ಪ್ರಧಾನಿ ನರೇಂದ್ರ ಮೋದಿ ಅವರ ದಾಖಲೆಗಳ ಪಟ್ಟಿಗೆ ಇನ್ನೊಂದು ದಾಖಲೆ ಸೇರಿಕೊಂಡಿದೆ. ಅವರು ಪ್ರಸ್ತುತ ಹಮ್ಮಿಕೊಂಡಿರುವ ಫ್ರಾನ್ಸ್ ಮತ್ತು ಸ್ಲೋವಾಕಿಯಾ ದೇಶಗಳ ಒಂದು ವಾರದ ಪ್ರವಾಸವು, ಕಳೆದ 12 ವರ್ಷಗಳ ಅವರ ಪ್ರಧಾನಿ ಅವಧಿಯ 100ನೇ ವಿದೇಶಿ ಪ್ರವಾಸವಾಗಿದೆ. ಪ್ರಧಾನಿ ಮಂತ್ರಿ ಕಾರ್ಯಾಲಯದ (PMO) ಅಧಿಕೃತ ವೆಬ್‌ಸೈಟ್‌ನಲ್ಲಿ ಲಭ್ಯವಿರುವ ಮಾಹಿತಿಯ ಪ್ರಕಾರ, ಪ್ರಧಾನಿ ಮೋದಿಯವರು ತಮ್ಮ 12 ವರ್ಷಗಳ ಅಧಿಕಾರಾವಧಿಯಲ್ಲಿ ಇದುವರೆಗೆ ಒಟ್ಟು 78 ದೇಶಗಳಿಗೆ ಭೇಟಿ ನೀಡಿದ್ದಾರೆ.
2014ರ ಮೇ 26ರಂದು ದೇಶದ ಪ್ರಧಾನಿಯಾಗಿ ಮೊದಲ ಬಾರಿಗೆ ಅಧಿಕಾರ ವಹಿಸಿಕೊಂಡ ಮೋದಿ, ಜೂನ್ 15-16 ರಂದು ಭೂತಾನ್‌ಗೆ ತಮ್ಮ ಚೊಚ್ಚಲ ವಿದೇಶಿ ಪ್ರವಾಸ ಕೈಗೊಂಡಿದ್ದರು. ತಮ್ಮ ಮೊದಲ 5 ವರ್ಷಗಳ ಅವಧಿಯಲ್ಲಿ ಒಟ್ಟು 49 ವಿದೇಶಿ ಪ್ರವಾಸಗಳನ್ನು ಕೈಗೊಂಡಿದ್ದ ಅವರು, ಎರಡನೇ ಅವಧಿಯಲ್ಲಿ 27 ಪ್ರವಾಸಗಳನ್ನು ಪೂರ್ಣಗೊಳಿಸಿದ್ದರು. ಇನ್ನು 2024ರಲ್ಲಿ ಮೂರನೇ ಬಾರಿಗೆ ಪ್ರಧಾನಿಯಾದ ನಂತರ ಇಟಲಿ ಭೇಟಿಯೊಂದಿಗೆ ಆರಂಭವಾದ ಜಾಗತಿಕ ಸಂಚಾರ, ಪ್ರಸ್ತುತ ಫ್ರಾನ್ಸ್ ಮತ್ತು ಸ್ಲೋವಾಕಿಯಾ ಭೇಟಿಯ ಮೂಲಕ ಮೂರನೇ ಅವಧಿಯಲ್ಲೇ 24ನೇ ಪ್ರವಾಸವನ್ನು ತಲುಪಿದೆ. ಜೂನ್ 18 ರವರೆಗೆ ನಡೆಯಲಿರುವ ಈ ಪ್ರವಾಸದಲ್ಲಿ ಅವರು G7 ಶೃಂಗಸಭೆಯಲ್ಲಿ ಭಾಗವಹಿಸಿ ಜಾಗತಿಕ ನಾಯಕರೊಂದಿಗೆ ದ್ವಿಪಕ್ಷೀಯ ಮಾತುಕತೆ ನಡೆಸಲಿದ್ದಾರೆ.
ಈ ಪ್ರವಾಸಗಳು ಭಾರತವನ್ನು ಅತ್ಯಂತ ಪ್ರಭಾವಶಾಲಿ ದೇಶವನ್ನಾಗಿ ಬಿಂಬಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿವೆ ಎನ್ನುತ್ತಾರೆ ಬೆಂಬಲಿಗರು. ‘ಮೇಕ್ ಇನ್ ಇಂಡಿಯಾ’ ಯೋಜನೆಗೆ ಜಾಗತಿಕ ಹೂಡಿಕೆ ಆಕರ್ಷಿಸುವುದು, ಆಪಲ್ ಅಥವಾ ಸೆಮಿಕಂಡಕ್ಟರ್‌ನಂತಹ ದೈತ್ಯ ಕಂಪನಿಗಳು ಭಾರತದ ಕಡೆ ಮುಖ ಮಾಡುವಂತೆ ಮಾಡಿದ್ದು ಈ ನಿರಂತರ ಪ್ರವಾಸಗಳ ಫಲಶೃತಿ ಎನ್ನಲಾಗುತ್ತಿದೆ. ಆದರೆ, ದೇಶ ಆಂತರಿಕ ಸಮಸ್ಯೆಗಳಿಂದ ತತ್ತರಿಸುತ್ತಿರುವಾಗ ಅವುಗಳನ್ನು ಪರಿಹರಿಸುವುದನ್ನು ಬಿಟ್ಟು ಜಾಗತಿಕ ನಾಯಕನ ಪಟ್ಟಕ್ಕಾಗಿ ಸಾರ್ವಜನಿಕರ ಕೋಟ್ಯಂತರ ರೂಪಾಯಿ ತೆರಿಗೆ ಹಣವನ್ನು ಅದ್ದೂರಿ ಪ್ರಚಾರ ಮತ್ತು ವಿಮಾನ ಪ್ರಯಾಣಕ್ಕೆ ಬಳಸಲಾಗುತ್ತಿದೆ ಎಂಬ ಆರೋಪ ಕೇಳಿಬರುತ್ತಿದೆ. ನೆರೆಯ ಚೀನಾದ ಪ್ರಭಾವವನ್ನೇ ಸಂಪೂರ್ಣವಾಗಿ ತಡೆಯಲು ಸಾಧ್ಯವಾಗದಿರುವುದು ಕೂಡ ಈ ವಿದೇಶಾಂಗ ನೀತಿಯ ಮಿತಿಯನ್ನು ತೋರಿಸುತ್ತದೆ ಎಂಬ ವಾದವೂ ಇದೆ.
ಇದನ್ನೂ ಓದಿ: ವ್ಯಕ್ತಿಚಿತ್ರ | ಅಭಿನಯ ಗಾರುಡಿಗ ರಂಗಾಯಣ ರಘು ಈಗ 400 ಚಿತ್ರಗಳ ಸರದಾರ
ದೇಶದಲ್ಲಿ ಸದ್ಯ ಪಿಡುಗಾಗಿ ಮಾರ್ಪಟ್ಟಿರುವ ಪೇಪರ್‌ ಲೀಕ್‌ ಹಗರಣ, ಆಕಾಶ ಮುಟ್ಟಿರುವ ಹಸಿವಿನ ಪ್ರಮಾಣ, ವರ್ಷದಿಂದ ವರ್ಷಕ್ಕೆ ಏರುತ್ತಲೇ ಇರುವ ನಿರುದ್ಯೋಗಿ ಯುವಕರ ಸಂಖ್ಯೆ, ಹೊರದೇಶಗಳಲ್ಲಿ ಭಾರತೀಯರ ಸಾವು, ಈ ಎಲ್ಲವಕ್ಕೂ ಪ್ರಧಾನಿಯವರ ನಿರಂತರ ಮೌನ ಎಲ್ಲಿವರೆಗೆ ಮುಂದುವರೆಯುತ್ತದೆಯೋ ಅಲ್ಲಿವರೆಗೆ ಈ ಅಂತಾರಾಷ್ಟ್ರೀಯ ಒಪ್ಪಂದಗಳು ಮತ್ತು ಜಾಗತಿಕ ಗೌರವಗಳು ನಿಜವಾದ ಬದಲಾವಣೆ ತರಲು ಸಾಧ್ಯವಿಲ್ಲ.
