರ್ತಿ, ಗಂಗೆ, ಸುಮನಾ, ಶಂಕರ್ ಇಂದಿರಾನಗರ ಹಾಗೂ ಸಂದೇಶ್ ಕುಮಾರ್ ಬಿರ್ತಿ ಉಪಸ್ಥಿತರಿದ್ದರು.
ದಲಿತ ಸಂಘರ್ಷ ಸಮಿತಿ ಮೈಸೂರು ವಿಭಾಗೀಯ ಸಂಘಟನಾ ಸಂಚಾಲಕ ಶ್ಯಾಮರಾಜ್ ಬಿರ್ತಿ ಪ್ರಸ್ತಾವಿಕವಾಗಿ ಮಾತನಾಡಿ ಸ್ವಾಗತಿಸಿದರು. ಶಶಿರಾಜ್ ಉಪ್ಪೂರು ಕಾರ್ಯಕ್ರಮ ನಿರೂಪಿಸಿದರು. ಲಿಂಗಪ್ಪ ಕುಟ್ಟಿ ವಂದಿಸಿದರು.
