ಬಂಗಾಳದ ನೆಲದಲ್ಲಿ ಸಮೀಕ್ಷಾ ಸಂಸ್ಥೆಗಳು ಮತದಾರರ ಒಲವನ್ನು, ವಿಶೇಷವಾಗಿ ಮಹಿಳಾ ಮತದಾರರ ಮೌನ ನಿಲುವನ್ನು ಗ್ರಹಿಸುವಲ್ಲಿ ಸಂಪೂರ್ಣವಾಗಿ ವಿಫಲವಾದವು. ಅಬ್ಬರದ ಪ್ರಚಾರ, ರಾಷ್ಟ್ರೀಯ ನಾಯಕರ ಸರಣಿ ಪ್ರಚಾರಗಳು ನೋಡಿ ಅವೆಲ್ಲವೂ ಬಿಜೆಪಿಯ ಪರ ಮತಗಳಾಗಿ ಪರಿವರ್ತನೆಯಾಗಲಿವೆ ಎಂದು ಸಮೀಕ್ಷೆಗಳು ತಪ್ಪಾಗಿ ವಿಶ್ಲೇಷಣೆ ಮಾಡಿದ್ದವು
ಚುನಾವಣೆಗಳು ಮುಗಿದ ಬೆನ್ನಲ್ಲೇ ಹೊರಬೀಳುವ ಚುನಾವಣೋತ್ತರ ಸಮೀಕ್ಷೆಗಳು (ಎಕ್ಸಿಟ್ ಪೋಲ್) ಮತದಾರರ ನಾಡಿಮಿಡಿತವನ್ನು ಅಳೆಯುವ ವೈಜ್ಞಾನಿಕ ಪ್ರಯತ್ನ ಎಂದು ಬಿಂಬಿಸಲಾಗುತ್ತದೆ. ಆದರೆ, ಈ ಸಮೀಕ್ಷೆಗಳು ನೀಡುವ ಅಂಕಿ-ಅಂಶಗಳೇ ಅಂತಿಮ ಸತ್ಯವಲ್ಲ ಎಂಬುದಕ್ಕೆ 2021ರ ಪಂಚರಾಜ್ಯ ವಿಧಾನಸಭಾ ಚುನಾವಣಾ ಫಲಿತಾಂಶವೇ ಅತ್ಯುತ್ತಮ ನಿದರ್ಶನ. ಅದರಲ್ಲೂ, ಇಡೀ ದೇಶದ ಗಮನ ಸೆಳೆದಿದ್ದ ಮತ್ತು ತೀವ್ರ ಕುತೂಹಲ ಕೆರಳಿಸಿದ್ದ ಪಶ್ಚಿಮ ಬಂಗಾಳದ ಕಣದಲ್ಲಿ, ಬಹುತೇಕ ಎಲ್ಲಾ ಪ್ರತಿಷ್ಠಿತ ಸಮೀಕ್ಷಾ ಸಂಸ್ಥೆಗಳ ಲೆಕ್ಕಾಚಾರಗಳು ವಾಸ್ತವದ ಕಠೋರ ಸತ್ಯದ ಮುಂದೆ ಸಂಪೂರ್ಣವಾಗಿ ಮಣ್ಣುಮುಕ್ಕಿದ್ದವು.
ಪಶ್ಚಿಮ ಬಂಗಾಳದಲ್ಲಿ ಆಡಳಿತರೂಢ ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಮತ್ತು ಪ್ರಬಲ ಪೈಪೋಟಿ ಒಡ್ಡಿದ್ದ ಬಿಜೆಪಿ ನಡುವೆ ತೀವ್ರ ಹಣಾಹಣಿ ಏರ್ಪಟ್ಟಿತ್ತು. ಸಮೀಕ್ಷಾ ಸಂಸ್ಥೆಗಳು ಈ ಬಿರುಸಿನ ಪ್ರಚಾರವನ್ನು ನೋಡಿ ಅತಂತ್ರ ವಿಧಾನಸಭೆಯ ಅಥವಾ ಬಿಜೆಪಿಯ ಭರ್ಜರಿ ಗೆಲುವಿನ ಭವಿಷ್ಯ ನುಡಿದಿದ್ದವು. ‘ಜನ್ ಕಿ ಬಾತ್’ ಸಂಸ್ಥೆ ಬಿಜೆಪಿಗೆ ಬರೋಬ್ಬರಿ 162 ರಿಂದ 185 ಸ್ಥಾನಗಳು ಒಲಿಯಲಿವೆ ಎಂದು ಊಹಿಸಿತ್ತು. ಪ್ರಖ್ಯಾತ ‘ಆಕ್ಸಿಸ್ ಮೈ ಇಂಡಿಯಾ’ (134-160) ಹಾಗೂ ‘ರಿಪಬ್ಲಿಕ್-ಸಿಎನ್‌ಎಕ್ಸ್’ (138-148) ಸಂಸ್ಥೆಗಳು ಕೂಡ ಟಿಎಂಸಿಗಿಂತ ಬಿಜೆಪಿಯೇ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿ ಅಧಿಕಾರ ಹಿಡಿಯುವ ಸುಳಿವು ನೀಡಿದ್ದವು. ‘ಸಿ-ವೋಟರ್’ ಮಾತ್ರ ಟಿಎಂಸಿಗೆ (152-164) ಅಲ್ಪ ಮುನ್ನಡೆಯನ್ನು ನೀಡಿತ್ತು.
ಆದರೆ, ಚುನಾವಣಾ ಆಯೋಗದ ಅಧಿಕೃತ ಅಂತಿಮ ಫಲಿತಾಂಶ ಹೊರಬಿದ್ದಾಗ ಸಮೀಕ್ಷೆಗಳ ಮರ್ಮ ಬಯಲಾಯಿತು. 292 ಕ್ಷೇತ್ರಗಳಿಗೆ ನಡೆದ ಚುನಾವಣೆಯಲ್ಲಿ ಟಿಎಂಸಿ ಬರೋಬ್ಬರಿ 213 ಸ್ಥಾನಗಳನ್ನು ಬಗಲಿಗೆ ಹಾಕಿಕೊಂಡು ಪ್ರಚಂಡ ಬಹುಮತದೊಂದಿಗೆ ಅಧಿಕಾರ ಉಳಿಸಿಕೊಂಡಿತು. ಸಮೀಕ್ಷೆಗಳಲ್ಲಿ ನೂರರ ಗಡಿ ದಾಟಿ, ಅಧಿಕಾರ ಹಿಡಿಯುವ ಕನಸು ಕಂಡಿದ್ದ ಬಿಜೆಪಿ ಕೇವಲ 77 ಸ್ಥಾನಗಳಿಗೆ ತೃಪ್ತಿಪಡಬೇಕಾಯಿತು. ಎಡರಂಗ ಮತ್ತು ಕಾಂಗ್ರೆಸ್ ಮೈತ್ರಿಕೂಟ ಶೂನ್ಯ ಸಂಪಾದನೆ ಮಾಡಿದರೆ, ಇತರೆ ಅಭ್ಯರ್ಥಿಗಳು 2 ಸ್ಥಾನ ಗೆದ್ದರು. ಸಮೀಕ್ಷೆಗಳು ನೀಡಿದ್ದ ಅಂಕಿ-ಅಂಶಗಳಿಗೂ, ನೈಜ ಫಲಿತಾಂಶಕ್ಕೂ ನಡುವೆ ಅಜಗಜಾಂತರ ವ್ಯತ್ಯಾಸ ಕಂಡುಬಂತು.
ಬಂಗಾಳದ ನೆಲದಲ್ಲಿ ಸಮೀಕ್ಷಾ ಸಂಸ್ಥೆಗಳು ಮತದಾರರ ಒಲವನ್ನು, ವಿಶೇಷವಾಗಿ ಮಹಿಳಾ ಮತದಾರರ ಮೌನ ನಿಲುವನ್ನು ಗ್ರಹಿಸುವಲ್ಲಿ ಸಂಪೂರ್ಣವಾಗಿ ವಿಫಲವಾದವು. ಅಬ್ಬರದ ಪ್ರಚಾರ, ರಾಷ್ಟ್ರೀಯ ನಾಯಕರ ಸರಣಿ ಪ್ರಚಾರಗಳು ನೋಡಿ ಅವೆಲ್ಲವೂ ಬಿಜೆಪಿಯ ಪರ ಮತಗಳಾಗಿ ಪರಿವರ್ತನೆಯಾಗಲಿವೆ ಎಂದು ಸಮೀಕ್ಷೆಗಳು ತಪ್ಪಾಗಿ ವಿಶ್ಲೇಷಣೆ ಮಾಡಿದ್ದವು. ಆದರೆ ಬಂಗಾಳದ ಜನತೆ, ಈ ಎಲ್ಲಾ ಲೆಕ್ಕಾಚಾರಗಳನ್ನು ಮೀರಿ ಟಿಎಂಸಿಗೆ ನಿರೀಕ್ಷೆಗೂ ಮೀರಿದ ಬೆಂಬಲ ನೀಡುವ ಮೂಲಕ, ‘ಎಕ್ಸಿಟ್ ಪೋಲ್’ ಅಂದಾಜುಗಳನ್ನು ಕೇವಲ ಕಾಗದದ ಮೇಲಿನ ಅಂಕಿಗಳನ್ನಾಗಿ ಮಾತ್ರ ಉಳಿಸಿದರು.
ಪಶ್ಚಿಮ ಬಂಗಾಳದ ತೀವ್ರ ವೈಫಲ್ಯಕ್ಕೆ ಹೋಲಿಸಿದರೆ, ದಕ್ಷಿಣದ ತಮಿಳುನಾಡು ಮತ್ತು ಕೇರಳದಲ್ಲಿ ಸಮೀಕ್ಷೆಗಳು ವಿಜೇತರ ಟ್ರೆಂಡ್ ಅನ್ನು ಒಂದು ಹಂತದಲ್ಲಿ ಸರಿಯಾಗಿ ಗುರುತಿಸಿದ್ದವು. ತಮಿಳುನಾಡಿನಲ್ಲಿ ಡಿಎಂಕೆ ಮೈತ್ರಿಕೂಟಕ್ಕೆ ‘ಆಕ್ಸಿಸ್ ಮೈ ಇಂಡಿಯಾ’ 175-195 ಸ್ಥಾನಗಳನ್ನು ನೀಡಿದ್ದರೆ, ವಾಸ್ತವದಲ್ಲಿ ಅದು 159 ಸ್ಥಾನ ಗೆದ್ದು ಸುಲಭವಾಗಿ ಅಧಿಕಾರ ಹಿಡಿಯಿತು. ಎಐಎಡಿಎಂಕೆ ಮೈತ್ರಿಕೂಟವು 75 ಸ್ಥಾನ ಪಡೆಯಿತು. ಅದೇ ರೀತಿ ಕೇರಳದಲ್ಲಿ ಆಡಳಿತ ವಿರೋಧಿ ಅಲೆಯಿಲ್ಲದೆ ಎಲ್‌ಡಿಎಫ್ ಮರಳಿ ಬರುತ್ತದೆ ಎಂದು ‘ಟುಡೇಸ್ ಚಾಣಕ್ಯ’ (93-111) ನಿಖರವಾಗಿ ಅಂದಾಜಿಸಿತ್ತು. ನೈಜ ಫಲಿತಾಂಶದಲ್ಲೂ ಎಲ್‌ಡಿಎಫ್ 99 ಹಾಗೂ ಯುಡಿಎಫ್ 41 ಸ್ಥಾನ ಪಡೆದುಕೊಂಡವು.
ಇದನ್ನು ಓದಿದ್ದೀರಾ? ತಮಿಳುನಾಡಿನ ಮೊದಲ ಲಿಂಗತ್ವ ಅಲ್ಪಸಂಖ್ಯಾತ ಕ್ರಿಕೆಟ್ ಅಂಪೈರ್ ರಿತಿಕಾ ಶ್ರೀ
ಇನ್ನು, ಅಸ್ಸಾಂ ಹಾಗೂ ಪುದುಚೇರಿ ರಾಜ್ಯಗಳಲ್ಲಿ ಎಕ್ಸಿಟ್ ಪೋಲ್ ಲೆಕ್ಕಾಚಾರಗಳು ವಾಸ್ತವ ಫಲಿತಾಂಶಕ್ಕೆ ಒಂಚೂರು ಹತ್ತಿರವಾಗಿದ್ದವು. ಅಸ್ಸಾಂನಲ್ಲಿ ‘ಆಕ್ಸಿಸ್ ಮೈ ಇಂಡಿಯಾ’ ಎನ್‌ಡಿಎ ಮೈತ್ರಿಕೂಟಕ್ಕೆ 75 ರಿಂದ 85 ಸ್ಥಾನಗಳು ಬರಲಿವೆ ಎಂದು ಅಂದಾಜಿಸಿತ್ತು. ಅದರಂತೆ ಎನ್‌ಡಿಎ 75 ಸ್ಥಾನಗಳನ್ನು ಪಡೆದುಕೊಂಡಿತು ಹಾಗೂ ಯುಪಿಎ 50 ಸ್ಥಾನ ಪಡೆಯಿತು. ಪುದುಚೇರಿಯಲ್ಲೂ ಎನ್‌ಡಿಎ ಅಧಿಕಾರ ಹಿಡಿಯಲಿದೆ ಎಂಬ ಬಹುತೇಕ ಎಲ್ಲಾ ಸಮೀಕ್ಷೆಗಳ ಭವಿಷ್ಯ (16-20 ಸ್ಥಾನಗಳ ಅಂದಾಜು) ಹತ್ತಿರಹತ್ತಿರ ನಿಜವಾಗಿತ್ತು; ವಾಸ್ತವದಲ್ಲಿ ಎನ್‌ಡಿಎ 16 ಸ್ಥಾನ ಗೆದ್ದರೆ, ಯುಪಿಎ 8 ಸ್ಥಾನ ಗಳಿಸಿತು.
ಇದೇ ಹಿನ್ನೆಲೆಯಲ್ಲಿ, ಏಪ್ರಿಲ್ 29ರಂದು ಮುಕ್ತಾಯಗೊಂಡಿರುವ ಪ್ರಸ್ತುತ 2026ರ ಪಂಚರಾಜ್ಯ ಚುನಾವಣೆಗಳ ಹೊಸ ಎಕ್ಸಿಟ್ ಪೋಲ್ ಅಂಕಿ-ಅಂಶಗಳು ಸಹ ಇದೇ ರೀತಿ ಸುಳ್ಳಾಗುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ. ಈಗಿನ ಸಮೀಕ್ಷೆಗಳಲ್ಲೂ ಪಶ್ಚಿಮ ಬಂಗಾಳದ ಬಗ್ಗೆ ತೀವ್ರ ಗೊಂದಲಮಯ ಹಾಗೂ ಪರಸ್ಪರ ವಿರುದ್ಧವಾದ ವರದಿಗಳಿವೆ; ‘ಪಿ-ಮಾರ್ಕ್’ ಸಮೀಕ್ಷೆಯು ಬಿಜೆಪಿಗೆ (150-175) ಬಹುಮತ ನೀಡಿದ್ದರೆ, ‘ಪೀಪಲ್ಸ್ ಪಲ್ಸ್’ ಸಮೀಕ್ಷೆಯು ಟಿಎಂಸಿಗೆ (177-187) ಭಾರಿ ಮುನ್ನಡೆ ನೀಡಿದೆ.
ಮತ್ತೊಂದೆಡೆ, ತಮಿಳುನಾಡಿನಲ್ಲಿ ನಟ ವಿಜಯ್ ಅವರ ‘ತಮಿಳು ವೆಟ್ರಿ ಕಳಗಂ’ (TVK) ಅತಿ ದೊಡ್ಡ ಪಕ್ಷವಾಗಿ (98-120 ಸ್ಥಾನ) ಹೊರಹೊಮ್ಮಲಿದೆ ಎಂದು ‘ಆಕ್ಸಿಸ್ ಮೈ ಇಂಡಿಯಾ’ ಅಚ್ಚರಿಯ ಲೆಕ್ಕಾಚಾರ ನೀಡಿದೆ. 2021ರ ಹಿಂದಿನ ಅನುಭವವನ್ನು ಗಮನಿಸಿದಾಗ, ಮೇ 4ರಂದು ಪ್ರಕಟವಾಗಲಿರುವ ನೈಜ ಫಲಿತಾಂಶದ ಎದುರು ಸದ್ಯದ ಈ ಅಬ್ಬರದ ಸಮೀಕ್ಷೆಗಳು ವಾಸ್ತವದ ನೆಲೆಗಟ್ಟಿನಲ್ಲಿ ಸಂಪೂರ್ಣವಾಗಿ ತಲೆಕೆಳಗಾದರೂ ಆಶ್ಚರ್ಯಪಡಬೇಕಿಲ್ಲ.
ಈ ಚುನಾವಣೋತ್ತರ ಸಮೀಕ್ಷೆಗಳು ಕೇವಲ ಒಂದು ಸ್ಥೂಲ ಅಂದಾಜು ಮಾತ್ರ ಎಂಬುದನ್ನು ಮರೆಯಬಾರದು. ಅಸ್ಸಾಂ ಮತ್ತು ಪುದುಚೇರಿಯಲ್ಲಿ ಇವುಗಳ ಭವಿಷ್ಯ ಯಶಸ್ವಿಯಾದರೂ, ಪಶ್ಚಿಮ ಬಂಗಾಳದಂತಹ ಸಂಕೀರ್ಣ ಹಾಗೂ ಭಾವನಾತ್ಮಕ ರಾಜಕೀಯ ಸನ್ನಿವೇಶವಿರುವ ರಾಜ್ಯಗಳಲ್ಲಿ ಸಮೀಕ್ಷೆಗಳ ಲೆಕ್ಕಾಚಾರಗಳು ಸಂಪೂರ್ಣವಾಗಿ ಬುಡಮೇಲಾಗುವ ಸಾಧ್ಯತೆಯೇ ಹೆಚ್ಚು. ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಎಕ್ಸಿಟ್ ಪೋಲ್‌ಗಳಿಗಿಂತ ಮತದಾರನ ರಹಸ್ಯ ಮೌನ ತೀರ್ಪೇ ಪರಮಸತ್ಯ ಎಂಬುದನ್ನು 2021ರ ಈ ಪಂಚರಾಜ್ಯ ಫಲಿತಾಂಶಗಳು ನಿರ್ವಿವಾದವಾಗಿ ದೃಢಪಡಿಸಿವೆ.
