ರಾಜ್ಯದಲ್ಲಿ ನಡೆಯುತ್ತಿರುವ ಎಸ್‌ಐಆರ್‌ ಅಕ್ರಮಗಳ ವಿರುದ್ಧ ಮತ್ತು ಎಸ್‌ಐಆರ್‌ನಿಂದ ಸಂಕಷ್ಟಕ್ಕೆ ಸಿಲುಕಿರುವ ಸಂತ್ರಸ್ತರಿಗೆ ನ್ಯಾಯಕ್ಕೆ ಆಗ್ರಹಿಸಿ ಅಕ್ಟೋಬರ್ 8ರಂದು ‘ಜನತಾ ನ್ಯಾಯಾಲಯ’ ವಿನೋತನ ಪ್ರತಿಭಟನೆ ನಡೆಯಲಿದೆ ಎಂದು ಎಸ್‌ಐಆರ್‌ ವಿರೋಧಿ ಒಕ್ಕೂಟ ಮತ್ತು ನಾಗರಿಕ ಮತ ಕಾವಲು ಸಮಿತಿ ನಾಯಕರು ತಿಳಿಸಿದ್ದಾರೆ.
ಬೆಂಗಳೂರಿನಲ್ಲಿ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಮತ ಕಾವಲು ಸಮಿತಿ ಮುಖಂಡ ನೂರ್ ಶ್ರೀಧರ್, “ಎಸ್‌ಐಆರ್‌ ಪ್ರಕ್ರಿಯೆ ಮೂಲಕ ಲಕ್ಷಾಂತರ ಶೋಷಿತ ಮತ್ತು ಅಲ್ಪಸಂಖ್ಯಾತ ಸಮುದಾಯಗಳ ಮತದಾರರ ಹಕ್ಕನ್ನು ಕಸಿಯುವ ಹುನ್ನಾರ ನಡೆಯುತ್ತಿದೆ. ಈ ವ್ಯವಸ್ಥಿತ ಷಡ್ಯಂತ್ರದ ವಿರುದ್ಧ ಜನಜಾಗೃತಿ ಮೂಡಿಸಲು ಮತ್ತು ಸಂತ್ರಸ್ತರಿಗೆ ನ್ಯಾಯ ಒದಗಿಸಲು ಈ ವಿನೂತನ ಹೋರಾಟ ರೂಪಿಸಲಾಗಿದೆ” ಎಂದಿದ್ದಾರೆ.
“ಅಕ್ಟೋಬರ್ 8 ರಂದು ನಡೆಯಲಿರುವ ಈ ಜನತಾ ನ್ಯಾಯಾಲಯದಲ್ಲಿ SIR ಪ್ರಕ್ರಿಯೆಯ ಹಿನ್ನೆಲೆ ಮತ್ತು ಅದರಿಂದಾಗಿರುವ ಅನ್ಯಾಯಗಳನ್ನು ತೆರೆದಿಡುವ ಮಹತ್ವದ ಸಾಕ್ಷ್ಯಗಳನ್ನು ಸಾರ್ವಜನಿಕವಾಗಿ ಹಾಜರುಪಡಿಸಲಾಗುವುದು. ದೇಶದ ಹಿರಿಯ ಮತ್ತು ಗಣ್ಯ ನ್ಯಾಯಮೂರ್ತಿಗಳು ಈ ಆರೋಪಗಳನ್ನು ಆಲಿಸಿ ತೀರ್ಪು ನೀಡಲಿದ್ದಾರೆ. ಅಲ್ಲದೆ, ನಟ ಪ್ರಕಾಶ್ ರಾಜ್ ಮತ್ತು ಕಿಶೋರ್ ಸೇರಿದಂತೆ ರಾಜ್ಯದ ಪ್ರಮುಖ ಸಾಹಿತಿಗಳು, ಚಿಂತಕರು, ಸಿಜೆಪಿ ಹಾಗೂ ವಿವಿಧ ವಿದ್ಯಾರ್ಥಿ-ಯುವಜನ ಸಂಘಟನೆಗಳು, ರೈತ, ಕಾರ್ಮಿಕ, ದಲಿತ ಮತ್ತು ಮಹಿಳಾ ಸಂಘಟನೆಗಳ ನಾಯಕರು ಈ ಪ್ರತಿಭಟನೆಗೆ ಬೆಂಬಲ ಸೂಚಿಸಿದ್ದಾರೆ” ಎಂದು ತಿಳಿಸಿದ್ದಾರೆ.
“ಎಸ್‌ಐಆರ್‌ ಹಾವಳಿಗೆ ಒಳಗಾಗಿ ಅನ್ಯಾಯಕ್ಕೊಳದ ರಾಜ್ಯದ ಹಲವಾರು ಸಂತ್ರಸ್ತರು ತಮ್ಮ ಸಮಸ್ಯೆಗಳನ್ನು ಜನತಾ ನ್ಯಾಯಾಲಯದ ಮುಂದೆ ತರಲಿದ್ದಾರೆ. ಸಂತ್ರಸ್ತರು ಅಥವಾ ಸಾಮಾಜಿಕ ಕಾರ್ಯಕರ್ತರು ತಕ್ಷಣವೇ 9606087560 ಸಂಖ್ಯೆಗೆ ಕರೆ ಮಾಡಿ ಅಥವಾ ಸಂದೇಶ ಕಳುಹಿಸುವ ಮೂಲಕ ಎಸ್‌ಐಆರ್‌ನಿಂದಾಗಿ ತಾವು ಎದುರಿಸಿದ ಸಮಸ್ಯೆಗಳ ಬಗ್ಗೆ ಮಾಹಿತಿ ನೀಡಬಹುದು” ಎಂದು ತಿಳಿಸಿದ್ದಾರೆ.
“ಪ್ರಜಾಪ್ರಭುತ್ವದ ಹಕ್ಕುಗಳ ರಕ್ಷಣೆಗಾಗಿ ನಡೆಯುತ್ತಿರುವ ಈ ವಿಶೇಷ ಪ್ರತಿಭಟನೆ – ನಡಾವಳಿಯಲ್ಲಿ ರಾಜ್ಯದ ಪ್ರಜ್ಞಾವಂತ ನಾಗರಿಕರು ಪಾಲ್ಗೊಳ್ಳಬೇಕು” ಎಂದು ಎಸ್‌ಐಆರ್‌ ವಿರೋಧಿ ಒಕ್ಕೂಟ ಕರೆ ನೀಡಿದೆ.
ಸುದ್ದಿಗೋಷ್ಠಿಯಲ್ಲಿ ಸೀತರಾಂ ಗುಂಡಪ್ಪ – ರಾಜ್ಯ ಅಧ್ಯಕ್ಷರು, ಆಮ್ ಆದ್ಮಿ ಪಕ್ಷ, ಫಾದರ್ ಅರಣ್ ಲೂಯಿಸ್ – ಮುಖ್ಯಸ್ಥರು ಆಶೀರ್ವಾದ ಕೇಂದ್ರ ಬೆಂಗಳೂರು, ಅಮ್ಜದ್ ಪಾಷಾ – ರಾಜ್ಯ ವಕ್ತಾರರು ಸ್ವರಾಜ್ ಇಂಡಿಯಾ ಪಕ್ಷ, ಹಬೀಬುಲ್ಲಾ – ರಾಜ್ಯ ಅಧ್ಯಕ್ಚರು, ವೆಲ್ ಪೇರ್ ಪಾರ್ಟಿ ಆಫ್ ಇಂಡಿಯಾ, ಜೆ.ಎಂ ವೀರಸಂಗಯ್ಯ – ರಾಜ್ಯ ಕಾರ್ಯಾಧ್ಯಕ್ಷರು ಕರ್ನಾಟಕ ರಾಜ್ಯ ರೈತ ಸಂಘಟನೆ, ಡಾ. ಮನೋಹರ ಚಂದ್ರ ಪ್ರಸಾದ್ – ರಾಜ್ಯ ಮುಖಂಡರು ದಲಿತ ಕೈಸ್ತ ಒಕ್ಕೂಟ, ಕುಮಾರ್ ಸಮತಳ – ರಾಜ್ಯ ಪ್ರಧಾನ ಕಾರ್ಯದರ್ಶಿಗಳು ಕರ್ನಾಟಕ ಜನಶಕ್ತಿ, ಯೂಸುಫ್ ಕನ್ನಿ – ರಾಜ್ಯ ಕಾರ್ಯದರ್ಶಿ ಗಳು ಜಮಾ- ಅತೆ ಇಸ್ಲಾಮಿ ಹಿಂದ್, ಅಮ್ಜದ್ ಖಾನ್ – ರಾಜ್ಯ ಕೋಶಾಧಿಕಾರಿ SDPI, ಸೋಹೆಲ್ ಅಹ್ಮದ್ – ರಾಜ್ಯ ಸಂಚಾಲಕರು, ಕರ್ನಾಟಕ ರಾಜ್ಯ ಮುಸ್ಲಿಂ ಒಕ್ಕೂಟ, ಅಡ್ವೊಕೇಟ್ ನೈನಾ – ಮಹಿಳಾ ಮುಖಂಡರು, ನಾಗೇಶ್ ಅರಳಿಕೊಪ್ಪ – ಮುಖಂಡರು ಎದ್ದೇಳು ಕರ್ನಾಟಕ, ರಾಜೇಶ್ ಗೌಡ – ಸಿಜೆಪಿ, ಸೌತ್ ಜೋನ್ ಸಂಚಾಲಕರು ಇದ್ದರು.
