ಮಾದಕ ವ್ಯಸನಿಯಾಗಿದ್ದ 32 ವರ್ಷದ ಮಗನ ನಿರಂತರ ಕಿರುಕುಳದಿಂದ ಬೇಸತ್ತ ಹೆತ್ತವರೇ ಆತನನ್ನು ಕೊಲೆ ಮಾಡಲು 5 ಲಕ್ಷ ರೂ. ಸುಪಾರಿ ನೀಡಿರುವ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ಬಿಜ್ನೋರ್ನಲ್ಲಿ ಬೆಳಕಿಗೆ ಬಂದಿದೆ. ಸುಪಾರಿ ಹಂತಕನಿಗೆ ಮುಂಗಡ ಹಣ ನೀಡಲು ತಾಯಿಯೇ ತನ್ನ ಚಿನ್ನಾಭರಣಗಳನ್ನು 55,000 ರೂ.ಕ್ಕೆ ಮಾರಾಟ ಮಾಡಿರುವುದು ಪೊಲೀಸ್ ತನಿಖೆಯಿಂದ ತಿಳಿದುಬಂದಿದೆ.
ಕೊಲೆಯಾದ ಯುವಕನನ್ನು ಅಮ್ರೋಹದ ನಾಸಿರ್ಪುರ ಗ್ರಾಮದ ದುಷ್ಯಂತ್ ಕುಮಾರ್ (32) ಎಂದು ಗುರುತಿಸಲಾಗಿದೆ. ಶನಿವಾರ ಬೆಳಿಗ್ಗೆ ಅರಣ್ಯ ಪ್ರದೇಶದ ಸಮೀಪವಿರುವ ಒಣಗಿದ ಕಾಲುವೆಯಲ್ಲಿ ದುಷ್ಯಂತ್ ಮೃತದೇಹ ಪತ್ತೆಯಾದಾಗ ಈ ಪ್ರಕರಣ ಹೊರಬಿದ್ದಿದೆ.
ಅಮ್ರೋಹ ಪೊಲೀಸ್ ವರಿಷ್ಠಾಧಿಕಾರಿ (ಎಸ್ಪಿ) ಲಖನ್ ಸಿಂಗ್ ಯಾದವ್ ಅವರು ಘಟನೆಯ ಕುರಿತು ಮಾಹಿತಿ ನೀಡಿದ್ದಾರೆ. “ದುಷ್ಯಂತ್ ತೀವ್ರ ಮಾದಕ ವ್ಯಸನಿಯಾಗಿದ್ದ. ಆತ ಪ್ರತಿದಿನ ಅಮಲಿನಲ್ಲಿ ಬಂದು 60ರ ವಯಸ್ಸಿನ ತನ್ನ ವೃದ್ಧ ತಂದೆ-ತಾಯಿಯನ್ನು ನಿಂದಿಸುತ್ತಿದ್ದ ಮತ್ತು ಅವರ ಮೇಲೆ ಹಲ್ಲೆ ನಡೆಸುತ್ತಿದ್ದ. ಮಗನ ಈ ನಿರಂತರ ಕಿರುಕುಳದಿಂದ ರೋಸಿಹೋಗಿದ್ದ ತಂದೆ ಪೀತಮ್ ಸಿಂಗ್ ಮತ್ತು ತಾಯಿ ಮಾಯಾ ದೇವಿ, ತಮ್ಮ ಕಿರಿಯ ಮಗ ಸಂಕಿತ್ ಜೊತೆ ಸೇರಿ ಈತನನ್ನು ಮುಗಿಸಲು ನಿರ್ಧರಿಸಿದ್ದರು. ಇದಕ್ಕಾಗಿ ಜೋಗೇಂದ್ರ ಎಂಬ ಸ್ಥಳೀಯ ಅಪರಾಧಿಗೆ 5 ಲಕ್ಷ ರೂ. ಸುಪಾರಿ ನೀಡಿದ್ದರು” ಎಂದು ಅವರು ವಿವರಿಸಿದ್ದಾರೆ.
ಇದನ್ನು ಓದಿದ್ದೀರಾ? ಗಲ್ಲಾಪೆಟ್ಟಿಗೆಯಿಂದ ಮತಪೆಟ್ಟಿಗೆ; ಜೋಸೆಫ್ ವಿಜಯ್ ಎಂಬ ಹೀರೋವಿನ ಸೂಪರ್ ಡ್ಯೂಪರ್ ಹಿಟ್ ರಾಜಕೀಯ ಪ್ರವೇಶ!
ಯೋಜನೆಯಂತೆ, ಶುಕ್ರವಾರ ರಾತ್ರಿ ಜೋಗೇಂದ್ರ ಹಾಗೂ ಆತನ ಸಹಚರರು, ಮೃತನ ಕಿರಿಯ ಸಹೋದರ ಸಂಕಿತ್ ಜೊತೆಗೂಡಿ ದುಷ್ಯಂತ್ನನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾರೆ. ಬಳಿಕ ಮೃತದೇಹವನ್ನು ಯಾರಿಗೂ ಕಾಣದಂತೆ ನಿರ್ಜನ ಕಾಲುವೆಯಲ್ಲಿ ಎಸೆದು ಪರಾರಿಯಾಗಿದ್ದರು.
ದುಷ್ಯಂತ್ ಸಾವಿನ ಬಗ್ಗೆ ಅನುಮಾನಗೊಂಡು ಕಿರಿಯ ಸಹೋದರ ಸಂಕಿತ್ನನ್ನು ಪೊಲೀಸರು ತೀವ್ರ ವಿಚಾರಣೆಗೆ ಒಳಪಡಿಸಿದಾಗ ಅಸಲಿ ಸತ್ಯ ಬಾಯ್ಬಿಟ್ಟಿದ್ದಾನೆ. ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು ತಂದೆ ಪೀತಮ್ ಸಿಂಗ್ ಹಾಗೂ ಸಹೋದರ ಸಂಕಿತ್ನನ್ನು ಬಂಧಿಸಿದ್ದಾರೆ. ಪೋಷಕರು, ಕಿರಿಯ ಮಗ ಹಾಗೂ ಸುಪಾರಿ ಹಂತಕನ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ ಸೆಕ್ಷನ್ 103(1) (ಕೊಲೆ) ಅಡಿಯಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ.
ಬಂಧಿತರನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ. ಪ್ರಕರಣದ ಪ್ರಮುಖ ಆರೋಪಿಗಳಾದ ತಾಯಿ ಮಾಯಾ ದೇವಿ, ಸುಪಾರಿ ಹಂತಕ ಜೋಗೇಂದ್ರ ಹಾಗೂ ಆತನ ಇಬ್ಬರು ಅಪರಿಚಿತ ಸಹಚರರು ತಲೆಮರೆಸಿಕೊಂಡಿದ್ದು, ಅವರಿಗಾಗಿ ತೀವ್ರ ಶೋಧ ಕಾರ್ಯ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
