ಉತ್ತರಾಖಂಡದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆ ಹಲವು ಅಚ್ಚರಿಯ ಅಂಕಿ-ಅಂಶಗಳೊಂದಿಗೆ ವಿವಾದಕ್ಕೆ ಕಾರಣವಾಗಿದೆ. ಇಲ್ಲಿವರೆಗೆ ರಾಜ್ಯಾದ್ಯಂತ 59,604 ಆಕ್ಷೇಪಣೆಗಳು ದಾಖಲಾಗಿದ್ದು, ಒಂದೇ ವಿಧಾನಸಭಾ ಕ್ಷೇತ್ರದಲ್ಲಿ ಒಬ್ಬರೇ ವ್ಯಕ್ತಿಯೇ ಬರೋಬ್ಬರಿ 5,906 ಆಕ್ಷೇಪಣೆಗಳನ್ನು ಸಲ್ಲಿಸಿರುವುದು ಗಮನ ಸೆಳೆದಿದೆ.
ಚುನಾವಣಾ ಅಧಿಕಾರಿಗಳು ಸಿದ್ಧಪಡಿಸಿರುವ ವಿಶ್ಲೇಷಣಾ ವರದಿ ಪ್ರಕಾರ, ರಾಜ್ಯದಲ್ಲಿ ದಾಖಲಾಗಿರುವ 59,604 ಆಕ್ಷೇಪಣೆಗಳಲ್ಲಿ ಶೇ.90ಕ್ಕೂ ಹೆಚ್ಚು ಆಕ್ಷೇಪಣೆಗಳು ಬಯಲು ಪ್ರದೇಶಗಳ ಜಿಲ್ಲೆಗಳಿಂದ ಬಂದಿವೆ. ಹೆಚ್ಚಿನ ಪ್ರಮಾಣದ ಆಕ್ಷೇಪಣೆಗಳು ಚುನಾವಣಾ ಆಯೋಗಕ್ಕೆ ಮತದಾರರ ವಿವರಗಳನ್ನು ಪರಿಶೀಲಿಸುವ ಸವಾಲನ್ನು ತಂದೊಡ್ಡಿವೆ ಎನ್ನಲಾಗಿದೆ.
ಒಟ್ಟು ಆಕ್ಷೇಪಣೆಗಳಲ್ಲಿ 40,906 ಮತದಾರರು ತಮ್ಮ ನೋಂದಾಯಿತ ವಿಳಾಸದಲ್ಲಿ ಪತ್ತೆಯಾಗಿಲ್ಲ ಅಥವಾ ಶಾಶ್ವತವಾಗಿ ಬೇರೆಡೆಗೆ ಸ್ಥಳಾಂತರಗೊಂಡಿದ್ದಾರೆ ಎಂಬ ಕಾರಣ ನೀಡಲಾಗಿದೆ. ಇದು ಒಟ್ಟು ಆಕ್ಷೇಪಣೆಗಳ ಪೈಕಿ ಶೇ.69ರಷ್ಟಾಗಿದೆ.
ಇದಲ್ಲದೆ, 2,575 ಮತದಾರರು ಶಾಶ್ವತವಾಗಿ ಸ್ಥಳಾಂತರಗೊಂಡಿದ್ದಾರೆ ಎಂಬ ನಿರ್ದಿಷ್ಟ ಕಾರಣದಡಿ ದೂರುಗಳನ್ನು ಸಲ್ಲಿಸಲಾಗಿದೆ. ಆದರೆ ಮತದಾರರು ಮನೆಯಲ್ಲಿ ಪತ್ತೆಯಾಗದಿರುವುದು ಮಾತ್ರ ಅವರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಲು ಸಕಾರಣವಲ್ಲ ಎಂದು ಚುನಾವಣಾ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ. ಮತದಾರರ ಪಟ್ಟಿಯನ್ನು ನಿಖರ ಹಾಗೂ ದೋಷರಹಿತಗೊಳಿಸುವುದೇ SIR ಪ್ರಕ್ರಿಯೆಯ ಪ್ರಮುಖ ಉದ್ದೇಶ ಎಂದು ಚುನಾವಣಾ ಆಯೋಗದ ಮೂಲಗಳು ತಿಳಿಸಿವೆ.
ರಾಜ್ಯದಲ್ಲೇ ಅತಿ ಹೆಚ್ಚು ಆಕ್ಷೇಪಣೆಗಳು ಕಿಚ್ಚಾ ವಿಧಾನಸಭಾ ಕ್ಷೇತ್ರದಲ್ಲಿ (8,767) ದಾಖಲಾಗಿವೆ. ಈ ಪೈಕಿ 5,906 ಆಕ್ಷೇಪಣೆಗಳನ್ನು ಒಬ್ಬರೇ ಸಲ್ಲಿಸಿದ್ದಾರೆ. ಚುನಾವಣಾ ಅಧಿಕಾರಿಗಳ ವರದಿಯಲ್ಲಿ ಆ ವ್ಯಕ್ತಿಯನ್ನು ರಾಜೇಶ್‌ ತಿವಾರಿ ಎಂದು ಗುರುತಿಸಲಾಗಿದೆ. ರಾಜ್ಯಾದ್ಯಂತ ದಾಖಲಾಗಿರುವ ಒಟ್ಟು 59,604 ಆಕ್ಷೇಪಣೆಗಳಲ್ಲಿ ತಿವಾರಿಯೊಬ್ಬರೇ ಸಲ್ಲಿಸಿರುವ ಆಕ್ಷೇಪಣೆಗಳ ಪ್ರಮಾಣ ಶೇ.10ರಷ್ಟಿದೆ. ಕಿಚ್ಚಾ ಕ್ಷೇತ್ರದಲ್ಲಿ ದಾಖಲಾಗಿರುವ ಆಕ್ಷೇಪಣೆಗಳ ಪೈಕಿ ಮೂರನೇ ಎರಡರಷ್ಟು ಆಕ್ಷೇಪಣೆಗಳು ಅವರಿಂದಲೇ ಬಂದಿವೆ.
ರಾಜೇಶ್‌ ತಿವಾರಿ ಅವರು ಆ ಕ್ಷೇತ್ರದಲ್ಲಿ ಬಿಜೆಪಿಯ ಬೂತ್‌ ಮಟ್ಟದ ಏಜೆಂಟ್‌ ಆಗಿ ಕಾರ್ಯನಿರ್ವಹಿಸುತ್ತಿದ್ದು, ಕಾಂಗ್ರೆಸ್‌ ಬೆಂಬಲಿಗರೆಂದು ಗುರುತಿಸಲಾದ ಮತದಾರರ ವಿರುದ್ಧ ಉದ್ದೇಶಪೂರ್ವಕವಾಗಿ ಆಕ್ಷೇಪಣೆಗಳನ್ನು ಸಲ್ಲಿಸಿದ್ದಾರೆ ಎಂದು ಕಾಂಗ್ರೆಸ್‌ ನಾಯಕ ಅಮೇಂದ್ರ ಬಿಷ್ಟ್‌ ಆರೋಪಿಸಿದ್ದಾರೆ. SIR ಪ್ರಕ್ರಿಯೆಯನ್ನು ಮುಸ್ಲಿಂ ಮತದಾರರು ಮತ್ತು ಪ್ರತಿಪಕ್ಷ ಬೆಂಬಲಿಗರನ್ನು ಗುರಿಯಾಗಿಸಲು ಬಳಸಲಾಗುತ್ತಿದೆ ಎಂದು ಕಾಂಗ್ರೆಸ್‌ ಆರೋಪಿಸಿದೆ.
“ಮುಸ್ಲಿಂ ಮತದಾರರು ಮತ್ತು ಕಾಂಗ್ರೆಸ್‌ ಜತೆ ಗುರುತಿಸಿಕೊಂಡಿರುವ ಮತದಾರರ ಹೆಸರುಗಳನ್ನು ಮತದಾರರ ಪಟ್ಟಿಯಿಂದ ತೆಗೆದುಹಾಕುವ ಉದ್ದೇಶದಿಂದ ಬಿಜೆಪಿ ಕಾರ್ಯಕರ್ತರು ಆಕ್ಷೇಪಣೆಗಳನ್ನು ಸಲ್ಲಿಸುತ್ತಿದ್ದಾರೆ” ಎಂದು ಕಾಂಗ್ರೆಸ್‌ನ ಅಮೇಂದ್ರ ಬಿಷ್ಟ್‌ ಆರೋಪಿಸಿದ್ದಾರೆ.
ಇದನ್ನೂ ಓದಿ: ಎಸ್‌ಐಆರ್‌ ಕರಡು ಮತದಾರರ ಪಟ್ಟಿ
ಆದರೆ ಕಾಂಗ್ರೆಸ್‌ನ ಆರೋಪಗಳನ್ನು ಬಿಜೆಪಿ ತಳ್ಳಿಹಾಕಿದೆ. ರಾಜ್ಯ ಬಿಜೆಪಿ ವಕ್ತಾರೆ ಮಥುರಾ ಜೋಶಿ, “ನಿರ್ದಿಷ್ಟ ಸಮುದಾಯವನ್ನು ಓಲೈಸುವ ಉದ್ದೇಶದಿಂದ ಕಾಂಗ್ರೆಸ್‌ ಇಂತಹ ಆರೋಪಗಳನ್ನು ಮಾಡುತ್ತಿದೆ. ಚುನಾವಣಾ ಆಯೋಗದ ಮೇಲ್ವಿಚಾರಣೆಯಲ್ಲೇ SIR ಪ್ರಕ್ರಿಯೆ ನಡೆಯುತ್ತಿದ್ದು, ನಿಯಮಾನುಸಾರ ಕ್ರಮ ಕೈಗೊಳ್ಳಲಾಗುತ್ತಿದೆ” ಎಂದು ಹೇಳಿದ್ದಾರೆ.
ಕಿಚ್ಚಾ ಬಳಿಕ ಹಲ್ದ್ವಾನಿಯಲ್ಲಿ 7,312, ಜಸ್ಪುರದಲ್ಲಿ 6,720, ಕಾಶಿಪುರದಲ್ಲಿ 5,704, ರುದ್ರಪುರದಲ್ಲಿ 4,958, ಗದರ್‌ಪುರದಲ್ಲಿ 4,785, ಝಬ್ರೇರಾದಲ್ಲಿ 2,333, ಸಿತಾರಗಂಜ್‌ನಲ್ಲಿ 1,612, ಬಾಜ್‌ಪುರದಲ್ಲಿ 1,475 ಮತ್ತು ಹರಿದ್ವಾರ ಗ್ರಾಮೀಣದಲ್ಲಿ 1,400 ಆಕ್ಷೇಪಣೆಗಳು ದಾಖಲಾಗಿವೆ. ಈ ಅಂಕಿ-ಅಂಶಗಳು ಬಹುತೇಕ ಆಕ್ಷೇಪಣೆಗಳು ರಾಜ್ಯದ ಬಯಲು ಪ್ರದೇಶಗಳಿಂದ, ಅದರಲ್ಲೂ ಉಧಮ್ ಸಿಂಗ್ ನಗರ ಮತ್ತು ಹರಿದ್ವಾರ ಜಿಲ್ಲೆಗಳ ವಿಧಾನಸಭಾ ಕ್ಷೇತ್ರಗಳಿಂದ ಬಂದಿರುವುದನ್ನು ತೋರಿಸುತ್ತವೆ.
ಒಟ್ಟು ಆಕ್ಷೇಪಣೆಗಳ ಪೈಕಿ 14,358 ಈಗಾಗಲೇ ಮತದಾರರಾಗಿ ನೋಂದಾಯಿತರಾಗಿರುವವರ ವಿರುದ್ಧ, 2,575 ಶಾಶ್ವತವಾಗಿ ಸ್ಥಳಾಂತರಗೊಂಡಿರುವ ಆರೋಪ, 804 ಮೃತಪಟ್ಟಿರುವವರು, 143 ಅಪ್ರಾಪ್ತ ವಯಸ್ಕರು, 205 ಭಾರತೀಯ ನಾಗರಿಕರಲ್ಲ ಎಂಬ ಆರೋಪ, 607 ಸ್ಪಷ್ಟ ಕಾರಣ ನಮೂದಿಸದ ಪ್ರಕರಣಗಳು ದಾಖಲಾಗಿವೆ.
ಈ ಕುರಿತು ಹೆಚ್ಚುವರಿ ಮುಖ್ಯ ಚುನಾವಣಾಧಿಕಾರಿ ವಿಜಯ್ ಕುಮಾರ್ ಜೋಗ್‌ದಂಡೆ ಸ್ಪಷ್ಟನೆ ನೀಡಿದ್ದು, ಕೇವಲ ಆಕ್ಷೇಪಣೆ ಸಲ್ಲಿಸಲಾಗಿದೆ ಎಂಬ ಕಾರಣಕ್ಕೆ ಮತದಾರರ ಹೆಸರನ್ನು ಸ್ವಯಂಚಾಲಿತವಾಗಿ ಪಟ್ಟಿಯಿಂದ ತೆಗೆದುಹಾಕಲಾಗುವುದಿಲ್ಲ. ಆಕ್ಷೇಪಣೆ ಸಲ್ಲಿಸಿದ ವ್ಯಕ್ತಿ ಹಾಗೂ ಯಾರ ವಿರುದ್ಧ ಆಕ್ಷೇಪಣೆ ಸಲ್ಲಿಸಲಾಗಿದೆಯೋ ಆ ಮತದಾರ ಇಬ್ಬರಿಗೂ ತಮ್ಮ ವಾದ ಮಂಡಿಸಲು ಅವಕಾಶ ನೀಡಲಾಗುತ್ತದೆ. ಬಳಿಕ ಪರಿಶೀಲನೆ ನಡೆಸಿ ನಿರ್ಧಾರ ಕೈಗೊಳ್ಳಲಾಗುತ್ತದೆ ಎಂದು ಹೇಳಿದ್ದಾರೆ.
