ನೀಟ್ (NEET) ಪತ್ರಿಕೆ ಸೋರಿಕೆ ಹಗರಣವನ್ನು ಮೊದಲು ಪತ್ತೆಹಚ್ಚಿ, ಬಹಿರಂಗ ಪಡಿಸಿದ ರಾಜಸ್ಥಾನದ ಸಿಕಾರ್ ಮೂಲದ ಶಿಕ್ಷಕರೊಬ್ಬರು, ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಗೆ (NTA) ದೂರು ನೀಡಿದ್ದಾರೆ. ಆ ದೂರಿನಲ್ಲಿ ಅತ್ಯಂತ ಸ್ಪೋಟಕ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ.
ಮೇ 3ರಂದು ಪರೀಕ್ಷೆ ನಡೆದ ದಿನವೇ ಈ ಪತ್ರಿಕೆ ಸೋರಿಕೆಯ ಸುಳಿವು ಅವರಿಗೆ ಸಿಕ್ಕಿತ್ತು. ಅಂದು ಸಂಜೆ ತಮ್ಮ ಮನೆಯ ಮಾಲೀಕರು ನೀಡಿದ ಕೈಬರಹದ ಪಿಡಿಎಫ್ ಫೈಲ್ ಅನ್ನು ಅವರು ಪರಿಶೀಲಿಸಿದಾಗ, ಅದರಲ್ಲಿ ನೀಟ್ ಪ್ರಶ್ನೆಪತ್ರಿಕೆಗೆ ಯಥಾವತ್ ಹೋಲುವ ಪ್ರಶ್ನೆಗಳಿರುವುದು ಕಂಡುಬಂದಿತ್ತು ಎಂದು ವರದಿಯಾಗಿದೆ.
ಈ ಪಿಡಿಎಫ್ನಲ್ಲಿ ಸುಮಾರು 410 ಪ್ರಶ್ನೆಗಳಿದ್ದು, ಅದರಲ್ಲಿ 120ಕ್ಕೂ ಹೆಚ್ಚು ಪ್ರಶ್ನೆಗಳು ಅಸಲಿ ಪರೀಕ್ಷೆಯಲ್ಲಿ ಕೇಳಲಾದ ಪ್ರಶ್ನೆಗಳೇ ಆಗಿದ್ದವು ಎಂಬುದನ್ನು ಶಿಕ್ಷಕ ತಮ್ಮ ದೂರಿನಲ್ಲಿ ವಿವರಿಸಿದ್ದಾರೆ.
“ನನ್ನ ಬಳಿ ಸುಮಾರು 60 ಪುಟಗಳ ಕೈಬರಹದ ಪಿಡಿಎಫ್ ಫೈಲ್ ಇದೆ. ಇದರಲ್ಲಿ ಕೆಮಿಸ್ಟ್ರಿಯ 90 ಪ್ರಶ್ನೆಗಳು ಮತ್ತು ಜೀವಶಾಸ್ತ್ರಕ್ಕೆ ಸಂಬಂಧಿಸಿದ 7-8 ಪುಟಗಳ ಪ್ರಶ್ನೆಗಳಿವೆ. ಈ ಪೇಪರ್ನಲ್ಲಿರುವ ಸುಮಾರು 120 ಪ್ರಶ್ನೆಗಳನ್ನು (ಕೆಲವು ವರದಿಗಳ ಪ್ರಕಾರ 135) ಪರೀಕ್ಷಾ ಪ್ರಶ್ನೆಪತ್ರಿಕೆಯೊಂದಿಗೆ ಹೋಲಿಸಿ ನೋಡಿದಾಗ, ಪ್ರಶ್ನೆಗಳ ಕ್ರಮ ಸಂಖ್ಯೆ ಮಾತ್ರವಲ್ಲದೆ ಆಯ್ಕೆಗಳೂ ಕೂಡ ಬದಲಾಗಿಲ್ಲ. ಎಲ್ಲ ಪ್ರಶ್ನೆಗಳು ಅಸಲಿ ನೀಟ್ ಪರೀಕ್ಷೆಯಲ್ಲಿ ಬಂದಿರುವ ಪ್ರಶ್ನೆಗಳೇ ಆಗಿವೆ” ಎಂದು ಶಿಕ್ಷಕ ವಿವರಿಸಿದ್ದಾರೆ.
ದೂರು ನೀಡಿದ ನಂತರ ಶಿಕ್ಷಕರು ಪೊಲೀಸರ ವಿಚಾರಣೆಯನ್ನೂ ಎದುರಿಸಿದ್ದಾರೆ. ಆರಂಭದಲ್ಲಿ ತನಿಖಾ ಸಂಸ್ಥೆಗಳು ಇವರ ಮೇಲೆ ಅನುಮಾನ ವ್ಯಕ್ತಪಡಿಸಿದರೂ, ಶಿಕ್ಷಕರು ತಾವು ಪರೀಕ್ಷೆ ಮುಗಿದ ನಂತರವೇ ಈ ದಾಖಲೆಗಳನ್ನು ಪಡೆದಿರುವುದಾಗಿ ಸಾಕ್ಷಿ ಸಮೇತ ವಿವರಿಸಿದ್ದಾರೆ.
“ಲಕ್ಷಾಂತರ ಬಡ ಮತ್ತು ಪ್ರತಿಭಾವಂತ ವಿದ್ಯಾರ್ಥಿಗಳ ಭವಿಷ್ಯದ ಮೇಲೆ ಈ ಅಕ್ರಮವು ಗಂಭೀರ ಪರಿಣಾಮ ಬೀರುತ್ತದೆ. ನಾನು ಶಿಕ್ಷಕನಾಗಿ ಈ ಅನ್ಯಾಯವನ್ನು ಸಹಿಸಲು ಸಾಧ್ಯವಿಲ್ಲ. ಅದಕ್ಕಾಗಿಯೇ ನಾನು ನನ್ನ ಮೊಬೈಲ್ ಫೋನ್ ಅನ್ನು ಫೋರೆನ್ಸಿಕ್ ತನಿಖೆಗೆ ನೀಡಲು ಸಿದ್ಧನಿದ್ದೇನೆ” ಎಂದು ಅವರು ದೂರಿನಲ್ಲಿ ಧೈರ್ಯವಾಗಿ ಬರೆದಿದ್ದಾರೆ.
ಶಿಕ್ಷಕ ನೀಡಿದ ದೂರು ಮತ್ತು ಒದಗಿಸಿದ ದಾಖಲೆಗಳೇ ಅಂತಿಮವಾಗಿ ರಾಜಸ್ಥಾನ ಪೊಲೀಸರ ವಿಶೇಷ ಕಾರ್ಯಾಚರಣೆ ಪಡೆಯು (SOG) ಈ ಹಗರಣದ ಮೂಲಗಳನ್ನು ಹುಡುಕಲು ನೆರವಾಗಿದೆ. ಪರೀಕ್ಷೆಗೂ ಮೊದಲೇ ಪ್ರಶ್ನೆಪತ್ರಿಕೆಯು ಅಕ್ರಮವಾಗಿ ಹೊರಬಂದಿದೆ ಎಂಬ ಸತ್ಯವನ್ನು ಸಾಬೀತುಪಡಿಸುವಲ್ಲಿ ಈ ಶಿಕ್ಷಕರ ದೂರು ಅತ್ಯಂತ ನಿರ್ಣಾಯಕ ಪಾತ್ರ ವಹಿಸಿದೆ.
ಈಗ, ದೇಶಾದ್ಯಂತ ಪ್ರತಿಭಟನೆಗಳು ಭುಗಿಲೆದ್ದಿವೆ. ಸುಪ್ರೀಂ ಕೋರ್ಟ್ ಮಧ್ಯಪ್ರವೇಶಿಸಿ ಪರೀಕ್ಷೆಯ ಮರುಮೌಲ್ಯಮಾಪನ ಮತ್ತು ಮರುಪರೀಕ್ಷೆಯಂತಹ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳುವಂತೆ ಸೂಚಿಸಿದೆ.
