ಪ್ರಧಾನಿ ನರೇಂದ್ರ ಮೋದಿ ಮತ್ತು ಭಾರತೀಯ ರಾಜತಾಂತ್ರಿಕರು ಅಮೆರಿಕದ ಮಾಜಿ ಅಧ್ಯಕ್ಷ ಜೋ ಬಿಡೆನ್ ಸೇರಿದಂತೆ ತಮ್ಮ ನಾಯಕರಿಗೆ ನೀಡಿದ ಉಡುಗೊರೆಗಳ ಪಟ್ಟಿಯನ್ನು ಅಮೆರಿಕ ವಿದೇಶಾಂಗ ಇಲಾಖೆ ಬಿಡುಗಡೆ ಮಾಡಿದೆ.
ಅಮೆರಿಕದ ವಿದೇಶಾಂಗ ಇಲಾಖೆಯ ಶಿಷ್ಟಾಚಾರದ ಮುಖ್ಯಸ್ಥರ ಕಚೇರಿಯು, 2024ರ ಕ್ಯಾಲೆಂಡರ್ ವರ್ಷದಲ್ಲಿ (2024ರ ಜನವರಿ 1ರಿಂದ 2024ರ ಡಿಸೆಂಬರ್ 31ರವರೆಗೆ) ವಿದೇಶಿ ಸರ್ಕಾರಿ ಮೂಲಗಳಿಂದ ಪಡೆದ ಉಡುಗೊರೆಗಳಿಗೆ ಸಂಬಂಧಿಸಿದಂತೆ ಪಟ್ಟಿಯನ್ನು ಕಾನೂನಿನ ಅಡಿಯಲ್ಲಿ ಪ್ರಕಟಿಸಿದೆ.
ಈ ಪಟ್ಟಿಯಲ್ಲಿ ಭಾರತದ ಪ್ರಧಾನಿ ಮೋದಿ ಅವರು ಮಾಜಿ ಅಧ್ಯಕ್ಷ ಬೈಡನ್ ಅವರಿಗೆ 2023ರ ಸೆಪ್ಟೆಂಬರ್ 10ರಂದು ಉಡುಗೊರೆಯಾಗಿ ನೀಡಿದ್ದ ‘ಮರದ ಎದೆ, ಸ್ಕಾರ್ಫ್, ಕೇಸರಿ ಜಾಡಿ, ಚಹಾಗೆ ಸಂಬಂಧಿಸಿದ ಮರದ ಪೆಟ್ಟಿಗೆಯನ್ನೂ ಸೇರಿಸಲಾಗಿದೆ. ಇದರ ಮೌಲ್ಯ 562 ಅಮೆರಿಕನ್ ಡಾಲರ್ ಎಂದು ವರದಿ ಮಾಡಿದೆ. ಈ ಉಡುಗೊರೆಗಳನ್ನು ಈಗ ಅಮೆರಿಕ ರಾಷ್ಟ್ರೀಯ ದಾಖಲೆಗಳಿಗೆ (NARA) ವರ್ಗಾಯಿಸಲಾಗಿದೆ. ಆದರೆ, ಹಾಳಾಗುವ ವಸ್ತುಗಳಾದ ಕೇಸರಿ ಮತ್ತು ಚಹಾ ಪುಡಿಯನ್ನು ಅಮೆರಿಕ ರಹಸ್ಯ ಸೇವಾ ನೀತಿಗಳಿಗೆ ಅನುಗುಣವಾಗಿ ‘ವಿಲೇವಾರಿ’ ಮಾಡಲಾಗಿದೆ ಎಂದು ತಿಳಿಸಿದೆ.
2024ರ ಜುಲೈ 16ರಂದು ಮೋದಿ ಅವರು ಬೈಡನ್‌ಗೆ ಮತ್ತೊಂದು ಉಡುಗೊರೆ ನೀಡಿದ್ದರು. ಅದರಲ್ಲಿ, ‘ಸ್ಟರ್ಲಿಂಗ್ ಸಿಲ್ವರ್ ಮೆಟಲ್ ಟ್ರೈನ್ ಸೆಟ್’ ಇತ್ತು. ಇದರ ಅಂದಾಜು ಮೌಲ್ಯ 7,750 ಡಾಲರ್‌ಗಳು. ಇದನ್ನು ರಾಷ್ಟ್ರೀಯ ಆರ್ಕೈವ್ಸ್‌ಗೆ ವರ್ಗಾಯಿಸಲಾಗಿದೆ.
ಜಿಲ್ ಬೈಡೆನ್ ಅವರಿಗೆ 2024 ಅಕ್ಟೋಬರ್ 21ರಂದು ಮೋದಿ ಅವರು ‘ಪಾಶ್ಮಿನಾ ಶಾಲ್’ಅನ್ನು ನೀಡಿದ್ದರು. ಇದರ ಮೌಲ್ಯವು 2,969 ಡಾಲರ್ ಆಗಿದ್ದು, ಇದನ್ನೂ ರಾಷ್ಟ್ರೀಯ ಆರ್ಕೈವ್ಸ್‌ಗೆ ವರ್ಗಾಯಿಸಲಾಗಿದೆ.
ಈ ಲೇಖನ ಓದಿದ್ದೀರಾ?: ಇರಾನ್‌ ಮೇಲೆ ಮರುದಾಳಿಗೆ ಸಜ್ಜಾಗಿದೆ ಅಮೆರಿಕ- ಇಸ್ರೇಲ್ ಯುದ್ಧಕೋರ ಜೋಡಿ
ಮಾಜಿ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್ ಅವರಿಗೆ ಮೋದಿ ಅವರು 2024ರ ಅಕ್ಟೋಬರ್ 18ರಂದು ‘ಶ್ರೀ ಕೃಷ್ಣ ರಾಸ ಲೀಲಾ ಬೆಳ್ಳಿ ಪೆಟ್ಟಿಗೆ’ಯನ್ನು ನೀಡಿದ್ದರು. ಅದರ ಮೌಲ್ಯವು ಅಂದಾಜು ಮೌಲ್ಯ 1,330 ಡಾಲರ್ ಆಗಿದೆ. ಅದನ್ನು NARAಗೆ ವರ್ಗಾಯಿಸಲಾಗಿದೆ. ಅದೇ ದಿನ, ಹ್ಯಾರಿಸ್ ಅವರ ಪತಿ ಡೌಗ್ಲಾಸ್ ಎಮ್‌ಹಾಫ್ ಅವರಿಗೆ ಮೋದಿಯವರು 585.65 ಡಾಲರ್ ಮೌಲ್ಯದ ಕಫ್‌ಲಿಂಕ್‌ಗಳನ್ನು ನೀಡಿದ್ದರು. ಅವುಗಳನ್ನು ರಾಷ್ಟ್ರೀಯ ಆರ್ಕೈವ್ಸ್‌ಗೆ ವರ್ಗಾಯಿಸಲಾಗಿದೆ.
ಇನ್ನು, ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಅವರು 2024ರ ಆಗಸ್ಟ್‌ 23ರಂದು ಅಂದಿನ ರಾಷ್ಟ್ರೀಯ ಭದ್ರತಾ ವ್ಯವಹಾರಗಳ ಅಧ್ಯಕ್ಷರ ಸಹಾಯಕ ಜಾಕೋಬ್ ಸುಲ್ಲಿವನ್ ಅವರಿಗೆ ನೀಡಿದ ಉಡುಗೊರೆಯನ್ನು ಪಟ್ಟಿಯನ್ನು ಉಲ್ಲೇಖಿಸಲಾಗಿದೆ. ಅದರಲ್ಲಿ, ಕಾಶ್ಮೀರ ಪಶ್ಮಿನಾ ಸ್ಕಾರ್ಫ್ ಇದ್ದು, ಅದರಅಂದಾಜು ಮೌಲ್ಯ 599.00 ಡಾಲರ್ ಆಗಿದೆ.
ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು 2022ರ ನವೆಂಬರ್ 24ರಂದು ಆಗಿನ ರಕ್ಷಣಾ ಕಾರ್ಯದರ್ಶಿ ಲಾಯ್ಡ್ ಆಸ್ಟಿನ್ ಅವರಿಗೆ ‘ಶಿವ ನಟರಾಜ ಕಂಚಿನ ಪ್ರತಿಮೆ’ಯನ್ನು ಉಡುಗೊರೆಯಾಗಿ ನೀಡಿದ್ದರು.ಅದರ ಮೌಲ್ಯವು 3,700.00 ಡಾಲರ್‌ಗಳಾಗಿವೆ. ಅದನ್ನು GSAಗೆ ವರ್ಗಾಯಿಸುವುದು ಬಾಕಿ ಇದೆ ಎಂದು ಪಟ್ಟಿಯಲ್ಲಿ ವಿವರಿಸಲಾಗಿದೆ.
