ಕಾರ್ಪೊರೇಟ್ ಮಾಧ್ಯಮಗಳು ತಮ್ಮ ಮೂಲಭೂತ ಸಂಪಾದಕೀಯ ನೈತಿಕತೆಯನ್ನು ಅಗ್ಗದ ಚೌಕಾಸಿಗೆ ಒಡ್ಡಿವೆ ಎಂಬ ಆರೋಪಗಳು ಕಳೆದೊಂದು ದಶಕಗಳಿಂದ ಕೇಳಿಬರುತ್ತಿವೆ. ಇಂತಹದೊಂದು ಆರೋಪಕ್ಕೆ ಇದೀಗ, ಪ್ರತಿಷ್ಠಿತ ಇಂಗ್ಲಿಷ್ ದಿನಪತ್ರಿಕೆ ‘ದಿ ಹಿಂದು’ ಮತ್ತು ಹಿಂದಿ ಪತ್ರಿಕೆ ‘ದೈನಿಕ್ ಭಾಸ್ಕರ್’ಗಳು ಗುರಿಯಾಗಿವೆ. ಇಬ್ಬರು ಮಹಿಳಾ ಶಿಷ್ಯೆಯರ ಮೇಲಿನ ಅತ್ಯಾಚಾರ ಪ್ರಕರಣದಲ್ಲಿ ಸಿಬಿಐ ವಿಶೇಷ ನ್ಯಾಯಾಲಯದಿಂದ 20 ವರ್ಷಗಳ ಕಠಿಣ ಜೈಲು ಶಿಕ್ಷೆಗೆ ಗುರಿಯಾಗಿರುವ ಡೇರಾ ಸಚ್ಚಾ ಸೌದಾ ಮುಖ್ಯಸ್ಥ, ಅಪರಾಧಿ ಗುರ್ಮೀತ್ ರಾಮ್ ರಹೀಮ್ ಸಿಂಗ್‌ನನ್ನು ‘ವಿಶುದ್ಧ’ ಎಂದು ಬಿಂಬಿಸುವ, ಕೋರ್ಟ್‌ಗಳ ತೀರ್ಪನ್ನೇ ಪ್ರಶ್ನಿಸುವ ಪೂರ್ಣ ಪುಟದ ಜಾಹೀರಾತನ್ನು ಎರಡೂ ಪತ್ರಿಕೆಗಳು ತಮ್ಮ ಮುಖಪುಟದಲ್ಲೇ ಪ್ರಕಟಿಸಿವೆ. ‘ಪತ್ರಿಕಾ ನೈತಿಕತೆಯನ್ನು ಗಾಳಿಗೆ ತೂರಿವೆ’ ಎಂಬ ಸಾರ್ವಜನಿಕ ಆಕ್ರೋಶಕ್ಕೆ ಗುರಿಯಾಗಿವೆ.
ಈ ಪತ್ರಿಕೆಗಳು ಸೆಪ್ಟೆಂಬರ್ 12ರಂದು ದೆಹಲಿ, ಮೊಹಾಲಿ ಸೇರಿದಂತೆ ಉತ್ತರ ಭಾರತದ ಪ್ರಮುಖ ಆವೃತ್ತಿಗಳಲ್ಲಿ ‘ಡೇರಾ ಸಚ್ಚಾ ಸೌದಾ ಎಂದರೇನು? (ಸತ್ಯ vs ಕಾಲ್ಪನಿಕಕಥೆ)’ ಎಂಬ ವಿವಾದಾತ್ಮಕ ಶೀರ್ಷಿಕೆಯ ಜಾಹೀರಾತನ್ನು ಪ್ರಕಟಿಸಿದ್ದವು. ಇದೇ ಜಾಹೀರಾತಿನಲ್ಲಿ, ಗುರು ಜಿ ವಿರುದ್ಧ ಪಿತೂರಿ ನಡೆದಿದೆಯೇ?’ ಎಂಬ ಪ್ರಶ್ನೆಗೆ ‘ಹೌದು, ಖಂಡಿತ’ ಎಂದೂ ಬರೆಯಲಾಗಿತ್ತು. ಈ ಜಾಹೀರಾತು ಸಂತ್ರಸ್ತರ ಕಟು ಸತ್ಯವನ್ನು ಮತ್ತು ನ್ಯಾಯಾಂಗದ ಸುದೀರ್ಘ ತನಿಖೆಯನ್ನು ಬಹಿರಂಗವಾಗಿ ಅಪಹಾಸ್ಯಕ್ಕೀಡು ಮಾಡಿತ್ತು. ಅಲ್ಲದೆ, ರಾಮ್ ರಹೀಮ್‌ಗೆ ಸರ್ಕಾರಗಳು ಸರಣಿಯಾಗಿ ನೀಡುತ್ತಿರುವ ಪೆರೋಲ್ ಮತ್ತು ಫರ್ಲೋಗಳು ‘ವಿಐಪಿ ಆತಿಥ್ಯವಲ್ಲ’ ಎಂದು ಧರ್ಮದಂಡ ಹಿಡಿಯುವ ಪ್ರಯತ್ನವನ್ನೂ ಮಾಡಲಾಗಿತ್ತು.
ಈ ಜಾಹೀರಾತಿನ ಪ್ರಕಟಣೆಯು ಸಾರ್ವಜನಿಕ ರಂಗದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ನ್ಯಾಯಾಲಯದಿಂದ ಅತ್ಯಾಚಾರ ಅಪರಾಧಿ ಎಂದು ಸಾಬೀತಾಗಿ ಜೈಲು ಶಿಕ್ಷೆ ಅನುಭವಿಸುತ್ತಿರುವ ವ್ಯಕ್ತಿಯನ್ನು ಸಮರ್ಥಿಸುವ ಈ ಜಾಹೀರಾತನ್ನು ಪ್ರಕಟಿಸಿರುವ ಪತ್ರಿಕೆಗಳ ನೈತಿಕ ಬದ್ಧತೆಯನ್ನು ಹಲವಾರು ನೆಟ್ಟಿಗರು ಪ್ರಶ್ನಿಸಿದ್ದರು.
ಗಮನಾರ್ಹವಾಗಿ, 2026ರ ಜೂನ್ ಅಂತ್ಯದ ವೇಳೆಗೆ ಈ ಅತ್ಯಾಚಾರ ಅಪರಾಧಿ ರಾಮ್ ರಹೀಮ್ ಪೆರೋಲ್ ಹೆಸರಿನಲ್ಲಿ ಭರ್ತಿ 435 ದಿನಗಳನ್ನು ಜೈಲಿನಿಂದ ಹೊರಗೆ ಕಳೆದಿದ್ದಾನೆ. ಅಂದರೆ ತನ್ನ ಶಿಕ್ಷೆಯ ಅವಧಿಯ 13.5%ಕ್ಕಿಂತಲೂ ಹೆಚ್ಚು ದಿನಗಳು ಆತ ಜೈಲಿನಿಂದ ಹೊರಗಿದ್ದಾನೆ. ಮಾತ್ರವಲ್ಲದೆ, ರಾಜಕೀಯ ಹಿತಾಸಕ್ತಿ ಮತ್ತು ವೋಟ್ ಬ್ಯಾಂಕ್‌ಗಾಗಿ ಹರಿಯಾಣದ ಬಿಜೆಪಿ ಸರ್ಕಾರ ಈತನಿಗೆ ರಾಜಾತಿಥ್ಯ ನೀಡುತ್ತಿದೆ ಎಂಬ ಗಂಭೀರ ಆರೋಪವೂ ದೇಶಾದ್ಯಂತ ಚರ್ಚೆ ಹುಟ್ಟುಹಾಕಿದೆ.
ಇಂತಹ ಸಂದರ್ಭದಲ್ಲಿ, ಮಾಧ್ಯಮಗಳು ಕೋಟಿ ಕೋಟಿ ಹಣಕ್ಕಾಗಿ ಇಂತಹ ಕ್ರಿಮಿನಲ್ ಸಮರ್ಥನೆಯ ಜಾಹೀರಾತನ್ನು ತಮ್ಮ ಮುಖಪುಟದಲ್ಲಿ ಪ್ರಕಟಿಸಿರುವುದು ಸಮಾಜದ ಸಾಕ್ಷಿಪ್ರಜ್ಞೆಯನ್ನು ತಲ್ಲಣಗೊಳಿಸಿದೆ.
The Hindu carried a full-page “Facts vs Fiction” ad for Gurmeet Ram Rahim Singh, convicted of raping two women disciples.
— newslaundry (@newslaundry) September 12, 2026
The ad presents his claims as answers, while leaving out the convictions, allegations and history of violence around his followers.https://t.co/GLjhoMpyfq
ಸಾಮಾಜಿಕ ಜಾಲತಾಣಗಳಲ್ಲಿ ಪತ್ರಿಕೋದ್ಯಮದ ಮೂಲಭೂತ ಹೊಣೆಗಾರಿಕೆಯನ್ನೇ ಪ್ರಶ್ನಿಸಿ ಜನಾಕ್ರೋಶ ಮುಗಿಲುಮುಟ್ಟಿದೆ. ಈ ಬೆನ್ನಲ್ಲೇ, ಎಚ್ಚೆತ್ತುಕೊಂಡ ‘ದಿ ಹಿಂದು’ ಸಂಸ್ಥೆಯು ತನ್ನ ಓದುಗರಲ್ಲಿ ಬೇಷರತ್ತಾಗಿ ಕ್ಷಮೆಯಾಚಿಸಿದೆ. ಅಪರಾಧಿಯನ್ನು ಸಮರ್ಥಿಸುವ ವಿಷಯವನ್ನು ಪ್ರಕಟಿಸಿದ್ದು ತೀವ್ರ ವಿಷಾದನೀಯ ಎಂದು ಪತ್ರಿಕೆ ಹೇಳಿಕೊಂಡಿದೆ.
ಆದರೆ, ಲೈಂಗಿಕ ದೌರ್ಜನ್ಯಕ್ಕೊಳಗಾದ ಸಂತ್ರಸ್ತರ ಹೋರಾಟ, ನ್ಯಾಯಾಲಯಗಳು ನೀಡಿದ ಐತಿಹಾಸಿಕ ತೀರ್ಪುಗಳನ್ನು ಹಣದ ಹಣಾಹಣಿಯಲ್ಲಿ ಧೂಳೀಪಟ ಮಾಡುವ ಜಾಹೀರಾತನ್ನು ಸಂಪಾದಕೀಯ ಮಂಡಳಿ ಕಣ್ಣುಮುಚ್ಚಿ ಒಪ್ಪಿಕೊಂಡಿದ್ದಾದರೂ ಹೇಗೆ? ಪತ್ರಿಕೆಯ ಆದಾಯಕ್ಕಾಗಿ ಸಂತ್ರಸ್ತರ ನೋವು ಮತ್ತು ಕಾನೂನಿನ ಆಶಯವನ್ನು ಬಲಿಕೊಡುವುದು ‘ಮಾಧ್ಯಮಗಳು ಪ್ರಜಾಪ್ರಭುತ್ವದ ನಾಲ್ಕನೇ ಕಂಬ’ ಎಂಬ ಪರಿಕಲ್ಪನೆಯನ್ನೇ ನಗೆಪಾಟಲಿಗೀಡು ಮಾಡಿದೆ ಎಂದು ನೆಟ್ಟಿಗರು ಮತ್ತು ಓದುಗರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
