ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಗ್ಯಾನೇಶ್ ಕುಮಾರ್ ಅವರ ರಾಜೀನಾಮೆಗೆ ಆಗ್ರಹಿಸಿ ಕಾಕ್‌ರೋಚ್ ಜನತಾ ಪಾರ್ಟಿ (ಸಿಜೆಪಿ) ತನ್ನ ಹೋರಾಟವನ್ನು ತೀವ್ರಗೊಳಿಸಿದೆ. ಅಕ್ಟೋಬರ್ 2ರಂದು ಮುಂಬೈನ ಶಿವಾಜಿ ಪಾರ್ಕ್‌ನಲ್ಲಿ ನಡೆಯಲಿರುವ ‘ಜೈಲ್ ಭರೋ ಆಂದೋಲನ’ದ ಬೆನ್ನಲ್ಲೇ, ಬೆಂಗಳೂರು, ಗೋವಾ, ಕೋಲ್ಕತ್ತ ಹಾಗೂ ಇತರ ನಗರಗಳಿಗೂ ಈ ಪ್ರತಿಭಟನೆ ವಿಸ್ತರಣೆಯಾಗಲಿದೆ ಎಂದು ಸಿಜೆಪಿ ಸಂಸ್ಥಾಪಕ ಅಭಿಜೀತ್ ದೀಪ್ಕೆ ಗುರುವಾರ (ಅ. 1) ಪ್ರಕಟಿಸಿದ್ದಾರೆ. ಮುಂಬೈನಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಸೌರವ್ ದಾಸ್ ಸೇರಿದಂತೆ ಸಿಜೆಪಿ ಮುಖಂಡರೊಂದಿಗೆ ಅವರು ಈ ವಿಷಯ ತಿಳಿಸಿದರು.
ಮತದಾರರ ಪಟ್ಟಿ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯಲ್ಲಿನ ಕಡಿತಗಳ ಕುರಿತು ಚುನಾವಣಾ ಆಯೋಗದ ಆಂತರಿಕ ಭಿನ್ನಾಭಿಪ್ರಾಯಗಳನ್ನು ‘ಎಕ್ಸ್‌ಪ್ರೆಸ್’ ತನಿಖಾ ವರದಿ ಬಯಲಿಗೆಳೆದ ಬೆನ್ನಲ್ಲೇ ಸಿಜೆಪಿ ಈ ಪ್ರತಿಭಟನೆಗೆ ಮುಂದಾಗಿದೆ. ಪತ್ರಿಕಾಗೋಷ್ಠಿಯಲ್ಲಿ ಮುಖಂಡರು ಸಿಇಸಿ ಗ್ಯಾನೇಶ್ ಕುಮಾರ್ ವಿರುದ್ಧ ಕ್ರಿಮಿನಲ್ ಕ್ರಮಕ್ಕೆ ಆಗ್ರಹಿಸಿದರು. ತಮ್ಮ ಹೋರಾಟಕ್ಕೆ ಕೈಜೋಡಿಸುವಂತೆ ಇತರ ರಾಜಕೀಯ ಪಕ್ಷಗಳಿಗೆ ಮನವಿ ಮಾಡಿದ ದೀಪ್ಕೆ, “ಸಿಜೆಪಿ ‘ಇಂಡಿಯಾ’ (INDIA) ಮೈತ್ರಿಕೂಟದ ಪ್ರತಿಭಟನೆಗಳ ಭಾಗವಾಗುವುದಿಲ್ಲ” ಎಂದು ಇದೇ ವೇಳೆ ಸ್ಪಷ್ಟಪಡಿಸಿದರು.
”ಗ್ಯಾನೇಶ್ ಕುಮಾರ್ ಅವರು ರಾಜೀನಾಮೆ ನೀಡುವವರೆಗೂ ನಮ್ಮ ಹೋರಾಟ ಮುಂದುವರಿಯಲಿದ್ದು, ನಾಳೆ ಪ್ರತಿಭಟನೆ ನಡೆಯಲಿದೆ. ಬಳಿಕ ಜಂತರ್ ಮಂತರ್‌ಗೂ ತೆರಳುತ್ತೇವೆ” ಎಂದು ದೀಪ್ಕೆ ಎಚ್ಚರಿಸಿದರು. ಸಿಇಸಿ ಅವರನ್ನು ‘ಕೈಗೊಂಬೆ’ ಎಂದು ಜರಿದ ಅವರು, ಮುಂದಿನ ಚುನಾವಣಾ ಆಯುಕ್ತರನ್ನು ಪಾರದರ್ಶಕವಾಗಿ ಆಯ್ಕೆ ಮಾಡಬೇಕು ಮತ್ತು ಆ ಪ್ರಕ್ರಿಯೆಯಲ್ಲಿ ನಾಗರಿಕ ಸಮಾಜಕ್ಕೆ ಅವಕಾಶ ನೀಡಬೇಕು ಎಂದು ಆಗ್ರಹಿಸಿದರು. “ಮುಂಬರುವ ದಿನಗಳಲ್ಲಿ ಗೋವಾ, ಬೆಂಗಳೂರು, ಕೋಲ್ಕತ್ತ ಹಾಗೂ ರಾಂಚಿಗಳಲ್ಲಿ ಮೋರ್ಚಾ ನಡೆಯಲಿದ್ದು, ತಿಂಗಳಾಂತ್ಯಕ್ಕೆ ಜಂತರ್ ಮಂತರ್ ತಲುಪಲಿದೆ” ಎಂದು ಮತ್ತೊಬ್ಬ ಮುಖಂಡ ಅಜಿಂಕ್ಯ ಶಿಂಧೆ ತಿಳಿಸಿದರು.
ಎಸ್‌ಐಆರ್‌ನ ಮೂರು ಹಂತಗಳ ಕರಡು ಪಟ್ಟಿಯಿಂದ 13 ಕೋಟಿ ಮತದಾರರ ಹೆಸರುಗಳನ್ನು ತೆಗೆದುಹಾಕಿರುವುದು ‘ಬಹಳ ಗಂಭೀರವಾದ ವಿಚಾರ’ ಎಂದು ದೀಪ್ಕೆ ಕಳವಳ ವ್ಯಕ್ತಪಡಿಸಿದರು. “ಇದು ಒಟ್ಟು ಮತಗಳ ಶೇಕಡಾ 14ರಷ್ಟಿದ್ದು, ಅದನ್ನು ಅವರು ತೆಗೆದುಹಾಕಿದ್ದಾರೆ ಎಂದರೆ, ಚುನಾವಣೆಯ ತೀರ್ಮಾನ ಆಗಲೇ ನಿರ್ಧಾರವಾದಂತಿದೆ. ದೇಶದಲ್ಲಿ ಕೇವಲ ಪ್ರಜಾಪ್ರಭುತ್ವದ ಭ್ರಮೆ ಉಳಿದಿದೆ. ಪ್ರತಿಯೊಂದು ಎಲೆಕ್ಟ್ರಾನಿಕ್ ಯಂತ್ರವನ್ನೂ ತಿರುಚಲು ಸಾಧ್ಯವಿರುವುದರಿಂದ ಇವಿಎಂ (EVM) ಯಂತ್ರಗಳ ಮೇಲೆ ನಂಬಿಕೆ ಇಡಲಾಗದು” ಎಂದು ಅವರು ಗಂಭೀರ ಆರೋಪ ಮಾಡಿದರು.
ಪ್ರತಿಭಟನೆಯಲ್ಲಿ ಪಾಲ್ಗೊಳ್ಳುವವರು ಯಾವುದೇ ರಾಜಕೀಯ ಪಕ್ಷಗಳ ಬ್ಯಾನರ್ ಅಥವಾ ಧ್ವಜಗಳನ್ನು ತರಬಾರದು ಎಂದು ದೀಪ್ಕೆ ಮನವಿ ಮಾಡಿದರು. “ನಾಳೆಯ ಪ್ರತಿಭಟನೆಗೆ ಬರುವಾಗ ಕೇವಲ ರಾಷ್ಟ್ರಧ್ವಜ ತನ್ನಿ, ಸಾಧ್ಯವಾದರೆ ಗಾಂಧಿ ಚಿತ್ರವಿರುವ ಟಿ-ಶರ್ಟ್ ಧರಿಸಿ ಹಾಗೂ ಸನ್‌ಸ್ಕ್ರೀನ್ ಹಚ್ಚಿಕೊಂಡು ಬನ್ನಿ” ಎಂದು ಸಿಜೆಪಿ ಮುಂಬೈ ಸಂಚಾಲಕ ಪ್ರಣಯ್ ಅಹಿರ್ ಸಲಹೆ ನೀಡಿದರು. ಜುಲೈನಲ್ಲಿ ಜಂತರ್ ಮಂತರ್‌ನಲ್ಲಿ ನಡೆದ ಹಿಂಸಾತ್ಮಕ ಪ್ರತಿಭಟನೆಯನ್ನು ಸ್ಮರಿಸಿದ ದೀಪ್ಕೆ, “ಮುಂಬೈ ಪೊಲೀಸರು ದೆಹಲಿ ಪೊಲೀಸರಂತಲ್ಲ, ಅವರು ಪ್ರತಿಭಟನಾಕಾರರೊಂದಿಗೆ ಸಹಕರಿಸುತ್ತಾರೆ” ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಯುವಜನತೆಯನ್ನು ಉದ್ದೇಶಿಸಿ ಮಾತನಾಡಿದ ದೀಪ್ಕೆ, “ಸರ್ಕಾರದ ದೌರ್ಜನ್ಯಗಳಿಗೆ ಮೀಮ್ಸ್ ಮತ್ತು ಹಾಸ್ಯದ ಮೂಲಕವೇ ತಿರುಗೇಟು ನೀಡಬೇಕು, ಏಕೆಂದರೆ ಇದನ್ನು ಹೇಗೆ ಎದುರಿಸಬೇಕೆಂದು ಸರ್ಕಾರಕ್ಕೆ ತಿಳಿದಿಲ್ಲ” ಎಂದರು. ಪ್ರತಿಭಟನಾಕಾರರ ಮೇಲಿನ ಸಂಭವನೀಯ ಕಾನೂನು ಕ್ರಮದ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಪ್ರತಿಭಟನೆ ಮಾಡಿದ್ದಕ್ಕಾಗಿ ಸರ್ಕಾರ ತಮ್ಮ ವಿರುದ್ಧ ಯಾವುದೇ ಕಾನೂನು ಕ್ರಮ ಜರುಗಿಸಲು ಸ್ವತಂತ್ರವಾಗಿದೆ ಎಂದು ಸವಾಲು ಹಾಕಿದರು. ಇದೇ ವೇಳೆ, ಚುನಾವಣಾ ಆಯೋಗದ ಕಾರ್ಯವೈಖರಿ ಖಂಡಿಸಿ ಅಕ್ಟೋಬರ್ 4ರಂದು ಜಂಟಿ ಪ್ರತಿಭಟನೆ ನಡೆಸುವುದಾಗಿ ರಾಜ್ ಠಾಕ್ರೆ ಮತ್ತು ಉದ್ಧವ್ ಠಾಕ್ರೆ ಪ್ರಕಟಿಸಿದ್ದಾರೆ.
