ಕೇಂದ್ರಾಡಳಿತ ಪ್ರದೇಶವಾದ ಲಡಾಖ್‌ನಲ್ಲಿ ಜಮ್ಮು ಮತ್ತು ಕಾಶ್ಮೀರ ಹಾಗೂ ಲಡಾಖ್ ಜಂಟಿ ಉಚ್ಚ ನ್ಯಾಯಾಲಯದ (ಹೈಕೋರ್ಟ್) ನಿಯಮಿತ ಪೀಠವನ್ನು ಸ್ಥಾಪಿಸಲು ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಅಂಕಿತ ಹಾಕಿದ್ದಾರೆ. ಈ ಮೂಲಕ ಲಡಾಖ್‌ನ ನಿವಾಸಿಗಳು ನ್ಯಾಯಕ್ಕಾಗಿ ಶ್ರೀನಗರ ಅಥವಾ ಜಮ್ಮುವಿಗೆ ದೂರದ ಪ್ರಯಾಣ ಬೆಳೆಸುವ ಕಷ್ಟಕ್ಕೆ ಮುಕ್ತಿ ಸಿಗಲಿದೆ.
ರಾಷ್ಟ್ರಪತಿಯವರು ಸಂವಿಧಾನದ ವಿಧಿ 240 ಮತ್ತು ಜಮ್ಮು-ಕಾಶ್ಮೀರ ಮರುಸಂಘಟನೆ ಕಾಯ್ದೆ 2019ರ ಸೆಕ್ಷನ್ 58(2)ರ ಅಡಿಯಲ್ಲಿ ‘ದಿ ಯೂನಿಯನ್ ಟೆರಿಟರಿ ಆಫ್ ಲಡಾಖ್ (ಸಿಟ್ಟಿಂಗ್ ಆಫ್ ಬೆಂಚ್ ಆಫ್ ದಿ ಹೈಕೋರ್ಟ್ ಆಫ್ ಜಮ್ಮು ಮತ್ತು ಕಾಶ್ಮೀರ, ಮತ್ತು ಲಡಾಖ್ ಇನ್ ಲಡಾಖ್) ವಿನಿಯಮಗಳು-2026’ ನಿಯಮಾವಳಿಗೆ ಅನುಮೋದನೆ ನೀಡಿದ್ದಾರೆ.
ಇದನ್ನೂ ಓದಿ: ಸುಪ್ರೀಂ ಕೋರ್ಟ್‌ಗೆ ಐವರು ನ್ಯಾಯಮೂರ್ತಿಗಳ ನೇಮಕಾತಿಗೆ ಕೇಂದ್ರ ಅಸ್ತು: ಜಡ್ಜ್‌ಗಳ ಸಂಖ್ಯೆ 37ಕ್ಕೆ ಏರಿಕೆ
ಜಮ್ಮು-ಕಾಶ್ಮೀರ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿಗಳು ಲಡಾಖ್‌ನ ಉಪರಾಜ್ಯಪಾಲರ (LG) ಅನುಮೋದನೆಯೊಂದಿಗೆ ಲಡಾಖ್‌ನಲ್ಲಿ ಪೀಠವು ಕುಳಿತುಕೊಳ್ಳುವ ನಿರ್ದಿಷ್ಟ ಸ್ಥಳವನ್ನು (ಉದಾಹರಣೆಗೆ ಲೇಹ್ ಅಥವಾ ಕಾರ್ಗಿಲ್) ನಿಗದಿಪಡಿಸಲಿದ್ದಾರೆ. ಈ ವಿನಿಯಮದಿಂದಾಗಿ ಹೈಕೋರ್ಟ್‌ನ ಮೂಲ ಕೇಂದ್ರ ಸ್ಥಾನದಲ್ಲಿ ಯಾವುದೇ ಬದಲಾವಣೆಯಾಗುವುದಿಲ್ಲ.
ಲಡಾಖ್‌ಗೆ ಸಂಬಂಧಿಸಿದ ಕೆಲವು ನಿರ್ದಿಷ್ಟ ಪ್ರಮುಖ ಪ್ರಕರಣಗಳನ್ನು ಜಮ್ಮು ಅಥವಾ ಶ್ರೀನಗರದ ಪೀಠಗಳಲ್ಲೇ ವಿಚಾರಣೆ ನಡೆಸುವ ವಿವೇಚನಾಧಿಕಾರವನ್ನು ಮುಖ್ಯ ನ್ಯಾಯಮೂರ್ತಿಗಳಿಗೆ ನೀಡಲಾಗಿದೆ.
2019ರಲ್ಲಿ ಜಮ್ಮು ಮತ್ತು ಕಾಶ್ಮೀರವನ್ನು ಎರಡು ಕೇಂದ್ರಾಡಳಿತ ಪ್ರದೇಶಗಳಾಗಿ ವಿಂಗಡಿಸಿದ ನಂತರ, ಎರಡೂ ಪ್ರದೇಶಗಳಿಗೂ ಒಂದೇ ಹೈಕೋರ್ಟ್ ಕಾರ್ಯನಿರ್ವಹಿಸುತ್ತಿತ್ತು. ಲಡಾಖ್‌ನ ಕಠಿಣ ಭೌಗೋಳಿಕ ಪರಿಸ್ಥಿತಿಯಲ್ಲಿ ಸಾರ್ವಜನಿಕರು ಹಾಗೂ ವಕೀಲರು ಜಮ್ಮು ಮತ್ತು ಶ್ರೀನಗರದ ನ್ಯಾಯಾಲಯಗಳಿಗೆ ಅಲೆಯುವುದು ಸವಾಲಾಗಿತ್ತು. ಈ ನೂತನ ಪೀಠದ ಸ್ಥಾಪನೆಯಿಂದ ಸ್ಥಳೀಯವಾಗಿ ಕಾನೂನು ಹೋರಾಟ ನಡೆಸಲು ಸುಲಭವಾಗಲಿದೆ. ಲಡಾಖ್ ಆಡಳಿತವು ಅಧಿಕೃತ ಗೆಜೆಟ್‌ನಲ್ಲಿ ಸೂಚಿಸುವ ದಿನಾಂಕದಿಂದ ಈ ಕಾಯ್ದೆ ಜಾರಿಗೆ ಬರಲಿದೆ.
