“ನಿಂಬೆಹಣ್ಣು ಕತ್ತರಿಸಿ, ಪ್ರಾರ್ಥನೆ ಮಾಡುವ ಮೂಲಕ ನಾನು ಮಳೆಯನ್ನು ನಿಲ್ಲಿಸಿದೆ” ಎಂದು ಛತ್ತೀಸ್‌ಗಢದ ಕಂಕೇರ್ ಕ್ಷೇತ್ರದ ಬಿಜೆಪಿ ಸಂಸದ ಭೋಜರಾಜ್ ನಾಗ್ ನೀಡಿದ ಹೇಳಿಕೆ ಇದೀಗ ವಿವಾದಕ್ಕೆ ಕಾರಣವಾಗಿದೆ.
ಸಂಸದರ ಈ ಹೇಳಿಕೆಯನ್ನು ತೀವ್ರವಾಗಿ ಟೀಕಿಸಿರುವ ಕಾಂಗ್ರೆಸ್, ಬಿಜೆಪಿಯನ್ನು ‘ಮೂಢನಂಬಿಕೆಗಳ ಪಕ್ಷ’ ಎಂದು ಜರಿದಿದ್ದು, “ನಿಂಬೆಹಣ್ಣು ಕತ್ತರಿಸುವುದರಿಂದಲೇ ಎಲ್ಲವೂ ಆಗುವುದಾದರೆ, ಅದೇ ನಿಂಬೆಯನ್ನು ಕತ್ತರಿಸಿ ಗಗನಕ್ಕೇರಿರುವ ಅಗತ್ಯ ವಸ್ತುಗಳ ಬೆಲೆ ಏರಿಕೆಯನ್ನು ನಿಯಂತ್ರಿಸಿ” ಎಂದು ಲೇವಡಿ ಮಾಡಿದೆ.
ಬಾಲೋದ್‌ನಲ್ಲಿ ಇತ್ತೀಚೆಗೆ ನಡೆದ ಮುಖ್ಯಮಂತ್ರಿ ವಿಷ್ಣುದೇವ್ ಸಾಯ್ ಅವರ ‘ಮಹತಾರಿ ವಂದನ್ ಯೋಜನೆ’ಯ ಹಣ ವರ್ಗಾವಣೆ ಕಾರ್ಯಕ್ರಮದಲ್ಲಿ ಸಂಸದರು ಈ ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ. “ಮುಖ್ಯಮಂತ್ರಿಯವರ ಆಗಮನದ ಪ್ರೋಟೋಕಾಲ್ ಮಧ್ಯರಾತ್ರಿ 12 ಗಂಟೆಗೆ ಬಿಡುಗಡೆಯಾಯಿತು. ಹವಾಮಾನ ವೈಪರೀತ್ಯದ ನಡುವೆಯೂ ಅವರು ಬಾಲೋದ್‌ಗೆ ಬರಲು ಸಿದ್ಧರಾದರು. ಈ ವೇಳೆ ಮಳೆ ಅಡ್ಡಿಯಾಗಬಾರದೆಂದು ನಾನು ಬೂಢಾದೇವ್ ಮಹಾದೇವನಿಗೆ ಪ್ರಾರ್ಥನೆ ಸಲ್ಲಿಸಿ, ಒಂದು ನಿಂಬೆಹಣ್ಣನ್ನು ಕತ್ತರಿಸಿದೆ. ತಕ್ಷಣವೇ ಮಳೆ ನಿಂತುಹೋಯಿತು” ಎಂದು ಭೋಜರಾಜ್ ನಾಗ್ ವೇದಿಕೆ ಮೇಲೆಯೇ ಬಹಿರಂಗವಾಗಿ ಹೇಳಿಕೊಂಡಿದ್ದಾರೆ. ಈ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ರಾಜಕೀಯ ವಲಯದಲ್ಲಿ ತೀವ್ರ ವಾಕ್ಸಮರ ಶುರುವಾಗಿದೆ.
ಸಂಸದರ ಹೇಳಿಕೆಗೆ ತೀಕ್ಷ್ಣವಾಗಿ ತಿರುಗೇಟು ನೀಡಿರುವ ಛತ್ತೀಸ್‌ಗಢ ಪ್ರದೇಶ ಕಾಂಗ್ರೆಸ್ ಸಮಿತಿ (ಪಿಸಿಸಿ) ಅಧ್ಯಕ್ಷ ದೀಪಕ್ ಬೈಜ್, ಕರೋನಾ ಸಮಯದಲ್ಲಿ ಚಪ್ಪಾಳೆ ತಟ್ಟಿದ ಮತ್ತು ಮೇಣದಬತ್ತಿ ಹಚ್ಚಿದ ಜನರಿಂದ ಇಂಥದ್ದೇ ಮಾತುಗಳು ಬರುತ್ತವೆ ಎಂದು ಲೇವಡಿ ಮಾಡಿದ್ದಾರೆ. ನಿಂಬೆಹಣ್ಣು ಕತ್ತರಿಸುವುದರಿಂದ ಮಳೆ ನಿಲ್ಲುತ್ತದೆ ಎಂದಾದರೆ, ಅದೇ ತಂತ್ರವನ್ನು ಬಳಸಿ ಹಣದುಬ್ಬರವನ್ನು ನಿಲ್ಲಿಸಲಿ. ಇಂದು ಸಕ್ಕರೆ ಕೆ.ಜಿ.ಗೆ 70 ರೂಪಾಯಿಗೆ ಮಾರಾಟವಾಗುತ್ತಿದೆ, ಪೆಟ್ರೋಲ್-ಡೀಸೆಲ್ ದರ ಲೀಟರ್‌ಗೆ 111 ರೂಪಾಯಿ ದಾಟಿದೆ, ಬೇಳೆಕಾಳು ಮತ್ತು ಅಡುಗೆ ಎಣ್ಣೆ ಬೆಲೆಗಳು ಆಕಾಶ ಮುಟ್ಟುತ್ತಿವೆ, ವಿದ್ಯುತ್ ಬಿಲ್ ಕೂಡ ಮಿತಿಮೀರುತ್ತಿದೆ. ಇವೆಲ್ಲವನ್ನೂ ಕಡಿಮೆ ಮಾಡಲು ಸಂಸದರು ನಿಂಬೆಹಣ್ಣು ಕತ್ತರಿಸಲಿ. ಇದ್ಯಾವುದೂ ಆಗದಿದ್ದರೆ ಮುಖ್ಯಮಂತ್ರಿಗೆ ಸದ್ಬುದ್ಧಿ ನೀಡುವಂತೆ ಪ್ರಾರ್ಥಿಸಿ ಒಂದು ನಿಂಬೆಹಣ್ಣು ಕತ್ತರಿಸಲಿ ಎಂದು ವ್ಯಂಗ್ಯವಾಡಿದ್ದಾರೆ.
ಈ ವಿಚಾರವಾಗಿ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಮಾಡಿರುವ ಮಾಜಿ ಸಚಿವ ಹಾಗೂ ಪಿಸಿಸಿ ಮಾಜಿ ಅಧ್ಯಕ್ಷ ಮೋಹನ್ ಮರ್ಕಾಮ್, ನಿಂಬೆಹಣ್ಣಿನಿಂದ ಮಳೆ ನಿಲ್ಲಿಸಲು ಸಾಧ್ಯವಾದರೆ ಮಾನ್ಯ ಸಂಸದರು ದಯವಿಟ್ಟು ಬಸ್ತಾರ್‌ನಲ್ಲಿ ಮಳೆ ಸುರಿಸುವಂತೆಯೂ ಮಾಡಬೇಕು ಎಂದು ಸವಾಲು ಹಾಕಿದ್ದಾರೆ. ಅಲ್ಲಿನ ರೈತರು ಮಳೆಗಾಗಿ ಪರಿತಪಿಸುತ್ತಿದ್ದಾರೆ, ನಿಮ್ಮ ಪ್ರಾರ್ಥನೆಯಲ್ಲಿ ಅಷ್ಟೊಂದು ಶಕ್ತಿ ಇದ್ದರೆ ಆ ಕೃಪಾದೃಷ್ಟಿಯನ್ನು ಬಸ್ತಾರ್ ಮೇಲೂ ಬೀರಿ ಎಂದು ಆಗ್ರಹಿಸಿದ್ದಾರೆ. ಇದರ ಜೊತೆಗೆ ಛತ್ತೀಸ್‌ಗಢ ಕಾಂಗ್ರೆಸ್ ತನ್ನ ಅಧಿಕೃತ ಖಾತೆಯಲ್ಲಿ, “ಮಳೆ ಹೆಚ್ಚಾದಾಗ ಹವಾಮಾನ ಇಲಾಖೆಗೆ ಕರೆ ಮಾಡಬೇಡಿ, ಬದಲಾಗಿ ಬಿಜೆಪಿ ಸಂಸದರ ಕೈಗೊಂದು ನಿಂಬೆಹಣ್ಣು ಕೊಡಿ. ಇದು ಬಿಜೆಪಿಯ ಹೊಸ ವಿಪತ್ತು ನಿರ್ವಹಣಾ ಮಾದರಿ: ನಿಂಬೆ ಕತ್ತರಿಸಿ, ಮಳೆ ಓಡಿಸಿ” ಎಂದು ಲೇವಡಿ ಮಾಡಿ ಪೋಸ್ಟ್ ಮಾಡಿದೆ.
