ಲೋಕಸಭೆಯಲ್ಲಿ ಕೇಂದ್ರ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (MEA) ಸಲ್ಲಿಸಿದ ಇತ್ತೀಚಿನ ದಾಖಲೆಗಳ ಪ್ರಕಾರ, 2015ರಿಂದ 2025ರವರೆಗಿನ 10 ವರ್ಷಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರ ವಿದೇಶ ಪ್ರವಾಸಗಳಿಗಾಗಿ 762 ಕೋಟಿ ರೂ. ಖರ್ಚು ಮಾಡಲಾಗಿದೆ. ಈ ವಿದೇಶಿ ಪ್ರವಾಸಗಳ ವಾರ್ಷಿಕ ವೆಚ್ಚವು 2024ರಲ್ಲಿ 100 ಕೋಟಿ ರೂ.ಗಳಿಗಿಂತ ಹೆಚ್ಚಿದೆ. ಇನ್ನು, 2025ರಲ್ಲಿ ಮೋದಿ ಅವರು ಯುರೋಪಿಯನ್ ರಾಷ್ಟ್ರಗಳು, ಅಮೆರಿಕ, ಆಫ್ರಿಕಾ ಹಾಗೂ ಪೂರ್ವ ಏಷ್ಯಾ ರಾಷ್ಟ್ರಗಳಿಗೆ ಭೇಟಿ ನೀಡಿದ್ದು, ವೆಚ್ಚವು 175 ಕೋಟಿ ರೂ.ಗಳನ್ನು ದಾಟಿದೆ ಎಂಬುದನ್ನು ಎಂಇಎ ದಾಖಲೆಗಳು ತೋರಿಸಿವೆ.
ಪ್ರವಾಸಗಳ ಸಮಯದಲ್ಲಿ ಆತಿಥೇಯ ದೇಶವು ಹೆಚ್ಚಿನ ಆತಿಥ್ಯ ವೆಚ್ಚವನ್ನು ಭರಿಸುತ್ತದೆ. ಆದರೆ, ಸರ್ಕಾರವು ಹೆಚ್ಚಾಗಿ ಭದ್ರತಾ ವ್ಯವಸ್ಥೆಗಳು, ಅಧಿಕೃತ ನಿಯೋಗಗಳು, ಮಾಧ್ಯಮ ತಂಡ ಹಾಗೂ ಇತರ ಲಾಜಿಸ್ಟಿಕ್ಸ್‌ಗಾಗಿ ಖರ್ಚು ಮಾಡುತ್ತದೆ ಎಂದು MEA ಹೇಳಿದೆ.
| Year | ವರ್ಷವಾರು ಮೋದಿ ಪ್ರವಾಸದ ವೆಚ್ಚ (ಕೋಟಿ ರೂ,ಗಳಲ್ಲಿ) |
| 2015 | 91.5 cr |
| 2016 | 33.22 cr |
| 2017 | 44.27 cr |
| 2018 | 51.46 cr |
| 2019 | 71.76 cr |
| 2020 | 0 (Covid-19 pandemic) |
| 2021 | 36.11 cr |
| 2022 | 55.82 cr |
| 2023 | 93.63 cr |
| 2024 | 109.51 cr |
| 2025 | 175.19 cr |
2014ರ ಮೇ ತಿಂಗಳಿನಿಂದ, ಪ್ರಧಾನ ಮಂತ್ರಿಯವರ ನಿಯೋಗದಲ್ಲಿನ ಸದಸ್ಯರ ಗಾತ್ರವು ಅವಶ್ಯಕತೆಗಳನ್ನು ಅವಲಂಬಿಸಿ 27 ರಿಂದ 72 ರವರೆಗೆ ಇತ್ತು. ಆದರೆ, 2025ರಲ್ಲಿ ಐದು ದೇಶಗಳಿಗೆ ಭೇಟಿ ನೀಡಿದ ಒಂದು ಪ್ರವಾಸದಲ್ಲಿ 95 ಸದಸ್ಯರಿದ್ದರು ಎಂದು ಸಚಿವಾಲಯ ತಿಳಿಸಿದೆ.
ಮೋದಿ ಸರ್ಕಾರಕ್ಕೆ ಹೋಲಿಸಿದರೆ, ಮನಮೋಹನ್ ಸಿಂಗ್ ಸರ್ಕಾರವು ವಿದೇಶಿ ಪ್ರವಾಸಗಳಿಗೆ ಗಮನಾರ್ಹವಾಗಿ ಕಡಿಮೆ ಖರ್ಚು ಮಾಡಿದೆ ಎಂದು ವಿದೇಶಾಂಗ ಸಚಿವಾಲಯದ ಉತ್ತರ ವಿವರಿಸಿದೆ. 2011ರಲ್ಲಿ ಅಮೆರಿಕಕ್ಕೆ 10.74 ಕೋಟಿ ರೂ., 2013ರಲ್ಲಿ ರಷ್ಯಾಕ್ಕೆ 9.95 ಕೋಟಿ ರೂ., 2011ರಲ್ಲಿ ಫ್ರಾನ್ಸ್‌ಗೆ 8.33 ಕೋಟಿ ರೂ. ಹಾಗೂ 2013ರಲ್ಲಿ ಜರ್ಮನಿಗೆ 6.02 ಕೋಟಿ ರೂ.ಗಳನ್ನು ಸಿಂಗ್ ಸರ್ಕಾರ ವ್ಯಯಿಸಿದೆ.
