ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಅವರು ‘ದುರಹಂಕಾರಿಗಳು’ ಎಂದು ಕಾಂಗ್ರೆಸ್ ನಾಯಕ, ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಸೋಮವಾರ ಹೇಳಿದ್ದಾರೆ. “ಇವರಿಬ್ಬರೂ ಜನರೊಂದಿಗೆ ಕೆಲಸ ಮಾಡುವ ಬದಲು ಜನರ ಮೇಲೆ ಆಳ್ವಿಕೆ ನಡೆಸುವ ಮನಸ್ಥಿತಿ ಹೊಂದಿದ್ದಾರೆ” ಎಂದು ರಾಹುಲ್ ಆರೋಪಿಸಿದ್ದಾರೆ.
ಕೇರಳದ ಮಾಲಾದಲ್ಲಿ ಚುನಾವಣೆ ಪ್ರಚಾರ ನಡೆಸುತ್ತಾ ಮಾತನಾಡಿದ ರಾಹುಲ್ ಗಾಂಧಿ, “ಕೇರಳದಲ್ಲಿ ಮುಂಬರುವ ವಿಧಾನಸಭಾ ಚುನಾವಣೆ ಕಾಂಗ್ರೆಸ್ ನೇತೃತ್ವದ ಯುಡಿಎಫ್ ಮತ್ತು ಆಡಳಿತಾರೂಢ ಎಲ್‌ಡಿಎಫ್ ನಡುವಿನ ಹೋರಾಟ. ಎಲ್‌ಡಿಎಫ್‌ಗೆ ಬಿಜೆಪಿ ನೆರವು ನೀಡುತ್ತಿದೆ” ಎಂದು ದೂರಿದರು.
ಇದನ್ನು ಓದಿದ್ದೀರಾ? ವಿವಾದಗಳ ಗೊಚ್ಚೆಯಲ್ಲಿ ಸಿಲುಕಿರುವ ಕೇರಳ ಬಿಜೆಪಿ: ಮತ ಬ್ಯಾಂಕ್‌ಗಾಗಿ ತೊಳಲಾಟ
“ಎಲ್‌ಡಿಎಫ್‌ಗೆ ಸಹಾಯ ಮಾಡುವ ಗುಪ್ತ ಕೈ ಇದೆ. ಆಡಳಿತಾರೂಢ ಸಿಪಿಐ(ಎಂ) ಕಾರ್ಯಕರ್ತರು ಸಹ ಸರ್ಕಾರ ನಿಜವಾದ ಎಡ ಆಡಳಿತವಾಗಿ ಕಾರ್ಯನಿರ್ವಹಿಸುತ್ತಿಲ್ಲ ಎಂದು ಒಪ್ಪಿಕೊಳ್ಳುತ್ತಾರೆ. ಕೇರಳ ಮತ್ತು ದೇಶಾದ್ಯಂತ ಬಿಜೆಪಿ ಕಾಂಗ್ರೆಸ್ ಮತ್ತು ಅದರ ನೇತೃತ್ವದ ಯುಡಿಎಫ್ ಅನ್ನು ತನ್ನ ಪ್ರಮುಖ ರಾಜಕೀಯ ಸವಾಲಾಗಿ ಪರಿಗಣಿಸುತ್ತದೆ” ಎಂದು ಹೇಳಿದರು.
“ಪ್ರಧಾನಿ ಮೋದಿ ತಮ್ಮ ಭಾಷಣಗಳಲ್ಲಿ ದೇವರು, ದೇವಾಲಯಗಳು ಮತ್ತು ಧರ್ಮದ ಬಗ್ಗೆ ಮಾತನಾಡುತ್ತಾರೆ. ಆದರೆ ಕೇರಳದಲ್ಲಿ ಅವರು ಸಿಪಿಐ(ಎಂ) ನಾಯಕರ ಕೈವಾಡವಿರುವ ಶಬರಿಮಲೆಯ ಚಿನ್ನ ನಾಪತ್ತೆ ಬಗ್ಗೆ ಮಾತನಾಡುವುದಿಲ್ಲ. ಏಕೆಂದರೆ ಮೋದಿ ಅವರು ಬಿಜೆಪಿ ಸಿಎಂ ಪಿಣರಾಯಿ ಮತ್ತು ಸಿಪಿಐಎಂ ಅನ್ನು ರಕ್ಷಿಸಲು ಬಯಸುತ್ತಾರೆ. ಎಲ್‌ಡಿಎಫ್ ಅನ್ನು ರಕ್ಷಿಸುವ ಸಲುವಾಗಿ ಕೇರಳದಲ್ಲಿ ದೇವರು, ಹಿಂದೂ ಧರ್ಮ ಮತ್ತು ದೇವಾಲಯಗಳನ್ನು ಮರೆತಿದ್ದಾರೆ” ಎಂದು ದೂರಿದರು.
ಕೇರಳ ವಿಧಾನಸಭೆ ಚುನಾವಣೆಯು ಏಪ್ರಿಲ್ 9ರಂದು ನಡೆಯಲಿದೆ. ಮೇ 4ರಂದು ಚುನಾವಣೆಯ ಫಲಿತಾಂಶ ಹೊರಬೀಳಲಿದೆ. ಯುಡಿಎಫ್, ಎಲ್‌ಡಿಎಫ್, ಎನ್‌ಡಿಎ ಪ್ರಚಾರ ಕಾರ್ಯ ನಡೆಸುತ್ತಿದೆ. ಒಂದೆಡೆ ಬಿಜೆಪಿ-ಎಲ್‌ಡಿಎಫ್ ಒಂದೇ ಎಂದು ಯುಡಿಎಫ್ ಆರೋಪಿಸುತ್ತಿದೆ. ಇನ್ನೊಂದೆಡೆ ಯುಡಿಎಫ್-ಬಿಜೆಪಿ ಒಂದೇ ಎಂದು ಎಲ್‌ಡಿಎಫ್ ದೂರುತ್ತಿದೆ.
