ಗುಜರಾತ್‌ನ ಆನಂದ್ ಜಿಲ್ಲೆಯ ಆದಾಸ್ ಗ್ರಾಮದ ಬಳಿ ನಿರ್ಮಾಣ ಹಂತದಲ್ಲಿದ್ದ ರೈಲ್ವೇ ಮೇಲ್ಸೇತುವೆಯ (ROB) ಒಂದು ಭಾಗ ಹಠಾತ್ತನೆ ಕುಸಿದು ಬಿದ್ದಿದೆ. ಸದ್ಯ ಅಪಘಾತದಲ್ಲಿ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ ಎಂದು ಪ್ರಾಥಮಿಕ ವರದಿಗಳು ದೃಢಪಡಿಸಿವೆ.
ವಡೋದ್ ಮತ್ತು ಆದಾಸ್ ರೋಡ್ ನಿಲ್ದಾಣಗಳ ನಡುವೆ ದೀರ್ಘಕಾಲದಿಂದ ಈ ಮೇಲ್ಸೇತುವೆಯ ಕಾಮಗಾರಿ ನಡೆಯುತ್ತಿತ್ತು. ಶನಿವಾರದಂದು ಎರಡು ಪಿಲ್ಲರ್‌ಗಳ ನಡುವಿನ ಕಾಂಕ್ರೀಟ್ ರಚನೆಯ ಒಂದು ಭಾಗ ಇದ್ದಕ್ಕಿದ್ದಂತೆ ಕುಸಿದು ಬಿದ್ದಿದ್ದರಿಂದ, ಇಡೀ ಮೇಲ್ಸೇತುವೆಯ ನಿರ್ಮಾಣ ಹಂತದ ಆಕೃತಿಗೂ ಭಾರಿ ಹಾನಿಯಾಗಿದೆ. ಘಟನೆ ಸಂಭವಿಸಿದ ತಕ್ಷಣವೇ ರೈಲ್ವೆ ಮತ್ತು ಸಂಬಂಧಪಟ್ಟ ಏಜೆನ್ಸಿಗಳ ಅಧಿಕಾರಿಗಳು ಹಾಗೂ ತಾಂತ್ರಿಕ ತಜ್ಞರ ತಂಡ ಸ್ಥಳಕ್ಕೆ ಧಾವಿಸಿದ್ದು, ತನಿಖೆ ಆರಂಭಿಸಿದೆ.
VIDEO | Gujarat: Portion of under-construction Railway overbridge collapsed near Adas village in Anand; no casualties reported.
— Press Trust of India (@PTI_News) May 31, 2026
(Full video available on PTI Videos – https://t.co/n147TvrpG7) pic.twitter.com/ibHWd0fEhm
ಈ ಕುರಿತು ಮಾಹಿತಿ ನೀಡಿರುವ ವಡೋದರಾ ರೈಲ್ವೆ ವಿಭಾಗದ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಅನುಭವ್ ಸಕ್ಸೇನಾ, “ವಡೋದ್ ಮತ್ತು ಆದಾಸ್ ರೋಡ್ ನಿಲ್ದಾಣಗಳ ನಡುವಿನ ಲೆವೆಲ್ ಕ್ರಾಸಿಂಗ್ ಸಂಖ್ಯೆ 250ರ ಮೇಲಿರುವ ಈ ಮೇಲ್ಸೇತುವೆ ಯೋಜನೆಯನ್ನು ವಡೋದರಾ ವಿಭಾಗದ ‘ಗತಿ ಶಕ್ತಿ ಯುನಿಟ್’ ಅನುಷ್ಠಾನಗೊಳಿಸುತ್ತಿದೆ. ಇದೊಂದು ಸಣ್ಣ ಘಟನೆಯಾಗಿದ್ದು, ಸೇತುವೆಯ ನಿರ್ಮಾಣ ಕಾಮಗಾರಿ ಪ್ರಗತಿಯಲ್ಲಿದ್ದಾಗ ಕೇವಲ ಅಪ್ರೋಚ್ ಗಿರ್ಡರ್‌ಗಳು ಮಾತ್ರ ಕುಸಿದಿವೆ. ಅಪಘಾತ ನಡೆದ ಸ್ಥಳವು ಪ್ರಮುಖ ರೈಲ್ವೆ ಹಳಿಗಳಿಂದ ಸಾಕಷ್ಟು ದೂರದಲ್ಲಿರುವುದರಿಂದ, ದೈನಂದಿನ ರೈಲು ಸಂಚಾರಕ್ಕಾಗಲಿ ಅಥವಾ ಸಾರ್ವಜನಿಕ ರಸ್ತೆ ಸಂಚಾರಕ್ಕಾಗಲಿ ಯಾವುದೇ ರೀತಿಯ ಅಡ್ಡಿಯಾಗಿಲ್ಲ” ಎಂದು ಮಾಹಿತಿ ನೀಡಿರುವುದಾಗಿ ಪಿಟಿಐ ವರದಿ ಮಾಡಿದೆ.
ಇದನ್ನೂ ಓದಿ: ‘ಗೌರವಾನ್ವಿತ ಜಿರಳೆ’ – ಸೋನಮ್‌ಗೆ ಮತ್ತೆ ಬಂಧನದ ಎಚ್ಚರಿಕೆ ನೀಡಿದ್ರಾ ಲಡಾಖ್ ಉಪರಾಜ್ಯಪಾಲರು?
ಪಿಟಿಐ ಹಂಚಿಕೊಂಡಿರುವ ಕುಸಿದು ಬಿದ್ದಿರುವ ಸೇತುವೆಯ ಸ್ಥಳದ ವಿಡಿಯೋಗೆ ಹಲವು X ಖಾತೆದಾರರು ಪ್ರತಿಕ್ರಿಯಿಸಿ, ಬಿಜೆಪಿ ಅಧಿಕಾರದಲ್ಲಿರುವ ರಾಜ್ಯಗಳಲ್ಲೇ ಹೀಗಾಗುತ್ತದೆ, ಇದು ಗುಜರಾತ್‌ ಮಾಡೆಲ್‌, ಇಂತ ವಿಷಯಗಳು ಗೋದಿ ಮಾಧ್ಯಮಗಳಲ್ಲಿ ಪ್ರಸಾರವಾಗುವುದಿಲ್ಲ, ಭಾರತ ಟ್ರಿಲಿಯನ್‌ ಲೆಕ್ಕದಲ್ಲಿ ಆರ್ಥಿಕತೆ ಹೊಂದಿದೆಯಂತೆ, ಆದರೆ ನೆಟ್ಟಗೊಂದು ಕಾಮಗಾರಿ ಮಾಡಲಾಗುತ್ತಿಲ್ಲ! ಎಂಬಿತ್ಯಾದಿಯಾಗಿ ಟೀಕಿಸುತ್ತಿದ್ದಾರೆ. ಜೊತೆಗೆ ಕಾಮಗಾರಿ ಮುಗಿಯುವ ಮುನ್ನವೇ ಮೇಲ್ಸೇತುವೆ ಕುಸಿದಿರುವುದಕ್ಕೆ ಕಳಪೆ ಕಾಮಗಾರಿ ಮತ್ತು ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರವೇ ನೇರ ಕಾರಣ ಎಂದು ಆಕ್ರೋಶ ವ್ಯಕ್ತಪಡಿಸುವವರನ್ನೇ ಗುರಿಯಾಗಿಸಿಕೊಂಡು, ಕೆಲ ಐಟಿ ಸೆಲ್‌ ಅತೀ ಬುದ್ಧಿವಂತರು “ದೇಶದ್ರೋಹಿಗಳು” ಎಂದು ಹಣೆಪಟ್ಟಿ ಕಟ್ಟಿ ಸಾರ್ವಜನಿಕರ ಗಮನವನ್ನು ದಿಕ್ಕುತಪ್ಪಿಸುವ ಪ್ರಯತ್ನ ಮಾಡುತ್ತಿರುವುದು ಈಗ ಮತ್ತೊಂದು ಚರ್ಚೆಗೆ ಗ್ರಾಸವಾಗಿದೆ.
