ಸಂಸತ್ತಿನ ಮುಂಗಾರು ಅಧಿವೇಶನ ಆರಂಭವಾಗಿ ಹಲವು ದಿನ ಕಳೆದರೂ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಸದನಕ್ಕೆ ಬಂದು ಪ್ರತಿಪಕ್ಷಗಳ ಪ್ರಶ್ನೆಗಳಿಗೆ ಉತ್ತರಿಸಿಲ್ಲ. ಜುಲೈ 20ರಂದು ದೆಹಲಿಯ ಜಂತರ್ ಮಂತರ್ನಲ್ಲಿ ನಡೆದ ಪ್ರತಿಭಟನೆಯಲ್ಲಿ ಪೊಲೀಸರ ಕ್ರೌರ್ಯದ ಕುರಿತು ಗೃಹ ಸಚಿವರು ವಿವರಣೆ ನೀಡಬೇಕು ಎಂಬುದು ಪ್ರತಿಪಕ್ಷಗಳ ಆಗ್ರಹ. ಆದರೆ, ಈ ವಿಚಾರದಲ್ಲಿ ಸರ್ಕಾರವೂ ಯಾವುದೇ ಕ್ರಮ ಕೈಗೊಂಡಿಲ್ಲ. ಪ್ರತಿಪಕ್ಷಗಳ ಪ್ರತಿಭಟನೆಯ ನಡುವೆಯೇ ಸಂಸತ್ತಿನ ಉಭಯ ಸದನಗಳು ನಿನ್ನೆ (ಆ.10) ಕೂಡ ಕೆಲವೇ ನಿಮಿಷಗಳಲ್ಲಿ ಮುಂದೂಡಲ್ಪಟ್ಟಿದೆ. ಈ ಬೆಳವಣಿಗೆ ಭಾರತದ ರಾಜಕೀಯದಲ್ಲಿ ಉಕ್ಕಿನ ಮನುಷ್ಯ ಎಂದೇ ಗುರುತಿಸಿಕೊಂಡಿರುವ ಅಮಿತ್ ಶಾ ಅವರ ವರ್ಚಸ್ಸು ದಿನೇ ದಿನೇ ಕುಸಿಯುತ್ತಿರುವ ಸೂಚನೆ ಎಂದು ವಿಶ್ಲೇಷಕರು ಅಭಿಪ್ರಾಯಪಡುತ್ತಿದ್ದಾರೆ.
ಹಿರಿಯ ಪತ್ರಕರ್ತ ಹಾಗೂ ರಾಜಕೀಯ ವಿಶ್ಲೇಷಕ ಹರೀಶ್ ಖರೆ, ದಿ ವೈರ್ (The wire) ನಲ್ಲಿ ಪ್ರಕಟಿಸಿರುವ ತಮ್ಮ ವಿಶ್ಲೇಷಣೆಯಲ್ಲಿ ಇದೇ ಪ್ರಶ್ನೆಯನ್ನು ಮುಂದಿಟ್ಟಿದ್ದಾರೆ. ಶಾ ಅವರ ಇದುವರೆಗಿನ ರಾಜಕೀಯ ವ್ಯಕ್ತಿತ್ವ, ಜಂತರ್ ಮಂತರ್ ಘಟನೆ, ಆರ್ಎಸ್ಎಸ್ನ ನಿಲುವು ಮತ್ತು ಬಿಜೆಪಿ ಒಳಗಿನ ರಾಜಕೀಯ ಲೆಕ್ಕಾಚಾರಗಳನ್ನು ಮುಂದಿಟ್ಟುಕೊಂಡು, ‘ಚಾಣಕ್ಯ’ ಎಂದೇ ಬಿಂಬಿಸಲ್ಪಟ್ಟಿರುವ ಗೃಹ ಸಚಿವರ ರಾಜಕೀಯ ವರ್ಚಸ್ಸಿಗೆ ಬಿರುಕು ಬಿದ್ದಿದೆಯೇ ಎಂಬ ಪ್ರಶ್ನೆಯನ್ನು ಅವರು ಎತ್ತಿದ್ದಾರೆ.
ನರೇಂದ್ರ ಮೋದಿಗಿಂತ ಭಿನ್ನವಾಗಿ ಅಮಿತ್ ಶಾ ಅವರು ರಾಜಕೀಯ ಹೋರಾಟದಿಂದ ಹಿಂದೆ ಸರಿಯುವ ನಾಯಕ ಎಂಬ ಚಿತ್ರಣ ಹೊಂದಿಲ್ಲ. ಬದಲಾಗಿ, ಪ್ರತಿಪಕ್ಷಗಳ ಟೀಕೆಗಳಿಗೆ ತಕ್ಷಣ ತಿರುಗೇಟು ನೀಡುವುದು, ಕಠಿಣ ನಿರ್ಧಾರಗಳನ್ನು ಕೈಗೊಳ್ಳುವುದು ಮತ್ತು ಅಧಿಕಾರದ ವಿಚಾರದಲ್ಲಿ ಯಾವುದೇ ಹಿಂಜರಿಕೆ ತೋರಿಸದಿರುವುದು ಅವರ ರಾಜಕೀಯ ಶೈಲಿಯ ಭಾಗ.
‘ಚಾಣಕ್ಯ’ ಎಂಬ ಬಿರುದು ಕೂಡ ಅವರ ಈ ರಾಜಕೀಯ ತಂತ್ರಗಾರಿಕೆಯಿಂದಾಗಿಯೇ ಬಳಕೆಯಲ್ಲಿದೆ. ಹೀಗಿರುವಾಗ, ‘ಪ್ರತಿಪಕ್ಷವನ್ನು ಎದುರಿಸಲು ಶಾ ಹೆದರುತ್ತಿದ್ದಾರೆ’ ಎನ್ನುವ ಆರೋಪ ಕೇಳಿಬರುತ್ತಿದ್ದರೂ ಅವರು ಸಂಸತ್ತಿಗೆ ಬಂದು ಉತ್ತರಿಸದಿರುವುದು ಖರೆ ಅವರು ಗಮನಿಸಿರುವ ಪ್ರಮುಖ ಅಂಶ.
ಇದು ಪ್ರತಿಪಕ್ಷಕ್ಕೆ ಯಾವುದೇ ರಾಜಕೀಯ ಅವಕಾಶ ನೀಡಬಾರದು ಎಂಬ ಸರ್ಕಾರದ ತಂತ್ರವೇ? ಅಥವಾ ಜಂತರ್ ಮಂತರ್ ಘಟನೆ ಬಳಿಕ ದೇಶದ ರಾಜಕೀಯ ವಾತಾವರಣ ಬದಲಾಗುತ್ತಿರುವುದನ್ನು ಶಾ ಅರಿತುಕೊಂಡಿದ್ದಾರೆಯೇ? ಇಲ್ಲವೇ ಅವರ ಇದುವರೆಗಿನ ಆಕ್ರಮಣಕಾರಿ ರಾಜಕೀಯ ವ್ಯಕ್ತಿತ್ವದಲ್ಲೇ ಬದಲಾವಣೆಯೊಂದು ಆರಂಭವಾಗಿದೆಯೇ? ಎಂಬ ಪ್ರಶ್ನೆಗಳನ್ನೂ ಖರೆ ಮುಂದಿಟ್ಟಿದ್ದಾರೆ.
2019ರಲ್ಲಿ ಕೇಂದ್ರ ಗೃಹ ಸಚಿವರಾದ ಬಳಿಕ ಅಮಿತ್ ಶಾ ಅವರು ಕಾನೂನು ಸುವ್ಯವಸ್ಥೆ ಮತ್ತು ರಾಷ್ಟ್ರೀಯ ಭದ್ರತೆಯ ವಿಚಾರದಲ್ಲಿ ಅತ್ಯಂತ ಕಠಿಣ ನಿಲುವಿಗೆ ಹೆಸರಾದರು. ಪೊಲೀಸ್ ಅಧಿಕಾರಿಗಳು, ಗುಪ್ತಚರ ಸಂಸ್ಥೆಗಳ ಸಿಬ್ಬಂದಿ, ಡಿಜಿಪಿಗಳು, ಪೊಲೀಸ್ ಆಯುಕ್ತರು ಸೇರಿದಂತೆ ಆಡಳಿತ ವ್ಯವಸ್ಥೆಯ ಪ್ರಮುಖರು ಶಾ ಅವರ ನೇರ ಹಾಗೂ ಆಕ್ರಮಣಕಾರಿ ಕಾರ್ಯಶೈಲಿಯಿಂದ ಪ್ರಭಾವಿತರಾಗಿದ್ದರು. ಕಾನೂನು ಸುವ್ಯವಸ್ಥೆ ವಿಚಾರದಲ್ಲಿ ‘ಮೊದಲು ಕಠಿಣ ಕ್ರಮ’ ಎಂಬ ಧೋರಣೆಗೆ ಅವರು ಒತ್ತು ನೀಡಿದರು. ಇದರಿಂದ ದೇಶದಾದ್ಯಂತ ಪೊಲೀಸ್ ವ್ಯವಸ್ಥೆಯಲ್ಲೂ ಒಂದು ರೀತಿಯ ಆತ್ಮವಿಶ್ವಾಸ ಮೂಡಿತು ಎಂಬುದು ಖರೆ ಅವರ ಅಭಿಪ್ರಾಯ.
ಈ ಪ್ರಕ್ರಿಯೆಯಲ್ಲೇ ಅಮಿತ್ ಶಾ ಅವರು ಬಿಜೆಪಿ ಸರ್ಕಾರದ ‘ನಂಬರ್ 2’ ಸ್ಥಾನವನ್ನು ಮತ್ತಷ್ಟು ಗಟ್ಟಿಗೊಳಿಸಿಕೊಂಡರು. ರಾಜನಾಥ್ ಸಿಂಗ್, ನಿತಿನ್ ಗಡ್ಕರಿ ಅವರಂತಹ ಹಿರಿಯ ನಾಯಕರು ಪಕ್ಷದಲ್ಲಿದ್ದರೂ, ಶಾ ಅವರ ರಾಜಕೀಯ ಪ್ರಭಾವ ಪ್ರತ್ಯೇಕವಾಗಿ ಎದ್ದು ಕಾಣತೊಡಗಿತು.
ಜುಲೈ 20ರಂದು ಜಂತರ್ ಮಂತರ್ನಲ್ಲಿ ನಡೆದ ಪ್ರತಿಭಟನೆಯ ಸಂದರ್ಭದಲ್ಲಿ ದೆಹಲಿ ಪೊಲೀಸರು ಹಾಗೂ ರ್ಯಾಪಿಡ್ ಆಕ್ಷನ್ ಫೋರ್ಸ್ (RAF) ನಡೆಸಿದ ಕ್ರಮ ಇದೀಗ ಅಮಿತ್ ಶಾ ಅವರ ರಾಜಕೀಯ ಹೊಣೆಗಾರಿಕೆಯ ಪ್ರಶ್ನೆಯನ್ನ ಮುನ್ನೆಲೆಗೆ ತಂದಿದೆ. ಪ್ರತಿಭಟನಾಕಾರರನ್ನು ನಿಯಂತ್ರಿಸಲು ಸಾಮಾನ್ಯವಾಗಿ ಅನುಸರಿಸುವ ಗುಂಪು ನಿಯಂತ್ರಣ ಕ್ರಮಗಳನ್ನು ಬದಿಗೊತ್ತಿ ಪೊಲೀಸರು ಅತಿಯಾದ ಬಲಪ್ರಯೋಗ ಮಾಡಿದ್ದಾರೆ. ಪೊಲೀಸ್ ವ್ಯವಸ್ಥೆಗೆ ರಾಜಕೀಯ ನಾಯಕತ್ವದಿಂದ ದೊರೆತಿರುವ ಬೆಂಬಲವೇ ಇಂತಹ ಕಠಿಣ ಕ್ರಮಕ್ಕೆ ಕಾರಣವಾಗಿರಬಹುದು ಎಂಬುದು ಖರೆ ಅವರ ವಿಶ್ಲೇಷಣೆ.
ಅವರ ಪ್ರಕಾರ, ದೆಹಲಿ ಪೊಲೀಸರ ಕ್ರಮದ ಅಂತಿಮ ಹೊಣೆಗಾರಿಕೆ ಗೃಹ ಸಚಿವಾಲಯದ ಮೇಲೆಯೇ ಬೀಳುತ್ತದೆ. ಹೀಗಾಗಿ ಜಂತರ್ ಮಂತರ್ ಘಟನೆಯ ಕುರಿತು ಅಮಿತ್ ಶಾ ಸಂಸತ್ತಿಗೆ ಬಂದು ಉತ್ತರಿಸಬೇಕೆಂಬ ಪ್ರತಿಪಕ್ಷಗಳ ಬೇಡಿಕೆಗೆ ರಾಜಕೀಯ ತೂಕವಿದೆ. ಆದರೆ ಇಲ್ಲಿ ಮತ್ತೊಂದು ಕುತೂಹಲಕಾರಿ ಅಂಶವಿದೆ. ಜಂತರ್ ಮಂತರ್ನಲ್ಲಿ ನಡೆದ ಪೊಲೀಸ್ ಕ್ರಮಕ್ಕೆ ಗೃಹ ಸಚಿವಾಲಯದ ಅಧೀನದ ವ್ಯವಸ್ಥೆಯೇ ಕಾರಣವಾಗಿದ್ದರೂ, ಸಾರ್ವಜನಿಕ ಆಕ್ರೋಶದ ಬಹುಪಾಲು ಪ್ರಧಾನಿ ನರೇಂದ್ರ ಮೋದಿ ವಿರುದ್ಧವೇ ವ್ಯಕ್ತವಾಗುತ್ತಿದೆ ಎಂದು ಖರೆ ಹೇಳಿದ್ದಾರೆ. ಅಂದರೆ, ಶಾ ಅವರ ಅಧೀನದಲ್ಲಿ ನಡೆದ ಕ್ರಮದ ರಾಜಕೀಯ ಹೊಣೆಗಾರಿಕೆಯ ಹೊರೆ ಮೋದಿ ಅವರ ಮೇಲೆ ಬೀಳುತ್ತಿದೆ. ಹೊಸ ತಲೆಮಾರಿನ ಭಾರತೀಯರೊಂದಿಗೆ ಹೇಗೆ ಮಾತನಾಡಬೇಕು, ಅವರ ಅಸಮಾಧಾನವನ್ನು ಹೇಗೆ ಅರ್ಥಮಾಡಿಕೊಳ್ಳಬೇಕು ಎಂಬುದನ್ನು ಪ್ರಧಾನಿ ಮೋದಿ ಹೊಸದಾಗಿ ಕಲಿಯಬೇಕಾದ ಪರಿಸ್ಥಿತಿ ಎದುರಾಗಿದೆ ಎಂಬ ವಿಶ್ಲೇಷಣೆಯನ್ನೂ ಖರೆ ಮಾಡಿದ್ದಾರೆ.
ಅಮಿತ್ ಶಾ ಅವರಿಗೆ ಮತ್ತೊಂದು ಸವಾಲು ಪ್ರತಿಪಕ್ಷದಿಂದ ಮಾತ್ರವಲ್ಲ, ಅವರದೇ ವೈಚಾರಿಕ ವಲಯದಿಂದ ಎದುರಾಗುತ್ತಿದೆ. ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ಜಂತರ್ ಮಂತರ್ನಲ್ಲಿ Gen-Z ಪ್ರತಿಭಟನಾಕಾರರನ್ನು ಪೊಲೀಸರು ನಿರ್ವಹಿಸಿದ ರೀತಿ ಮತ್ತು ಬಳಸಿದ ಕಠಿಣ ಧೋರಣೆಯಿಂದ ಅಂತರ ಕಾಯ್ದುಕೊಂಡಿದ್ದಾರೆ. ಇದು ಸಾಮಾನ್ಯ ಎಚ್ಚರಿಕೆಯೇ ಅಥವಾ ಬಿಜೆಪಿ ಸರ್ಕಾರದ ಕಾರ್ಯವೈಖರಿ ಬಗ್ಗೆ ಸಂಘದೊಳಗೆ ಅಸಮಾಧಾನ ಹೆಚ್ಚುತ್ತಿರುವ ಸೂಚನೆಯೇ ಎಂಬ ಪ್ರಶ್ನೆಗಳೂ ಸದ್ಯ ಎದುರಾಗಿವೆ.
ಜಂತರ್ ಮಂತರ್ನಲ್ಲಿ ಪ್ರತಿಭಟನೆ ನಡೆಸಿದವರಲ್ಲಿ ಬಹುತೇಕರು ಹಿಂದೂಗಳೇ ಆಗಿದ್ದರು. ಹೀಗಾಗಿ ಸರ್ಕಾರದ ವಿರುದ್ಧ ಧ್ವನಿ ಎತ್ತಿದವರನ್ನು ಕೇವಲ ರಾಜಕೀಯ ವಿರೋಧಿಗಳೆಂದು ನೋಡುವುದು ಆರ್ಎಸ್ಎಸ್ಗೂ ಸುಲಭವಲ್ಲ. ಜತೆಗೆ ಇಲ್ಲೊಂದು ರಾಜಕೀಯ ವ್ಯಂಗ್ಯವೂ ಇದೆ. ಅಮಿತ್ ಶಾ ಅವರನ್ನು ನಿರಂತರವಾಗಿ ಟೀಕಿಸುತ್ತಿರುವ ಪ್ರತಿಪಕ್ಷ ನಾಯಕ ರಾಹುಲ್ ಗಾಂಧಿ ಒಂದು ಕಡೆ ಇದ್ದರೆ, ಬಿಜೆಪಿ ಮತ್ತು ಆರ್ಎಸ್ಎಸ್ ನಡುವಿನ ಪ್ರಮುಖ ನಾಯಕ ಮೋಹನ್ ಭಾಗವತ್ ಮತ್ತೊಂದು ಕಡೆ ಇದ್ದಾರೆ. ಆದರೆ, ಜಂತರ್ ಮಂತರ್ ಪ್ರತಿಭಟನೆಯನ್ನು ಪೊಲೀಸರು ನಿರ್ವಹಿಸಿದ ರೀತಿಯ ವಿಚಾರದಲ್ಲಿ ಇಬ್ಬರ ನಿಲುವುಗಳು ಒಂದೇ ರೀತಿಯಾಗಿ ಕಾಣಿಸುತ್ತಿವೆ. ಇದು ಅಮಿತ್ ಶಾ ಅವರಿಗೆ ರಾಜಕೀಯವಾಗಿ ಅಸಹಜ ಪರಿಸ್ಥಿತಿ ಸೃಷ್ಟಿಸಿದೆ. ಒಂದೆಡೆ ಪ್ರತಿಪಕ್ಷ, ಮತ್ತೊಂದೆಡೆ ಆರ್ಎಸ್ಎಸ್ನಿಂದ ಬರುತ್ತಿರುವ ಸಂದೇಶ.. ಇವೆರಡನ್ನೂ ಎದುರಿಸಬೇಕಾದ ಪರಿಸ್ಥಿತಿ ಗೃಹ ಸಚಿವರಿಗೆ ಎದುರಾಗಿದೆ.
ಅಮಿತ್ ಶಾ ಅವರನ್ನು ಕೆಲವರು ‘ಸರ್ದಾರ್ ಪಟೇಲ್ ನಂತರದ ಅತ್ಯಂತ ಪ್ರಬಲ ಗೃಹ ಸಚಿವ’ ಎಂಬ ರೀತಿಯಲ್ಲಿ ಬಿಂಬಿಸಿದ್ದಾರೆ. ಆದರೆ ಸಂಸತ್ತಿನಲ್ಲಿ ಪ್ರತಿಪಕ್ಷವನ್ನು ಎದುರಿಸದೇ ಒಂದು ವಾರ ಕಳೆದಿರುವುದು ಅವರ ಈ ರಾಜಕೀಯ ಚಿತ್ರಣಕ್ಕೆ ಹೊಡೆತ ನೀಡಿದೆ ಎಂಬುದು ಹಲವರ ಅಭಿಪ್ರಾಯ. ಯಾವುದೇ ಸವಾಲನ್ನು ನೇರವಾಗಿ ಎದುರಿಸುವ ನಾಯಕ ಎಂಬ ಇಮೇಜ್ ಹೊಂದಿದ್ದ ಶಾ, ಈಗ ಪ್ರತಿಪಕ್ಷಗಳ ಪ್ರಶ್ನೆಗಳಿಂದ ದೂರ ಉಳಿದಿರುವುದು ಅವರ ರಾಜಕೀಯ ವರ್ಚಸ್ಸಿನ ಮೇಲೆಯೇ ಪರಿಣಾಮ ಬೀರಬಹುದು. ವರ್ಷಗಳಿಂದ ಎಚ್ಚರಿಕೆಯಿಂದ ಕಟ್ಟಿಕೊಂಡಿದ್ದ ಅತಿಯಾದ ಆತ್ಮವಿಶ್ವಾಸ, ರಾಜಕೀಯ ಚಾಣಾಕ್ಷತೆ ಮತ್ತು ಕಠಿಣ ನಾಯಕತ್ವದ ಚಿತ್ರಣ ಕರಗಲು ಆರಂಭವಾಗಿದೆಯೇ? ಎಂಬ ಪ್ರಶ್ನೆಯನ್ನು ಖರೆ ಮುಂದಿಟ್ಟಿದ್ದಾರೆ.
ಇದನ್ನೂ ಓದಿ: NEET ವಿವಾದದ ನಡುವೆಯೇ ಉನ್ನತ ಶಿಕ್ಷಣ ಇಲಾಖೆಗೆ ಹೊಸ ಕಾರ್ಯದರ್ಶಿ; ದೀಪ್ತಿ ಗೌರ್ ಮುಖರ್ಜಿ ನೇಮಕ
ಕೆಲವೇ ವಾರಗಳ ಹಿಂದೆ ಬಿಜೆಪಿ ರಾಜಕೀಯ ವಲಯದಲ್ಲಿ ಅಮಿತ್ ಶಾ ಅವರನ್ನು ಉಪಪ್ರಧಾನಿಯಾಗಿ ನೇಮಿಸುವ ಸಾಧ್ಯತೆ ಕುರಿತು ಚರ್ಚೆಗಳು ನಡೆದಿದ್ದವು. ಪ್ರಧಾನಿ ಮೋದಿ ಅವರ ನಂತರದ ಅತ್ಯಂತ ಪ್ರಭಾವಿ ನಾಯಕ ಎಂಬ ಕಾರಣಕ್ಕೆ ಈ ಚರ್ಚೆಗೆ ಬಲವೂ ಇತ್ತು. ಆದರೆ ಜಂತರ್ ಮಂತರ್ ಘಟನೆ ಮತ್ತು ಅದರ ನಂತರದ ರಾಜಕೀಯ ಬೆಳವಣಿಗೆಗಳು ಆ ಲೆಕ್ಕಾಚಾರವನ್ನು ಬದಲಿಸಿರಬಹುದು. ಪ್ರಧಾನಿ ಮೋದಿಗೆ ಅಮಿತ್ ಶಾ ಅವರ ಅನಿವಾರ್ಯತೆ ಹಿಂದೆ ಇದ್ದಷ್ಟು ಗಟ್ಟಿಯಾಗಿಲ್ಲ ಎಂಬ ಭಾವನೆ ಕೂಡ ಮೂಡುತ್ತಿದೆ ಎಂದು ಖರೆ ಹೇಳಿದ್ದಾರೆ. ಅಂದರೆ, ಕೆಲವೇ ವಾರಗಳ ಹಿಂದೆ ‘ಉಪಪ್ರಧಾನಿ’ ಹುದ್ದೆಯತ್ತ ಸಾಗುತ್ತಿದ್ದಾರೆ ಎನ್ನಲಾಗುತ್ತಿದ್ದ ಅಮಿತ್ ಶಾ, ಈಗ ತಮ್ಮದೇ ರಾಜಕೀಯ ಸ್ಥಾನವನ್ನು ಉಳಿಸಿಕೊಳ್ಳಬೇಕಾದ ಪರಿಸ್ಥಿತಿಗೆ ಬಂದಿದ್ದಾರೆ.
ಅಮಿತ್ ಶಾ ಅವರ ರಾಜಕೀಯ ಪಯಣ ಮುಗಿದಿದೆ ಎಂಬ ತೀರ್ಮಾನಕ್ಕೆ ಬರುವುದಲ್ಲ. ಆದರೆ ವರ್ಷಗಳಿಂದ ನಿರ್ಮಾಣವಾಗಿದ್ದ ಅವರ ಅಜೇಯ ನಾಯಕನ ಇಮೇಜ್ಗೆ ಮೊದಲ ಬಾರಿಗೆ ಗಂಭೀರ ಸವಾಲು ಎದುರಾಗಿದೆ ಎಂಬ ಸೂಚನೆಯಂತೂ ಸ್ಪಷ್ಟವಾಗಿದೆ. ಜಂತರ್ ಮಂತರ್ ಘಟನೆ, ಪ್ರತಿಪಕ್ಷಗಳ ಒತ್ತಡ, ಸಂಸತ್ತಿನಲ್ಲಿ ಗೈರುಹಾಜರಿ, ಸಾರ್ವಜನಿಕ ಆಕ್ರೋಶ ಮತ್ತು ಆರ್ಎಸ್ಎಸ್ನಿಂದ ಕೇಳಿಬರುತ್ತಿರುವ ಅಸಮಾಧಾನದ ಧ್ವನಿ.. ಇವೆಲ್ಲವೂ ಒಂದೇ ಸಮಯದಲ್ಲಿ ಎದುರಾಗಿವೆ. ಇದುವರೆಗೆ ಅಮಿತ್ ಶಾ ಅವರನ್ನು ರಾಜಕೀಯವಾಗಿ ‘ಅನಿವಾರ್ಯ’ ಎಂದು ಪರಿಗಣಿಸಲಾಗುತ್ತಿತ್ತು. ಆದರೆ ಈಗ ಆ ಅನಿವಾರ್ಯತೆಯೇ ಪ್ರಶ್ನೆಯಲ್ಲಿದೆ. ‘ಚಾಣಕ್ಯ’ನಿಗೆ ನಿಜವಾಗಿಯೂ ರಾಜಕೀಯ ಸಂಕಷ್ಟ ಆರಂಭವಾಗಿದೆಯೇ? ಅಥವಾ ಇದು ಕೇವಲ ತಾತ್ಕಾಲಿಕ ಹಿನ್ನಡೆಯೇ? ಎಂಬ ಪ್ರಶ್ನೆಗೆ ಉತ್ತರ ಮುಂದಿನ ದಿನಗಳ ರಾಜಕೀಯ ಬೆಳವಣಿಗೆಗಳಲ್ಲಿದೆ.
