ಉತ್ತಮ ಇಂಧನ ಕಾರ್ಯಕ್ಷಮತೆ (ಮೈಲೇಜ್) ನೀಡುತ್ತದೆ ಎಂದು ಜಾಹೀರಾತು ನೀಡಿ, ಪ್ರಾಯೋಗಿಕವಾಗಿ ತೀರಾ ಕಡಿಮೆ ಮೈಲೇಜ್ ನೀಡಿದ ಕಾರು ತಯಾರಿಕಾ ಕಂಪನಿಗೆ ಗ್ರಾಹಕ ನ್ಯಾಯಾಲಯವು ಬಿಸಿ ಮುಟ್ಟಿಸಿದೆ. ಪ್ರತಿ ಲೀಟರ್‌ಗೆ 18.5 ಕಿ.ಮೀ. ಮೈಲೇಜ್ ನೀಡುವುದಾಗಿ ಭರವಸೆ ನೀಡಿ ಮಾರಾಟ ಮಾಡಿದ್ದ ಕಾರು, ವಾಸ್ತವದಲ್ಲಿ ಕೇವಲ 8 ರಿಂದ 10 ಕಿ.ಮೀ. ಮೈಲೇಜ್ ನೀಡಿದ ಕಾರಣಕ್ಕಾಗಿ ಕಾರು ಖರೀದಿಸಿದ ಗ್ರಾಹಕನಿಗೆ ₹75,000 ಪರಿಹಾರ ನೀಡುವಂತೆ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗವು ಮಹತ್ವದ ತೀರ್ಪು ನೀಡಿದೆ.
ಗ್ರಾಹಕರು ಪ್ರತಿ ಲೀಟರ್ ಪೆಟ್ರೋಲ್‌ಗೆ 18.5 ಕಿ.ಮೀ. ಮೈಲೇಜ್ ನೀಡುತ್ತದೆ ಎಂಬ ಕಂಪನಿಯ ಜಾಹೀರಾತು ಮತ್ತು ಶೋರೂಮ್‌ ಸಿಬ್ಬಂದಿಯ ಭರವಸೆಯನ್ನು ನಂಬಿ ಹೊಸ ಕಾರನ್ನು ಖರೀದಿಸಿದ್ದರು. ಆದರೆ, ಕಾರು ರಸ್ತೆಗಿಳಿದ ನಂತರ ನಿರೀಕ್ಷಿತ ಮಟ್ಟದಲ್ಲಿ ಇಂಧನ ಕಾರ್ಯಕ್ಷಮತೆ ತೋರಲಿಲ್ಲ. ನಗರ ಹಾಗೂ ಹೆದ್ದಾರಿ ರಸ್ತೆಗಳಲ್ಲಿ ಪರಿಶೀಲಿಸಿದಾಗಲೂ ಕಾರು ಕೇವಲ 8 ರಿಂದ 10 ಕಿ.ಮೀ. ಮೈಲೇಜ್ ನೀಡುತ್ತಿತ್ತು.
ಇದನ್ನೂ ಓದಿ: ಸದ್ಯಕ್ಕೆ ಎಥೆನಾಲ್-25 ಇಂಧನ ಬಿಡುಗಡೆಯಿಲ್ಲ: ಕೇಂದ್ರ ಸರ್ಕಾರ
ಈ ಕುರಿತು ಗ್ರಾಹಕರು ಅಧಿಕೃತ ಸರ್ವೀಸ್ ಸೆಂಟರ್‌ಗೆ ಭೇಟಿ ನೀಡಿ ಹಲವು ಬಾರಿ ದೂರು ನೀಡಿದ್ದರು. ತಾಂತ್ರಿಕ ತಪಾಸಣೆ ನಡೆಸಿದ ಸರ್ವೀಸ್ ಸೆಂಟರ್ ಸಿಬ್ಬಂದಿ, ಕಾರಿನಲ್ಲಿ ಯಾವುದೇ ತಾಂತ್ರಿಕ ದೋಷವಿಲ್ಲ ಎಂದು ಹೇಳಿ ದೂರು ಇತ್ಯರ್ಥಪಡಿಸಲು ನಿರಾಕರಿಸಿದ್ದರು. ಇದರಿಂದ ಅಸಮಾಧಾನಗೊಂಡ ಗ್ರಾಹಕರು, ಇದು ‘ಅನುಚಿತ ವ್ಯಾಪಾರ ವಹಿವಾಟು’ ಮತ್ತು ‘ಸೇವೆಯಲ್ಲಿನ ನ್ಯೂನತೆ’ ಎಂದು ಆರೋಪಿಸಿ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗದ ಬಾಗಿಲು ತಟ್ಟಿದರು.
ವಿಚಾರಣೆ ವೇಳೆ ಕಾರು ಕಂಪನಿಯು, “ಜಾಹೀರಾತಿನಲ್ಲಿ ನೀಡಲಾದ ಮೈಲೇಜ್ ಪ್ರಮಾಣ ಪ್ರಮಾಣೀಕೃತ ಪರೀಕ್ಷಾ ಕೇಂದ್ರಗಳಲ್ಲಿ (ARAI) ನಿಯಂತ್ರಿತ ವಾತಾವರಣದಲ್ಲಿ ಪಡೆದ ಫಲಿತಾಂಶವಾಗಿರುತ್ತದೆ. ರಸ್ತೆಯ ಸ್ಥಿತಿ, ಚಾಲನಾ ಶೈಲಿ ಮತ್ತು ಸಂಚಾರ ದಟ್ಟಣೆಗೆ ಅನುಗುಣವಾಗಿ ಮೈಲೇಜ್ ವ್ಯತ್ಯಾಸವಾಗುತ್ತದೆ” ಎಂದು ವಾದಿಸಿತು.
ಆದರೆ, ಕಂಪನಿಯ ಈ ವಾದವನ್ನು ಆಯೋಗವು ಪುರಸ್ಕರಿಸಲಿಲ್ಲ. ಜಾಹೀರಾತಿನಲ್ಲಿ ನೀಡುವ ಮೈಲೇಜ್ ಸಂಖ್ಯೆ ಮತ್ತು ವಾಸ್ತವಿಕ ಬಳಕೆಯಲ್ಲಾಗುವ ಮೈಲೇಜ್ ನಡುವೆ ಅತಿಯಾದ ವ್ಯತ್ಯಾಸವಿರುವುದು ಗ್ರಾಹಕರನ್ನು ಹಾದಿತಪ್ಪಿಸುವ ತಂತ್ರವಾಗಿದೆ ಎಂದು ಆಯೋಗ ಅಭಿಪ್ರಾಯಪಟ್ಟಿತು. ಗ್ರಾಹಕರಿಗೆ ಆದ ಮಾನಸಿಕ ಕಿರುಕುಳ ಮತ್ತು ಹಣಕಾಸಿನ ನಷ್ಟವನ್ನು ಪರಿಗಣಿಸಿ, ದೂರುದಾರರಿಗೆ ₹75,000 ಪರಿಹಾರ ಹಾಗೂ ಪ್ರಕರಣದ ವೆಚ್ಚವಾಗಿ ₹5,000 ಪಾವತಿಸುವಂತೆ ಕಾರು ತಯಾರಕ ಕಂಪನಿ ಮತ್ತು ಸ್ಥಳೀಯ ಡೀಲರ್‌ಗೆ ನಿರ್ದೇಶನ ನೀಡಿತು.
