ನ್ಯಾಯಾಲಯಗಳ ನಕಲಿ ಆದೇಶಗಳನ್ನು ಆಧರಿಸಿ ಬರೋಬ್ಬರಿ 129 ಅಕ್ರಮ ಬೆಟ್ಟಿಂಗ್ ವೆಬ್‌ಸೈಟ್‌ಗಳನ್ನು ಕೇಂದ್ರ ಸರ್ಕಾರವು ಸ್ಥಗಿತಗೊಳಿಸಿರುವ ಆಘಾತಕಾರಿ ಸಂಗತಿಯನ್ನು ಅಂತಾರಾಷ್ಟ್ರೀಯ ಸುದ್ದಿ ಸಂಸ್ಥೆ ‘ರಾಯಿಟರ್ಸ್’ ತನಿಖಾ ವರದಿ ಬಯಲಿಗೆಳೆದಿದೆ. ಇದರಿಂದ, ತೀವ್ರ ಮುಖಭಂಗಕ್ಕೀಡಾದ ಕೇಂದ್ರ ದೂರಸಂಪರ್ಕ ಇಲಾಖೆ (DoT) ಇದೀಗ 129 ವೆಬ್‌ಸೈಟ್‌ಗಳ ಪೈಕಿ 95 ವೆಬ್‌ಸೈಟ್‌ಗಳನ್ನು ತಕ್ಷಣವೇ ಮರುಸ್ಥಾಪಿಸುವಂತೆ ‘ಇಂಟರ್‌ನೆಟ್ ಸೇವಾ ಪೂರೈಕೆದಾರ’ರಿಗೆ (ISPs) ತುರ್ತು ನಿರ್ದೇಶನ ನೀಡಿದೆ.
ರಾಯಿಟರ್ಸ್ ಪತ್ರಕರ್ತರಾದ ಮುನ್ಸಿಫ್ ವೆಂಗಟ್ಟಿಲ್ ಮತ್ತು ಆದಿತ್ಯ ಕಲ್ರಾ ಅವರು ನಡೆಸಿದ ವಿಶೇಷ ತನಿಖೆಯಲ್ಲಿ ನ್ಯಾಯಾಲಯಗಳ ಹೆಸರಿನಲ್ಲಿ ನಕಲಿ ಆದೇಶಗಳನ್ನು ರವಾನಿಸಲಾಗಿರುವ ಬೃಹತ್ ವಂಚನೆ ಬೆಳಕಿಗೆ ಬಂದಿತ್ತು. ಅಲಹಾಬಾದ್ ಹೈಕೋರ್ಟ್ ಮತ್ತು ರಾಜಸ್ಥಾನ ಹೈಕೋರ್ಟ್‌ಗಳ ನಕಲಿ ಆದೇಶಗಳನ್ನು ಉಲ್ಲೇಖಿಸಿ, ಯಾವುದೇ ಪೂರ್ವಾಪರ ಪರಿಶೀಲನೆ ನಡೆಸದೆಯೇ ದೂರಸಂಪರ್ಕ ಇಲಾಖೆಯು ವೆಬ್‌ಸೈಟ್‌ಗಳನ್ನು ಬ್ಲಾಕ್ ಮಾಡಲು ಆದೇಶಿಸಿತ್ತು. ಇಲಾಖೆಯ ಆದೇಶವನ್ನು ಇಂಟರ್‌ನೆಟ್ ಸೇವಾ ಸಂಸ್ಥೆಗಳು ಅದನ್ನು ಪಾಲಿಸಿದ್ದವು. ಆದರೆ, ಈ ಎರಡೂ ಆದೇಶಗಳು ನ್ಯಾಯಾಲಯಗಳ ಆನ್‌ಲೈನ್ ನೋಂದಣಿ ದಾಖಲೆಗಳಲ್ಲಿ ಇರಲೇ ಇಲ್ಲ. ಈ ಬಗ್ಗೆ ರಾಯಿಟರ್ಸ್ ಪ್ರಶ್ನೆಗೆ ಇಮೇಲ್‌ನಲ್ಲಿ ಪ್ರತಿಕ್ರಿಯಿಸಿದ್ದ ರಾಜಸ್ಥಾನ ಹೈಕೋರ್ಟ್‌ನ ರಿಜಿಸ್ಟ್ರಾರ್, “ತಮ್ಮ ನ್ಯಾಯಾಲಯದ ಹೆಸರಿನಲ್ಲಿರುವ ಆದೇಶವು ನಕಲಿ. ಈ ಆದೇಶವು ತಮ್ಮ ಸರ್ವರ್‌ನಲ್ಲಿ ಅಸ್ತಿತ್ವದಲ್ಲೇ ಇಲ್ಲ” ಎಂದು ಸ್ಪಷ್ಟಪಡಿಸಿದ್ದರು.
ಅಂತೆಯೇ, ಅಲಹಾಬಾದ್ ಹೈಕೋರ್ಟ್‌ನದ್ದು ಎನ್ನಲಾದ ಆದೇಶವೊಂದನ್ನು ಆಧರಿಸಿ ಕಳೆದ ಸೆಪ್ಟೆಂಬರ್ 2ರಂದು ದೂರಸಂಪರ್ಕ ಇಲಾಖೆಯು ಈ 95 ವೆಬ್‌ಸೈಟ್‌ಗಳನ್ನು ನಿರ್ಬಂಧಿಸುವಂತೆ ಆದೇಶ ಹೊರಡಿಸಿತ್ತು. ಆದರೆ, ಆ ನ್ಯಾಯಾಲಯದ ಆದೇಶವೇ ಸಂಪೂರ್ಣ ನಕಲಿ ಎಂಬುದು ತನಿಖೆಯಿಂದ ದೃಢಪಟ್ಟಿದೆ.
ಪೊಲೀಸರು ಮತ್ತು ನ್ಯಾಯಾಲಯದ ರಿಜಿಸ್ಟ್ರಿ ನೀಡಿದ ಮಾಹಿತಿಯ ಪ್ರಕಾರ, ಈ ನಕಲಿ ಆದೇಶಗಳಲ್ಲಿ ನ್ಯಾಯಾಲಯದ ನಕಲಿ ಲೋಗೋಗಳು, ಸೀಲ್‌ಗಳು ಹಾಗೂ ನಕಲಿ ಕ್ಯೂಆರ್ ಕೋಡ್‌ಗಳನ್ನು ಅತ್ಯಂತ ನಿಪುಣತೆಯಿಂದ ಸೃಷ್ಟಿಸಲಾಗಿತ್ತು.
ಈ ಲೇಖನ ಓದಿದ್ದೀರಾ?: ಒಬಿಸಿ ಮೀಸಲಾತಿ ಮತ್ತು ಕೆನೆಪದರ: ಸುಪ್ರೀಂನ ಮಾರ್ಚ್ ತೀರ್ಪಿನ ಹಿನ್ನೆಲೆಯೇನು? ಪ್ರಸ್ತುತ ಮಹತ್ವವೇನು?
ಈ ಹಿನ್ನೆಲೆಯಲ್ಲಿ ಇಲಾಖೆಯು ಹೊಸ ಅಧಿಸೂಚನೆಯನ್ನು ಹೊರಡಿಸಿದೆ. ಪಟ್ಟಿಯಲ್ಲಿ ಉಲ್ಲೇಖಿಸಲಾಗಿರುವ 95 ವೆಬ್‌ಸೈಟ್‌ಗಳು ಮತ್ತು ಡೊಮೇನ್‌ಗಳ ಮೇಲಿನ ನಿರ್ಬಂಧವನ್ನು ತಕ್ಷಣವೇ ತೆರವುಗೊಳಿಸಲು ಅಗತ್ಯ ಕ್ರಮ ಕೈಗೊಳ್ಳುವಂತೆ ಎಲ್ಲ ಇಂಟರ್‌ನೆಟ್ ಸೇವಾ ಪರವಾನಗಿದಾರರಿಗೆ ಸೂಚಿಸಿದೆ ಎಂದು ‘ದಿ ಟೆಲಿಗ್ರಾಫ್’ ವರದಿ ಮಾಡಿದೆ.
ಇದೆಲ್ಲದರ ನಡುವೆ, ಪ್ರಧಾನ ಮಂತ್ರಿಗಳ ಕಾರ್ಯಾಲಯವು (PMO) ದೂರಸಂಪರ್ಕ ಕಾರ್ಯದರ್ಶಿ ಅಮಿತ್ ಅಗರ್ವಾಲ್ ಅವರಿಗೆ ಸಮನ್ಸ್ ಜಾರಿ ಮಾಡಿದ್ದು, ಖುದ್ದು ಹಾಜರಾಗಿ ವಿವರಣೆ ನೀಡುವಂತೆ ತಾಕೀತು ಮಾಡಿದೆ. ಇದಕ್ಕೂ ಮುನ್ನವೇ ದೂರಸಂಪರ್ಕ ಸಚಿವಾಲಯವು ಈ ವಂಚನೆ ಕುರಿತು ಆಂತರಿಕ ತನಿಖೆಗೆ ಆದೇಶಿಸಿದೆ. ಮತ್ತೊಂದೆಡೆ, ಪೊಲೀಸರು ಕೂಡ ಕ್ರಿಮಿನಲ್ ತನಿಖೆಯ ಭಾಗವಾಗಿ ಸಚಿವಾಲಯದಿಂದ ದಾಖಲೆಗಳನ್ನು ಕೇಳಿದ್ದಾರೆ.
