ಪಶ್ಚಿಮ ಬಂಗಾಳದ ರಾಜಕೀಯದಲ್ಲಿ ಆಡಳಿತಾರೂಢ ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ತೊರೆದು ನ್ಯಾಷನಲಿಸ್ಟ್ ಸಿಟಿಜನ್ಸ್ ಪಾರ್ಟಿ ಆಫ್ ಇಂಡಿಯಾ (ಎನ್‌ಸಿಪಿಐ) ಗುಂಪಿನಲ್ಲಿ ಗುರುತಿಸಿಕೊಂಡಿದ್ದ 20 ಸಂಸದರ ಪೈಕಿ 17 ಜನರು ಶೀಘ್ರದಲ್ಲೇ ಅಧಿಕೃತವಾಗಿ ಬಿಜೆಪಿ ಸೇರ್ಪಡೆಯಾಗಲಿದ್ದಾರೆ ಎಂದು ಬಂಡಾಯ ಸಂಸದ ಜಗದೀಶ್ ಚಂದ್ರ ಬರ್ಮಾ ಬಸುನಿಯಾ ತಿಳಿಸಿದ್ದಾರೆ.
ಕಳೆದ ಜೂನ್ ತಿಂಗಳಲ್ಲಿ ತೃಣಮೂಲ ಕಾಂಗ್ರೆಸ್‌ನ ನಾಯಕತ್ವದ ವಿರುದ್ಧ ಅಸಮಾಧಾನಗೊಂಡು ಹೊರಬಂದಿದ್ದ 20 ಲೋಕಸಭೆ ಸಂಸದರು ಎನ್‌ಸಿಪಿಐ ಜೊತೆ ವಿಲೀನಗೊಂಡು ಎನ್‌ಡಿಎಗೆ ಬೆಂಬಲ ಸೂಚಿಸಿದ್ದರು. ಇದೀಗ ಬಸುನಿಯಾ ಅವರ ಪ್ರಕಾರ, ಮುಂಬರುವ ದುರ್ಗಾಪೂಜೆಯ (ಅಕ್ಟೋಬರ್) ಹೊತ್ತಿಗೆ ಅಥವಾ ನಂತರ ಈ 17 ಸಂಸದರು ನೇರವಾಗಿ ಬಿಜೆಪಿ ಅಂಗಳಕ್ಕೆ ಧುಮುಕಲಿದ್ದಾರೆ.
ಇದನ್ನೂ ಓದಿ: ಆಪರೇಷನ್ ಟೈಗರ್ | ಶಿವಸೇನೆ ಧ್ವಂಸಕ್ಕೆ BJP ಕುತಂತ್ರ; ಮುಂದುವರೆದ ಕೇಸರಿ ಕೊಳಕಿನ ಇತಿಹಾಸ
ಒಟ್ಟು 20 ಸಂಸದರ ಪೈಕಿ 17 ಜನರು ಒಂದಾಗಿ ಬಿಜೆಪಿ ಸೇರುತ್ತಿರುವುದರಿಂದ, ಒಟ್ಟು ಸಂಖ್ಯೆಯ ಮೂರನೇ ಎರಡರಷ್ಟು (2/3) ಭಾಗದ ತಾಂತ್ರಿಕ ಮಾನದಂಡವನ್ನು ಇದು ಪೂರೈಸುತ್ತದೆ. ಇದರಿಂದಾಗಿ ಪಕ್ಷಾಂತರ ನಿಷೇಧ ಕಾಯ್ದೆಯಡಿ ಯಾವುದೇ ಅನರ್ಹತೆಯ ಭೀತಿ ಎದುರಾಗುವುದಿಲ್ಲ ಎಂಬುದು ರೆಬೆಲ್ ನಾಯಕರ ಲೆಕ್ಕಾಚಾರವಾಗಿದೆ.
ಉಳಿದ ಮೂವರು ಸಂಸದರಾದ ಅಬು ತಾಹೇರ್ ಖಾನ್, ಖಲೀಲೂರ್ ರೆಹಮಾನ್ ಹಾಗೂ ಯೂಸುಫ್ ಪಠಾಣ್ ಅವರು ನೇರವಾಗಿ ಬಿಜೆಪಿಗೆ ಸೇರ್ಪಡೆಯಾಗುವುದಿಲ್ಲ. ತಮ್ಮ ಕ್ಷೇತ್ರಗಳ ರಾಜಕೀಯ ಪರಿಸ್ಥಿತಿಗಳನ್ನು ಪರಿಗಣಿಸಿ ಅವರು ಬಿಜೆಪಿ ಸೇರದೇ ಹೊರಗಿನಿಂದಲೇ ಎನ್‌ಡಿಎಗೆ ಬೆಂಬಲ ನೀಡಲಿದ್ದಾರೆ ಹಾಗೂ ಅವರಿಗೆ ಕೆಲವು ಜವಾಬ್ದಾರಿಗಳನ್ನು ನೀಡುವ ಸಾಧ್ಯತೆಯಿದೆ ಎಂದು ಬಸುನಿಯಾ ಮಾಹಿತಿ ನೀಡಿದ್ದಾರೆ.
ಮಮತಾ ಬ್ಯಾನರ್ಜಿ ನೇತೃತ್ವದ ಟಿಎಂಸಿಗೆ ಶಾಕ್ ನೀಡುತ್ತಾ ಸಾಗಿರುವ ಬಿಜೆಪಿಯ ಈ ತಂತ್ರಗಾರಿಕೆ, ಪಶ್ಚಿಮ ಬಂಗಾಳ ರಾಜಕೀಯದಲ್ಲಿ ಹಳೆಯ ರಾಜಕೀಯ ಸಮೀಕರಣಗಳನ್ನು ಬುಡಮೇಲು ಮಾಡಲು ‘ಆಪರೇಷನ್ ಕಮಲ’ದ ದಾಳವನ್ನು ಮುಂದುವರಿಸಿದೆ ಎಂಬುದನ್ನು ಸ್ಪಷ್ಟಪಡಿಸುತ್ತದೆ.
