ಕಳೆದ ಕೆಲ ತಿಂಗಳಿಂದ ಮುಂಗಾರು ಕೊರತೆ ಕಾಣಿಸಿಕೊಂಡಿದ್ದರೂ, ಆಗಸ್ಟ್ ಆರಂಭದಲ್ಲಿ ದೇಶದ ಹಲವು ಭಾಗಗಳಲ್ಲಿ ಮಳೆ ಚುರುಕುಗೊಂಡಿದೆ. ರಾಜಧಾನಿ ದೆಹಲಿಯಲ್ಲಂತೂ ಆಗಸ್ಟ್ನ ಮೊದಲ ಎಂಟು ದಿನಗಳಲ್ಲೇ ಇಡೀ ತಿಂಗಳ ಸರಾಸರಿ ಮಳೆಯ ಪ್ರಮಾಣವನ್ನು ಮೀರಿದಷ್ಟು ಮಳೆ ದಾಖಲಾಗಿದೆ. ಭಾರಿ ಮಳೆಯಿಂದ ದೆಹಲಿಯಲ್ಲಿ ಜಲಾವೃತ, ಸಂಚಾರ ದಟ್ಟಣೆ ಹಾಗೂ ರಸ್ತೆ ಬಂದ್ನಂತಹ ಸಮಸ್ಯೆಗಳು ಎದುರಾದರೂ, ದೇಶದ ಒಟ್ಟಾರೆ ಮಳೆ ಕೊರತೆ ತಗ್ಗಿರುವುದು ಖಾರಿಫ್ ಬೆಳೆಗಳ ಬಿತ್ತನೆಗೆ ಕೊಂಚ ಆಶಾಭಾವನೆ ಮೂಡಿಸಿದೆ. ಆದರೂ ಎಲ್-ನಿನೋ ಆತಂಕ ಮುಂದುವರೆದಿದೆ.
ಅಲ್ಪಾವಧಿಯಲ್ಲಿ ಮುಂಗಾರು ಮಳೆ ಚೇತರಿಕೆ ಕಂಡಿದ್ದರೂ, ದೀರ್ಘಾವಧಿಯ ಹವಾಮಾನ ಮುನ್ಸೂಚನೆಗಳು ಮತ್ತೊಂದು ಆತಂಕವನ್ನು ಮುಂದಿಟ್ಟಿವೆ. ಆಗಸ್ಟ್ನಿಂದ ಅಕ್ಟೋಬರ್ ಅವಧಿಯಲ್ಲಿ ಎಲ್ನಿನೊ ಪರಿಣಾಮದಿಂದ ಭಾರತದಲ್ಲಿ ಸಾಮಾನ್ಯಕ್ಕಿಂತ ಕಡಿಮೆ ಮಳೆ ಬೀಳುವ ಅಪಾಯವಿದೆ ಎಂದು ವಿಶ್ವ ಹವಾಮಾನ ಸಂಸ್ಥೆ (WMO) ಎಚ್ಚರಿಸಿದೆ. WMO ಬಿಡುಗಡೆ ಮಾಡಿರುವ ಜಾಗತಿಕ ಋತುಮಾನ ಹವಾಮಾನ ವರದಿಯ ಪ್ರಕಾರ, ಎಲ್ನಿನೊ ಬಲಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಭಾರತೀಯ ಉಪಖಂಡದಲ್ಲಿ ಸಾಮಾನ್ಯಕ್ಕಿಂತ ಒಣಹವಾಮಾನ ಉಂಟಾಗುವ ಸಾಧ್ಯತೆಯಿದೆ. ಇದರೊಂದಿಗೆ ಭೂಭಾಗದ ತಾಪಮಾನವೂ ಸಾಮಾನ್ಯಕ್ಕಿಂತ ಹೆಚ್ಚಾಗುವ ಸಾಧ್ಯತೆ ಇದ್ದು, ಬೆಳೆಗಳ ಮೇಲೆ ತೀವ್ರ ಶಾಖದ ಒತ್ತಡ ಉಂಟಾಗಿ ಇಳುವರಿ ಕುಸಿಯುವ ಅಪಾಯವಿದೆ.
ಇದರ ಜತೆಗೆ ಧನಾತ್ಮಕ ಹಿಂದೂ ಮಹಾಸಾಗರ ದ್ವಿಧ್ರುವ (Positive IOD) ಕೂಡ ರೂಪುಗೊಳ್ಳುತ್ತಿದೆ. ಪಶ್ಚಿಮ ಹಿಂದೂ ಮಹಾಸಾಗರದ ನೀರು ಪೂರ್ವ ಭಾಗಕ್ಕಿಂತ ಹೆಚ್ಚು ಬೆಚ್ಚಗಾಗುವ ಈ ವಿದ್ಯಮಾನ ಎಲ್ನಿನೊದೊಂದಿಗೆ ಸೇರಿಕೊಂಡು ದಕ್ಷಿಣ ಏಷ್ಯಾದಲ್ಲಿ ಬರ ಪರಿಸ್ಥಿತಿಯನ್ನು ಮತ್ತಷ್ಟು ತೀವ್ರಗೊಳಿಸುವ ಸಾಧ್ಯತೆಯಿದೆ ಎಂದು WMO ಎಚ್ಚರಿಸಿದೆ. ವಿಶ್ವಸಂಸ್ಥೆ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರಸ್, ಎಲ್ನಿನೊ ಈಗಾಗಲೇ ಜಾಗತಿಕ ತಾಪಮಾನ ಹೆಚ್ಚಳಕ್ಕೆ ಮತ್ತಷ್ಟು ಇಂಧನ ನೀಡುತ್ತಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ಬಿಸಿಗಾಳಿಯ ಅಲೆಗಳು, ಕಾಡ್ಗಿಚ್ಚು ಹಾಗೂ ಸಮುದ್ರದ ದಾಖಲೆಯ ತಾಪಮಾನದ ನಡುವೆ ಎಲ್ನಿನೊದ ಬಲವರ್ಧನೆ ಮತ್ತಷ್ಟು ಸವಾಲುಗಳನ್ನು ಸೃಷ್ಟಿಸಬಹುದು ಎಂದು ಅವರು ಹೇಳಿದ್ದಾರೆ.
WMO ಪ್ರಧಾನ ಕಾರ್ಯದರ್ಶಿ ಸೆಲೆಸ್ಟೆ ಸೌಲೊ ಕೂಡ ಈ ಮುನ್ನೆಚ್ಚರಿಕೆ ಮುನ್ಸೂಚನೆಗಳು ಸರ್ಕಾರಗಳು ಹಾಗೂ ಕೃಷಿ ಯೋಜಕರಿಗೆ ಬರ ನಿರ್ವಹಣೆ, ನೀರಿನ ಸಮರ್ಪಕ ಬಳಕೆ ಮತ್ತು ತೀವ್ರ ಶಾಖದಿಂದ ಬೆಳೆಗಳನ್ನು ರಕ್ಷಿಸುವ ಕ್ರಮಗಳನ್ನು ಕೈಗೊಳ್ಳಲು ಮಹತ್ವದ ಸಮಯಾವಕಾಶ ಒದಗಿಸುತ್ತವೆ ಎಂದು ತಿಳಿಸಿದ್ದಾರೆ. ಹೀಗಾಗಿ ಆಗಸ್ಟ್ ಆರಂಭದಲ್ಲಿ ಚುರುಕುಗೊಂಡಿರುವ ಮುಂಗಾರು ಸದ್ಯಕ್ಕೆ ಕೃಷಿ ಕ್ಷೇತ್ರಕ್ಕೆ ಕೊಂಚ ನೆಮ್ಮದಿ ತಂದಿದ್ದರೂ, ಪ್ರದೇಶವಾರು ಮಳೆಯ ಅಸಮತೋಲನ ಹಾಗೂ ಮುಂಬರುವ ಎಲ್ನಿನೊ ಪರಿಣಾಮಗಳು ಖಾರಿಫ್ ಬೆಳೆಗಳ ಭವಿಷ್ಯದ ಮೇಲೆ ಇನ್ನೂ ಕಪ್ಪು ಮೋಡದಂತೆ ಕಾಡುತ್ತಿವೆ.
ಭಾರತೀಯ ಹವಾಮಾನ ಇಲಾಖೆ (IMD) ಪ್ರಕಾರ, ಆಗಸ್ಟ್ ಮೊದಲ ವಾರದಲ್ಲಿ ದೆಹಲಿಯಲ್ಲಿ 2011ರ ಬಳಿಕದ ಅತ್ಯಂತ ತೇವಭರಿತ ಮೊದಲ ವಾರ ದಾಖಲಾಗಿದೆ. ದೆಹಲಿ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಿಗೆ ರೆಡ್ ಅಲರ್ಟ್ ಕೂಡ ನೀಡಲಾಗಿತ್ತು. ದೇಶದ 12ಕ್ಕೂ ಹೆಚ್ಚು ರಾಜ್ಯಗಳಲ್ಲಿ ವ್ಯಾಪಕ ಮಳೆಯಾಗಿದ್ದು, ಇದರಿಂದ ಮುಂಗಾರು ಮಳೆ ಕೊರತೆ ಮತ್ತಷ್ಟು ಹೆಚ್ಚುವ ಆತಂಕ ಸದ್ಯಕ್ಕೆ ಕಡಿಮೆಯಾಗಿದೆ. ಸದ್ಯ ಮಳೆಯ ತೀವ್ರತೆ ಇಳಿಕೆಯಾಗಿದ್ದು, ದೆಹಲಿಗೆ ಯಾವುದೇ ಪ್ರಮುಖ ಮಳೆ ಎಚ್ಚರಿಕೆ ನೀಡಲಾಗಿಲ್ಲ.
ದೇಶಾದ್ಯಂತ ಮುಂಗಾರು ಮಳೆ ಚುರುಕುಗೊಂಡಿರುವ ಪರಿಣಾಮ ಒಟ್ಟಾರೆ ಮಳೆ ಕೊರತೆ ಶೇ.11ಕ್ಕೆ ಇಳಿದಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಮಳೆಯ ಪುನಶ್ಚೇತನದಿಂದ ಖಾರಿಫ್ ಬೆಳೆಗಳ ಬಿತ್ತನೆ ಪ್ರಮಾಣವೂ ಸುಧಾರಿಸಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಕಂಡುಬಂದಿದ್ದ ಬಿತ್ತನೆ ಕೊರತೆ ಗಣನೀಯವಾಗಿ ಕಡಿಮೆಯಾಗಿದೆ. ಕೃಷಿ ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, ಆಗಸ್ಟ್ 7ರ ವೇಳೆಗೆ ದೇಶಾದ್ಯಂತ ಖಾರಿಫ್ ಬೆಳೆಗಳ ಬಿತ್ತನೆ ಪ್ರದೇಶದ ಕೊರತೆ 17.96 ಲಕ್ಷ ಹೆಕ್ಟೇರ್ಗೆ ಇಳಿದಿದೆ. ಜುಲೈ 24ರ ವೇಳೆಗೆ ಪ್ರಮುಖ ಖಾರಿಫ್ ಬೆಳೆಗಳ ಬಿತ್ತನೆ ಕಳೆದ ವರ್ಷಕ್ಕಿಂತ 38.82 ಲಕ್ಷ ಹೆಕ್ಟೇರ್ ಕಡಿಮೆಯಾಗಿತ್ತು, ಅಂದರೆ ಶೇ.4.70ರಷ್ಟು ಇಳಿಕೆ ಕಂಡುಬಂದಿತ್ತು. ಕಳೆದ ಎರಡು ವಾರಗಳಲ್ಲಿ ದ್ವಿದಳ ಧಾನ್ಯಗಳ ಬಿತ್ತನೆ ಕೊರತೆಯೂ ಗಣನೀಯವಾಗಿ ಕಡಿಮೆಯಾಗಿದ್ದು, ಜುಲೈ 24ರಂದು 6.90 ಲಕ್ಷ ಹೆಕ್ಟೇರ್ನಷ್ಟಿದ್ದ ಕೊರತೆ ಆಗಸ್ಟ್ 7ಕ್ಕೆ ಕೇವಲ 1.95 ಲಕ್ಷ ಹೆಕ್ಟೇರ್ಗೆ ಇಳಿದಿದೆ.
ಆದರೆ ಇದೇ ಅವಧಿಯಲ್ಲಿ ಭತ್ತ ಮತ್ತು ಎಣ್ಣೆಕಾಳುಗಳ ಬಿತ್ತನೆ ಪರಿಸ್ಥಿತಿ ಮತ್ತಷ್ಟು ಹಿಂದುಳಿದಿದೆ. ಆಗಸ್ಟ್ 7ರ ವೇಳೆಗೆ ಭತ್ತದ ಬಿತ್ತನೆ ಪ್ರದೇಶ ಕಳೆದ ವರ್ಷಕ್ಕಿಂತ 15.90 ಲಕ್ಷ ಹೆಕ್ಟೇರ್ ಕಡಿಮೆ ಇದೆ. ಎಣ್ಣೆಕಾಳುಗಳ ಬಿತ್ತನೆ ಕೊರತೆಯೂ ಜುಲೈ 24ರ 3.45 ಲಕ್ಷ ಹೆಕ್ಟೇರ್ನಿಂದ ಆಗಸ್ಟ್ 7ಕ್ಕೆ 5.19 ಲಕ್ಷ ಹೆಕ್ಟೇರ್ಗೆ ವಿಸ್ತರಿಸಿದೆ. ಮಧ್ಯ ಮತ್ತು ವಾಯವ್ಯ ಭಾರತದ ಹಲವು ಭಾಗಗಳಲ್ಲಿ ಮಳೆ ಕೊರತೆ ತಗ್ಗಿದ್ದರೂ, ಪೂರ್ವ ಮತ್ತು ಈಶಾನ್ಯ ಭಾರತ ಹಾಗೂ ದಕ್ಷಿಣ ಪರ್ಯಾಯ ದ್ವೀಪದ ಕೆಲವು ಭಾಗಗಳಲ್ಲಿ ಮಳೆಯ ಕೊರತೆ ಮುಂದುವರಿದಿದೆ. ಪೂರ್ವ ಮತ್ತು ಈಶಾನ್ಯ ಭಾರತದ ಒಟ್ಟಾರೆ ಮಳೆ ಕೊರತೆ ಶೇ.25.5ರಷ್ಟಿದ್ದು, ದೇಶದ ಎಲ್ಲ ಪ್ರದೇಶಗಳ ಪೈಕಿ ಇದೇ ಗರಿಷ್ಠ ಕೊರತೆಯಾಗಿದೆ. ಮಳೆ ಆಧಾರಿತ ಕೃಷಿಯ ಮೇಲೆ ಅವಲಂಬಿತವಾಗಿರುವ ಪ್ರದೇಶಗಳಿಗೆ ಇದು ಪ್ರಮುಖ ಆತಂಕವಾಗಿದೆ.
ಈ ಪ್ರದೇಶದ ಕೆಲವು ಭಾಗಗಳು ಇದೇ ವರ್ಷ ಭೀಕರ ಪ್ರವಾಹಕ್ಕೆ ತುತ್ತಾಗಿದ್ದರೂ, ಒಟ್ಟಾರೆ ಮಳೆ ಪ್ರಮಾಣದಲ್ಲಿ ಕೊರತೆ ಇರುವುದು ಗಮನಾರ್ಹವಾಗಿದೆ. ವಿಶೇಷವಾಗಿ ಹೆಚ್ಚಿನ ಪ್ರಮಾಣದ ನೀರಿನ ಅಗತ್ಯವಿರುವ ಭತ್ತದ ಬೆಳೆಯ ಮೇಲೆ ಮಳೆ ಕೊರತೆ ನೇರ ಪರಿಣಾಮ ಬೀರಿದೆ. ಪೂರ್ವ ಭಾರತದ ಕೃಷಿ ಪ್ರದೇಶಗಳಲ್ಲಿ ಆಗಸ್ಟ್ನಲ್ಲಿ ಉತ್ತಮ ಮಳೆಯಾದರೆ ಭತ್ತದ ಬಿತ್ತನೆ ಕೊರತೆ ತಗ್ಗಿ, ಖಾರಿಫ್ ಉತ್ಪಾದನಾ ಗುರಿ ತಲುಪಲು ನೆರವಾಗಬಹುದು ಎಂಬ ನಿರೀಕ್ಷೆ ಇದೆ.
