“ಪತಿಗೆ ಕಿಡ್ನಿ ದಾನ ಮಾಡು ಇಲ್ಲವೇ 30 ಲಕ್ಷ ರೂಪಾಯಿ ಹಣ ತೆಗೆದುಕೊಂಡು ಬಾ” — ಇದು ಉತ್ತರ ಪ್ರದೇಶದ ಕಾನ್ಪುರದ ಮಹಿಳೆಯೊಬ್ಬರು ತಮ್ಮ ಗಂಡನ ಮನೆಯವರಿಂದ ಎದುರಿಸಿದ ವಿಚಿತ್ರ ಮತ್ತು ವಿಕೃತ ಬೇಡಿಕೆ. ಪತಿ ಮತ್ತು ಅತ್ತೆ-ಮಾವನ ಈ ವರದಕ್ಷಿಣೆ ಕಿರುಕುಳದಿಂದ ಬೇಸತ್ತ ಮಹಿಳೆ ಇದೀಗ, ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾರೆ. ಗಂಡನ ಮನೆಯವರ ವಿರುದ್ಧ ದೂರು ದಖಲಿಸಿದ್ದಾರೆ.
ಕಾನ್ಪುರದ ಚಕೇರಿ ಪೊಲೀಸ್ ಠಾಣೆಯ ಪೊಲೀಸರು ಮಹಿಳೆಯ ದೂರನ್ನು ದಾಖಲಿಸಿಕೊಂಡಿದ್ದು, ಆಕೆಯ ಪತಿ ಮತ್ತು ಅತ್ತೆ-ಮಾವನ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.
ಮಹಿಳೆಯ ದೂರಿನಲ್ಲಿ; “2023ರ ಜೂನ್‌ನನ್ನು ನನಗೂ – ನಿಶಾಂತ್ ಕುಮಾರ್‌ಗೂ ಮದುವೆಯಾಗಿದೆ. ಮದುವೆಗೂ ಮುನ್ನವೇ ನಿಶಾಂತ್‌ಗೆ ಎರಡೂ ಕಿಡ್ನಿಗಳು ವೈಫಲ್ಯಗೊಂಡಿದ್ದವು. ಆದರೆ, ಆ ವಿಷಯವನ್ನು ಮುಚ್ಚಿಟ್ಟು ಮದುವೆ ಮಾಡಿದ್ದಾರೆ. ಮದುವೆಯ ಸಮದಯಲ್ಲಿ ಚಿನ್ನಾಭರಣ, 8 ಲಕ್ಷ ರೂ. ನಗದು ಹಾಗೂ ಮಹಿಂದ್ರಾ ಥಾರ್ ಕಾರನ್ನು ವರದಕ್ಷಿಣೆಯಾಗಿ ನನ್ನ ಮನೆಯವರು ಕೊಟ್ಟಿದ್ದಾರೆ. ಈಗ, ವಿವಾದ ಬಳಿಕ, ವರದಕ್ಷಿಣೆಯಾಗಿ ಪತಿಗೆ ನನ್ನದೊಂದು ಕಿಡ್ನಿ ದಾನ ಮಾಡಬೇಕು. ಇಲ್ಲವೇ, ಆತನ ಶಸ್ತ್ರಚಿಕಿತ್ಸೆಗಾಗಿ 30 ಲಕ್ಷ ರೂ. ಹೊಂದಿಸಬೇಕೆಂದು ಬೇಡಿಕೆ ಇಟ್ಟಿದ್ದಾರೆ. ಕಿರುಕುಳ ನೀಡುತ್ತಿದ್ದಾರೆ” ಎಂದು ಆರೋಪಿಸಿದ್ದಾರೆ.
“ಪತಿಯು ದೈಹಿಕ ಸಂಬಂಧದಲ್ಲಿ ಆಸಕ್ತಿ ತೋರಿಸುತ್ತಿರಲಿಲ್ಲ. ಸಂಬಂಧಕ್ಕೆ ಒತ್ತಾಯಿಸಿದಾಗ ಬೇರೆಯವರನ್ನು ಮದುವೆಯಾಗುವಂತೆ ಹೇಳುತ್ತಿದ್ದನು. ಮಲಗುವ ಕೋಣೆಯಲ್ಲಿ ನಮ್ಮ ನಡುವೆ ಅತ್ತೆ ಮಲಗುತ್ತಿದ್ದರು. ಮಾವ ಅನುಮತಿ ಇಲ್ಲದೆ ಕೋಣೆಗೆ ನುಗ್ಗಿ ಫೋಟೋಗಳನ್ನು ತೆಗೆಯುತ್ತಿದ್ದರು. ಪತಿ ಪ್ರತಿದಿನ 10 ಮಾತ್ರೆಗಳನ್ನು ತೆಗೆದುಕೊಳ್ಳುತ್ತಿದ್ದನು. ಕೇಳಿದರೆ ಅಧಿಕ ರಕ್ತದೊತ್ತಡ ಎಂದು ಸುಳ್ಳು ಹೇಳುತ್ತಿದ್ದರು” ಎಂದು ದೂರಿನಲ್ಲಿ ವಿವರಿಸಿದ್ದಾರೆ.
ಈ ಲೇಖನ ಓದಿದ್ದೀರಾ?: ರಷ್ಯಾದಿಂದ ತೈಲ, ಅನಿಲ ಪೂರೈಕೆಗೆ ಸಮ್ಮತಿ: ಭಾರತದ ಇಂಧನದ ಕೊರತೆ ಎಷ್ಟರ ಮಟ್ಟಿಗೆ ನೀಗಲಿದೆ?
“2024ರ ಏಪ್ರಿಲ್‌ನಲ್ಲಿ ನಾನು ನನ್ನ ಪತಿಯ ವೈದ್ಯಕೀಯ ಕಡತವನ್ನು ಪತ್ತೆಹಚ್ಚಿ, ನೋಡಿದಾಗ, ಆಘಾತಕಾರಿ ಸತ್ಯ ಹೊರಬಂದಿತು. ಆತನಿಗೆ ಎರಡೂ ಕಿಡ್ನಿಗಳು 2022ರಲ್ಲೇ ವೈಫಲ್ಯಗೊಂಡಿದ್ದವು. ಆತ ಡಯಾಲಿಸಿಸ್‌ ಪಡೆಯುತ್ತಿದ್ದನು. ಈ ಬಗ್ಗೆ ಪ್ರಶ್ನಿಸಿದಾಗ, ಅತ್ತೆ-ಮಾವಂದಿರು ನನಗೆ ಎರಡು ಆಯ್ಕೆಗಳನ್ನು ನೀಡಿದರು: ನನ್ನ ತವರು ಮನೆಯಿಂದ 30 ಲಕ್ಷ ರೂಪಾಯಿ ತರು ಅಥವಾ ನಿನ್ನ ಒಂದು ಕಿಡ್ನಿಯನ್ನು ಪತಿಗೆ ದಾನ ಮಾಡಬೇಕು ಎಂಬುದು ಅವರ ಬೇಡಿಕೆಯಾಗಿತ್ತು” ಎಂದು ಆರೋಪಿಸಿದ್ದಾರೆ.
ಮಹಿಳೆಯು ಗಂಡನ ಮನೆ ತೊರೆದು, ತಂದೆಯ ಮನೆಗೆ ಮರಳಿದ್ದಾರೆ. ಪ್ರಸ್ತುತ, ಅವರು ಕಾನ್ಪುರದಲ್ಲಿ ನೆಲೆಸಿದ್ದಾರೆ. ತಾನು ಪತಿಯ ಮನೆಯಿಂದ ಬರುವಾಗ ತನ್ನೆಲ್ಲ ಒಡವೆಗಳನ್ನು ಅತ್ತೆ-ಮಾವ ಕಿತ್ತುಕೊಂಡಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ.
“ನಾವು ಪ್ರಕರಣ ದಾಖಲಿಸಿಕೊಂಡಿದ್ದು, ತನಿಖೆ ನಡೆಯುತ್ತಿದೆ. ಸಾಕ್ಷ್ಯಾಧಾರಗಳ ಆಧಾರದ ಮೇಲೆ ಮುಂದಿನ ಕ್ರಮ ಕೈಗೊಳ್ಳಲಾಗುವುದು,” ಎಂದು ಕಾನ್ಪುರ ಹಿರಿಯ ಪೊಲೀಸ್ ಅಧಿಕಾರಿ ಅಭಿಷೇಕ್ ಪಾಂಡೆ ತಿಳಿಸಿದ್ದಾರೆ.
