ತಮ್ಮ ಉತ್ಪನ್ನಗಳ ಮೇಲೆ ‘100% ಪರಿಶುದ್ಧ’, ‘100% ನೈಸರ್ಗಿಕ’ (100% Natural), 100% ಆರ್ಗಾನಿಕ್ (100% Organic) ಹಾಗೂ ‘100% ಪರಿಶುದ್ಧತೆಯ ಖಾತರಿ’ ಎಂಬ ಲೇಬಲ್‌ಗಳನ್ನು ತಕ್ಷಣವೇ ತೆಗೆಯುವಂತೆ ‘ಡಾಬರ್ ಇಂಡಿಯಾ’ ಸಂಸ್ಥೆಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಆದೇಶಿಸಿತ್ತು. ಆದರೆ, ಎಫ್‌ಎಸ್‌ಎಸ್‌ಎಐ ಹೊರಡಿಸಿದ್ದ ಈ ಆದೇಶಕ್ಕೆ ದೆಹಲಿ ಹೈಕೋರ್ಟ್ ತಡೆ ನೀಡಿದೆ. ಡಾಬರ್ ಸಂಸ್ಥೆಗೆ ದೊಡ್ಡ ಮಧ್ಯಂತರ ರಿಲೀಫ್‌ ಕೊಟ್ಟಿದೆ.
ಎಫ್‌ಎಸ್‌ಎಸ್‌ಎಐ ನೀಡಿದ್ದ ಆದೇಶವನ್ನು ಪ್ರಶ್ನಿಸಿ ಡಾಬರ್ ಸಂಸ್ಥೆಯು ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿತ್ತು. ಡಾಬರ್ ಕಂಪನಿ ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಮೂರ್ತಿ ಅಮಿತ್ ಮಹಾಜನ್ ಅವರಿದ್ದ ಪೀಠ ವಿಚಾರಣೆ ನಡೆಸಿದೆ. “ಡಾಬರ್ ಸಂಸ್ಥೆಯು ಕಳೆದ ಹಲವು ದಶಕಗಳಿಂದಲೂ ಈ ಉತ್ಪನ್ನಗಳನ್ನು ಮಾರುಕಟ್ಟೆಯಲ್ಲಿ ಮಾರಾಟ ಮಾಡುತ್ತಾ ಬಂದಿದೆ. ಆದರೆ, ಪ್ರಾಧಿಕಾರವು ಸಂಸ್ಥೆಗೆ ತನ್ನ ವಾದವನ್ನು ಮಂಡಿಸಲು ಯಾವುದೇ ಅವಕಾಶ ಅಥವಾ ವಿಚಾರಣೆಯ ಸಮಯವನ್ನು ನೀಡದೆ ಏಕಪಕ್ಷೀಯವಾಗಿ ನಿಷೇಧ ಹೇರಿರುವುದು ಪ್ರಾಥಮಿಕ ದೃಷ್ಟಿಯಲ್ಲಿ ಸರಿಯಲ್ಲ” ಎಂದು ಕೋರ್ಟ್ ಅಭಿಪ್ರಾಯಪಟ್ಟಿದೆ.
ವಿಚಾರಣೆ ವೇಳೆ ಎಫ್‌ಎಸ್‌ಎಸ್‌ಎಐ ಆದೇಶವನ್ನು ಸಮರ್ಥಿಸಿಕೊಂಡ ಕೇಂದ್ರ ಸರ್ಕಾರದ ಪರ ವಕೀಲರು, “ಡಾಬರ್ ಸಂಸ್ಥೆಗೆ ಈ ಹಿಂದೆ ಹಲವು ಬಾರಿ ಸುಧಾರಣಾ ನೋಟಿಸ್‌ಗಳು ಮತ್ತು ಕಟ್ಟುನಿಟ್ಟಿನ ಸೂಚನೆಗಳನ್ನು ನೀಡಲಾಗಿತ್ತು. ಆಹಾರ ಉತ್ಪನ್ನಗಳ ಮೇಲೆ ‘100% ಪರಿಶುದ್ಧತೆ’ ಎಂದು ಮುದ್ರಿಸುವುದು ಗ್ರಾಹಕರನ್ನು ಸ್ಪಷ್ಟವಾಗಿ ದಾರಿತಪ್ಪಿಸುವ ತಂತ್ರವಾಗಿದೆ. ಈ ಹಂತದಲ್ಲಿ ಮಧ್ಯಂತರ ಪರಿಹಾರ ನೀಡಬಾರದು” ಎಂದು ವಾದಿಸಿದರು.
ಆದರೆ, ಕೇಂದ್ರ ಸರ್ಕಾರದ ವಾದವನ್ನು ತಿರಸ್ಕರಿಸಿದ ಹೈಕೋರ್ಟ್, “ದಶಕಗಳಿಂದ ಮಾರಾಟವಾಗುತ್ತಿರುವ ಉತ್ಪನ್ನಗಳನ್ನು ದಿಢೀರನೆ ತಡೆಯಲು ಸಾಧ್ಯವಿಲ್ಲ” ಎಂದು ಹೇಳಿದ್ದು, ಎರಡು ವಾರಗಳ ನಂತರ ನಡೆಯಲಿರುವ ಮುಂದಿನ ವಿಚಾರಣೆಯವರೆಗೆ ಎಫ್‌ಎಸ್‌ಎಸ್‌ಎಐ ಆದೇಶದ ಜಾರಿಗೆ ತಡೆ ನೀಡಿದೆ.
ಎಫ್‌ಎಸ್‌ಎಸ್‌ಎಐ ಪ್ರಕಾರ, ಡಾಬರ್ ಜೇನುತುಪ್ಪ, ಸುಂದರಬನ್ಸ್ ಜೇನುತುಪ್ಪ, ವರ್ಜಿನ್ ಕೊಬ್ಬರಿ ಎಣ್ಣೆ, ಹಸುವಿನ ತುಪ್ಪ, ಹಿಮಾಲಯನ್ ಆ್ಯಪಲ್ ಸೈಡರ್ ವಿನೆಗರ್, ರಿಯಲ್ ಆಕ್ಟಿವ್ ಎಳೆನೀರು, ತೆಂಗಿನ ಹಾಲು ಹಾಗೂ ಎಳ್ಳಿನ ಎಣ್ಣೆಯಂತಹ ಉತ್ಪನ್ನಗಳ ಮೇಲೆ ‘100% ಶುದ್ಧ, ನೈಸರ್ಗಿಕ’ ಎಂದು ಹಕ್ಕು ಸಾಧಿಸುವುದು ‘ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ (ಜಾಹೀರಾತು ಮತ್ತು ಹಕ್ಕುಗಳು) ನಿಯಮಾವಳಿಗಳು-2018’ಕ್ಕೆ ವಿರುದ್ಧವಾಗಿದೆ. ಇಂತಹ ಹೇಳಿಕೆಗಳು ಅಸ್ಪಷ್ಟ, ಪರಿಶೀಲಿಸಲಾಗದ ಹಾಗೂ ಗ್ರಾಹಕರನ್ನು ದಾರಿತಪ್ಪಿಸುವ ಸಾಧ್ಯತೆಯನ್ನು ಹೊಂದಿರುತ್ತವೆ.
