ದೇಶದಲ್ಲಿ ಪ್ರಸ್ತುತ ಬಳಕೆಯಲ್ಲಿರುವ E20 ಪೆಟ್ರೋಲ್ ಅನ್ನು E10 ಪೆಟ್ರೋಲ್‌ನಿಂದ ಬದಲಿಸುವ ಯಾವುದೇ ನಿರ್ಧಾರವಾಗಿಲ್ಲ ಎಂದು ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಲಿಮಿಟೆಡ್‌ (BPCL) ಸ್ಪಷ್ಟಪಡಿಸಿದೆ.
ಕಂಪನಿಯ ವಾರ್ಷಿಕ ಷೇರುದಾರರ ಸಭೆಯ ಬಳಿಕ ನಡೆದ ಮಾಧ್ಯಮ ಸಂವಾದದಲ್ಲಿ ಮಾತನಾಡಿದ BPCL ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಸಂಜಯ್‌ ಖನ್ನಾ, E20 ಅನ್ನು E10 ಆಗಿ ಬದಲಾಯಿಸಲಾಗುತ್ತದೆ ಎಂದು ನಾನು ಎಂದೂ ಹೇಳಿಲ್ಲ. ಹಳೆಯ ವಾಹನಗಳಿಗೆ ಕಡಿಮೆ ಪ್ರಮಾಣದ ಎಥೆನಾಲ್ ಹೊಂದಿರುವ ಪೆಟ್ರೋಲ್ ಲಭ್ಯವಾಗುವಂತೆ ಮಾಡಬೇಕೇ ಎಂಬ ಕುರಿತು ಮಾತ್ರ ಚರ್ಚೆ ನಡೆಯುತ್ತಿದೆ. ಅದಕ್ಕಾಗಿ E20 ಸಂಪೂರ್ಣವಾಗಿ ಹೊರ ಹೋಗಿ E10 ಬರಲಿದೆ ಎಂದರ್ಥವಲ್ಲ ಎಂದು ಹೇಳಿದರು.
ಪ್ರಸ್ತುತ E20 ಪೆಟ್ರೋಲ್‌ನಲ್ಲಿ ಶೇ.20ರಷ್ಟು ಎಥೆನಾಲ್ ಮಿಶ್ರಣವಿದ್ದು, E10ನಲ್ಲಿ ಶೇ.10ರಷ್ಟು ಎಥೆನಾಲ್ ಇರುತ್ತದೆ. ದೇಶವು ಕಚ್ಚಾ ತೈಲ ಆಮದಿನ ಮೇಲಿನ ಅವಲಂಬನೆ ಕಡಿಮೆ ಮಾಡುವುದು, ಇಂಗಾಲ ಹೊರಸೂಸುವಿಕೆ ತಗ್ಗಿಸುವುದು ಹಾಗೂ ದೇಶೀಯ ಎಥೆನಾಲ್ ಉತ್ಪಾದನೆಗೆ ಉತ್ತೇಜನ ನೀಡುವ ಉದ್ದೇಶದಿಂದ ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣವನ್ನು ಹಂತ ಹಂತವಾಗಿ ಹೆಚ್ಚಿಸುತ್ತಿದೆ. ಆದರೆ, ಕೆಲವು ಗ್ರಾಹಕರು ಹಾಗೂ ಉದ್ಯಮ ವಲಯದವರು ಹೆಚ್ಚಿನ ಪ್ರಮಾಣದ ಎಥೆನಾಲ್ ಮಿಶ್ರಣದಿಂದ ಹಳೆಯ ವಾಹನಗಳ ಕಾರ್ಯಕ್ಷಮತೆ ಹಾಗೂ ಬಿಡಿಭಾಗಗಳ ಮೇಲೆ ಪರಿಣಾಮ ಉಂಟಾಗಬಹುದು ಎಂಬ ಆತಂಕ ವ್ಯಕ್ತಪಡಿಸುತ್ತಿದ್ದಾರೆ. ಆದರೂ E20 ಪೆಟ್ರೋಲ್ ವಾಹನಗಳ ಎಂಜಿನ್‌ಗಳಿಗೆ ವ್ಯಾಪಕ ಹಾನಿ ಉಂಟುಮಾಡುತ್ತದೆ ಎಂಬ ಆರೋಪಗಳಿಗೆ ಸಾಕಷ್ಟು ಪುರಾವೆಗಳಿಲ್ಲ ಎಂದು ಸರ್ಕಾರ ಹಲವು ಬಾರಿ ಹೇಳಿದೆ.
ಈ ನಡುವೆ, ಸರ್ಕಾರದ ಮುಖ್ಯ ಆರ್ಥಿಕ ಸಲಹೆಗಾರ ವಿ. ಅನಂತ ನಾಗೇಶ್ವರನ್‌ ಹಾಗೂ ಆರ್ಥಿಕ ವ್ಯವಹಾರಗಳ ಇಲಾಖೆಯ ಸಲಹೆಗಾರ ಆಕಾಶ್‌ ಪೂಜಾರಿ ಇತ್ತೀಚೆಗೆ ಪ್ರಕಟಿಸಿದ ಅಭಿಪ್ರಾಯ ಲೇಖನದಲ್ಲಿ, ಹಳೆಯ ವಾಹನಗಳನ್ನು ರಕ್ಷಿಸುವ ಉದ್ದೇಶದಿಂದ ಕಡಿಮೆ ಎಥೆನಾಲ್ ಮಿಶ್ರಣದ ಪೆಟ್ರೋಲ್ ಅನ್ನು ಮತ್ತೆ ಪರಿಚಯಿಸುವಂತೆ ಶಿಫಾರಸು ಮಾಡಿದ್ದರು. ಭಾರತದಲ್ಲಿ BS-IVಕ್ಕಿಂತ ಹಳೆಯದಾದ ಸುಮಾರು 7.5ರಿಂದ 8 ಕೋಟಿ ದ್ವಿಚಕ್ರ ವಾಹನಗಳು ಇವೆ. ಇವುಗಳಲ್ಲಿ ಹಲವು ಕಾರ್ಬ್ಯುರೇಟರ್‌ ಆಧಾರಿತವಾಗಿದ್ದು, E20ನಲ್ಲಿರುವ ಹೆಚ್ಚುವರಿ ಎಥೆನಾಲ್‌ನಿಂದ ಉಂಟಾಗುವ ಆಮ್ಲಜನಕ ಪ್ರಮಾಣಕ್ಕೆ ಅನುಗುಣವಾಗಿ ಇಂಧನ ಪೂರೈಕೆಯನ್ನು ಸ್ವಯಂಚಾಲಿತವಾಗಿ ಹೊಂದಿಸಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಇದರಿಂದ ಎಂಜಿನ್‌ ಹೆಚ್ಚು ಬಿಸಿಯಾಗುವ ಸಾಧ್ಯತೆ ಇದೆ. ಹಳೆಯ ವಾಹನಗಳಲ್ಲಿನ ಎಥೆನಾಲ್ ನಿರೋಧಕವಲ್ಲದ ರಬ್ಬರ್‌ ಸೀಲ್‌ಗಳ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದೂ ಹೇಳಿದ್ದರು
“E20ನಿಂದ E10ಗೆ ಬದಲಾಯಿಸಬೇಕಾದ ಪರಿಸ್ಥಿತಿ ಬಂದರೆ, ಪೆಟ್ರೋಲ್ ಪೂರೈಕೆ ಮಾಡುವುದರಲ್ಲಿ ಯಾವುದೇ ದೊಡ್ಡ ತಾಂತ್ರಿಕ ಅಥವಾ ಕಾರ್ಯಾಚರಣೆಯ ಸವಾಲು ಇರುವುದಿಲ್ಲ. ಯಾವುದೇ ತೈಲ ಕಂಪನಿಗೂ E20ನಿಂದ E10ಗೆ ಬದಲಾಯಿಸುವಲ್ಲಿ ಸಮಸ್ಯೆ ಇರುವುದಿಲ್ಲ ಎಂದು ಖನ್ನಾ ತಿಳಿಸಿದರು.
ಇದನ್ನೂ ಓದಿ: ಪೆಟ್ರೋಲ್‌ಗೆ ಎಥೆನಾಲ್ ಅಲ್ಲ, ಎಥೆನಾಲ್‌ಗೇ ಪೆಟ್ರೋಲ್ ಮಿಕ್ಸ್: ಜೇಬಿಗೆ ಕತ್ತರಿ, ಎಂಜಿನ್‌ಗೆ ಕಂಟಕ!
ಆದರೆ E10 ಅನ್ನು E20ಗೆ ಪರ್ಯಾಯವಾಗಿ ತರುವುದಕ್ಕೂ, E10 ಮತ್ತು E20 ಎರಡನ್ನೂ ಏಕಕಾಲದಲ್ಲಿ ವಿಭಿನ್ನ ಗ್ರೇಡ್‌ಗಳಾಗಿ ಪೂರೈಸುವುದಕ್ಕೂ ವ್ಯತ್ಯಾಸವಿದೆ. ದೇಶದಾದ್ಯಂತ ಮತ್ತೊಂದು ಗ್ರೇಡ್‌ ಪೆಟ್ರೋಲ್ ಅನ್ನು ಪೂರೈಸುವುದು ಹೆಚ್ಚಿನ ಪ್ರಮಾಣದ ಲಾಜಿಸ್ಟಿಕ್ಸ್‌ ಸವಾಲುಗಳನ್ನು ಸೃಷ್ಟಿಸಬಹುದು. ದೇಶದಲ್ಲಿ ಒಂದು ಲಕ್ಷಕ್ಕೂ ಅಧಿಕ ಪೆಟ್ರೋಲ್ ಬಂಕ್‌ಗಳಿದ್ದು, ಅವುಗಳನ್ನು ರಿಫೈನರಿ, ಟರ್ಮಿನಲ್‌, ಡಿಪೋ ಹಾಗೂ ಪೈಪ್‌ಲೈನ್‌ಗಳ ವ್ಯಾಪಕ ಜಾಲದ ಮೂಲಕ ಸಂಪರ್ಕಿಸಲಾಗಿದೆ. ಒಂದೇ ವೇಳೆ ಶುದ್ಧ ಪೆಟ್ರೋಲ್, E10 ಹಾಗೂ E20 ಪೂರೈಸಬೇಕಾದರೆ ಹೆಚ್ಚುವರಿ ನಿರ್ವಹಣಾ ವೆಚ್ಚ, ಸಂಗ್ರಹಣೆ ಹಾಗೂ ವಿತರಣೆಯಲ್ಲಿ ಸಂಕೀರ್ಣತೆ ಉಂಟಾಗಬಹುದು ಎಂದು ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ ಈ ಹಿಂದೆ ಹೇಳಿತ್ತು.
ಈ ಕುರಿತು ಪ್ರತಿಕ್ರಿಯಿಸಿದ ಖನ್ನಾ, ಮತ್ತೊಂದು ಗ್ರೇಡ್‌ ಪೆಟ್ರೋಲ್ ಪೂರೈಸುವುದರಿಂದ ಎದುರಾಗಬಹುದಾದ ಸವಾಲುಗಳೇ ಸದ್ಯ ಚರ್ಚೆಯಲ್ಲಿರುವ ಪ್ರಮುಖ ಅಂಶಗಳಲ್ಲಿ ಒಂದಾಗಿದೆ. ಮತ್ತೊಂದು ಗ್ರೇಡ್‌ ಪೆಟ್ರೋಲ್ ಪೂರೈಕೆಗೆ ಸಂಬಂಧಿಸಿದ ಸವಾಲುಗಳೇನು ಎಂಬುದು ಚರ್ಚೆಯಾಗುತ್ತಿದೆ. ಈ ಎಲ್ಲ ಅಂಶಗಳನ್ನು ಪರಿಗಣಿಸಲಾಗುತ್ತಿದೆ. ಸದ್ಯಕ್ಕೆ ಯಾವುದನ್ನೂ ಅಂತಿಮಗೊಳಿಸಿಲ್ಲ ಎಂದು ಅವರು ಸ್ಪಷ್ಟಪಡಿಸಿದರು.
