ಪತಂಜಲಿ ಆಯುರ್ವೇದ ಲಿಮಿಟೆಡ್‌ಗೆ ಸಂಬಂಧಿಸಿದಂತೆ ‘ಆದಾಯ ತೆರಿಗೆ ಮೇಲ್ಮನವಿ ನ್ಯಾಯಾಧೀಕರಣ’ (ITAT) ಹೊರಡಿಸಿದ್ದ 7 ಆದೇಶಗಳನ್ನು ದೆಹಲಿ ಹೈಕೋರ್ಟ್ ರದ್ದುಗೊಳಿಸಿದೆ. ಯಾವುದೇ ವಿವೇಚನೆ ಇಲ್ಲದೆ, ಕಣ್ಣುಮುಚ್ಚಿಕೊಂಡು ಈ ಆದೇಶಗಳನ್ನು ಹೊರಡಿಸಲಾಗಿದೆ ಎಂದು ತೀವ್ರ ಅಸಮಾಧಾನ ವ್ಯಕ್ತಪಡಿಸಿರುವ ನ್ಯಾಯಾಲಯವು, ಪ್ರಕರಣದ ಮರು ವಿಚಾರಣೆ ನಡೆಸುವಂತೆ ಹೊಸ ಪೀಠಕ್ಕೆ ಸೂಚಿಸಿದೆ.
’ಪ್ರಧಾನ ಆದಾಯ ತೆರಿಗೆ ಆಯುಕ್ತರು (ಕೇಂದ್ರ-1, ದೆಹಲಿ) ಮತ್ತು ಪತಂಜಲಿ ಆಯುರ್ವೇದ ಲಿಮಿಟೆಡ್’ ನಡುವಿನ ಪ್ರಕರಣದ ವಿಚಾರಣೆಯನ್ನು ನ್ಯಾಯಮೂರ್ತಿಗಳಾದ ದಿನೇಶ್ ಮೆಹ್ತಾ ಮತ್ತು ರಜನೀಶ್ ಕುಮಾರ್ ಗುಪ್ತಾ ಅವರಿದ್ದ ವಿಭಾಗೀಯ ಪೀಠವು ನಡೆಸಿತು. 2013-14 ರಿಂದ 2015-16 ಹಾಗೂ 2017-18ನೇ ಸಾಲಿನ ಮೌಲ್ಯಮಾಪನ ವರ್ಷಗಳಿಗೆ ಸಂಬಂಧಿಸಿದ ಮೇಲ್ಮನವಿಗಳು ಇದಾಗಿದ್ದವು.
ಆದೇಶಗಳನ್ನು ಪರಿಶೀಲಿಸಿದ ನ್ಯಾಯಪೀಠವು, ಐಟಿಎಟಿ ಕಾರ್ಯವೈಖರಿಯನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿತು. “ಪ್ರಕರಣಗಳನ್ನು ಬೇಗ ವಿಲೇವಾರಿ ಮಾಡಬೇಕೆಂಬ ಅತಿ-ಆತುರದಲ್ಲಿ ಐಟಿಎಟಿ ಆದೇಶಗಳನ್ನು ಹೊರಡಿಸಿದಂತಿದೆ. ಅರ್ಜಿದಾರರ ಯಾವುದೇ ವಾದಗಳನ್ನೂ ಪರಿಗಣಿಸಿಲ್ಲ ಹಾಗೂ ಪ್ರಕರಣದ ಒಳಗಿನ ವಿಚಾರಗಳನ್ನು ಚರ್ಚಿಸಿಲ್ಲ. ಕನಿಷ್ಠ 7 ಪ್ಯಾರಾಗಳೂ ಇಲ್ಲದ ಆದೇಶವೊಂದರಲ್ಲಿ ಬರೋಬ್ಬರಿ 7 ಮೇಲ್ಮನವಿಗಳನ್ನು ವಿಲೇವಾರಿ ಮಾಡಲಾಗಿದೆ. ಆದೇಶದ ಗಾತ್ರದ ಬಗ್ಗೆ ನಮಗೆ ಚಿಂತೆಯಿಲ್ಲ, ಆದರೆ ನ್ಯಾಯಾಧೀಕರಣದ ಸದಸ್ಯರು ತೋರಿರುವ ಆತುರ ಹಾಗೂ ವಿವೇಚನೆಯಿಲ್ಲದ ನಡೆ ನಮಗೆ ಆಘಾತ ತಂದಿದೆ,” ಎಂದು ಹೈಕೋರ್ಟ್ ಕಟುವಾಗಿ ನುಡಿಯಿತು.
ಇದೇ ವೇಳೆ, ವಿಚಾರಣೆ ಮತ್ತು ತೀರ್ಪು ಪ್ರಕಟಿಸಿದ ದಿನಾಂಕಗಳಲ್ಲೂ ಇರುವ ವಿರೋಧಾಭಾಸಗಳನ್ನು ನ್ಯಾಯಾಲಯ ಬೊಟ್ಟು ಮಾಡಿತು. “4 ಮೇಲ್ಮನವಿಗಳ ವಿಚಾರಣೆ ನಡೆಸಿ 2025ರ ಆಗಸ್ಟ್ 6ರಂದು ಆದೇಶ ಹೊರಡಿಸಲಾಗಿದೆ. ಉಳಿದ 3 ಮೇಲ್ಮನವಿಗಳ ವಿಚಾರಣೆ ನಡೆಸಿ ಆ.13ರಂದು ಆದೇಶ ಪ್ರಕಟಿಸಲಾಗಿದೆ. ಆದರೆ, ಇವೆಲ್ಲಕ್ಕೂ ಸೇರಿ ಒಂದೇ ಸಾಮಾನ್ಯ ಆದೇಶವನ್ನು ಹೇಗೆ ನೀಡಲಾಯಿತು ಎಂಬುದೇ ನಮಗೆ ಅರ್ಥವಾಗುತ್ತಿಲ್ಲ. ಇದರಲ್ಲಿ ಯಾವುದೇ ತರ್ಕ ಅಥವಾ ಕಾರಣಗಳಿಲ್ಲ,” ಎಂದು ನ್ಯಾಯಪೀಠ ಅಚ್ಚರಿ ವ್ಯಕ್ತಪಡಿಸಿತು.
ಈ ಎಲ್ಲ ಕಾರ್ಯವಿಧಾನದ ಲೋಪಗಳ ಹಿನ್ನೆಲೆಯಲ್ಲಿ ಐಟಿಎಟಿಯ 7 ಆದೇಶಗಳನ್ನು ರದ್ದುಗೊಳಿಸಿದ ದೆಹಲಿ ಹೈಕೋರ್ಟ್, ಬೇರೊಂದು ಪೀಠದ ಮೂಲಕ ಪ್ರಕರಣದ ಮರು ವಿಚಾರಣೆಯನ್ನು ಖಚಿತಪಡಿಸುವಂತೆ ಐಟಿಎಟಿ ಅಧ್ಯಕ್ಷರಿಗೆ ನಿರ್ದೇಶನ ನೀಡಿದೆ. ಅಲ್ಲದೆ, ನ್ಯಾಯಾಧೀಕರಣದ ಈ ನಡೆಯ ಬಗ್ಗೆ ಮಾಹಿತಿ ನೀಡಲು ತನ್ನ ಆದೇಶದ ಪ್ರತಿಯನ್ನು ಕೇಂದ್ರ ಕಾನೂನು ಮತ್ತು ನ್ಯಾಯ ಸಚಿವಾಲಯದ ಕಾರ್ಯದರ್ಶಿಗೂ ರವಾನಿಸಿದೆ.
ಆದಾಯ ತೆರಿಗೆ ಇಲಾಖೆ ಪರವಾಗಿ ಹಿರಿಯ ವಕೀಲ ಪುನೀತ್ ರಾಯ್, ಅಶ್ವಿನಿ ಕುಮಾರ್, ರಿಷಭ್ ನಂಗಿಯಾ, ನಿಖಿಲ್ ಜೈನ್ ಮತ್ತು ನ್ಯಾನ್ಸಿ ಜೈನ್ ವಾದ ಮಂಡಿಸಿದರು. ಪತಂಜಲಿ ಪರವಾಗಿ ವಕೀಲರಾದ ವೈಭವ್ ಕುಲಕರ್ಣಿ ಮತ್ತು ಸಂದೀಪ್ ನಗರ್ ಹಾಜರಿದ್ದರು.
