ಎಡ ಸರ್ಕಾರ ಕೈಗೊಂಡ ಅಭಿವೃದ್ಧಿ ಯೋಜನೆಗಳಿಂದ ಆದಿವಾಸಿ, ದಲಿತ ಮತ್ತು ಇತರ ಹಿಂದುಳಿದ ಸಮುದಾಯಗಳನ್ನು ಬದಿಗಿಡಲಾಗಿದೆ ಎಂದು 65ಕ್ಕೂ ಅಧಿಕ ದಲಿತ, ಆದಿವಾಸಿ ಗುಂಪುಗನ್ನು ಒಳಗೊಂಡ ಸಂಘಟನೆ ಆರೋಪಿಸಿವೆ. ಅಂಬೇಡ್ಕರ್‌ವಾದಿ ಪ್ರಜಾಸತ್ತಾತ್ಮಕ ರಂಗ (ಎಡಿಎಫ್) ಕಾಂಗ್ರೆಸ್ ನೇತೃತ್ವದ ಯುನೈಟೆಡ್ ಪ್ರಜಾಸತ್ತಾತ್ಮಕ ರಂಗ (ಯುಡಿಎಫ್) ಗೆ ತನ್ನ ಬೆಂಬಲವನ್ನು ಘೋಷಿಸಿದೆ.
ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ಎಡಿಎಫ್ ಕಾರ್ಯಕಾರಿ ಅಧ್ಯಕ್ಷ ಕೆ. ಅಂಬುಜಾಕ್ಷನ್, ರಾಜ್ಯದ ಒಟ್ಟು ಬಜೆಟ್‌ನ ಏಳನೇ ಒಂದು ಭಾಗ ಮಾತ್ರ ಇರುವ ಯೋಜನಾ ನಿಧಿಯ ಕೇವಲ 10% ಮಾತ್ರ ಎಸ್‌ಸಿ/ಎಸ್‌ಟಿ ಅಭಿವೃದ್ಧಿಗೆ ಮೀಸಲಿಡಲಾಗಿದೆ. ಇದರಲ್ಲಿ ಗಣನೀಯ ಭಾಗವು ಬಳಕೆಯಾಗದೆ ಉಳಿದಿದೆ ಎಂದು ದೂರಿದ್ದಾರೆ.
ಇದನ್ನು ಓದಿದ್ದೀರಾ? ಕೇರಳ | ಹೈಕೋರ್ಟ್ ಮಧ್ಯಪ್ರವೇಶದ ಬಳಿಕವೂ ಕೋಮುದ್ವೇಷದ ಹೇಳಿಕೆ ಪುನರುಚ್ಚರಿಸಿದ ಬಿಜೆಪಿ ಅಭ್ಯರ್ಥಿ
ಹಾಗೆಯೇ ವಿಝಿಂಜಮ್ ಬಂದರು, ರಾಷ್ಟ್ರೀಯ ಹೆದ್ದಾರಿಗಳು ಮತ್ತು ಸುರಂಗ ರಸ್ತೆಗಳಂತಹ ದೊಡ್ಡ ಮೂಲಸೌಕರ್ಯ ಯೋಜನೆಗಳು ದಲಿತರು, ಆದಿವಾಸಿಗಳು, ಮೀನುಗಾರರು ಮತ್ತು ಕಡಿಮೆ ಆದಾಯದ ಗುಂಪುಗಳು ಸೇರಿದಂತೆ ಸಾಮಾನ್ಯ ತೆರಿಗೆದಾರರಿಗೆ ಪ್ರಯೋಜನವಾಗದ ಅಭಿವೃದ್ಧಿಯಾಗಿದೆ ಎಂದು ಎಡಿಎಫ್ ಹೇಳಿಕೆಯಲ್ಲಿ ತಿಳಿಸಿದೆ.
ಕಳೆದ ಒಂಬತ್ತು ವರ್ಷಗಳಲ್ಲಿ ಎಸ್‌ಸಿ/ಎಸ್‌ಟಿ ಕಲ್ಯಾಣಕ್ಕಾಗಿ ಮೀಸಲಿಟ್ಟ ₹7,411 ಕೋಟಿ ವ್ಯರ್ಥವಾಗಿದ್ದು, ಶಿಕ್ಷಣದಂತಹ ಕ್ಷೇತ್ರಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತಿದೆ. ಇ-ಅನುದಾನಗಳ ವಿತರಣೆಯಲ್ಲಿನ ವಿಳಂಬದಿಂದಾಗಿ ಸುಮಾರು 150 ಎಸ್‌ಸಿ/ಎಸ್‌ಟಿ ವಿದ್ಯಾರ್ಥಿಗಳು ತಮ್ಮ ಅಧ್ಯಯನವನ್ನು ತ್ಯಜಿಸಬೇಕಾದ ಸ್ಥಿತಿ ಬಂದಿದೆ ಎಂದು ಅಂಬುಜಾಕ್ಷನ್ ದೂರಿದ್ದಾರೆ. ಹಾಗೆಯೇ ಇ-ಅನುದಾನಗಳನ್ನು ಬಾಕಿ ಇಟ್ಟಿಲ್ಲ, ವಿತರಿಸಲಾಗಿದೆ ಎಂಬ ಸಚಿವ ಓ ಆರ್ ಕೇಲು ಹೇಳಿಕೆಯನ್ನು ಸಂಘಟನೆಗಳು ವಿರೋಧಿಸಿದೆ.
ಭೂರಹಿತರಿಗಾಗಿ ಕೇಂದ್ರ ಸರ್ಕಾರವು ಮಂಜೂರು ಮಾಡಿದ 19,000 ಎಕರೆ ಭೂಮಿಯನ್ನು ವಿತರಿಸಿಲ್ಲ. ಹೆಚ್ಚುವರಿಯಾಗಿ, ವಸತಿ ಯೋಜನೆಯಡಿಯಲ್ಲಿ ನಿಧಿಯ ಗಮನಾರ್ಹ ಪಾಲು ಎಸ್‌ಸಿ/ಎಸ್‌ಟಿ ಹಂಚಿಕೆಗಳಿಂದ ಬಂದಿದ್ದರೂ, ಈ ಸಮುದಾಯಗಳ ಫಲಾನುಭವಿಗಳನ್ನು ಕಡೆಗಣಿಸಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ.
ಏಪ್ರಿಲ್ 9ರಂದು ಕೇರಳ ವಿಧಾನಸಭೆ ಚುನಾವಣೆ ನಡೆಯಲಿದೆ. ಮೇ 4ರಂದು ಮತ ಎಣಿಕೆ ನಡೆಯಲಿದೆ.
