ಕಬ್ಬು ಅರೆಯುವ ಹಂಗಾಮು ಆರಂಭವಾಗಿರುವ ಬೆನ್ನಲ್ಲೇ ಕಬ್ಬು ಬೆಳೆಗಾರರಿಗೆ ತೂಕದಲ್ಲಿ ಅನ್ಯಾಯವಾಗದಂತೆ ತಡೆಯಲು ಕಾನೂನು ಮಾಪನಶಾಸ್ತ್ರ ಇಲಾಖೆ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದೆ. ಬಾಗಲಕೋಟೆ ಜಿಲ್ಲೆಯೂ ಸೇರಿದಂತೆ ಬೆಳಗಾವಿ ಮತ್ತು ಕಲಬುರಗಿ ವಿಭಾಗಗಳ ವ್ಯಾಪ್ತಿಯಲ್ಲಿರುವ ಸಕ್ಕರೆ ಕಾರ್ಖಾನೆಗಳ ವೇಬ್ರಿಡ್ಜ್‌ಗಳು ಹಾಗೂ ತೂಕ ಅಳತೆ ಸಾಧನಗಳ ವಿಶೇಷ ತಪಾಸಣೆಗೆ ಇಲಾಖೆ ತಂಡಗಳನ್ನು ರಚಿಸಿದೆ.
ಕಬ್ಬು ಖರೀದಿ ಸಂದರ್ಭದಲ್ಲಿ ರೈತರು ತರುವ ಕಬ್ಬಿನ ತೂಕದಲ್ಲಿ ಯಾವುದೇ ವ್ಯತ್ಯಾಸವಾಗದಂತೆ ನೋಡಿಕೊಳ್ಳುವುದು ಈ ವಿಶೇಷ ತಪಾಸಣೆಯ ಪ್ರಮುಖ ಉದ್ದೇಶವಾಗಿದೆ. ಅಕ್ಟೋಬರ್ 23ರಿಂದ ಆರಂಭವಾಗಿರುವ ತಪಾಸಣಾ ಕಾರ್ಯವು ಪ್ರಸಕ್ತ ಕಬ್ಬು ಅರೆಯುವ ಹಂಗಾಮು ಮುಕ್ತಾಯವಾಗುವವರೆಗೂ ಮುಂದುವರಿಯಲಿದೆ.
ಕಾನೂನು ಮಾಪನಶಾಸ್ತ್ರ ನಿಯಂತ್ರಕ ಸಿ.ಎನ್. ಮಂಜುನಾಥ ಕೆ.ಎ.ಎಸ್. ಅವರು ಅಕ್ಟೋಬರ್ 22ರಂದು ಹೊರಡಿಸಿರುವ ಆದೇಶದಂತೆ ಕಾನೂನು ಮಾಪನಶಾಸ್ತ್ರ ಕಾಯ್ದೆ-2009ರ ಕಲಂ 14(3)ರ ಅಡಿಯಲ್ಲಿ ಅಧಿಕಾರಿಗಳಿಗೆ ತಪಾಸಣೆಯ ಅಧಿಕಾರ ನೀಡಲಾಗಿದೆ. ಸಹಾಯಕ ನಿಯಂತ್ರಕರು ಹಾಗೂ ತನಿಖಾ ದಳಗಳನ್ನೊಳಗೊಂಡ ವಿಶೇಷ ತಂಡಗಳು ಸಕ್ಕರೆ ಕಾರ್ಖಾನೆಗಳ ವೇಬ್ರಿಡ್ಜ್‌ಗಳನ್ನು ಪರಿಶೀಲಿಸಲಿವೆ.
ತಪಾಸಣೆ ವೇಳೆ ವೇಬ್ರಿಡ್ಜ್‌ಗಳ ನಿಖರತೆ, ತೂಕ ಅಳತೆ ಸಾಧನಗಳ ಕಾರ್ಯನಿರ್ವಹಣೆ ಹಾಗೂ ಸರ್ಕಾರ ನಿಗದಿಪಡಿಸಿರುವ ಮಾದರಿ ಕಾರ್ಯಸೂಚಿ ಮತ್ತು ನಿಯಮಾವಳಿಗಳನ್ನು ಪಾಲಿಸಲಾಗುತ್ತಿದೆಯೇ ಎಂಬುದನ್ನು ಪರಿಶೀಲಿಸಲಾಗುತ್ತದೆ.
ವೇಬ್ರಿಡ್ಜ್‌ಗಳಲ್ಲಿ ಲೋಪ, ತೂಕದಲ್ಲಿ ವ್ಯತ್ಯಾಸ ಅಥವಾ ಕಾನೂನು ಉಲ್ಲಂಘನೆ ಕಂಡುಬಂದಲ್ಲಿ ಸಂಬಂಧಿಸಿದ ಸಕ್ಕರೆ ಕಾರ್ಖಾನೆಗಳ ಮಾಲೀಕರ ವಿರುದ್ಧ ನಿಯಮಾನುಸಾರ ಮೊಕದ್ದಮೆ ದಾಖಲಿಸುವಂತೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ. ತಪಾಸಣೆ ಸಂದರ್ಭದಲ್ಲಿ ದಾಖಲಾದ ಪ್ರಕರಣಗಳ ಮುಂದಿನ ಕಾನೂನು ಕ್ರಮಕ್ಕಾಗಿ ಸಂಬಂಧಿಸಿದ ಕ್ಷೇತ್ರದ ಸಹಾಯಕ ನಿಯಂತ್ರಕರಿಗೆ ವಿವರಗಳನ್ನು ಹಸ್ತಾಂತರಿಸುವಂತೆ ಆದೇಶಿಸಲಾಗಿದೆ.
ತಪಾಸಣಾ ತಂಡಗಳು ತಮ್ಮ ದೈನಂದಿನ ಕರ್ತವ್ಯಗಳ ಜತೆಗೆ ಸಕ್ಕರೆ ಕಾರ್ಖಾನೆಗಳ ವೇಬ್ರಿಡ್ಜ್‌ಗಳ ಪರಿಶೀಲನೆಯನ್ನೂ ನಡೆಸಬೇಕು. ಕ್ಷೇತ್ರವ್ಯಾಪ್ತಿಯ ಉಪ ನಿಯಂತ್ರಕರು ತಪಾಸಣಾ ಕಾರ್ಯಗಳ ಮೇಲುಸ್ತುವಾರಿ ವಹಿಸಿ, ಕೈಗೊಂಡ ಕ್ರಮಗಳ ಸಮಗ್ರ ವರದಿಯನ್ನು ಕೇಂದ್ರ ಕಚೇರಿಗೆ ಸಲ್ಲಿಸಬೇಕು ಎಂದು ನಿರ್ದೇಶನ ನೀಡಲಾಗಿದೆ.
ರೈತರ ಹಿತಾಸಕ್ತಿಗೆ ಮಹತ್ವ
ಕಬ್ಬು ಬೆಳೆದು ಕಾರ್ಖಾನೆಗಳಿಗೆ ಪೂರೈಸುವ ರೈತರಿಗೆ ಅದರ ತೂಕವೇ ಪ್ರಮುಖ ಆಧಾರವಾಗಿದೆ. ವೇಬ್ರಿಡ್ಜ್‌ಗಳಲ್ಲಿನ ಸಣ್ಣ ವ್ಯತ್ಯಾಸವೂ ರೈತರ ಆದಾಯದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ. ಈ ಹಿನ್ನೆಲೆಯಲ್ಲಿ ಇಲಾಖೆಯ ವಿಶೇಷ ತಪಾಸಣೆ ರೈತರ ಹಿತಾಸಕ್ತಿ ಕಾಪಾಡುವ ದೃಷ್ಟಿಯಿಂದ ಮಹತ್ವ ಪಡೆದಿದೆ. ಆದರೆ ತಪಾಸಣೆ ಕೇವಲ ಕಾಗದದ ಮೇಲಿನ ಕ್ರಮವಾಗದೆ, ಹಂಗಾಮಿನುದ್ದಕ್ಕೂ ನಿರಂತರವಾಗಿ ನಡೆಯುವುದರ ಜತೆಗೆ ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕಿದೆ.
ಜಿಲ್ಲೆಯ 9 ಸಕ್ಕರೆ ಕಾರ್ಖಾನೆಗಳ ತಪಾಸಣೆ
ಬಾಗಲಕೋಟೆ ಜಿಲ್ಲೆಯ ಜೆಮ್ ಶುಗರ್ಸ್ ಲಿಮಿಟೆಡ್ (ಕುಂದರಗಿ), ಗೋದಾವರಿ ಶುಗರ್ಸ್ ಲಿಮಿಟೆಡ್ (ಸಮೀರವಾಡಿ), ಇಂಡಿಯನ್ ಕೇನ್‌ಪವರ್ ಲಿಮಿಟೆಡ್ (ಉತ್ತೂರು), ಜಮಖಂಡಿ ಶುಗರ್ಸ್ ಲಿಮಿಟೆಡ್ (ಹಿರೇಪಡಸಲಗಿ), ಮೇಲ್‌ಟ್ರೊ ಶುಗರ್ಸ್ ಲಿಮಿಟೆಡ್ (ಶಿರೂರು), ಎಂ.ಆರ್.ಎನ್. ಕೇನ್ ಪವರ್ (ಕಲ್ಲಾಪುರ), ನಿರಾಣಿ ಶುಗರ್ಸ್ ಲಿಮಿಟೆಡ್ (ಮುಧೋಳ), ಪ್ರಭುಲಿಂಗೇಶ್ವರ ಶುಗರ್ಸ್ ಲಿಮಿಟೆಡ್ (ಸಿದ್ದಾಪುರ) ಹಾಗೂ ಶ್ರೀ ಕೇದಾರನಾಥ ಶುಗರ್ಸ್ ಅಂಡ್ ಆಗ್ರೋ ಪ್ರಾಡಕ್ಟ್ಸ್ ಲಿಮಿಟೆಡ್ (ಕೆರಕಾಲಮಟ್ಟಿ) ಸೇರಿದಂತೆ ಜಿಲ್ಲೆಯ ಒಟ್ಟು ಒಂಬತ್ತು ಸಕ್ಕರೆ ಕಾರ್ಖಾನೆಗಳ ವೇಬ್ರಿಡ್ಜ್‌ಗಳನ್ನು ತಪಾಸಣೆಗೆ ಒಳಪಡಿಸಲಾಗುತ್ತಿದೆ.
