ಕೇಂದ್ರ ಪಂಚಾಯತ್ ರಾಜ್ ಸಚಿವಾಲಯದ ಕಲ್ಯಾಣ ಯೋಜನೆಗಳ ಫಲಾನುಭವಿಗಳನ್ನು ಗುರುತಿಸಲು ಆಧಾರ್ ಬದಲಿಗೆ ಮತದಾರರ ಗುರುತಿನ ಚೀಟಿಯನ್ನು (ವೋಟರ್ ಐಡಿ) ಕಡ್ಡಾಯಗೊಳಿಸುವ ಸರ್ಕಾರದ ನಡೆಯನ್ನು ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ತೀವ್ರವಾಗಿ ಖಂಡಿಸಿದ್ದಾರೆ. ಇದು ಕೇವಲ ‘ಮತಗಳ ಕಳ್ಳತನ’ (ವೋಟ್ ಚೋರಿ) ಅಲ್ಲ, ಇದು ಜನರ ‘ಹಕ್ಕುಗಳ ಕಳ್ಳತನ’ (ಹಕ್ ಚೋರಿ) ಎಂದು ಶುಕ್ರವಾರ ಮೋದಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
ಇತ್ತೀಚೆಗಷ್ಟೇ ಕೇಂದ್ರ ಪಂಚಾಯತ್ ರಾಜ್ ಸಚಿವ ರಾಜೀವ್ ರಂಜನ್ ‘ಲಾಲನ್’ ಸಿಂಗ್ ಅವರು, “ಸಚಿವಾಲಯದ ಯೋಜನೆಗಳ ಅಡಿಯಲ್ಲಿ ಆರ್ಥಿಕ ಸೌಲಭ್ಯ ಮತ್ತು ಕಲ್ಯಾಣ ಯೋಜನೆಗಳ ಪ್ರಯೋಜನ ಪಡೆಯಲು ಇನ್ನು ಮುಂದೆ ಬಯೋಮೆಟ್ರಿಕ್ ದೃಢೀಕರಣದೊಂದಿಗೆ ಮತದಾರರ ಗುರುತಿನ ಚೀಟಿ (EPIC) ಸಂಖ್ಯೆ ಅಥವಾ ವೋಟರ್ ಐಡಿ ಕಡ್ಡಾಯ” ಎಂದು ಹೇಳಿದ್ದರು. ಸರ್ಕಾರದ ಈ ನಿರ್ಧಾರದ ಬೆನ್ನಲ್ಲೇ ರಾಹುಲ್ ಗಾಂಧಿ ತಮ್ಮ ‘ಎಕ್ಸ್’ (X) ಖಾತೆಯಲ್ಲಿ ಸುದೀರ್ಘ ಪೋಸ್ಟ್ ಮಾಡುವ ಮೂಲಕ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
”ಮತದಾನ ಮಾಡುವುದು ನಿಮ್ಮ ಹಕ್ಕು; ಅದೊಂದು ಷರತ್ತಲ್ಲ. ಬಡವರ ಪಿಂಚಣಿಯನ್ನು ಅವರ ವೋಟರ್ ಐಡಿಗೆ ಗುಲಾಮರನ್ನಾಗಿ ಮಾಡಲು ಸಾಧ್ಯವಿಲ್ಲ. ಇದು ಕೇವಲ ಮತಗಳ ಕಳ್ಳತನವಲ್ಲ, ಹಕ್ಕುಗಳ ಕಳ್ಳತನ. ಇದನ್ನು ನಾವು ಯಾವುದೇ ಕಾರಣಕ್ಕೂ ನಡೆಯಲು ಬಿಡುವುದಿಲ್ಲ” ಎಂದು ರಾಹುಲ್ ಎಚ್ಚರಿಸಿದ್ದಾರೆ.
“ಇದರ ಹಿಂದೆ ದೊಡ್ಡ ಷಡ್ಯಂತ್ರ ಅಡಗಿದೆ. ಎಸ್‌ಐಆರ್ (SIR) ನೆಪದಲ್ಲಿ ಲಕ್ಷಾಂತರ ಜನರನ್ನು ಮತದಾರರ ಪಟ್ಟಿಯಿಂದ ಕೈಬಿಡಲಾಗುತ್ತಿದೆ. ಇದನ್ನು ಈಗಲೇ ತಡೆಯದಿದ್ದರೆ ಭವಿಷ್ಯದಲ್ಲಿ ಇನ್ನಷ್ಟು ಹೆಸರುಗಳನ್ನು ತೆಗೆದುಹಾಕಲಾಗುತ್ತದೆ. ವಿಶೇಷವಾಗಿ ಬಿಜೆಪಿ ವಿರುದ್ಧ ಆಕ್ರೋಶಗೊಂಡಿರುವವರನ್ನೇ ಗುರಿಯಾಗಿಸಿ ಪಟ್ಟಿಯಿಂದ ಕೈಬಿಡಲಾಗುತ್ತಿದೆ. ಮತದಾರರ ಪಟ್ಟಿಯು ನಿಷ್ಪಕ್ಷಪಾತವಾದ ಚುನಾವಣಾ ಆಯೋಗದ ಕೈಯಲ್ಲಿರಬೇಕಿತ್ತು. ಆದರೆ, ಈಗ ಅದು ಮೋದಿ ಸರ್ಕಾರದ ನೌಕರರ ಕೈಯಲ್ಲಿದೆ” ಎಂದು ಅವರು ಗಂಭೀರ ಆರೋಪ ಮಾಡಿದ್ದಾರೆ.
“ಯಾವಾಗಲೂ ಬಿಜೆಪಿಗೇ ಬಹುಮತ ಸಿಗುವಂತಹ ಮತದಾರರ ಪಟ್ಟಿಯನ್ನು ಸಿದ್ಧಪಡಿಸುವ ಹುನ್ನಾರ ನಡೆಯುತ್ತಿದೆ. ಈ ಪಟ್ಟಿಯೇ ನಿಮಗೆ ಸರ್ಕಾರದ ಸೌಲಭ್ಯ ಸಿಗಬೇಕೆ ಅಥವಾ ಬೇಡವೇ ಎಂಬುದನ್ನು ನಿರ್ಧರಿಸಲಿದೆ. ಪಟ್ಟಿಯಿಂದ ಹೆಸರನ್ನು ಅಳಿಸಿದರೆ ಮತದಾನದ ಹಕ್ಕು ಹೋಗುತ್ತದೆ, ಮತ ಹೋದರೆ ನಿಮ್ಮ ಹಕ್ಕುಗಳೂ ಇಲ್ಲದಂತಾಗುತ್ತವೆ” ಎಂದು ರಾಹುಲ್ ಕಳವಳ ವ್ಯಕ್ತಪಡಿಸಿದ್ದಾರೆ.
“ಹೀಗೆಯೇ ಮುಂದುವರಿದರೆ ನೀವೆಲ್ಲರೂ ಹೈಜಾಕ್ ಆದ ಪ್ರಜಾಪ್ರಭುತ್ವದ ಅದೃಶ್ಯ ನಾಗರಿಕರಾಗುತ್ತೀರಿ. ಅಲ್ಲಿ ಜನರು ಸರ್ಕಾರವನ್ನು ಆಯ್ಕೆ ಮಾಡುವುದಿಲ್ಲ, ಬದಲಿಗೆ ಸರ್ಕಾರವೇ ತನ್ನ ಜನರನ್ನು ಆಯ್ಕೆ ಮಾಡುತ್ತದೆ. ಇಂದು ಪಂಚಾಯತ್ ರಾಜ್ ಯೋಜನೆಗಳಿಗೆ ಇದನ್ನು ಜಾರಿ ಮಾಡಿದ್ದಾರೆ. ನಾಳೆ ಪಡಿತರ, ಪಿಂಚಣಿ, ಉದ್ಯೋಗ ಖಾತ್ರಿ (MGNREGA), ವಸತಿ ಯೋಜನೆ, ವಿದ್ಯಾರ್ಥಿವೇತನ ಅಥವಾ ಮೀಸಲಾತಿಗೂ ವೋಟರ್ ಐಡಿ ಕಡ್ಡಾಯ ಮಾಡಿದರೆ ಅಚ್ಚರಿಯಿಲ್ಲ. ಇದು ಕೇವಲ ಚುನಾವಣೆ ಗೆಲ್ಲುವ ತಂತ್ರವಲ್ಲ, ಬದಲಿಗೆ ಅಧಿಕಾರಕ್ಕೆ ಅಂಟಿಕೊಳ್ಳಲು ಮಾಡಿಕೊಂಡಿರುವ ಶಾಶ್ವತ ವ್ಯವಸ್ಥೆಯಾಗಿದೆ” ಎಂದು ಅವರು ಪೋಸ್ಟ್‌ನಲ್ಲಿ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
