ಪಶ್ಚಿಮ ಬಂಗಾಳದ ರೇಜಿನಗರ ಉಪಚುನಾವಣೆ ಸಮೀಪಿಸುತ್ತಿದ್ದಂತೆ ರಾಜಕೀಯ ವಾಗ್ದಾಳಿಗಳು ತೀವ್ರ ಸ್ವರೂಪ ಪಡೆದುಕೊಂಡಿದೆ. ಆಮ್ ಜನತಾ ಉನ್ನಯನ್ ಪಾರ್ಟಿ (AJUP) ಸಂಸ್ಥಾಪಕ ಹಾಗೂ ಶಾಸಕ ಹುಮಾಯೂನ್ ಕಬೀರ್, ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ವಿರುದ್ಧ ಹೇಳಿಕೆ ನೀಡುವ ಮೂಲಕ ಹೊಸ ವಿವಾದಕ್ಕೆ ನಾಂದಿ ಹಾಡಿದ್ದಾರೆ.
ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಹುಮಾಯೂನ್ ಕಬೀರ್, “ಸುವೇಂದು ಅಧಿಕಾರಿ ಶೀಘ್ರದಲ್ಲೇ ಈ ಲೋಕದಿಂದ ನಿರ್ಗಮಿಸುವಂತೆ ಹಾಗೂ ಅಲ್ಲಾಹ್ ಅವರಿಗೆ ‘ಮೇಲಕ್ಕೆ ಹೋಗುವ ಟಿಕೆಟ್’ ಶೀಘ್ರದಲ್ಲೇ ಖಚಿತಪಡಿಸುವಂತೆ ನಾನು ಶುಕ್ರವಾರದ ಪ್ರಾರ್ಥನೆಯಲ್ಲಿ (ನಮಾಜ್) ಪ್ರಾರ್ಥಿಸುತ್ತೇನೆ” ಎಂದು ಹೇಳಿದ್ದಾರೆ.
ಇದನ್ನೂ ಓದಿ: 75ರ ಮೋದಿಗೆ ಜೈಕಾರ, 71ರ ದೀದಿಗೆ ನಿವೃತ್ತಿಯ ಪಾಠ: ಸುವೇಂದು ಅಧಿಕಾರಿಯ ದ್ವಂದ್ವ ನೀತಿ ಬಯಲು
ಪೊಲೀಸರು ಮತ್ತು ಆಡಳಿತ ಯಂತ್ರವು ತಮ್ಮ ಪಕ್ಷದ ಕಾರ್ಯಕರ್ತರಿಗೆ ಕಿರುಕುಳ ನೀಡುತ್ತಿದೆ ಎಂದು ಆರೋಪಿಸಿದ ಕಬೀರ್, ಅಹಂಕಾರ ಹೆಚ್ಚಾದಾಗ ನಾಯಕರ ಪತನ ಹೇಗಿರುತ್ತದೆ ಎಂಬುದಕ್ಕೆ ರಾಜಕೀಯ ಇತಿಹಾಸದ ಉದಾಹರಣೆಗಳನ್ನು ನೀಡಿದರು. “ಇಂದಿರಾ ಗಾಂಧಿ, ರಾಜೀವ್ ಗಾಂಧಿ, ಮಾಧವರಾವ್ ಸಿಂಧಿಯಾ ಹಾಗೂ ಅಜಿತ್ ಪವಾರ್ ಅವರಿಗೆ ಏನಾಯಿತು ಎಂಬುದನ್ನು ನೆನಪಿಸಿಕೊಳ್ಳಿ. ಅಧಿಕಾರದ ಗರ್ವ ಎಂದಿಗೂ ಶಾಶ್ವತವಲ್ಲ, ದೇವರೆಲ್ಲವನ್ನೂ ನೋಡಿಕೊಳ್ಳುತ್ತಿದ್ದಾನೆ” ಎಂದು ಸುವೇಂದು ಅಧಿಕಾರಿಗೆ ಎಚ್ಚರಿಕೆ ನೀಡಿದ್ದಾರೆ.
ಈ ಹೇಳಿಕೆ ರಾಜಕೀಯ ವಲಯದಲ್ಲಿ ತೀವ್ರ ಖಂಡನೆಗೆ ಗುರಿಯಾದ ಬೆನ್ನಲ್ಲೇ, ಕಬೀರ್ ತಮ್ಮ ಹೇಳಿಕೆಯನ್ನು ಬದಲಾಯಿಸಲು ಯತ್ನಿಸಿದರು. “ತಮ್ಮ ಮಾತುಗಳನ್ನು ತಪ್ಪಾಗಿ ಅರ್ಥೈಸಲಾಗಿದೆ. ಪೊಲೀಸರ ಸರ್ವಾಧಿಕಾರಿ ವರ್ತನೆಯಿಂದಾಗಿ ಆ ರೀತಿ ಹೇಳಿದ್ದೆ” ಎಂದು ಸಮಜಾಯಿಷಿ ನೀಡಿದ ಅವರು, “ನಾನು ಸುವೇಂದು ಅವರಿಗೆ ದೀರ್ಘಾಯುಷ್ಯ ಬಯಸುತ್ತೇನೆ ಮತ್ತು ಅವರು ದೇಶದ ಪ್ರಧಾನಿಯಾಗಲಿ ಎಂದು ಹಾರೈಸುತ್ತೇನೆ” ಎಂದು ಹೇಳಿಕೆ ತಿರುಗಿಸಿದರು.
ಬಿಜೆಪಿ ಮುಖಂಡರು ಮತ್ತು ಸಚಿವರು ಹುಮಾಯೂನ್ ಕಬೀರ್ ಅವರ ಹೇಳಿಕೆಯನ್ನು ತೀವ್ರವಾಗಿ ಖಂಡಿಸಿದ್ದು, ಇದು ರಾಜಕೀಯ ಸೌಜನ್ಯದ ಅಧಃಪತನ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ರೇಜಿನಗರ ಉಪಚುನಾವಣೆಯ ಪ್ರಚಾರದ ಕಾವು ಏರಿರುವ ಈ ವೇಳೆಯಲ್ಲಿ ಈ ವಿವಾದ ರಾಜಕೀಯ ರಂಗದಲ್ಲಿ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ.
