ರಷ್ಯಾದ ಈ ನಿರಂತರ ಮತ್ತು ರಿಯಾಯಿತಿ ದರದ ಪೂರೈಕೆಯು ಭಾರತದ ಬೃಹತ್ ಇಂಧನ ಕೊರತೆಯನ್ನು ಗಣನೀಯವಾಗಿ ನೀಗಿಸುವ ಜೊತೆಗೆ, ದೇಶದ ಹಣದುಬ್ಬರ ನಿಯಂತ್ರಣಕ್ಕೂ ಅತಿ ದೊಡ್ಡ ಮಟ್ಟದಲ್ಲಿ ನೆರವಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 90 ರಿಂದ 100 ಡಾಲರ್ ಗಡಿ ದಾಟಿ ವಿಪರೀತವಾಗಿ ಏರಿಳಿತಗೊಂಡರೂ, ರಷ್ಯಾದ ಅಗ್ಗದ ತೈಲವು ಭಾರತದೊಳಗೆ ರಿಟೇಲ್ ಇಂಧನ ಬೆಲೆಗಳು ಗಗನಕ್ಕೇರದಂತೆ ತಡೆದಿದೆ.
ಜಾಗತಿಕ ಮಟ್ಟದಲ್ಲಿ ದಿನೇ ದಿನೇ ತೀವ್ರಗೊಳ್ಳುತ್ತಿರುವ ಭೌಗೋಳಿಕ-ರಾಜಕೀಯ ಬಿಕ್ಕಟ್ಟುಗಳು, ಯುದ್ಧದ ಕಾರ್ಮೋಡಗಳು ಮತ್ತು ಇಂಧನ ಮಾರುಕಟ್ಟೆಯ ತೀವ್ರ ಅನಿಶ್ಚಿತತೆಯ ನಡುವೆ ಭಾರತಕ್ಕೆ ಬಹುದೊಡ್ಡ ಆರ್ಥಿಕ ನೆಮ್ಮದಿ ದೊರಕಿದೆ. ಅಮೆರಿಕ ಮತ್ತು ಯುರೋಪಿಯನ್ ಯೂನಿಯನ್ ಸೇರಿದಂತೆ ಪಾಶ್ಚಿಮಾತ್ಯ ದೇಶಗಳು ಹೇರಿರುವ ಅತ್ಯಂತ ಕಠಿಣ ಆರ್ಥಿಕ ನಿರ್ಬಂಧಗಳ ನಡುವೆಯೂ, ಭಾರತಕ್ಕೆ ನಿರಂತರವಾಗಿ ಕಚ್ಚಾ ತೈಲ ಮತ್ತು ದ್ರವೀಕೃತ ನೈಸರ್ಗಿಕ ಅನಿಲವನ್ನು (ಎಲ್‌ಎನ್‌ಜಿ) ಭಾರಿ ರಿಯಾಯಿತಿ ದರದಲ್ಲಿ ಪೂರೈಸಲು ರಷ್ಯಾ ಸಮ್ಮತಿ ಸೂಚಿಸಿದೆ. ಉಕ್ರೇನ್ ಸಂಘರ್ಷದ ಬಳಿಕ ಸಂಪೂರ್ಣವಾಗಿ ಬದಲಾದ ಜಾಗತಿಕ ರಾಜತಾಂತ್ರಿಕ ಮತ್ತು ಆರ್ಥಿಕ ಸಮೀಕರಣಗಳಲ್ಲಿ, ರಷ್ಯಾದ ಈ ನಿರ್ಧಾರವು ಭಾರತದ ಪಾಲಿಗೆ ಒಂದು ಆರ್ಥಿಕ ಸಂಜೀವಿನಿಯಾಗಿ ಪರಿಣಮಿಸಿದೆ ಎಂದರೆ ಅತಿಶಯೋಕ್ತಿಯಲ್ಲ.
ಭಾರತವು ವಿಶ್ವದ ಮೂರನೇ ಅತಿದೊಡ್ಡ ಇಂಧನ ಬಳಕೆದಾರ ಮತ್ತು ಆಮದುದಾರ ರಾಷ್ಟ್ರವಾಗಿದೆ. ದೇಶದ ಒಟ್ಟು ತೈಲ ಬೇಡಿಕೆಯ ಶೇಕಡಾ 85ರಷ್ಟನ್ನು ಹಾಗೂ ನೈಸರ್ಗಿಕ ಅನಿಲದ ಬೇಡಿಕೆಯ ಶೇಕಡಾ 50ರಷ್ಟನ್ನು ಕೇವಲ ಆಮದು ಮೂಲಕವೇ ಪೂರೈಸಿಕೊಳ್ಳಲಾಗುತ್ತಿದೆ. 2022ರ ಫೆಬ್ರವರಿಯಲ್ಲಿ ಶುರುವಾದ ರಷ್ಯಾ-ಉಕ್ರೇನ್ ಯುದ್ಧಕ್ಕೂ ಮುನ್ನ, ಭಾರತದ ಒಟ್ಟು ತೈಲ ಆಮದಿನಲ್ಲಿ ರಷ್ಯಾದ ಪಾಲು ಕೇವಲ ಶೇಕಡಾ 1 ರಿಂದ 2ರಷ್ಟು ಮಾತ್ರ ಇತ್ತು. ಆಗ ನಮ್ಮ ಬಹುಪಾಲು ಇಂಧನ ಅಗತ್ಯಗಳಿಗಾಗಿ ನಾವು ಮಧ್ಯಪ್ರಾಚ್ಯದ ಒಪೆಕ್ ದೇಶಗಳಾದ ಸೌದಿ ಅರೇಬಿಯಾ, ಇರಾಕ್ ಮತ್ತು ಯುಎಇ ಮೇಲೆ ಅತಿಯಾಗಿ ಅವಲಂಬಿತರಾಗಿದ್ದೆವು.
ಈ ಹಂತದಲ್ಲಿ ಅಮೆರಿಕದ ವಿದೇಶಾಂಗ ನೀತಿಗಳು ಮತ್ತು ನಿರ್ಬಂಧಗಳ ಇತಿಹಾಸವನ್ನು ನಾವು ಸೂಕ್ಷ್ಮವಾಗಿ ಗಮನಿಸಬೇಕಾಗುತ್ತದೆ. ಈ ಹಿಂದೆ ಭಾರತಕ್ಕೆ ಅತಿ ಹೆಚ್ಚು ತೈಲ ಪೂರೈಸುತ್ತಿದ್ದ ಇರಾನ್ ಮತ್ತು ದಕ್ಷಿಣ ಅಮೆರಿಕದ ಪ್ರಮುಖ ತೈಲ ಉತ್ಪಾದಕ ರಾಷ್ಟ್ರವಾದ ವೆನೆಜುವೆಲಾದ ಮೇಲೆ ಅಮೆರಿಕ ಕಠಿಣ ನಿರ್ಬಂಧಗಳನ್ನು ಹೇರಿದಾಗ, ಭಾರತದ ಇಂಧನ ಭದ್ರತೆಗೆ ದೊಡ್ಡ ಹೊಡೆತ ಬಿದ್ದಿತ್ತು. ಅಗ್ಗದ ತೈಲದ ಮೂಲಗಳು ಕೈತಪ್ಪಿದ್ದರಿಂದ ಪರ್ಯಾಯ ಮಾರುಕಟ್ಟೆಗಳನ್ನು ಹುಡುಕುವುದು ಭಾರತಕ್ಕೆ ಅನಿವಾರ್ಯವಾಗಿತ್ತು. ಹೀಗಾಗಿ, ಉಕ್ರೇನ್ ಯುದ್ಧದ ನಂತರ ಪಾಶ್ಚಿಮಾತ್ಯ ರಾಷ್ಟ್ರಗಳು ರಷ್ಯಾದ ತೈಲದ ಮೇಲೆ ಕಠಿಣ ನಿರ್ಬಂಧ ಹೇರಿದಾಗ, ರಷ್ಯಾ ತಾನೇ ಖುದ್ದಾಗಿ ಭಾರಿ ರಿಯಾಯಿತಿ ದರದಲ್ಲಿ ತೈಲ ನೀಡಲು ಮುಂದಾಯಿತು. ಈ ಅವಕಾಶವನ್ನು ಭಾರತ ತನ್ನ ರಾಷ್ಟ್ರೀಯ ಹಿತಾಸಕ್ತಿಯಿಂದ ಬಳಸಿಕೊಂಡಿತು.
ರಷ್ಯಾ ನೀಡಿದ ಈ ಬಂಪರ್ ಆಫರ್ ಅನ್ನು ತಕ್ಷಣವೇ ಸದುಪಯೋಗಪಡಿಸಿಕೊಂಡ ಭಾರತ, ತನ್ನ ಆರ್ಥಿಕ ಹಿತದೃಷ್ಟಿಯಿಂದ ರಷ್ಯಾದಿಂದ ಮಾಡುವ ಆಮದಿನ ಪ್ರಮಾಣವನ್ನು ದಿಢೀರ್ ಎಂದು ಹತ್ತು-ಹದಿನೈದು ಪಟ್ಟು ಹೆಚ್ಚಿಸಿತು. ಇದರ ಪರಿಣಾಮವಾಗಿ, ಪ್ರಸ್ತುತ ಭಾರತದ ಒಟ್ಟು ಕಚ್ಚಾ ತೈಲ ಆಮದಿನಲ್ಲಿ ರಷ್ಯಾದ ಪಾಲು ಸರಿಸುಮಾರು ಶೇಕಡಾ 35 ರಿಂದ 40ರಷ್ಟಕ್ಕೆ ತಲುಪಿದೆ. ಇತ್ತೀಚಿನ ವಾಣಿಜ್ಯ ಅಂಕಿ-ಅಂಶಗಳ ಪ್ರಕಾರ, ರಷ್ಯಾವು ನಮ್ಮ ದೀರ್ಘಕಾಲದ ಮತ್ತು ಸಾಂಪ್ರದಾಯಿಕ ಪ್ರಮುಖ ಪೂರೈಕೆದಾರರಾದ ಇರಾಕ್ ಮತ್ತು ಸೌದಿ ಅರೇಬಿಯಾವನ್ನು ಬಹುಹಿಂದೆ ಹಾಕಿ, ಭಾರತಕ್ಕೆ ಅತಿ ಹೆಚ್ಚು ಕಚ್ಚಾ ತೈಲ ಪೂರೈಸುವ ನಂಬರ್ ಒನ್ ರಾಷ್ಟ್ರವಾಗಿ ದೃಢವಾಗಿ ಹೊರಹೊಮ್ಮಿದೆ. ಇದು ಜಾಗತಿಕ ತೈಲ ಮಾರುಕಟ್ಟೆಯಲ್ಲಿಯೇ ಒಂದು ಐತಿಹಾಸಿಕ ಪಲ್ಲಟವಾಗಿದೆ.
ಇದನ್ನು ಓದಿದ್ದೀರಾ? IPL | ಒಂದೆಡೆ ಮನರಂಜನೆಯ ಮಹಾಪೂರ, ಮತ್ತೊಂದೆಡೆ ಜೂಜಾಟದ ಕರಾಳ ಘೋರ
ಕೇವಲ ಕಚ್ಚಾ ತೈಲ ಮಾತ್ರವಲ್ಲದೆ, ದ್ರವೀಕೃತ ನೈಸರ್ಗಿಕ ಅನಿಲ (LNG) ಪೂರೈಕೆಯಲ್ಲೂ ರಷ್ಯಾ ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತಿದೆ. ಭಾರತದ ಸರ್ಕಾರಿ ಸ್ವಾಮ್ಯದ ಅನಿಲ ನಿಗಮವಾದ ಗೇಲ್ (GAIL) ಮತ್ತು ರಷ್ಯಾದ ದೈತ್ಯ ಇಂಧನ ಕಂಪನಿ ಗ್ಯಾಜ್‌ಪ್ರೋಮ್ ನಡುವಿನ ದೀರ್ಘಾವಧಿಯ ಒಪ್ಪಂದದ ಅನ್ವಯ, ವಾರ್ಷಿಕ ಎಲ್.ಎನ್.ಜಿ ಪೂರೈಕೆಗೆ ರಷ್ಯಾ ತನ್ನ ಬದ್ಧತೆ ತೋರಿದೆ. ಅಮೆರಿಕದ ಡಾಲರ್ ಮತ್ತು ಸ್ವಿಫ್ಟ್ (SWIFT) ಪಾವತಿ ವ್ಯವಸ್ಥೆಗಳ ನಿರ್ಬಂಧದಿಂದಾಗಿ ಆರಂಭದಲ್ಲಿ ಸಾಗಾಟ ಮತ್ತು ಹಣ ಪಾವತಿಯಲ್ಲಿ ತೊಡಕುಗಳಾದವು. ಆದರೆ, ಇದೀಗ ಉಭಯ ದೇಶಗಳು ರೂಪಾಯಿ-ರೂಬಲ್ ಹಾಗೂ ಯುಎಇಯ ದಿರ್ಹಾಮ್ ಸೇರಿದಂತೆ ಪರ್ಯಾಯ ಪಾವತಿ ವ್ಯವಸ್ಥೆಗಳ ಮೂಲಕ ಪೂರೈಕೆಯನ್ನು ಸರಾಗಗೊಳಿಸಿವೆ. ಇದು ಭಾರತದ ರಸಗೊಬ್ಬರ ಕಾರ್ಖಾನೆಗಳು ಮತ್ತು ಕೈಗಾರಿಕೆಗಳ ಅನಿಲ ಕೊರತೆಯನ್ನು ಯಶಸ್ವಿಯಾಗಿ ನೀಗಿಸಿದೆ.
ರಷ್ಯಾದ ಈ ನಿರಂತರ ಮತ್ತು ರಿಯಾಯಿತಿ ದರದ ಪೂರೈಕೆಯು ಭಾರತದ ಬೃಹತ್ ಇಂಧನ ಕೊರತೆಯನ್ನು ಗಣನೀಯವಾಗಿ ನೀಗಿಸುವ ಜೊತೆಗೆ, ದೇಶದ ಹಣದುಬ್ಬರ ನಿಯಂತ್ರಣಕ್ಕೂ ಅತಿ ದೊಡ್ಡ ಮಟ್ಟದಲ್ಲಿ ನೆರವಾಗಿದೆ. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 90 ರಿಂದ 100 ಡಾಲರ್ ಗಡಿ ದಾಟಿ ವಿಪರೀತವಾಗಿ ಏರಿಳಿತಗೊಂಡರೂ, ರಷ್ಯಾದ ಅಗ್ಗದ ತೈಲವು ಭಾರತದೊಳಗೆ ರಿಟೇಲ್ ಇಂಧನ ಬೆಲೆಗಳು ಗಗನಕ್ಕೇರದಂತೆ ತಡೆದಿದೆ. ದೇಶೀಯವಾಗಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಸ್ಥಿರವಾಗಿರುವುದರಿಂದ, ದಿನಬಳಕೆಯ ಅಗತ್ಯ ವಸ್ತುಗಳ ಸಾಗಣೆ ವೆಚ್ಚವು ಸಂಪೂರ್ಣ ನಿಯಂತ್ರಣದಲ್ಲಿದೆ. ಇದು ಜನಸಾಮಾನ್ಯರ ಮೇಲಿನ ಜೀವನ ವೆಚ್ಚದ ಭಾರವನ್ನು ಗಣನೀಯವಾಗಿ ಕಡಿಮೆ ಮಾಡಿದೆ.
ಕೇವಲ ಹಣದುಬ್ಬರ ನಿಯಂತ್ರಣವಷ್ಟೇ ಅಲ್ಲದೆ, ರಷ್ಯಾದಿಂದ ಸಿಗುತ್ತಿರುವ ಈ ಬ್ಯಾರೆಲ್ ಒಂದಕ್ಕೆ ಅಂದಾಜು 10 ರಿಂದ 15 ಡಾಲರ್‌ನಷ್ಟು ಆಕರ್ಷಕ ರಿಯಾಯಿತಿಯಿಂದಾಗಿ, ಭಾರತದ ಬೊಕ್ಕಸಕ್ಕೆ ಸಾವಿರಾರು ಕೋಟಿ ರೂಪಾಯಿಗಳ ವಿದೇಶಿ ವಿನಿಮಯ ಉಳಿತಾಯವಾಗಿದೆ. ಇದಕ್ಕಿಂತ ಮಿಗಿಲಾಗಿ, ರಿಲಯನ್ಸ್ ಇಂಡಸ್ಟ್ರೀಸ್, ನಾಯರಾ ಎನರ್ಜಿ ಸೇರಿದಂತೆ ಭಾರತೀಯ ಖಾಸಗಿ ಮತ್ತು ಸರ್ಕಾರಿ ಸಂಸ್ಕರಣಾಗಾರಗಳು ರಷ್ಯಾದಿಂದ ಅತ್ಯಂತ ಅಗ್ಗದ ಕಚ್ಚಾ ತೈಲವನ್ನು ಬೃಹತ್ ಪ್ರಮಾಣದಲ್ಲಿ ತರಿಸಿಕೊಳ್ಳುತ್ತಿವೆ. ಆ ಕಚ್ಚಾ ತೈಲವನ್ನು ಸಂಸ್ಕರಿಸಿ. ಅದರಿಂದ ಉತ್ಪಾದಿಸಿದ ಡೀಸೆಲ್ ಮತ್ತು ವಿಮಾನ ಇಂಧನವನ್ನು (ಎಟಿಎಫ್) ಯುರೋಪ್ ಸೇರಿದಂತೆ ಪಾಶ್ಚಿಮಾತ್ಯ ದೇಶಗಳಿಗೇ ಮರಳಿ ರಫ್ತು ಮಾಡುತ್ತಿರುವುದರಿಂದ ದೇಶಕ್ಕೆ ಭಾರಿ ವಿದೇಶಿ ರಫ್ತು ಆದಾಯವೂ ಹರಿದುಬರುತ್ತಿದೆ.
ರಷ್ಯಾದ ಪೂರೈಕೆಯಿಂದ ಪ್ರಸ್ತುತದ ಇಂಧನ ಕೊರತೆ ಬಹಳ ಮಟ್ಟಿಗೆ ನೀಗಿದ್ದರೂ, ಭವಿಷ್ಯದ ಹಾದಿ ಸಂಪೂರ್ಣ ಸುಗಮವಾಗಿಲ್ಲ ಮತ್ತು ಸವಾಲುಗಳಿಂದ ಮುಕ್ತವಾಗಿಲ್ಲ. ರಷ್ಯಾದಿಂದ ತೈಲ ಖರೀದಿಸದಂತೆ ಹಾಗೂ ಜಿ7 ರಾಷ್ಟ್ರಗಳು ನಿಗದಿಪಡಿಸಿರುವ ಬೆಲೆ ಮಿತಿಯನ್ನು ಪಾಲಿಸುವಂತೆ ಅಮೆರಿಕ ಸೇರಿದಂತೆ ಪಾಶ್ಚಿಮಾತ್ಯ ರಾಷ್ಟ್ರಗಳು ಭಾರತದ ಮೇಲೆ ನಿರಂತರವಾಗಿ ರಾಜತಾಂತ್ರಿಕ ಒತ್ತಡಗಳನ್ನು ಹೇರುತ್ತಲೇ ಇವೆ. ಈ ಹಿನ್ನೆಲೆಯಲ್ಲಿ ಎಚ್ಚೆತ್ತಿರುವ ಭಾರತ, ತನ್ನ ಭವಿಷ್ಯದ ಇಂಧನ ಭದ್ರತೆಗಾಗಿ ಕೇವಲ ರಷ್ಯಾ ಅಥವಾ ಯಾವುದೇ ಒಂದು ದೇಶವನ್ನು ಅವಲಂಬಿಸದೆ, ತನ್ನ ಆಮದು ಮೂಲಗಳನ್ನು ಚಾಣಾಕ್ಷತನದಿಂದ ವೈವಿಧ್ಯಮಯಗೊಳಿಸುತ್ತಿದೆ. ಅಮೆರಿಕ, ವೆನೆಜುವಿಲಾ ಮತ್ತು ಸೌದಿ ಅರೇಬಿಯಾ ಕಡೆಗೂ ತನ್ನ ಮಾರುಕಟ್ಟೆಯನ್ನು ವಿಸ್ತರಿಸಿಕೊಳ್ಳುವ ಮೂಲಕ ಅಪಾಯವನ್ನು ಸಮತೋಲನ ಮಾಡುತ್ತಿದೆ.
ರಷ್ಯಾದ ತೈಲ ಮತ್ತು ಅನಿಲ ಪೂರೈಕೆಯು ಇಂಧನ ಬಿಕ್ಕಟ್ಟಿನ ಈ ಕಠಿಣ ಸಮಯದಲ್ಲಿ ಭಾರತದ ಆರ್ಥಿಕತೆಯ ಪಾಲಿಗೆ ಅಕ್ಷರಶಃ ಜೀವದಾನ ನೀಡಿದೆ. ಮುಂದಿನ ದಿನಗಳಲ್ಲೂ ಪಾಶ್ಚಿಮಾತ್ಯ ದೇಶಗಳ ನಿರಂತರ ಟೀಕೆಗಳನ್ನು ಮತ್ತು ಒತ್ತಡಗಳನ್ನು ದಿಟ್ಟವಾಗಿ ಬದಿಗಿಟ್ಟು, ತನ್ನ 140 ಕೋಟಿ ಜನರ ಆರ್ಥಿಕ ಹಿತದೃಷ್ಟಿಗೆ ಹಾಗೂ ದೇಶದ ಸಾರ್ವಭೌಮತೆಗೆ ಇದೇ ರೀತಿಯ ಸ್ವತಂತ್ರ ಮತ್ತು ರಾಷ್ಟ್ರೀಯ ಹಿತಾಸಕ್ತಿ ಆಧಾರಿತ ಸಮತೋಲಿತ ಹೆಜ್ಜೆಗಳು ಭಾರತವನ್ನು ಜಾಗತಿಕ ಇಂಧನ ಬಿಕ್ಕಟ್ಟಿನಿಂದ ಸುರಕ್ಷಿತವಾಗಿ ಪಾರು ಮಾಡಲಿವೆ.
