ಅತ್ತ ಆಂಬ್ಯುಲೆನ್ಸ್ ಇಲ್ಲ, ಇತ್ತ ಸೇತುವೆಯೂ ಇಲ್ಲ. ಬೇರೆ ದಾರಿ ಕಾಣದೆ ಹೆರಿಗೆ ನೋವಿನಿಂದ ನರಳುತ್ತಿದ್ದ ಗರ್ಭಿಣಿಯನ್ನು ಗ್ರಾಮಸ್ಥರು ಮಂಚದಲ್ಲಿ ಹೊತ್ತೊಯ್ಯುವಾಗ, ನಡು ದಾರಿಯಲ್ಲೇ ಮಹಿಳೆ ಮಗುವಿಗೆ ಜನ್ಮ ನೀಡಿರುವ ಘಟನೆ ಮಧ್ಯಪ್ರದೇಶದ ಛಿಂದ್ವಾರಾ ಜಿಲ್ಲೆಯಲ್ಲಿ ನಡೆದಿದೆ.
ಅಮರವಾರ ಬ್ಲಾಕ್‌ನ ಹಥೋಡಾ ಹಿರಿ ಗ್ರಾಮದ ಲೋಹ್ರಿ ಮೊಹಲ್ಲಾ ಪ್ರದೇಶದಲ್ಲಿ ಈ ಘಟನೆ ನಡೆದಿದೆ. ಮಳೆಗಾಲದಲ್ಲಿ ಸೇತುವೆ ಇಲ್ಲದೆ, ಇರುವ ಒಂದು ರಸ್ತೆಯೂ ಜಲಾವೃತವಾಗುವ ಕಾರಣ ಇಲ್ಲಿನ ಸುಮಾರು 20 ಕುಟುಂಬಗಳು ಪಟ್ಟಣಕ್ಕೆ ಸಂಪರ್ಕವನ್ನು ಕಳೆದುಕೊಂಡಿದೆ.
ಇದನ್ನೂ ಓದಿ: ಹೆರಿಗೆಗಾಗಿ 6 ಕಿ.ಮೀ ನಡೆದು ಬಂದ ಗರ್ಭಿಣಿ ಸಾವು
ಈ ನಡುವೆ ಹೆರಿಗೆ ನೋವು ಕಾಣಿಸಿಕೊಂಡ ಮಹಿಳೆಯನ್ನು ಗ್ರಾಮಸ್ಥರು ಮಂಚದಲ್ಲಿ ಹೊತ್ತು ಪಟ್ಟಣದತ್ತ ಧಾವಿಸಿದ್ದು ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಸರ್ಕಾರದ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ಶಂಕರ್ ವಿಶ್ವಕರ್ಮ ಅವರ ಪತ್ನಿ 35 ವರ್ಷದ ಸವಿತಾ ವಿಶ್ವಕರ್ಮ ಅವರಿಗೆ ಬುಧವಾರ ಸಂಜೆ ಹೆರಿಗೆ ನೋವು ಕಾಣಿಸಿಕೊಂಡಿತ್ತು. ಅವರ ಸಂಬಂಧಿಕರು ತಕ್ಷಣ 108 ಆಂಬ್ಯುಲೆನ್ಸ್ ಸೇವೆಗೆ ಕರೆ ಮಾಡಿದ್ದರು. ಆದರೆ ನದಿ ಉಕ್ಕಿ ಹರಿಯುತ್ತಿದ್ದ ಕಾರಣ ವಾಹನವು ಹಳ್ಳಿಯನ್ನು ತಲುಪಲು ಸಾಧ್ಯವಾಗಲಿಲ್ಲ. ಬೇರೆ ದಾರಿಯಿಲ್ಲದೆ, ಕುಟುಂಬ ಸದಸ್ಯರು ಮತ್ತು ಗ್ರಾಮಸ್ಥರು ಮಹಿಳೆಯನ್ನು ಮಂಚದಲ್ಲಿ ಹೊತ್ತು ನಡೆದುಕೊಂಡು ನದಿಯನ್ನು ದಾಟಲು ಮುಂದಾಗಿದ್ದಾರೆ. ನದಿ ದಾಟುವಾಗ ಹೆರಿಗೆ ನೋವು ತೀವ್ರವಾಗಿ ಮಂಚದಲ್ಲಿಯೇ ಹೆರಿಗೆಯಾಗಿದೆ.
ನಂತರ ಗ್ರಾಮಸ್ಥರು ತಾಯಿ ಮತ್ತು ನವಜಾತ ಶಿಶುವನ್ನು ನದಿ ದಾಟಿಸಿ ಆಂಬ್ಯುಲೆನ್ಸ್‌ಗಾಗಿ ಕಾದಿದ್ದಾರೆ. ಆದರೆ ಸುಮಾರು ಗಂಟೆಗಳ ಕಾಲ ಕಾದರೂ ಆಂಬ್ಯುಲೆನ್ಸ್ ಬರದ ಕಾರಣ ಶಿಶು, ತಾಯಿಯನ್ನು ಕೊನೆಗೆ ಮೋಟಾರ್ ಸೈಕಲ್‌ನಲ್ಲಿ ಅಮರವಾರ ಸಿವಿಲ್ ಆಸ್ಪತ್ರೆಗೆ ಸಾಗಿಸಲಾಗಿದೆ. ಸದ್ಯ ತಾಯಿ ಮತ್ತು ಮಗು ಇಬ್ಬರೂ ಆರೋಗ್ಯವಾಗಿದ್ದಾರೆ ಎಂದು ಆಸ್ಪತ್ರೆ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಬಗ್ಗೆ ಮಾಧ್ಯಮಕ್ಕೆ ಪ್ರತಿಕ್ರಿಯಿಸಿರುವ ಮಹಿಳೆಯ ಸೋದರ ಮಾವ ಗೋಪಾಲ್ ವಿಶ್ವಕರ್ಮ, ಪ್ರತಿ ಮಳೆಗಾಲದಲ್ಲಿ ಗ್ರಾಮದಲ್ಲಿ ಇದೇ ಸಮಸ್ಯೆ ಉಂಟಾಗುತ್ತದೆ. ವಾಹನಗಳು ನದಿ ದಾಟಲು ಸಾಧ್ಯವಾಗದ ಕಾರಣ ಹಲವು ಸಮಸ್ಯೆಗಳಾಗುತ್ತದೆ. ನಾವು ಸೇತುವೆ ನಿರ್ಮಾಣಕ್ಕಾಗಿ, ಉತ್ತಮ ರಸ್ತೆಗಾಗಿ ಪದೇ ಪದೇ ಮನವಿ ಮಾಡುತ್ತಲೇ ಇದ್ದೇವೆ. ಆದರೆ ನಮ್ಮ ಮನವಿಯನ್ನು ಕೇಳುವವರಿಲ್ಲ” ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
“ಅಧಿಕಾರಿಗಳು, ಜನಪ್ರತಿನಿಧಿಗಳು ನಮ್ಮ ಮನವಿಯನ್ನು ಕೇಳುವುದೇ ಇಲ್ಲ. ಶಾಲಾ ಮಕ್ಕಳು ಸಹ ಪ್ರತಿದಿನ ನದಿ ದಾಟಬೇಕಾಗುತ್ತದೆ. ನಾವು ಜನಪದ ಪಂಚಾಯತ್, ಎಸ್‌ಡಿಎಂಗೆ ದೂರುಗಳನ್ನು ಸಲ್ಲಿಸಿದ್ದೇವೆ. ಚುನಾಯಿತ ಪ್ರತಿನಿಧಿಗಳಿಗೆ ಮಾಹಿತಿ ನೀಡಿದ್ದೇವೆ. ಆದೆರೆ ಯಾರೂ ಯಾವುದೇ ಕ್ರಮ ಕೈಗೊಂಡಿಲ್ಲ” ಎಂದು ವಿಶ್ವಕರ್ಮ ಹೇಳಿದ್ದಾರೆ.
