ಜೂನ್ ತಿಂಗಳಲ್ಲಿ ವಾಡಿಕೆಗಿಂತ ಶೇ. 40ರಷ್ಟು ಕಡಿಮೆ ಮಳೆಯಾಗುವ ಮೂಲಕ ಈ ಬಾರಿಯ ಮುಂಗಾರು ಐತಿಹಾಸಿಕ ಕೊರತೆ ದಾಖಲಿಸಿದೆ. ಶತಮಾನದಲ್ಲೇ ಇದು ಅತ್ಯಂತ ಒಣ ಜೂನ್ ಎಂದು ಕರೆಯಲ್ಪಡುತ್ತಿದೆ. ಜುಲೈನಲ್ಲಿಯೂ ಕೂಡ ಸಾಮಾನ್ಯ ಮಟ್ಟಕ್ಕಿಂತಲೂ ಕಡಿಮೆ ಮಳೆಯಾಗಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (IMD) ಎಚ್ಚರಿಕೆ ನೀಡಿದೆ.
ದೇಶದ ಅರ್ಧಕ್ಕೂ ಹೆಚ್ಚು ಜನಸಂಖ್ಯೆಯ ಬದುಕು ಕೃಷಿಯನ್ನೇ ಅವಲಂಬಿಸಿದೆ. ದೇಶದ ಒಟ್ಟು ಕೃಷಿ ಭೂಮಿಯಲ್ಲಿ ಬಹುತೇಕ ಅರ್ಧದಷ್ಟು ಭಾಗ ಸಂಪೂರ್ಣವಾಗಿ ಮಳೆಯಾಧಾರಿತವಾಗಿದೆ. ಇಂತಹ ಪರಿಸ್ಥಿತಿಯಲ್ಲಿ ಮುಂಗಾರು ಮಳೆಯ ಸಕಾಲಿಕ ಮತ್ತು ಸಮರ್ಪಕ ಆಗಮನವು ಕೋಟ್ಯಂತರ ರೈತರ ಪಾಲಿಗೆ ಜೀವನಾಡಿ. ಆದರೆ, ಈಗ ಅಂದಾಜಿಸಿರುವ ಮಳೆ ಕೊರತೆಯು ಕೃಷಿಗೆ ಮಾತ್ರವಲ್ಲ, ದೈನಂದಿನ ಕುಡಿಯುವ ನೀರಿನ ಪೂರೈಕೆ, ಕೈಗಾರಿಕೆಗಳ ಕಾರ್ಯಾಚರಣೆ ಮತ್ತು ಜಲವಿದ್ಯುತ್ ಉತ್ಪಾದನೆಯಂತಹ ಪ್ರತಿಯೊಂದು ಪ್ರಮುಖ ಕ್ಷೇತ್ರಕ್ಕೂ ಪೆಟ್ಟು ಕೊಡಲಿದೆ.
ಜೂನ್ ತಿಂಗಳಲ್ಲಿ ಮಳೆಯ ಕೊರತೆಗೆ ಮುಖ್ಯ ಕಾರಣಗಳೆಂದರೆ ವಾಯುಭಾರ ಕುಸಿತದ ಕೊರತೆ, ಮಾರುತಗಳ ದುರ್ಬಲ ಹರಿವು ಮತ್ತು ಮಳೆಯನ್ನು ಉತ್ತೇಜಿಸುವ ‘ಮ್ಯಾಡನ್ ಜೂಲಿಯನ್ ಆಸಿಲೇಷನ್’ನಂತಹ ವ್ಯವಸ್ಥೆಗಳು ಪೂರಕವಾಗಿರದಿರುವುದು. ಇದೀಗ ಪೆಸಿಫಿಕ್ ಸಾಗರದಲ್ಲಿ ಉಂಟಾಗಿರುವ ‘ಎಲ್ ನಿನೋ’ ಪ್ರಭಾವವು ಜುಲೈನಲ್ಲಿ ಇನ್ನಷ್ಟು ಬಲಗೊಳ್ಳುವ ಸಾಧ್ಯತೆಯಿದ್ದು, ಇದು ಮಳೆಯ ಪ್ರಮಾಣವನ್ನು ತಗ್ಗಿಸುವುದರ ಜೊತೆಗೆ ತಾಪಮಾನದಲ್ಲಿಯೂ ಏರಿಕೆಗೆ ಕಾರಣವಾಗಬಹುದು ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ.
ಇದನ್ನೂ ಓದಿ: ಯುರೋಪ್‌ನಲ್ಲಿ ಬಿಸಿಗಾಳಿ: ಫ್ರಾನ್ಸ್‌ನಲ್ಲಿ 1000ಕ್ಕೂ ಹೆಚ್ಚು ಸಾವು
ಜೂನ್ ತಿಂಗಳು ಕಳೆದ 1901ರಿಂದೀಚೆಗೆ 5ನೇ ಅತಿ ಒಣಗಿದ ತಿಂಗಳಾಗಿ ದಾಖಲಾಗಿದೆ. ಜುಲೈ ತಿಂಗಳು ಮಳೆಗಾಲದ ಅತ್ಯಂತ ಪ್ರಮುಖ ತಿಂಗಳಾಗಿದ್ದು, ಇಡೀ ಹಂಗಾಮಿನ ಶೇ. 32ರಷ್ಟು ಮಳೆಯನ್ನು ತಂದುಕೊಡುತ್ತದೆ. ಈಗಿನ ಅಂದಾಜಿನಂತೆ ಜುಲೈನಲ್ಲೂ ಕೊರತೆ ಕಂಡುಬರುತ್ತಿರುವುದು ಕೃಷಿ ವಲಯದ ಆತಂಕ ಹೆಚ್ಚಿಸಿದೆ. ಆದಾಗ್ಯೂ, ಜೂನ್ ಅಂತ್ಯದಲ್ಲಿ ಕಂಡುಬಂದ ಅಲ್ಪ ಸುಧಾರಣೆಯು ಜುಲೈನ ಮೊದಲ ವಾರದಲ್ಲೂ ಮುಂದುವರಿಯಬಹುದು ಎಂಬುದು ಸಣ್ಣ ಆಶಾದಾಯಕ ಸಂಗತಿ. ಇಂತಹ ಸಂದರ್ಭದಲ್ಲಿ ಕೃಷಿ ಚಟುವಟಿಕೆಗಳಲ್ಲಿ ನೀರಿನ ಮಿತಬಳಕೆ ಮತ್ತು ಜಲ ಸಂರಕ್ಷಣೆಯತ್ತ ಹೆಚ್ಚಿನ ಗಮನ ಹರಿಸುವುದು ಅಗತ್ಯವಾಗಿದೆ.
