ವಿಜಯಪುರ ನಗರದ ಐತಿಹಾಸಿಕ ಇಬ್ರಾಹಿಂ ರೋಜಾ ಸ್ಮಾರಕದ 400ನೇ ವರ್ಷಾಚರಣೆಯ ಅಂಗವಾಗಿ ಪ್ರವಾಸೋದ್ಯಮ ಇಲಾಖೆ ವತಿಯಿಂದ ನವೆಂಬರ್ 14 ಮತ್ತು 15ರಂದು ಎರಡು ದಿನಗಳ ‘ಕಲಾ ಧಾರಾ-2’ ಸಂಗೀತ ಮತ್ತು ನೃತ್ಯೋತ್ಸವ ಆಯೋಜಿಸಲಾಗಿದೆ.
ನ.14ರಂದು ಸಂಜೆ 5ಕ್ಕೆ ಉತ್ಸವ ಉದ್ಘಾಟನೆಯಾಗಲಿದ್ದು, ಸಂಜೆ ಕರ್ನಾಟಕ ಶಾಸ್ತ್ರೀಯ ವಾದ್ಯಸಂಗೀತ ಹಾಗೂ ರಾತ್ರಿ ಡಾ. ಸಂಜಯ್ ಶಾಂತರಾಮ್ ಮತ್ತು ತಂಡದಿಂದ ‘ಶಿವತಾಂಡವ’ ಕೂಚಿಪುಡಿ ನೃತ್ಯರೂಪಕ ಪ್ರದರ್ಶನಗೊಳ್ಳಲಿದೆ.
ನ.15ರಂದು ಬೆಳಗ್ಗೆ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತದ ಜಲತರಂಗ್ ಜುಗಲ್‌ಬಂದಿ ಹಾಗೂ ಪಂ. ಕಾಶಿನಾಥ ಭೋಸಲೆ ತಂಡದಿಂದ ಗಾಯನ ಕಾರ್ಯಕ್ರಮ ನಡೆಯಲಿದೆ. ಸಂಜೆ ‘ಸಂತವಾಣಿ’ ಭಕ್ತಿ ಸಂಗೀತ ಮತ್ತು ರಾತ್ರಿ ಗುರು ಸರಿತಾ ಮಿಶ್ರಾ ಹಾಗೂ ಆದ್ಯಾಶಾ ಫೌಂಡೇಶನ್ ಕಲಾವಿದರಿಂದ ಒಡಿಸ್ಸಿ ನೃತ್ಯ ಪ್ರದರ್ಶನ ನಡೆಯಲಿದೆ.
ಈ ವರ್ಷದ ಆರಂಭದಲ್ಲಿ ಗೋಳಗುಮ್ಮಟದಲ್ಲಿ ನಡೆದ ‘ಕಲಾ ಧಾರಾ’ ಮೊದಲ ಆವೃತ್ತಿಗೆ ಸುಮಾರು 4 ಸಾವಿರ ಕಲಾಭಿಮಾನಿಗಳು ಭಾಗವಹಿಸಿದ್ದರು. ಅದಕ್ಕೆ ದೊರೆತ ಉತ್ತಮ ಸ್ಪಂದನೆಯ ಹಿನ್ನೆಲೆಯಲ್ಲಿ ಎರಡನೇ ಆವೃತ್ತಿಯನ್ನು ಇಬ್ರಾಹಿಂ ರೋಜಾದಲ್ಲಿ ಆಯೋಜಿಸಲಾಗಿದೆ.ಎರಡು ದಿನಗಳ ಉತ್ಸವಕ್ಕೆ ಸಾರ್ವಜನಿಕರಿಗೆ ಉಚಿತ ಪ್ರವೇಶವಿದ್ದು, ಕಲಾಭಿಮಾನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ಪ್ರವಾಸೋದ್ಯಮ ಇಲಾಖೆ ಮನವಿ ಮಾಡಿದೆ.
