ಕೆನಡಾ ಸರ್ಕಾರವು ತನ್ನ ವಲಸೆ ನಿಯಮಗಳನ್ನು ಬಿಗಿಗೊಳಿಸುತ್ತಿದ್ದು, ದೇಶದಲ್ಲಿ ಕಾನೂನುಬಾಹಿರವಾಗಿ ನೆಲೆಸಿದ್ದವರ ವಿರುದ್ಧ ಕಠಿಣ ಕ್ರಮ ಮುಂದುವರಿಸಿದೆ. 2026ರ ಜನವರಿಯಿಂದ ಸೆಪ್ಟೆಂಬರ್ 30ರವರೆಗಿನ ಅವಧಿಯಲ್ಲಿ ಒಟ್ಟು 4,526 ಭಾರತೀಯ ಪ್ರಜೆಗಳನ್ನು ಕೆನಡಾದಿಂದ ನಿರ್ಗಮಿಸುವಂತೆ (ಉಚ್ಚಾಟನೆ/ಗಡೀಪಾರು) ಮಾಡಲಾಗಿದೆ ಎಂದು ಕೆನಡಾದ ಗಡಿ ಸೇವೆಗಳ ಸಂಸ್ಥೆ (CBSA) ಬಹಿರಂಗಪಡಿಸಿದೆ. ವರ್ಷವೊಂದರಲ್ಲಿ ಕೆನಡಾದಿಂದ ನಿರ್ಗಮಿಸಿದ ಭಾರತೀಯ ಪ್ರಜೆಗಳ ಸಂಖ್ಯೆಯಲ್ಲಿ ಇದು ಸಾರ್ವಕಾಲಿಕ ಗರಿಷ್ಠ ದಾಖಲೆಯಾಗಿದೆ.
ಈ ವರ್ಷ ಕೆನಡಾ ಜಾರಿಗೊಳಿಸಿದ ಒಟ್ಟು 16,426 ಉಚ್ಚಾಟನೆಗಳಲ್ಲಿ ಭಾರತೀಯರ ಪಾಲು ಶೇ. 27ಕ್ಕಿಂತ ಹೆಚ್ಚಿದೆ. 2020ರ ನಂತರ ಗಡೀಪಾರಾದವರ ಪಟ್ಟಿಯಲ್ಲಿ ಭಾರತೀಯ ಪ್ರಜೆಗಳು ಅಗ್ರಸ್ಥಾನಕ್ಕೇರಿರುವುದು ಇದೇ ಮೊದಲ ಬಾರಿಯಾಗಿದೆ. 2021ರಿಂದ 2025ರವರೆಗೆ ಮೆಕ್ಸಿಕೊ ದೇಶದ ನಾಗರಿಕರು ಈ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದ್ದರು. 2025ರಲ್ಲಿ 3,779 ಭಾರತೀಯರನ್ನು ಕೆನಡಾದಿಂದ ಹೊರಕಳುಹಿಸಲಾಗಿತ್ತು.
ಇದನ್ನೂ ಓದಿ: ಈ ದಿನ ಸಂಪಾದಕೀಯ | ದುರಹಂಕಾರಿ ದೊಡ್ಡಣ್ಣನ ಎದುರು ಮಂಡಿಯೂರಿದ ಮೋದಿ
CBSA ನೀಡಿದ ಮಾಹಿತಿಯ ಪ್ರಕಾರ, ಪ್ರಸ್ತುತ ಉಚ್ಚಾಟನೆ ಪ್ರಕ್ರಿಯೆಯ ಹಂತದಲ್ಲಿರುವ ಒಟ್ಟು 52,457 ಪ್ರಕರಣಗಳ ಪೈಕಿ 11,393ಕ್ಕೂ ಹೆಚ್ಚು ಪ್ರಕರಣಗಳು ಭಾರತೀಯ ನಾಗರಿಕರಿಗೆ ಸಂಬಂಧಿಸಿವೆ.
ವಲಸೆ ನಿಯಮಗಳ ಉಲ್ಲಂಘನೆ, ವೀಸಾ ಅವಧಿ ಮುಗಿದಿದ್ದರೂ ಅಕ್ರಮವಾಗಿ ಉಳಿದುಕೊಂಡಿರುವುದು, ನಿರಾಶ್ರಿತರ ಅರ್ಜಿ ತಿರಸ್ಕೃತಗೊಂಡಿರುವುದು, ತಪ್ಪು ಮಾಹಿತಿ ಅಥವಾ ನಕಲಿ ದಾಖಲೆ ಸಲ್ಲಿಕೆ ಮತ್ತು ಕ್ರಿಮಿನಲ್ ಹಿನ್ನೆಲೆಯ ಆಧಾರದ ಮೇಲೆ ಈ ಕ್ರಮ ಕೈಗೊಳ್ಳಲಾಗಿದೆ.
“ಕೆನಡಾಕ್ಕೆ ಪ್ರವೇಶಿಸಲು ಅಥವಾ ಇಲ್ಲಿ ನೆಲೆಸಲು ಕಾನೂನುಬದ್ಧ ಹಕ್ಕಿಲ್ಲದ ವ್ಯಕ್ತಿಗಳನ್ನು ತೆರವುಗೊಳಿಸುವುದು ನಮ್ಮ ವಲಸೆ ವ್ಯವಸ್ಥೆಯ ಪ್ರಾಮಾಣಿಕತೆ ಮತ್ತು ನಿಷ್ಠೆಯನ್ನು ಎತ್ತಿಹಿಡಿಯಲು ಹಾಗೂ ಕಾನೂನುಬದ್ಧವಾಗಿ ಬರುವವರಿಗೆ ನ್ಯಾಯ ಒದಗಿಸಲು ಅತ್ಯಗತ್ಯವಾಗಿದೆ” ಎಂದು ಕೆನಡಾ ಗಡಿ ಸೇವೆಗಳ ಸಂಸ್ಥೆ (CBSA) ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.
