ಅಮೆರಿಕ ನಿರ್ಮಿತ ಟ್ಯಾಂಕ್‌ ವಿರೋಧಿ ಜ್ಯಾವೆಲಿನ್ ಕ್ಷಿಪಣಿ ವ್ಯವಸ್ಥೆಯನ್ನು ಖರೀದಿಸಲು ಭಾರತ ಅಂತಿಮ ಒಪ್ಪಂದ ಮಾಡಿಕೊಂಡಿದೆ. ಈ ಸಂಬಂಧ ಭಾರತೀಯ ಸೇನೆ ಶುಕ್ರವಾರ ‘ಲೆಟರ್ ಆಫ್ ಆಫರ್ ಅಂಡ್ ಅಕ್ಸೆಪ್ಟನ್ಸ್’ಗೆ ಸಹಿ ಹಾಕಿದೆ. ಅಮೆರಿಕದ ಫಾರಿನ್ ಮಿಲಿಟರಿ ಸೇಲ್ಸ್ ಪ್ರಕ್ರಿಯೆಯ ಮೂಲಕ ಭಾರತವು ಶಸ್ತ್ರಾಸ್ತ್ರ ಖರೀದಿ ಮಾಡಲಿದೆ.
ಜ್ಯಾವೆಲಿನ್ ಖರೀದಿಗೆ ಸಂಬಂಧಿಸಿದ ಚರ್ಚೆಗಳು ಹಲವು ವರ್ಷಗಳಿಂದ ನಡೆಯುತ್ತಿದ್ದು, ಈಗ ಭಾರತೀಯ ಸೇನೆ ಅಧಿಕೃತವಾಗಿ ಖರೀದಿ ಪ್ರಕ್ರಿಯೆ ಆರಂಭಿಸಿದೆ. ಈ ಒಪ್ಪಂದವನ್ನು ಭಾರತ–ಅಮೆರಿಕ ರಕ್ಷಣಾ ಸಹಕಾರದ ಮತ್ತೊಂದು ಪ್ರಮುಖ ಹೆಜ್ಜೆಯೆಂದು ಕೇಂದ್ರ ಸರ್ಕಾರ ಹೇಳಿಕೊಂಡಿದೆ.
ಭಾರತದ ಈ ನಿರ್ಧಾರವನ್ನು ಅಮೆರಿಕ ಸ್ವಾಗತಿಸಿದ್ದು, ಎರಡೂ ದೇಶಗಳ ಸೈನಿಕ ಸಹಕಾರ ಮತ್ತಷ್ಟು ಬಲವಾಗುತ್ತಿರುವುದಕ್ಕೆ ಇದು ಉದಾಹರಣೆ ಎಂದು ಹೇಳಿದೆ. ಅಮೆರಿಕದ ರಾಯಭಾರಿ ಸರ್ಜಿಯೋ ಗೋರ್, “ಈ ಒಪ್ಪಂದವು ಅಮೆರಿಕ ಮತ್ತು ಭಾರತದ ರಕ್ಷಣಾ ಪಾಲುದಾರಿಕೆ ಇನ್ನಷ್ಟು ಬಲವಾಗಿ ಮತ್ತು ಪರಿಣಾಮಕಾರಿಯಾಗಿ ಬೆಳೆಯುತ್ತಿರುವುದನ್ನು ತೋರಿಸುತ್ತದೆ” ಎಂದು ಹೇಳಿದ್ದಾರೆ.
ಎರಡೂ ದೇಶಗಳ ರಕ್ಷಣಾ ಕೈಗಾರಿಕೆಗಳ ನಡುವೆ ಭವಿಷ್ಯದಲ್ಲಿ ಜಂಟಿ ಉತ್ಪಾದನೆ ಮತ್ತು ತಂತ್ರಜ್ಞಾನ ಸಹಕಾರಕ್ಕೆ ಹೊಸ ಅವಕಾಶಗಳನ್ನು ತೆರೆದಿಡಬಹುದು ಎಂದು ಅಮೆರಿಕದ ರಾಯಭಾರ ಕಚೇರಿ ತಿಳಿಸಿದೆ.
ಕಳೆದ ನವೆಂಬರ್‌ನಲ್ಲಿ ಅಮೆರಿಕ ಭಾರತಕ್ಕೆ ಜ್ಯಾವೆಲಿನ್ ಶಸ್ತ್ರಾಸ್ತ್ರ ವ್ಯವಸ್ಥೆ ಮಾರಾಟ ಮಾಡುವ ಸಂಭವನೀಯ ಒಪ್ಪಂದಕ್ಕೆ ಅನುಮೋದನೆ ನೀಡಿತ್ತು. ಅದರಡಿ 100 ಎಫ್‌ಜಿಎಂ-148 ಜ್ಯಾವೆಲಿನ್ ಕ್ಷಿಪಣಿಗಳು, ಒಂದು ಹೆಚ್ಚುವರಿ ಪರೀಕ್ಷಾ ಅಥವಾ ‘ಫ್ಲೈ-ಟು-ಬಯ್’ ಕ್ಷಿಪಣಿ, 25 ಲೈಟ್‌ವೇಟ್ ಕಮಾಂಡ್ ಲಾಂಚ್ ಯುನಿಟ್‌ಗಳು ಅಥವಾ ಬ್ಲಾಕ್-1 ಕಮಾಂಡ್ ಲಾಂಚ್ ಯುನಿಟ್‌ಗಳು ಮತ್ತು ಸಂಬಂಧಿತ ಉಪಕರಣಗಳನ್ನು ಪೂರೈಸುವ ಯೋಜನೆ ಇತ್ತು. ಇದರ ಅಂದಾಜು ವೆಚ್ಚ ಸುಮಾರು 45.7 ಮಿಲಿಯನ್ ಅಮೆರಿಕನ್ ಡಾಲರ್ (436.07 ಕೋಟಿ ರೂ.) ಎಂದು ಹೇಳಲಾಗಿತ್ತು. ಈಗ ಭಾರತ ಖರೀದಿಗೆ ಒಪ್ಪಿಗೆ ಸೂಚಿಸಿದೆ.
ಜ್ಯಾವೆಲಿನ್ ಕ್ಷಿಪಣಿಯನ್ನು ಅಮೆರಿಕದ RTX ಮತ್ತು ಲಾಕ್ಹೀಡ್ ಮಾರ್ಟಿನ್ ಕಂಪನಿಗಳ ಜಂಟಿ ಸಹಭಾಗಿತ್ವದಲ್ಲಿ ನಿರ್ಮಿಸಲಾಗುತ್ತದೆ. ಇದು ಒಬ್ಬ ಸೈನಿಕನೇ ಹೊತ್ತುಕೊಂಡು ಹೋಗಬಹುದಾದ, ಮಧ್ಯಮ ವ್ಯಾಪ್ತಿಯ, ಅತ್ಯಾಧುನಿಕ ಟ್ಯಾಂಕ್‌ ವಿರೋಧಿ ಶಸ್ತ್ರಾಸ್ತ್ರ ವ್ಯವಸ್ಥೆಯಾಗಿದೆ ಎಂದು ಹೇಳಲಾಗಿದೆ.
ಈ ಲೇಖನ ಓದಿದ್ದೀರಾ?: ನಾಗೇಂದ್ರ ಪ್ರಕರಣ | ಬಿಜೆಪಿ-ಕಾಂಗ್ರೆಸ್‌ ರಾಜಕೀಯ ಲೆಕ್ಕಾಚಾರವೇನು? ಒಂದೇ ಏಟಿಗೆ ಎರಡು ಹಕ್ಕಿ ಹೊಡೆವುದೇ
ಜ್ಯಾವೆಲಿನ್‌ನ ಪ್ರಮುಖ ವೈಶಿಷ್ಟ್ಯವೇ ‘ಫೈರ್ ಅಂಡ್ ಫರ್ಗೆಟ್’ ತಂತ್ರಜ್ಞಾನ. ಅಂದರೆ ಗುರಿಯನ್ನು ಗುರುತಿಸಿ ಕ್ಷಿಪಣಿಯನ್ನು ಉಡಾಯಿಸಿದ ಬಳಿಕ ಅದನ್ನು ನಿರಂತರವಾಗಿ ನಿಯಂತ್ರಿಸುವ ಅಗತ್ಯವಿಲ್ಲ. ಕ್ಷಿಪಣಿ ತನ್ನ ಗುರಿಯನ್ನು ಸ್ವತಃ ಹಿಂಬಾಲಿಸಿ ಹೊಡೆದುರುಳಿಸುವ ಸಾಮರ್ಥ್ಯ ಹೊಂದಿದೆ ಎಂದು ಅಮೆರಿಕ ಹೇಳಿಕೊಂಡಿದೆ.
ಇದನ್ನು ಮುಖ್ಯವಾಗಿ ಶತ್ರುಪಕ್ಷದ ಟ್ಯಾಂಕ್‌ಗಳು, ವಾಹನಗಳು ಹಾಗೂ ಬಲಪಡಿಸಲಾದ ರಕ್ಷಣಾ ನೆಲೆಗಳನ್ನು ಧ್ವಂಸ ಮಾಡಲು ವಿನ್ಯಾಸಗೊಳಿಸಲಾಗಿದೆ. ಕವಚವುಳ್ಳ ವಾಹನಗಳ ದುರ್ಬಲ ಮೇಲ್ಭಾಗವನ್ನು ಗುರಿಯಾಗಿಸಿ ದಾಳಿ ಮಾಡುವ ಸಾಮರ್ಥ್ಯವೂ ಜ್ಯಾವೆಲಿನ್‌ಗೆ ಇದೆ. ಇದರಿಂದಾಗಿ ಸಾಂಪ್ರದಾಯಿಕ ಟ್ಯಾಂಕ್‌ ವಿರೋಧಿ ಶಸ್ತ್ರಾಸ್ತ್ರಗಳಿಗಿಂತ ಇದು ಹೆಚ್ಚು ಪರಿಣಾಮಕಾರಿ ಎಂದು ಪರಿಗಣಿಸಲಾಗಿದೆ.
ಅಮೆರಿಕದ ಸೇನೆ ಮತ್ತು ಮೆರೈನ್ ಪಡೆಗಳು ಈಗಾಗಲೇ ಈ ಕ್ಷಿಪಣಿ ವ್ಯವಸ್ಥೆಯನ್ನು ಬಳಸುತ್ತಿವೆ. ಹಲವು ದೇಶಗಳೂ ಜ್ಯಾವೆಲಿನ್ ಖರೀದಿಸಿದ್ದು, ರಷ್ಯಾ ವಿರುದ್ಧದ ಯುದ್ಧದಲ್ಲಿ ಉಕ್ರೇನ್ ಕೂಡ ಈ ಕ್ಷಿಪಣಿಗಳನ್ನು ಬಳಸುತ್ತಿದೆ.
ಭಾರತಕ್ಕೆ ಈ ಶಸ್ತ್ರಾಸ್ತ್ರ ಸೇರ್ಪಡೆಯಾದರೆ ಗಡಿಭಾಗದ ಭೂಸೇನೆ ಘಟಕಗಳಿಗೆ, ವಿಶೇಷವಾಗಿ ಶತ್ರು ಟ್ಯಾಂಕ್‌ಗಳು ಮತ್ತು ಕವಚಿತ ಪಡೆಗಳನ್ನು ಎದುರಿಸುವ ಸಾಮರ್ಥ್ಯಕ್ಕೆ ಹೆಚ್ಚುವರಿ ಬಲ ಸಿಗಲಿದೆ. ಪರ್ವತ ಪ್ರದೇಶಗಳು, ಮುಂಚೂಣಿ ನೆಲೆಗಳು ಮತ್ತು ವೇಗವಾಗಿ ಸ್ಥಳಾಂತರಗೊಳ್ಳಬೇಕಾದ ಯುದ್ಧ ಪರಿಸ್ಥಿತಿಗಳಲ್ಲೂ ಒಬ್ಬ ಸೈನಿಕ ಹೊತ್ತುಕೊಂಡು ಕಾರ್ಯಾಚರಣೆ ನಡೆಸಬಹುದಾದ ವ್ಯವಸ್ಥೆಯಾಗಿರುವುದು ಇದರ ಪ್ರಮುಖ ಪ್ರಯೋಜನವಾಗಿದೆ ಎಂದು ಭಾರತೀಯ ರಕ್ಷಣಾ ಸಚಿವಾಲಯ ಹೇಳಿಕೊಂಡಿದೆ.
