ವಿಶ್ವದ ಮೇಲೆ ವಿನಾಕಾರಣ ಯುದ್ಧ ಮತ್ತು ಜಂಜಾಟಗಳನ್ನು ಹೇರಿರುವ ಯುದ್ಧದಾಹಿ, ವಿಧ್ವಂಸಕ ಡೊನಾಲ್ಡ್ ಟ್ರಂಪ್ ಹಾಗೂ ಅವರ ರಿಪಬ್ಲಿಕನ್ ಪಕ್ಷಕ್ಕೆ ಇದೇ ನವೆಂಬರ್ನಲ್ಲಿ ನಡೆಯಲಿರುವ ಮಧ್ಯಂತರ ಚುನಾವಣೆ ಬಹುದೊಡ್ಡ ಅಗ್ನಿಪರೀಕ್ಷೆಯಾಗಿದೆ. ಜಾಗತಿಕ ಯುದ್ಧದ ಅನಿಶ್ಚಿತತೆ, ತೈಲ ದರ ಏರಿಕೆ ಹಾಗೂ ಜೀವನ ವೆಚ್ಚದ ಜಿಗಿತದಿಂದಾಗಿ ಟ್ರಂಪ್ ಜನಬೆಂಬಲ ತೀವ್ರವಾಗಿ ಕುಸಿದಿದೆ. ಜನಪ್ರತಿನಿಧಿಗಳ ಸದನ ಹಾಗೂ ಸೆನೆಟ್ಗೆ ನಡೆಯುವ ಈ ಮಹತ್ವದ ಚುನಾವಣೆಯಲ್ಲಿ ಒಂದು ವೇಳೆ ಬಹುಮತ ಕೈತಪ್ಪಿದರೆ, ಟ್ರಂಪ್ ಆಡಳಿತ ಸಂಪೂರ್ಣವಾಗಿ ಕುಂಟುಕೋಳಿಯಾಗಲಿದೆ. ಅವರ ಪರಮಾಧಿಕಾರದ ರೆಕ್ಕೆಪುಕ್ಕಗಳಿಗೆ ಕತ್ತರಿ ಬೀಳಲಿದೆ.
ವಿವಾದಗಳ ಸರದಾರ, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಭವಿಷ್ಯವನ್ನು ನಿರ್ಧರಿಸುವ ಈ ಚುನಾವಣೆ ಅಮೆರಿಕದ ರಾಜಕೀಯ ವಿದ್ಯಮಾನಗಳು ಕೇವಲ ಆ ದೇಶಕ್ಕಷ್ಟೇ ಸೀಮಿತವಾಗಿರದೆ, ಇಡೀ ಜಗತ್ತಿನ ಆರ್ಥಿಕತೆ ಮತ್ತು ಭದ್ರತೆಯ ಮೇಲೆ ನೇರ ಪರಿಣಾಮ ಬೀರುತ್ತವೆ. ಇದೇ ಕಾರಣಕ್ಕೆ ಬರುವ ನವೆಂಬರ್ ತಿಂಗಳಲ್ಲಿ ಅಮೆರಿಕದಲ್ಲಿ ನಡೆಯಲಿರುವ ‘ಮಧ್ಯಂತರ ಚುನಾವಣೆ’ (Midterm Elections) ಇಡೀ ವಿಶ್ವದ ಗಮನ ಸೆಳೆದಿದೆ.
ಬಹುಮತ ಕೈತಪ್ಪಿದರೆ ಟ್ರಂಪ್ ಹೇಗೆ ಬಲಹೀನರಾಗುತ್ತಾರೆಯೇ?
ಈ ಚುನಾವಣೆಯಲ್ಲಿ ಟ್ರಂಪ್ ಅವರ ರಿಪಬ್ಲಿಕನ್ ಪಕ್ಷ ಸಂಸತ್ತಿನ ಎರಡೂ ಸದನಗಳಲ್ಲಿ ಅಥವಾ ಕನಿಷ್ಠ ಕೆಳಮನೆಯಲ್ಲಾದರೂ ಬಹುಮತ ಕಳೆದುಕೊಂಡರೆ, ಅವರು ಅಧಿಕಾರದಲ್ಲಿದ್ದರೂ ತೀವ್ರವಾಗಿ ಬಲಹೀನಗೊಳ್ಳಲಿದ್ದಾರೆ. ಸಂಸತ್ತಿನ ಕೆಳಮನೆ ವಿಪಕ್ಷಗಳ ಪಾಲಾದರೆ, ಟ್ರಂಪ್ ಅವರ ಯಾವುದೇ ಹೊಸ ಆರ್ಥಿಕ ಮಸೂದೆಗಳು, ಬಜೆಟ್ ಅಥವಾ ಯೋಜನೆಗಳಿಗೆ ಹಣಕಾಸಿನ ಅನುಮೋದನೆ ಸಿಗುವುದಿಲ್ಲ. ಇದರಿಂದ ಆಡಳಿತ ಯಂತ್ರವು ಹೆಜ್ಜೆಹೆಜ್ಜೆಗೂ ಸ್ಥಗಿತಗೊಳ್ಳುವ ಅಪಾಯವಿದೆ.
ಒಂದು ವೇಳೆ ಮೇಲ್ಮನೆ ‘ಸೆನೆಟ್’ ಅನ್ನು ವಿರೋಧ ಪಕ್ಷ ವಶಪಡಿಸಿಕೊಂಡರೆ ಟ್ರಂಪ್ ಪಾಲಿಗೆ ಬಹುದೊಡ್ಡ ಸಂಕಷ್ಟ ಎದುರಾಗಲಿದೆ. ಸುಪ್ರೀಂ ಕೋರ್ಟ್ ನ್ಯಾಯಾಧೀಶರು, ಅಂತಾರಾಷ್ಟ್ರೀಯ ರಾಯಭಾರಿಗಳು ಹಾಗೂ ಕ್ಯಾಬಿನೆಟ್ ಮಂತ್ರಿಗಳ ನೇಮಕಾತಿಗೆ ಸೆನೆಟ್ ಒಪ್ಪಿಗೆ ಅತ್ಯಗತ್ಯ. ಇಲ್ಲಿ ವಿಪಕ್ಷಗಳದ್ದೇ ಮೇಲುಗೈ ಆದರೆ, ಟ್ರಂಪ್ ತಮ್ಮ ಆಪ್ತರನ್ನು ಉನ್ನತ ಹುದ್ದೆಗಳಿಗೆ ತರುವುದು ಅಸಾಧ್ಯವಾಗಲಿದ್ದು, ಅವರ ರಾಜಕೀಯ ಅಧಿಕಾರದ ಹಲ್ಲು ಕಿತ್ತಂತಾಗುತ್ತದೆ.
ಯಾವುದೇ ಸದನದಲ್ಲಿ ಬಹುಮತ ಕಳೆದುಕೊಂಡರೂ ಟ್ರಂಪ್ ‘ಕುಂಟುಕೋಳಿ’ (Lame Duck) ಆಗುವುದು ಖಚಿತ. ಅಂದರೆ, ಕಾರಿನ ಸ್ಟೇರಿಂಗ್ ಕೈಯಲ್ಲಿದ್ದರೂ, ಪೆಟ್ರೋಲ್ ಇಲ್ಲದಂತೆ ಅವರ ಸ್ಥಿತಿ ಆಗುತ್ತದೆ. ವಿರೋಧ ಪಕ್ಷದವರು ಸಂಸದೀಯ ಸಮಿತಿಗಳ ಅಧ್ಯಕ್ಷರಾಗುವುದರಿಂದ, ಟ್ರಂಪ್ ಆಡಳಿತದ ಹಿಂದಿನ ನಿರ್ಧಾರಗಳು ಹಾಗೂ ಆರ್ಥಿಕ ವ್ಯವಹಾರಗಳ ಮೇಲೆ ತೀವ್ರ ಸ್ವರೂಪದ ತನಿಖೆಗಳು ಶುರುವಾಗಲಿವೆ. ಅವರ ಏಕಪಕ್ಷೀಯ ನಿರ್ಧಾರಗಳಿಗೆ ಸಂಪೂರ್ಣ ಲಗಾಮು ಬೀಳಲಿದೆ.
ಮಧ್ಯಂತರ ಚುನಾವಣೆ: ಪ್ರಕ್ರಿಯೆ ಮತ್ತು ಮಹತ್ವ
ಅಮೆರಿಕದ ಪ್ರಜಾಸತ್ತಾತ್ಮಕ ವ್ಯವಸ್ಥೆಯಲ್ಲಿ ‘ಮಧ್ಯಂತರ ಚುನಾವಣೆ’ ಅತ್ಯಂತ ಮಹತ್ವದ ಘಟ್ಟವಾಗಿದೆ. ಅಮೆರಿಕದ ಅಧ್ಯಕ್ಷರ ಅಧಿಕಾರಾವಧಿ ನಾಲ್ಕು ವರ್ಷಗಳು. ಅವರು ಅಧಿಕಾರಕ್ಕೆ ಬಂದು ಸರಿಯಾಗಿ ಎರಡು ವರ್ಷಗಳು ಪೂರ್ಣಗೊಂಡಾಗ ಈ ಚುನಾವಣೆ ಎದುರಾಗುತ್ತದೆ. ಇದೇ ಬರುವ ನವೆಂಬರ್ ತಿಂಗಳಲ್ಲಿ ದೇಶದಾದ್ಯಂತ ಈ ಬೃಹತ್ ಮತದಾನ ಪ್ರಕ್ರಿಯೆ ಜರುಗಲಿದ್ದು, ಇದು ಹಾಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಆಡಳಿತ, ನೀತಿಗಳು ಹಾಗೂ ನಡವಳಿಕೆಗಳಿಗೆ ಜನಸಾಮಾನ್ಯರು ನೀಡುವ ನೇರ ತೀರ್ಪಾಗಲಿದೆ.
ಅಮೆರಿಕದ ಸಂಸತ್ತಿನ (ಕಾಂಗ್ರೆಸ್) ಕೆಳಮನೆಯಾದ ‘ಜನಪ್ರತಿನಿಧಿಗಳ ಸದನ’ವು (House of Representatives) ನಮ್ಮ ಲೋಕಸಭೆಯಿದ್ದಂತೆ. ಈ ಸದನದ ಒಟ್ಟು 435 ಸ್ಥಾನಗಳಿಗೂ ಈ ಚುನಾವಣೆಯಲ್ಲಿ ಕಡ್ಡಾಯವಾಗಿ ಮತದಾನ ನಡೆಯಲಿದೆ. ಇಲ್ಲಿನ ಸದಸ್ಯರ ಅಧಿಕಾರಾವಧಿ ಕೇವಲ ಎರಡು ವರ್ಷಗಳಾಗಿರುವುದರಿಂದ, ಪ್ರತಿ ಮಧ್ಯಂತರ ಚುನಾವಣೆಯಲ್ಲೂ ಇದು ಸಂಪೂರ್ಣವಾಗಿ ಹೊಸ ಜನಾದೇಶಕ್ಕೆ ಒಳಪಡುತ್ತದೆ. ಯಾವುದೇ ಪಕ್ಷ ಕಾನೂನುಗಳನ್ನು ರೂಪಿಸಲು ಮತ್ತು ಅಂಗೀಕರಿಸಲು ಕನಿಷ್ಠ 218 ಸ್ಥಾನಗಳ ಬಹುಮತ ಪಡೆಯುವುದು ಅತ್ಯಗತ್ಯ.
ಇದನ್ನು ಓದಿದ್ದೀರಾ? ಸಮೀಕ್ಷೆಗಳ ಲೆಕ್ಕಾಚಾರ ಬುಡಮೇಲು; ಪಶ್ಚಿಮ ಬಂಗಾಳದಲ್ಲಿ ಮಣ್ಣುಮುಕ್ಕಿದ್ದ ‘ಎಕ್ಸಿಟ್ ಪೋಲ್’
ಮತ್ತೊಂದೆಡೆ, ಸಂಸತ್ತಿನ ಮೇಲ್ಮನೆಯಾದ ‘ಸೆನೆಟ್’ (Senate) ನಮ್ಮ ರಾಜ್ಯಸಭೆಗೆ ಸಮಾನವಾದದ್ದು. ಇದು ಒಟ್ಟು 100 ಸ್ಥಾನಗಳನ್ನು ಹೊಂದಿದ್ದು, ಪ್ರತಿ ರಾಜ್ಯಕ್ಕೆ ಇಬ್ಬರು ಸೆನೆಟರ್ಗಳು ಇರುತ್ತಾರೆ. ಇವರ ಅಧಿಕಾರಾವಧಿ ಆರು ವರ್ಷಗಳ ಸುದೀರ್ಘ ಅವಧಿಯದ್ದಾಗಿದೆ. ಹೀಗಾಗಿ, ಪ್ರತಿ ಎರಡು ವರ್ಷಗಳಿಗೊಮ್ಮೆ ಸೆನೆಟ್ನ ಮೂರನೇ ಒಂದು ಭಾಗದಷ್ಟು ಸ್ಥಾನಗಳಿಗೆ ಚುನಾವಣೆ ನಡೆಯುತ್ತದೆ. ಅದರಂತೆ, ಈ ನವೆಂಬರ್ನಲ್ಲಿ 35 ಸೆನೆಟ್ ಸ್ಥಾನಗಳಿಗೆ(33 ನಿಯಮಿತ ಹಾಗೂ 2 ವಿಶೇಷ ಸ್ಥಾನಗಳು) ಚುನಾವಣೆ ನಡೆಯಲಿದ್ದು, ಇಲ್ಲಿ ಹಿಡಿತ ಸಾಧಿಸುವುದು ಅಮೆರಿಕದ ರಾಜಕೀಯ ವ್ಯವಸ್ಥೆಯ ಅತ್ಯಂತ ಬಲಶಾಲಿ ಅಸ್ತ್ರವಾಗಿದೆ.
ಕೇವಲ ರಾಷ್ಟ್ರೀಯ ಸಂಸತ್ತಿನ ಸ್ಥಾನಗಳಿಗಷ್ಟೇ ಅಲ್ಲದೆ, ಅಮೆರಿಕದ 50 ರಾಜ್ಯಗಳ ಪೈಕಿ 36 ರಾಜ್ಯಗಳ ಗವರ್ನರ್ ಹುದ್ದೆಗಳಿಗೂ (ರಾಜ್ಯದ ಮುಖ್ಯಮಂತ್ರಿಗಳ ಸ್ಥಾನಮಾನಕ್ಕೆ ಸಮಾನ) ಇದೇ ಚುನಾವಣೆಯಲ್ಲಿ ಮತದಾನ ಜರುಗಲಿದೆ. ಇದರ ಜೊತೆಗೆ ಸಾವಿರಾರು ಸ್ಥಳೀಯ ಸಂಸ್ಥೆಗಳು, ಕೌಂಟಿ ಹುದ್ದೆಗಳು, ಮೇಯರ್ ಸ್ಥಾನಗಳು ಮತ್ತು ರಾಜ್ಯ ಶಾಸಕಾಂಗಗಳಿಗೂ ಅಮೆರಿಕನ್ನರು ಮತ ಚಲಾಯಿಸುತ್ತಾರೆ. ಇದು ತಳಮಟ್ಟದಲ್ಲಿ ಯಾವ ಪಕ್ಷ ಬಲಿಷ್ಠವಾಗಿದೆ ಎಂಬುದನ್ನು ಸ್ಪಷ್ಟವಾಗಿ ನಿರ್ಧರಿಸುತ್ತದೆ.
ಮಧ್ಯಂತರ ಚುನಾವಣೆ ಹಾಗೂ ಅಧ್ಯಕ್ಷೀಯ ಚುನಾವಣೆಯ ನಡುವಿನ ನಂಟು
ಅಮೆರಿಕದಲ್ಲಿ ಪ್ರತಿ ನಾಲ್ಕು ವರ್ಷಕ್ಕೊಮ್ಮೆ ಅಂತಿಮ ‘ಅಧ್ಯಕ್ಷೀಯ ಚುನಾವಣೆ’ (Presidential Election) ನಡೆಯುತ್ತದೆ. ಮುಂದಿನ ಅಧ್ಯಕ್ಷೀಯ ಚುನಾವಣೆಗೆ ಮುನ್ನ ಬರುವ ಈ ಮಧ್ಯಂತರ ಚುನಾವಣೆಯನ್ನು ಒಂದು ರೀತಿಯಲ್ಲಿ ‘ಸೆಮಿ-ಫೈನಲ್’ ಪಂದ್ಯ ಎಂದು ಕರೆಯಬಹುದು. ಇದು ಹಾಲಿ ಅಧ್ಯಕ್ಷರು ಕಳೆದ ಎರಡು ವರ್ಷಗಳಲ್ಲಿ ನೀಡಿದ ಆಡಳಿತಕ್ಕೆ ಜನಸಾಮಾನ್ಯರು ಬರೆದುಕೊಡುವ ‘ಪ್ರೋಗ್ರೆಸ್ ರಿಪೋರ್ಟ್’ (ಅಂಕಪಟ್ಟಿ). ಒಂದು ವೇಳೆ ಈ ಚುನಾವಣೆಯಲ್ಲಿ ಟ್ರಂಪ್ ಅವರ ರಿಪಬ್ಲಿಕನ್ ಪಕ್ಷ ಸೋತರೆ, ಜನಸಾಮಾನ್ಯರು ಅವರ ಆಡಳಿತವನ್ನು ತಿರಸ್ಕರಿಸಿದ್ದಾರೆ ಎಂದರ್ಥ. ಇದು ಮುಂದಿನ ಎರಡು ವರ್ಷಗಳ ನಂತರ ನಡೆಯುವ ಅಂತಿಮ ಅಧ್ಯಕ್ಷೀಯ ಚುನಾವಣೆಯಲ್ಲಿ ಟ್ರಂಪ್ ಮರು ಆಯ್ಕೆಯಾಗುವುದು ಅತ್ಯಂತ ಕಷ್ಟಕರ ಎಂಬ ಸ್ಪಷ್ಟ ಮುನ್ಸೂಚನೆಯನ್ನು ರವಾನಿಸುತ್ತದೆ. ಹೀಗಾಗಿ ಅಧ್ಯಕ್ಷೀಯ ಪೀಠವನ್ನು ಉಳಿಸಿಕೊಳ್ಳಲು ಈ ನವೆಂಬರ್ ಪರೀಕ್ಷೆ ಪಾಸ್ ಮಾಡುವುದು ಟ್ರಂಪ್ಗೆ ಅನಿವಾರ್ಯ.
ಅಮೆರಿಕದ ಚುನಾವಣಾ ಇತಿಹಾಸವನ್ನು ಗಮನಿಸಿದರೆ, ಈ ಮಧ್ಯಂತರ ಚುನಾವಣೆಗಳು ಯಾವಾಗಲೂ ಅಧಿಕಾರದಲ್ಲಿರುವ ಅಧ್ಯಕ್ಷರ ಪಕ್ಷಕ್ಕೆ ಆಘಾತವನ್ನೇ ನೀಡಿವೆ. ಮತದಾರರು ತಮ್ಮ ದೈನಂದಿನ ಸಮಸ್ಯೆಗಳಾದ ಬೆಲೆ ಏರಿಕೆ, ಉದ್ಯೋಗ ನಷ್ಟದಂತಹ ವಿಚಾರಗಳ ಆಧಾರದ ಮೇಲೆ ಸಹಜವಾಗಿಯೇ ಆಡಳಿತ ವಿರೋಧಿ ಅಲೆಯತ್ತ ವಾಲುತ್ತಾರೆ. ಅಧ್ಯಕ್ಷರ ಆಡಳಿತದ ಬಗ್ಗೆ ಅಸಮಾಧಾನವಿದ್ದರೆ, ವಿರೋಧ ಪಕ್ಷಕ್ಕೆ ಮಣೆಹಾಕುವ ಮೂಲಕ ಅಧ್ಯಕ್ಷರ ‘ಏಕಸ್ವಾಮ್ಯ’ ಅಥವಾ ಸರ್ವಾಧಿಕಾರಕ್ಕೆ ಕಡಿವಾಣ ಹಾಕುವ ಸಂಪ್ರದಾಯ ಅಮೆರಿಕದ ಮತದಾರರಲ್ಲಿದೆ. ಈ ಬಾರಿಯ ಚುನಾವಣೆ ಟ್ರಂಪ್ ಅವರ ರಿಪಬ್ಲಿಕನ್ ಪಕ್ಷ ಹಾಗೂ ವಿರೋಧ ಪಕ್ಷವಾದ ಡೆಮಾಕ್ರಟಿಕ್ ಪಕ್ಷದ ನಡುವಿನ ನೇರ ಹಣಾಹಣಿಯಾಗಿದೆ.
ಬಹುಮತ ಕಳೆದುಕೊಂಡಿದ್ದ ಕ್ಲಿಂಟನ್,ಒಬಾಮಾ,ಬುಷ್
ಅಮೆರಿಕದ ಇತಿಹಾಸದಲ್ಲಿ ಮಧ್ಯಂತರ ಚುನಾವಣೆಯಲ್ಲಿ ಆಡಳಿತ ಪಕ್ಷ ಬಹುಮತ ಕಳೆದುಕೊಂಡ ಅನೇಕ ಉದಾಹರಣೆಗಳಿವೆ. 1994ರಲ್ಲಿ ಬಿಲ್ ಕ್ಲಿಂಟನ್, 2006ರಲ್ಲಿ ಜಾರ್ಜ್ ಡಬ್ಲ್ಯು. ಬುಷ್ ಹಾಗೂ 2010ರಲ್ಲಿ ಬರಾಕ್ ಒಬಾಮಾ ಸಂಸತ್ತಿನಲ್ಲಿ ಬಹುಮತ ಕಳೆದುಕೊಂಡು ತೀವ್ರ ಹಿನ್ನಡೆ ಅನುಭವಿಸಿದ್ದರು. ಸ್ವತಃ ಡೊನಾಲ್ಡ್ ಟ್ರಂಪ್ ತಮ್ಮ ಮೊದಲ ಅವಧಿಯ 2018ರ ಮಧ್ಯಂತರ ಚುನಾವಣೆಯಲ್ಲಿ ಜನಪ್ರತಿನಿಧಿಗಳ ಸದನವನ್ನು ಡೆಮಾಕ್ರಟಿಕ್ ಪಕ್ಷಕ್ಕೆ ಬಿಟ್ಟುಕೊಟ್ಟಿದ್ದರು. ಇತ್ತೀಚೆಗೆ ಜೋ ಬೈಡನ್ ಕೂಡ 2022ರಲ್ಲಿ ಕೆಳಮನೆಯ ನಿಯಂತ್ರಣ ಕಳೆದುಕೊಂಡರು. ಈ ನಾಯಕರೆಲ್ಲರೂ ಬಹುಮತ ಕಳೆದುಕೊಂಡ ನಂತರ ಹೊಸ ಕಾಯ್ದೆಗಳ ಜಾರಿಗೆ ವಿಪಕ್ಷಗಳೊಂದಿಗೆ ರಾಜಿ ಮಾಡಿಕೊಳ್ಳುವ ಅನಿವಾರ್ಯತೆಗೆ ಸಿಲುಕಿ, ರಾಜಕೀಯವಾಗಿ ತೀವ್ರ ಬಲಹೀನರಾಗಿದ್ದರು.
ಟ್ರಂಪ್ ಆಡಳಿತದ ಅನಾಚಾರಗಳು – ವಿವಾದಗಳು
ಡೊನಾಲ್ಡ್ ಟ್ರಂಪ್ ಆಡಳಿತದಲ್ಲಿ ಅಮೆರಿಕ ಮತ್ತು ಜಗತ್ತು ಕಂಡಿರುವ ಅನಾಚಾರಗಳು ಈ ಚುನಾವಣೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತಿವೆ. ಜಗತ್ತಿನ ಮೇಲೆ ವಿನಾಕಾರಣ ಯುದ್ಧದ ಭೀತಿಯನ್ನು ಹುಟ್ಟುಹಾಕಿರುವ ಅವರ ಆಕ್ರಮಣಕಾರಿ ವಿದೇಶಾಂಗ ನೀತಿಗಳು ಜಾಗತಿಕ ಶಾಂತಿಗೆ ದೊಡ್ಡ ಕಂಟಕವಾಗಿವೆ. ಹವಾಮಾನ ಬದಲಾವಣೆ ಒಪ್ಪಂದಗಳಿಂದ ಹಿಂದೆ ಸರಿದಿರುವುದು, ಮಿತ್ರ ರಾಷ್ಟ್ರಗಳನ್ನೇ ಬೆದರಿಸುವ ಅವರ ‘ವಿಧ್ವಂಸಕ’ ಧೋರಣೆಯಿಂದಾಗಿ ಜಾಗತಿಕ ಮಟ್ಟದಲ್ಲಿ ಅಮೆರಿಕದ ಗೌರವ ಪಾತಾಳಕ್ಕೆ ಕುಸಿದಿದೆ.
ಟ್ರಂಪ್ ಆಡಳಿತವು ಕೇವಲ ಬೆದರಿಕೆಗಳಿಗಷ್ಟೇ ಸೀಮಿತವಾಗದೆ, ಮಧ್ಯಪ್ರಾಚ್ಯ ಸೇರಿದಂತೆ ವಿಶ್ವದ ಹಲವು ರಾಷ್ಟ್ರಗಳ ಮೇಲೆ ಯುದ್ಧದ ಕಾರ್ಮೋಡ ಕವಿಯುವಂತೆ ಮಾಡಿದೆ. ನಿರ್ದಿಷ್ಟವಾಗಿ ಹೇಳಬೇಕೆಂದರೆ, ಇರಾನ್ ಜೊತೆಗಿನ ಅಣು ಒಪ್ಪಂದದಿಂದ ಏಕಪಕ್ಷೀಯವಾಗಿ ಹೊರಬಂದು ಆ ದೇಶದ ಮೇಲೆ ಕಠಿಣ ಆರ್ಥಿಕ ದಿಗ್ಬಂಧನಗಳನ್ನು ಹೇರುವ ಮೂಲಕ ಇಡೀ ಗಲ್ಫ್ ವಲಯವನ್ನು ಯುದ್ಧದ ಅಂಚಿಗೆ ತಳ್ಳಿದರು. ಸಿರಿಯಾ ಮೇಲಿನ ಕ್ಷಿಪಣಿ ದಾಳಿಗಳು, ಅನಿಶ್ಚಿತ ಮಿಲಿಟರಿ ನಿರ್ಧಾರಗಳು ಹಾಗೂ ಇತರ ರಾಷ್ಟ್ರಗಳ ಆಂತರಿಕ ವಿಚಾರಗಳಲ್ಲಿನ ಅನಗತ್ಯ ಹಸ್ತಕ್ಷೇಪವು ಜಾಗತಿಕ ಮಟ್ಟದಲ್ಲಿ ಭಾರಿ ವಿವಾದ ಸೃಷ್ಟಿಸಿದೆ.
ಇಂತಹ ಯುದ್ಧದಾಹಿ ನೀತಿಗಳಿಂದಾಗಿ ಅಮೆರಿಕದ ರಕ್ಷಣಾ ಬಜೆಟ್ಗೆ ಭಾರಿ ಹೊರೆಯಾಗುತ್ತಿದ್ದು, ವಿಶ್ವದ ಇನ್ನೆಲ್ಲೋ ನಡೆಯುವ ಈ ಅನಗತ್ಯ ಯುದ್ಧಗಳ ವೆಚ್ಚವನ್ನು ಅಮೆರಿಕದ ಸಾಮಾನ್ಯ ತೆರಿಗೆದಾರರು ಹೊರಬೇಕಾದ ದುಸ್ಥಿತಿ ನಿರ್ಮಾಣವಾಗಿದೆ. ಅದಲ್ಲದೆ ಯಾವುದೋ ದೇಶದಲ್ಲಿ ತನ್ನ ರಾಷ್ಟ್ರಕ್ಕೆ ಸಂಬಂಧವಿಲ್ಲದೆ ನಡೆಯುವ ಯುದ್ಧದಲ್ಲಿ ಅಮೆರಿಕದ ಸೈನಿಕರು ಭಾಗಿಯಾಗಬೇಕಿದೆ. ಇದು ಅಮೆರಿಕದ ಮತದಾರರಲ್ಲಿ ತೀವ್ರ ಅಸಮಾಧಾನಕ್ಕೆ ಕಾರಣವಾಗಿದೆ.
ಸ್ವದೇಶದಲ್ಲೂ ಟ್ರಂಪ್ ಅವರ ನಿರ್ಧಾರಗಳು ಜನಸಾಮಾನ್ಯರನ್ನು ಹೈರಾಣಾಗಿಸಿವೆ. ಅನಗತ್ಯ ವ್ಯಾಪಾರ ಸಮರಗಳು ಮತ್ತು ಆಮದು ಸುಂಕಗಳ ದಿಢೀರ್ ಏರಿಕೆಯಿಂದಾಗಿ ಕಚ್ಚಾ ವಸ್ತುಗಳ ಕೊರತೆ ಸೃಷ್ಟಿಯಾಗಿದೆ. ಅಂತಾರಾಷ್ಟ್ರೀಯ ಸಂಘರ್ಷಗಳ ಪರಿಣಾಮ ತೈಲ ದರಗಳ ಏರಿಕೆಯಾಗಿ ಸಾರಿಗೆ ವೆಚ್ಚ ಹೆಚ್ಚಾಗಿದೆ. ಇದರಿಂದ ದೇಶದಲ್ಲಿ ಹಣದುಬ್ಬರ ಮಿತಿಮೀರಿದ್ದು, ದಿನಸಿ, ಮನೆ ಬಾಡಿಗೆ ಸೇರಿ ದೈನಂದಿನ ಜೀವನದ ವೆಚ್ಚ ವಿಪರೀತವಾಗಿ ಹೆಚ್ಚಾಗಿದೆ. ಕೇವಲ ಶ್ರೀಮಂತರಿಗೆ ಮಾತ್ರ ಲಾಭ ಮಾಡಿಕೊಡುವ ಇಂತಹ ನೀತಿಗಳ ಬಗ್ಗೆ ಜನಸಾಮಾನ್ಯರಲ್ಲಿ ಭಾರಿ ಆಕ್ರೋಶವಿದೆ.
ಇದರ ಜೊತೆಗೆ, ಪ್ರಜಾಸತ್ತಾತ್ಮಕ ಮೌಲ್ಯಗಳ ಉಲ್ಲಂಘನೆ ಮತ್ತು ಸಮಾಜದಲ್ಲಿ ಬಿರುಕು ಮೂಡಿಸುವಂತಹ ದ್ವೇಷದ ಭಾಷಣಗಳು ಟ್ರಂಪ್ ಆಡಳಿತದ ಕರಾಳ ಮುಖಗಳಾಗಿವೆ. ವಲಸಿಗರನ್ನು ಕೀಳಾಗಿ ಕಾಣುವುದು, ನ್ಯಾಯಾಂಗ ವ್ಯವಸ್ಥೆ ಮತ್ತು ಮಾಧ್ಯಮಗಳ ಮೇಲಿನ ನಿರಂತರ ದಾಳಿಗಳು ಅಮೆರಿಕದ ಸಂವಿಧಾನಕ್ಕೇ ಬೆದರಿಕೆ ಒಡ್ಡಿವೆ. ಭಿನ್ನಾಭಿಪ್ರಾಯಗಳನ್ನು ಸಹಿಸದ, ಮಹಿಳೆಯರು ಮತ್ತು ಅಲ್ಪಸಂಖ್ಯಾತರ ಹಕ್ಕುಗಳನ್ನು ಕಡೆಗಣಿಸುವ ಅವರ ಸರ್ವಾಧಿಕಾರಿ ಧೋರಣೆಗಳು ದೇಶದ ಒಳಗೆ ತೀವ್ರ ಅಶಾಂತಿ ಸೃಷ್ಟಿಸಿವೆ. ಇವೆಲ್ಲವನ್ನು ಗಮನಿಸಿದರೆ, ಈ ಮುಂಬರುವ ನವೆಂಬರ್ ಚುನಾವಣೆಯು ಟ್ರಂಪ್ ಅವರ ದುರಾಡಳಿತ, ಆರ್ಥಿಕ ವೈಫಲ್ಯಗಳು ಮತ್ತು ವಿವಾದಾತ್ಮಕ ಅನಾಚಾರಗಳಿಗೆ ಅಮೆರಿಕದ ಜನತೆ ನೀಡುವ ಸ್ಪಷ್ಟ ತೀರ್ಪಾಗಲಿದೆ. ಬೆಲೆ ಏರಿಕೆ ಹಾಗೂ ಜಾಗತಿಕ ಅಶಾಂತಿಯಿಂದ ರೋಸಿಹೋಗಿರುವ ಮತದಾರರು, ಟ್ರಂಪ್ ಅವರ ಅಧಿಕಾರದ ರೆಕ್ಕೆಗಳನ್ನು ಕತ್ತರಿಸಿ ಸಂಸತ್ತಿನ ಚುಕ್ಕಾಣಿಯನ್ನು ವಿರೋಧ ಪಕ್ಷಕ್ಕೆ ನೀಡುವ ಮೂಲಕ, ಈ ವಿಧ್ವಂಸಕ ಆಡಳಿತಕ್ಕೆ ಇತಿಶ್ರೀ ಹಾಡುತ್ತಾರೆಯೇ ಎಂಬುದನ್ನು ಇಡೀ ಜಗತ್ತು ಕಾತುರದಿಂದ ಎದುರುನೋಡುತ್ತಿದೆ.
