ಯಾವುದೇ ಸರ್ಕಾರಿ ಹುದ್ದೆಯಲ್ಲಿ ಇಲ್ಲದಿದ್ದರೂ, ಖಾಸಗಿ ಸಂಘಟನೆಯೊಂದರ ಮುಖ್ಯಸ್ಥರಾಗಿರುವ ಮೋಹನ್ ಭಾಗವತ್ ಅವರು 'ಝೆಡ್ ಪ್ಲಸ್' (Z+) ಭದ್ರತೆಯನ್ನು ಹೊಂದಿದ್ದಾರೆ. ಅಂದಾಜಿನ ಪ್ರಕಾರ 50-60 ಸುರಕ್ಷಾ ಸಿಬ್ಬಂದಿ, ವಾಹನಗಳು, ಸಂವಹನ ವ್ಯವಸ್ಥೆ, ತಪಾಸಣೆ ಇತ್ಯಾದಿ ಸೇರಿ ವರ್ಷಕ್ಕೆ 5 ರಿಂದ 6 ಕೋಟಿ ಹಣ ರೂ. ವೆಚ್ಚವಾಗುತ್ತದೆ.
ಪ್ರಧಾನಿ ನರೇಂದ್ರ ಮೋದಿಯವರು ಅಧಿಕಾರಕ್ಕೆ ಬಂದಾಗಿನಿಂದಲೂ ಸಾರ್ವಜನಿಕ ಹಣದ ಮಿತವ್ಯಯ ಮತ್ತು ‘ವಿಐಪಿ ಸಂಸ್ಕೃತಿ’ಯ ನಿರ್ಮೂಲನೆಯ ಬಗ್ಗೆ ನಿರಂತರವಾಗಿ ಪ್ರತಿಪಾದಿಸುತ್ತಲೇ ಬಂದಿದ್ದಾರೆ. ವಾಹನಗಳ ಮೇಲಿನ ಕೆಂಪು ದೀಪಗಳ ತೆರವು ಸೇರಿದಂತೆ ಹಲವು ಕ್ರಮಗಳ ಮೂಲಕ ಸರಳತೆಯ ಸಂದೇಶ ಸಾರಿದ್ದಾರೆ. ಆದರೆ, ಇದೇ ವೇಳೆ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್ಎಸ್ಎಸ್) ಸರಸಂಘಚಾಲಕ ಮೋಹನ್ ಭಾಗವತ್ ಅವರಿಗೆ ಕೇಂದ್ರ ಸರ್ಕಾರ ಒದಗಿಸಿರುವ ಅತ್ಯುನ್ನತ ಮಟ್ಟದ ಭದ್ರತೆಯು ಸಾರ್ವಜನಿಕ ಹಾಗೂ ರಾಜಕೀಯ ವಲಯದಲ್ಲಿ ದೊಡ್ಡ ಚರ್ಚೆಗೆ ಗ್ರಾಸವಾಗಿದೆ.
ಸಾಂವಿಧಾನಿಕ ಅಥವಾ ಯಾವುದೇ ಸರ್ಕಾರಿ ಹುದ್ದೆಯಲ್ಲಿ ಇಲ್ಲದಿದ್ದರೂ, ಖಾಸಗಿ ಸಂಘಟನೆಯೊಂದರ ಮುಖ್ಯಸ್ಥರಾಗಿರುವ ಮೋಹನ್ ಭಾಗವತ್ ಅವರು ‘ಝೆಡ್ ಪ್ಲಸ್’ (Z+) ಭದ್ರತೆಯನ್ನು ಹೊಂದಿದ್ದಾರೆ. ಕೇಂದ್ರ ಗುಪ್ತಚರ ಇಲಾಖೆಯ (IB) ವರದಿಗಳ ಪ್ರಕಾರ, ಭಾಗವತ್ ಅವರ ಜೀವಕ್ಕೆ ಉಗ್ರರ ಬೆದರಿಕೆ ಇದೆ ಎಂಬ ಕಾರಣ ನೀಡಿ ಈ ಉನ್ನತ ಮಟ್ಟದ ಭದ್ರತೆ ಒದಗಿಸಲಾಗಿದೆ.
ಅವರ ಭದ್ರತೆಯ ಜವಾಬ್ದಾರಿಯನ್ನು ಕೇಂದ್ರ ಕೈಗಾರಿಕಾ ಭದ್ರತಾ ಪಡೆ (CISF) ನಿರ್ವಹಿಸುತ್ತಿದ್ದು, ಇತ್ತೀಚೆಗೆ ಅವರ ಭದ್ರತಾ ಶಿಷ್ಟಾಚಾರವನ್ನು ಅಮಿತ್ ಶಾ ಅವರ ಭದ್ರತೆಗೆ ಸಮಾನವಾದ ‘ಎಎಸ್ಎಲ್’ (Advanced Security Liaison – ASL) ಮಟ್ಟಕ್ಕೂ ಮೇಲ್ದರ್ಜೆಗೇರಿಸಲಾಗಿದೆ. ಇದರರ್ಥ, ಅವರು ಭೇಟಿ ನೀಡುವ ಪ್ರತಿಯೊಂದು ಸ್ಥಳವನ್ನೂ ಮುಂಚಿತವಾಗಿಯೇ ತಪಾಸಣೆಗೆ ಒಳಪಡಿಸಲಾಗುತ್ತದೆ. ಈ ಹೈಟೆಕ್ ಭದ್ರತಾ ವ್ಯವಸ್ಥೆಗೆ ಸರ್ಕಾರಿ ಬೊಕ್ಕಸದಿಂದ ವಾರ್ಷಿಕ ಕೋಟ್ಯಂತರ ರೂಪಾಯಿ ತೆರಿಗೆ ಹಣ ವೆಚ್ಚವಾಗುತ್ತಿದೆ. ಅಂದಾಜಿನ ಪ್ರಕಾರ 50-60 ಸುರಕ್ಷಾ ಸಿಬ್ಬಂದಿ, ವಾಹನಗಳು, ಸಂವಹನ ವ್ಯವಸ್ಥೆ, ತಪಾಸಣೆ ಇತ್ಯಾದಿ ಸೇರಿ ವರ್ಷಕ್ಕೆ 5 ರಿಂದ 6 ಕೋಟಿ ಹಣ ರೂ. ವೆಚ್ಚವಾಗುತ್ತದೆ.
ಇದನ್ನು ಓದಿದ್ದೀರಾ? NTA ಹಗರಣಗಳ ಸರಮಾಲೆ; ಕಳಚಿದೆ ಮೋದಿ ಸರ್ಕಾರದ ಹೊಣೆಗೇಡಿತನದ ಮುಖವಾಡ!
ಸರ್ಕಾರದ ನೀತಿಗೂ ಮತ್ತು ವಾಸ್ತವದ ಆಚರಣೆಗೂ ಇರುವ ಈ ವ್ಯತ್ಯಾಸವೇ ವಿಪಕ್ಷಗಳ ಕಟು ಟೀಕೆಗೆ ಕಾರಣವಾಗಿದೆ. ಪ್ರಧಾನಿ ಮೋದಿಯವರು ಒಂದು ಕಡೆ ಮಿತವ್ಯಯದ ಬಗ್ಗೆ ಮಾತನಾಡುತ್ತಾ, ಸಾರ್ವಜನಿಕ ವಲಯದ ಅನಗತ್ಯ ಖರ್ಚುಗಳಿಗೆ ಕಡಿವಾಣ ಹಾಕುವ ಮಾತುಗಳನ್ನಾಡುತ್ತಾರೆ. ಆದರೆ, ಮತ್ತೊಂದೆಡೆ ಯಾವುದೇ ಸಾಂವಿಧಾನಿಕ ಹುದ್ದೆಯಲ್ಲಿರದ ವ್ಯಕ್ತಿಗೆ ಕೋಟ್ಯಂತರ ರೂಪಾಯಿ ವೆಚ್ಚದ ವಿಐಪಿ ಭದ್ರತೆ ಒದಗಿಸುತ್ತಾರೆ. ಇದು ಮಿತವ್ಯಯದ ವ್ಯಾಖ್ಯಾನಕ್ಕೆ ವಿರುದ್ಧವಲ್ಲವೇ ಎಂಬುದು ಪ್ರಮುಖ ಪ್ರಶ್ನೆಯಾಗಿದೆ.
ವ್ಯಕ್ತಿಯ ಜೀವ ಬೆದರಿಕೆಯ ಆಧಾರದ ಮೇಲೆ ಭದ್ರತೆ ಒದಗಿಸುವುದು ಸರ್ಕಾರದ ಆಂತರಿಕ ಭದ್ರತೆಯ ಜವಾಬ್ದಾರಿಯಾದರೂ, ಮಿತವ್ಯಯದ ಆದರ್ಶಗಳನ್ನು ಸಾರುವ ಸರ್ಕಾರದ ನಡೆಯು, ತನ್ನ ಸೈದ್ಧಾಂತಿಕ ಮಾತೃಸಂಸ್ಥೆಯ ಮುಖ್ಯಸ್ಥರ ವಿಚಾರದಲ್ಲಿ ಭಿನ್ನ ನಿಲುವು ತಳೆದಿದೆಯೇ ಎಂಬ ಅನುಮಾನಗಳನ್ನು ಹುಟ್ಟುಹಾಕಿದೆ. ಪ್ರಜಾಪ್ರಭುತ್ವದಲ್ಲಿ ತೆರಿಗೆ ಹಣದ ಬಳಕೆಯ ಸಮರ್ಥನೆ ಮತ್ತು ವಿಐಪಿ ಸಂಸ್ಕೃತಿಯ ವಾಸ್ತವಿಕತೆಯ ನಡುವಿನ ಅಂತರವನ್ನು ಈ ವಿದ್ಯಮಾನ ಸ್ಪಷ್ಟವಾಗಿ ಬಿಂಬಿಸುತ್ತಿದೆ.
