ಗಣೇಶ ಚತುರ್ಥಿ ಹಬ್ಬದ ಹಿನ್ನೆಲೆಯಲ್ಲಿ ಗಣೇಶ ಮೂರ್ತಿಯನ್ನು ಮಂಟಪಕ್ಕೆ ತರುತ್ತಿದ್ದ ವೇಳೆ ಭಾರೀ ಮಳೆ ಹಾಗೂ ಬಿರುಗಾಳಿಗೆ ಸಿಲುಕಿ ಗಣೇಶ ಮೂರ್ತಿ ದಿಢೀರ್ ಪಲ್ಟಿಯಾದ ಘಟನೆ ಮಹಾರಾಷ್ಟ್ರದ ಪಾಲ್ಘರ್ ಜಿಲ್ಲೆಯ ನಾಲಾಸೋಪಾರದಲ್ಲಿ ನಡೆದಿದೆ. ಈ ವೇಳೆ ಮೂರ್ತಿಯ ಅಡಿಯಲ್ಲಿ ಸುಮಾರು 4 ರಿಂದ 5 ಭಕ್ತರು ಸಿಲುಕಿಕೊಂಡಿದ್ದು, ತಕ್ಷಣವೇ ಕಾರ್ಯಪ್ರವೃತ್ತರಾದ ಇತರೆ ಭಕ್ತರು ಅವರನ್ನು ರಕ್ಷಿಸಿದ್ದಾರೆ.
ನಾಲಾಸೋಪಾರ ಈಸ್ಟ್‌ನ ಮೊರೆಗಾಂವ್ ಸಾರ್ವಜನಿಕ ಗಣೇಶೋತ್ಸವ ಮಂಡಳಿಯ ಸದಸ್ಯರು ಕಾರಖಾನೆಯಿಂದ ಗಣೇಶ ವಿಗ್ರಹವನ್ನು ಟ್ರಾಲಿ ಮೇಲೆ ಇರಿಸಿಕೊಂಡು ತಮ್ಮ ಪಂಡಾಲ್‌ನತ್ತ ಮೆರವಣಿಗೆಯಲ್ಲಿ ತರುತ್ತಿದ್ದರು. ನಾಲಾಸೋಪಾರ ಪಶ್ಚಿಮದ ಫನ್ ಫಿಯೆಸ್ಟಾ ಥಿಯೇಟರ್ ಹಾಗೂ ಯಶವಂತ್ ಗೌರವ್ ಪ್ರದೇಶದ ಬಳಿ ಮೆರವಣಿಗೆ ತಲುಪಿದಾಗ ಇದ್ದಕ್ಕಿದ್ದಂತೆ ಭಾರೀ ಮಳೆ ಮತ್ತು ಬಿರುಗಾಳಿ ಆರಂಭವಾಯಿತು.
ಇದನ್ನೂ ಓದಿ: ಮಹಾರಾಷ್ಟ್ರಕ್ಕೆ ‘ಶಕ್ತಿ’ ಚಂಡಮಾರುತದ ಭೀತಿ: ಕರ್ನಾಟಕದಲ್ಲಿ ಭಾರೀ ಮಳೆ ಸೂಚನೆ
ವಿಗ್ರಹವು ಮಳೆಯಲ್ಲಿ ನೆನೆಯಬಾರದೆಂದು ಭಕ್ತರು ಅದರ ಮೇಲೆ ಪ್ಲಾಸ್ಟಿಕ್ ಶೀಟ್ (ತಾಡಪಾಲು) ಹೊದಿಸಲು ಯತ್ನಿಸಿದರು. ಈ ವೇಳೆ ಗಡಿಬಿಡಿಯಲ್ಲಿ ಹಾಗೂ ಗಾಳಿಯ ರಭಸಕ್ಕೆ ಟ್ರಾಲಿಯ ಸಮತೋಲನ ತಪ್ಪಿ ಬೃಹತ್ ಗಣೇಶ ಮೂರ್ತಿಯು ಪಕ್ಕಕ್ಕೆ ವಾಲಿ ನೆಲಕ್ಕುರುಳಿತು.
ಮೂರ್ತಿ ಕೆಳಗೆ ಬೀಳುತ್ತಿದ್ದಂತೆ ಅಲ್ಲಿ ಗೊಂದಲ ಹಾಗೂ ಆತಂಕದ ವಾತಾವರಣ ನಿರ್ಮಾಣವಾಯಿತು. ಮೂರ್ತಿಯ ತಳಭಾಗದಲ್ಲಿ ನಾಲ್ಕೈದು ಭಕ್ತರು ಸಿಲುಕಿಕೊಂಡಿದ್ದರು. ತಕ್ಷಣವೇ ಸ್ಥಳದಲ್ಲಿದ್ದ ಇತರ ಭಕ್ತರು ಹಾಗೂ ಸಾರ್ವಜನಿಕರು ಒಂದಾಗಿ ಮೂರ್ತಿಯನ್ನು ಮೇಲಕ್ಕೆತ್ತಿ ಸಿಲುಕಿದ್ದವರನ್ನು ಸುರಕ್ಷಿತವಾಗಿ ಹೊರಗೆಳೆದಿದ್ದಾರೆ.
ಅೃಷ್ಟವಶಾತ್ ಘಟನೆಯಲ್ಲಿ ಯಾರಿಗೂ ಗಂಭೀರ ಗಾಯಗಳಾಗಿಲ್ಲ. ಭಕ್ತರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಮೂರ್ತಿಗೂ ಯಾವುದೇ ಹಾನಿಯಾಗಿಲ್ಲ ಎಂದು ಪೊಲೀಸರು ಮತ್ತು ಸ್ಥಳೀಯ ಜನಪ್ರತಿನಿಧಿಗಳು ಸ್ಪಷ್ಟಪಡಿಸಿದ್ದಾರೆ. ಘಟನೆಗೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
