- ಸೇಬು ಟರ್ಕಿಯಿಂದ ಗರಿಷ್ಠ ಆಮದು
- ಭೂತಾನ್ ಹಣ್ಣಿನ ಆಮದಿಗೆ ವಿನಾಯತಿ
ಕೇಂದ್ರ ಸರ್ಕಾರ ಪ್ರತಿ ಕೆಜಿಗೆ 50 ರೂ.ಗಿಂತಲೂ ಕಡಿಮೆಯಿರುವ ಸೇಬು ಹಣ್ಣಿನ ಆಮದನ್ನು ಸೋಮವಾರ (ಮೇ 8) ನಿಷೇಧಿಸಿದೆ.
ಪ್ರತಿ ಕೆಜಿಗೆ 50ಕ್ಕಿಂತ ಹೆಚ್ಚಿದ್ದರೆ ಸೇಬನ್ನು ಆಮದು ಮಾಡಬಹುದು ಎಂದು ವಿದೇಶಿ ವ್ಯಾಪಾರದ ಮಹಾನಿರ್ದೇಶನಾಲಯ (ಡಿಜಿಎಫ್‌ಟಿ) ಅಧಿಸೂಚನೆಯೊಂದರಲ್ಲಿ ತಿಳಿಸಿದೆ.
ಇದರಿಂದ ದೇಶಕ್ಕೆ ಅಧಿಕ ಪ್ರಮಾಣದಲ್ಲಿ ಹಣ್ಣನ್ನು ರಫ್ತು ಮಾಡುತ್ತಿರುವ ಇರಾನ್, ಯುಎಇ ಹಾಗೂ ಅಫ್ಗಾನಿಸ್ತಾನಕ್ಕೆ ಹೊಡೆತ ಬೀಳಲಿದೆ.
ಹಣ್ಣಿನ ಆಮದು ನಿಷೇಧ ಚೀನಾದ ವ್ಯಾಪಾರದ ಮೇಲೆ ಪರಿಣಾಮ ಬೀರಲಿದೆ. ಆದರೆ ಅಂಕಿ ಅಂಶಗಳ ಪ್ರಕಾರ ಅತಿ ಕಡಿಮೆ ಪ್ರಮಾಣದ ಸೇಬಿನ ಹಣ್ಣು ಆಮದು ಆಗುತ್ತಿದೆ.
ಸೇಬು ಹಣ್ಣಿನ ಸಿಐಎಫ್ (ವೆಚ್ಚ, ವಿಮೆ, ಸರಕು ಸಾಗಣೆ) ಆಮದು ಬೆಲೆ ಪ್ರತಿ ಕೆಜಿಗೆ ₹50ಕ್ಕಿಂತಲೂ ಕಡಿಮೆ ಇರುವ ಆಮದನ್ನು ನಿಷೇಧಿಸಲಾಗಿದೆ ಎಂದು ಡಿಜಿಎಫ್‌ಟಿ ಅಧಿಸೂಚನೆಯಲ್ಲಿ ತಿಳಿಸಿದೆ.
ಹಣ್ಣಿನ ಋತುಮಾನ ಕ್ಷೀಣಿಸಿರುವ ಹಿನ್ನೆಲೆ ಕೃಷಿ ಸಚಿವಾಲಯದ ಶಿಫಾರಸಿನ ಮೇರೆಗೆ ಈ ತೀರ್ಮಾನ ಕೈಗೊಳ್ಳಲಾಗಿದೆ.
ಸೇಬಿನ ಹಣ್ಣು ಇತ್ತೀಚೆಗೆ ವಾಷಿಂಗ್ಟನ್ ಹಾಗೂ ಟರ್ಕಿಗಳಿಂದ ಹೆಚ್ಚು ಆಮದಾಗುತ್ತಿತ್ತು. ಕಳೆದ ಹಣಕಾಸು ವರ್ಷದಲ್ಲಿ ಸುಮಾರು 300 ದಶಲಕ್ಷ ಡಾಲರ್ ಮೌಲ್ಯದ ಸೇಬಿನ ಹಣ್ಣು ಆಮದಾಗಿತ್ತು.
ಭೂತಾನ್ ನಿಂದ ಆಮದು ಮಾಡಿಕೊಳ್ಳುತ್ತಿರುವ ಸೇಬಿನ ಹಣ್ಣುಗಳಿಗೆ ಕನಿಷ್ಠ ಆಮದು ಬೆಲೆಯ ಷರತ್ತು ಅನ್ವಯಿಸುವುದಿಲ್ಲ ಎಂದು ಅಧಿಸೂಚನೆ ಹೇಳಿದೆ.
ಈ ಸುದ್ದಿ ಓದಿದ್ದೀರಾ? ಗಲಭೆ ಲಾಭ ಪಡೆದ ವಿಮಾನಯಾನ ಸಂಸ್ಥೆಗಳು; ₹2 ಸಾವಿರ ಬೆಲೆಯ ಟಿಕೆಟ್ ₹25 ಸಾವಿರಕ್ಕೆ ಏರಿಕೆ
ಸೇಬು ಹಣ್ಣಿನ ರಫ್ತನ್ನು ಅಮೆರಿಕ, ಇರಾನ್, ಬ್ರೆಜಿಲ್, ಯುಎಇ, ಅಫ್ಗಾನಿಸ್ತಾನ, ಫ್ರಾನ್ಸ್, ಬೆಲ್ಜಿಯಂ, ಚಿಲಿ, ಇಟಲಿ, ಟರ್ಕಿ, ನ್ಯೂಜಿಲೆಂಡ್, ದಕ್ಷಿಣ ಆಫ್ರಿಕಾ ಮತ್ತು ಪೋಲೆಂಡ್ ದೇಶಗಳು ಮಾಡುತ್ತವೆ.
ಭಾರತಕ್ಕೆ ಟರ್ಕಿಯಿಂದ ಗರಿಷ್ಠ ಅಂದರೆ 72 ದಶಲಕ್ಷ ಡಾಲರ್ ಮೌಲ್ಯದ ಸೇಬಿನ ಹಣ್ಣು ಆಮದಾಗುತ್ತಿದೆ. ಚಿಲಿ (38.6 ದಶಲಕ್ಷ), ಇಟಲಿ (34), ಇರಾನ್ (26) ನಂತರ ಸ್ಥಾನ ಪಡೆದಿವೆ. ಅಮೆರಿಕದಿಂದ ಆಮದಾಗುವ ಸೇಬಿನ ಪ್ರಮಾಣ 50 ಲಕ್ಷ ಡಾಲರ್‌ಗೆ ಕುಸಿದಿದೆ.
ಜಮ್ಮು ಮತ್ತು ಕಾಶ್ಮೀರ ದೇಶದಲ್ಲಿ ಶೇ 70 ರಷ್ಟನ್ನು ಸೇಬನ್ನು ಉತ್ಪಾದನೆ ಮಾಡುತ್ತಿದೆ.
