ಕೇರಳದ ತಿರುವನಂತಪುರಂ ಮಹಾನಗರ ಪಾಲಿಕೆಯ ಹಾಜರಾತಿ ಪುಸ್ತಕದಲ್ಲಿ ಬಿಜೆಪಿ ಕೌನ್ಸಿಲರ್ ಆರ್ ಸುಗತನ್ ತಲೆಮರೆಸಿಕೊಂಡಿದ್ದ ಸಮಯದಲ್ಲಿ ಅವರ ನಕಲಿ ಸಹಿ ಹಾಕಿ ಹಾಜರಾತಿ ನಮೂದಿಸಲಾಗಿದೆ ಎಂಬ ಆರೋಪ ಕೇಳಿಬಂದಿದ್ದು, ಈ ಕುರಿತು ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಮಾಹಿತಿ ಹಕ್ಕು ಕಾಯಿದೆ (ಆರ್‌ಟಿಐ) ಅಡಿಯಲ್ಲಿ ಪಡೆದ ದಾಖಲೆಗಳನ್ನು ಆಧರಿಸಿ ಎಲ್‌ಡಿಎಫ್ ನಾಯಕರು ಈ ಗಂಭೀರ ಆರೋಪವನ್ನು ಮಾಡಿದ್ದಾರೆ.
ಬಿಜೆಪಿ ಕೌನ್ಸಿಲರ್ ಆರ್. ಸುಗತನ್ (ವಾಳೋಟ್ಟುಕೋಣಂ ವಾರ್ಡ್) ಅವರ ವಿರುದ್ಧ ಸುಮಾರು 19 ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿವೆ. ಮುಖ್ಯವಾಗಿ ವಟ್ಟಿಯೂರ್ಕಾವು ಮತ್ತು ನೆಡುಮಂಗಾಡ್ ಪೊಲೀಸ್ ಠಾಣೆಗಳ ವ್ಯಾಪ್ತಿಯಲ್ಲಿ ಬಿಜೆಪಿ ಕೌನ್ಸಿಲರ್ ವಿರುದ್ಧ ಪ್ರಕರಣಗಳು ನಮೂದಾಗಿವೆ. ಎರಡು ಕೊಲೆ ಯತ್ನ ಪ್ರಕರಣಗಳೂ ಇವೆ.
ಇದನ್ನೂ ಓದಿ: ಕೇರಳ | ಕೋಮು ವಿಭಜನೆ ಉತ್ತೇಜಿಸುವ ಭಾಷಣದ ಮೂಲಕವೇ ಬಿಜೆಪಿ ಪ್ರಚಾರ ಶುರು
ಇತ್ತೀಚೆಗೆ ವ್ಯಕ್ತಿಯೊಬ್ಬನ ತಲೆಗೆ ಹೊಡೆದು ಕೊಲೆ ಯತ್ನ ನಡೆಸಿದ ಪ್ರಕರಣದಲ್ಲಿ ಪೊಲೀಸ್ ಬಂಧನದಿಂದ ತಪ್ಪಿಸಿಕೊಳ್ಳಲು ತಲೆಮರೆಸಿಕೊಂಡಿದ್ದರು. ಈ ಅವಧಿಯಲ್ಲಿ ಪಾಲಿಕೆಯಲ್ಲಿ ನಡೆದ ಮೂರು ಪ್ರಮುಖ ಸಭೆಗಳಿಗೆ (ಫೆಬ್ರವರಿ 26, ಮಾರ್ಚ್ 11 ಮತ್ತು ಏಪ್ರಿಲ್ 27) ಸುಗತನ್ ಗೈರುಹಾಜರಾಗಿದ್ದರು.
ನಿಯಮದ ಪ್ರಕಾರ, ಕೌನ್ಸಿಲರ್ ಒಬ್ಬರು ಸತತವಾಗಿ 3 ಸಭೆಗಳಿಗೆ ಗೈರುಹಾಜರಾದರೆ ಅವರ ಕೌನ್ಸಿಲರ್ ಸದಸ್ಯತ್ವ ರದ್ದಾಗುವ ಸಾಧ್ಯತೆ ಇರುತ್ತದೆ. ಈ ಸದಸ್ಯತ್ವ ರದ್ದತಿಯನ್ನು ತಪ್ಪಿಸಲು ಮತ್ತು ಅವರು ಸಭೆಗೆ ಬಂದಿದ್ದರು ಎಂದು ತೋರಿಸಲು, ಮೇಯರ್ ಕಚೇರಿಯಲ್ಲಿದ್ದ ಹಾಜರಾತಿ ಪುಸ್ತಕದಲ್ಲಿ ಅವರ ನಕಲಿ ಸಹಿ (Forged Signature) ಹಾಕಲಾಗಿದೆ ಎಂಬುದು ಎಲ್‌ಡಿಎಫ್ ನಾಯಕರ ಪ್ರಮುಖ ಆರೋಪವಾಗಿದೆ.
ದೂರು ದಾಖಲಾದ ಬೆನ್ನಲ್ಲೇ ಪೊಲೀಸರು ಹಾಜರಾತಿ ಪುಸ್ತಕದಲ್ಲಿನ ಸಹಿಗಳನ್ನು ವಿಧಿವಿಜ್ಞಾನ ಪರೀಕ್ಷೆಗೆ ಒಳಪಡಿಸಲು ಮತ್ತು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಲು ಮುಂದಾಗಿದ್ದಾರೆ. ಮತ್ತೊಂದೆಡೆ, ತಮ್ಮ ಮೇಲಿನ ನಕಲಿ ಸಹಿ ಆರೋಪವನ್ನು ಕೌನ್ಸಿಲರ್ ಆರ್. ಸುಗತನ್ ತಳ್ಳಿಹಾಕಿದ್ದು, ಪೋಲಿಸರ ತನಿಖೆಗೆ ಮತ್ತು ಸಿಸಿಟಿವಿ ತನಿಖೆಗೆ ಸಿದ್ಧರಿರುವುದಾಗಿ ತಿಳಿಸಿದ್ದಾರೆ.
