ಭಾರತೀಯ ಜೀವವಿಮಾ ನಿಗಮ (ಎಲ್‌ಐಸಿ) ವತಿಯಿಂದ ಜಾರಿಗೊಂಡಿದ್ದ ಮೈಕ್ರೋ ಇನ್ಸೂರೆನ್ಸ್ ಯೋಜನೆಯಲ್ಲಿ ನಡೆದ ಭಾರಿ ವಂಚನೆ ಪ್ರಕರಣದಲ್ಲಿ, ಚಿಕ್ಕಮಗಳೂರು ಜಿಲ್ಲೆಯ 57 ಸಾವಿರಕ್ಕೂ ಅಧಿಕ ಪಾಲಿಸಿದಾರರು ಕೊನೆಗೂ ನ್ಯಾಯಾಲಯದ ಆದೇಶದಂತೆ ಪರಿಹಾರ ಪಡೆದಿದ್ದಾರೆ ಎಂದು ಉಡುಪಿ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ. ರವೀಂದ್ರನಾಥ ಶ್ಯಾನುಭಾಗ್ ತಿಳಿಸಿದ್ದಾರೆ.
ಉಡುಪಿಯ ವೈಕುಂಠ ಬಾಳಿಗಾ ಕಾನೂನು ಕಾಲೇಜಿನಲ್ಲಿರುವ ಪ್ರತಿಷ್ಠಾನದ ಕಚೇರಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಅವರು ಈ ವಿಷಯವನ್ನು ತಿಳಿಸಿದರು.
2005ರಲ್ಲಿ ಎಲ್‌ಐಸಿ ಪರಿಚಯಿಸಿದ ಮೈಕ್ರೋ ಇನ್ಸೂರೆನ್ಸ್ ಯೋಜನೆ 2009-10ರಲ್ಲಿ ಚಿಕ್ಕಮಗಳೂರು ಜಿಲ್ಲೆಯ ಕಡೂರು, ತರೀಕೆರೆ, ಅರಸಿಕೆರೆ, ಮೂಡಿಗೆರೆ, ಎನ್‌.ಆರ್‌.ಪುರ ಸೇರಿದಂತೆ ವಿವಿಧ ತಾಲೂಕುಗಳ 200ಕ್ಕೂ ಹೆಚ್ಚು ಗ್ರಾಮಗಳಲ್ಲಿ ಜಾರಿಗೊಂಡಿತ್ತು. ಈ ಯೋಜನೆಯಲ್ಲಿ 58 ಸಾವಿರಕ್ಕೂ ಅಧಿಕ ಜನರು ಪಾಲಿಸಿಗಳನ್ನು ಪಡೆದಿದ್ದರು.
ಪಾಲಿಸಿದಾರರಿಂದ ಪ್ರತಿ ತಿಂಗಳು ಸಂಗ್ರಹಿಸಲಾದ ಪ್ರೀಮಿಯಂ ಹಣವನ್ನು ಅಂಗನವಾಡಿ ಕಾರ್ಯಕರ್ತೆಯರು ಎಲ್‌ಐಸಿಯಿಂದ ನೇಮಿಸಲ್ಪಟ್ಟ ಸಮನ್ವಯ ಗ್ರಾಮೀಣ ಅಭಿವೃದ್ಧಿ ಸಂಸ್ಥೆ, ಶುಭೋದಯ ಗ್ರಾಮೀಣ ಅಭಿವೃದ್ಧಿ ಸಂಸ್ಥೆ ಹಾಗೂ ಮುಕ್ಕಣ್ಣೇಶ್ವರಿ ಯುವತಿಮಂಡಲಗಳಿಗೆ ಹಸ್ತಾಂತರಿಸುತ್ತಿದ್ದರು. ಆದರೆ ಈ ಸಂಸ್ಥೆಗಳು ಕೋಟ್ಯಾಂತರ ರೂಪಾಯಿ ಹಣವನ್ನು ದುರುಪಯೋಗ ಮಾಡಿಕೊಂಡಿರುವುದು 2013ರಲ್ಲಿ ಒಂದು ಕ್ಲೈಮ್ ಅರ್ಜಿಯಿಂದ ಬಹಿರಂಗವಾಯಿತು.
ಈ ಘಟನೆ ನಂತರ, ವಿಷಯ ತಿಳಿಯದ ಪಾಲಿಸಿದಾರರು ಅಂಗನವಾಡಿ ಕಾರ್ಯಕರ್ತೆಯರನ್ನೇ ಹೊಣೆಗಾರರನ್ನಾಗಿ ಮಾಡಿ ಅವರ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದರು. ಬಳಿಕ ತರೀಕೆರೆ ಮತ್ತು ಕಡೂರು ಪೊಲೀಸ್ ಠಾಣೆಗಳಲ್ಲಿ ಪ್ರಕರಣಗಳು ದಾಖಲಾಗಿದ್ದವು.
2016ರಲ್ಲಿ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಹಸ್ತಕ್ಷೇಪದಿಂದ ಪ್ರಕರಣದ ತನಿಖೆ ವೇಗ ಪಡೆದು, ಎಲ್‌ಐಸಿ ಅಧಿಕಾರಿಗಳು ಕೂಡ ಸಂಬಂಧಪಟ್ಟ ಸಂಸ್ಥೆಗಳ ವಿರುದ್ಧ ದೂರು ದಾಖಲಿಸಿದರು.
ಈ ಪ್ರಕರಣದಲ್ಲಿ ಸುಮಾರು 60 ಮಂದಿ ಗ್ರಾಹಕರು ಚಿಕ್ಕಮಗಳೂರು ಜಿಲ್ಲಾ ಬಳಕೆದಾರರ ಆಯೋಗದಲ್ಲಿ ದಾವೆ ಹೂಡಿದ್ದು, ಆಯೋಗವು ಎಲ್‌ಐಸಿಯ ನಿರ್ಲಕ್ಷ್ಯವನ್ನು ಗುರುತಿಸಿ, ಪಾಲಿಸಿದಾರರಿಗೆ ಪ್ರೀಮಿಯಂ ಮೊತ್ತವನ್ನು ದಂಡ ಸಮೇತ ಹಿಂದಿರುಗಿಸಲು ಹಾಗೂ ದಾವೆಯ ವೆಚ್ಚವನ್ನು ಭರಿಸಲು ಆದೇಶ ನೀಡಿತು. ಇದರಂತೆ ಎಲ್‌ಐಸಿ ಹಣವನ್ನು ಹಿಂದಿರುಗಿಸಿತು.
ಉಳಿದ ಪಾಲಿಸಿದಾರರ ಪರವಾಗಿ ರಾಜ್ಯ ಬಳಕೆದಾರರ ಆಯೋಗದಲ್ಲಿ ಹೂಡಲಾದ ದಾವೆಯ ಬಳಿಕ, ಸುಮಾರು 10 ವರ್ಷಗಳ ನಂತರ ಎಲ್‌ಐಸಿ ತನ್ನ ತಪ್ಪನ್ನು ಒಪ್ಪಿಕೊಂಡು ಪರಿಹಾರ ನೀಡಲು ಒಪ್ಪಿಕೊಂಡಿದೆ. ಈಗಾಗಲೇ ಪಾಲಿಸಿದಾರರು ತಮ್ಮ ಪ್ರೀಮಿಯಂ ಹಣದೊಂದಿಗೆ ದಾವೆ ವೆಚ್ಚ ಹಾಗೂ ತಲಾ ₹3,000 ಪರಿಹಾರವನ್ನು ಪಡೆದಿದ್ದಾರೆ.
ಈ ಸಂದರ್ಭದಲ್ಲಿ ಅಂಗನವಾಡಿ ಕಾರ್ಯಕರ್ತೆಯರಾದ ಅನ್ನಪೂರ್ಣ, ಆಶಾ, ಪೂರ್ಣಿಮಾ, ಸುಮಿತ್ರಾ, ಕವಿತಾ, ಆಶಾ, ಪವಿತ್ರಾ ದೇವನೂರು ಹಾಗೂ ರಘು ಆನೆಗೆರೆ ಉಪಸ್ಥಿತರಿದ್ದರು.
