ಕೋವಿಡ್ ಸಂದರ್ಭದಲ್ಲಿ ಸಾಂಕ್ರಾಮಿಕ ಹರಡುವುದನ್ನು ನಿಯಂತ್ರಿಸಲು ಸಾಧ್ಯವಾಗದೆ ವಿಶ್ವದ ಹಲವು ದೇಶಗಳಲ್ಲಿ ಲಾಕ್ಡೌನ್ ಹೇರುವಂತಾಗಿತ್ತು. ಹಲವು ಮಂದಿ ಕ್ವಾರಂಟೈನ್ಗೆ ಒಳಗಾಗಬೇಕಾಯಿತು. ಅಲ್ಲಲ್ಲಿ ಸಾವು, ಆರ್ಥಿಕ ಬಿಕ್ಕಟ್ಟು, ನಿರುದ್ಯೋಗ ಎಲ್ಲವೂ ಅಪ್ಪಳಿಸಿತ್ತು. ಇದೀಗ ಅಂತಹ ಸ್ಥಿತಿ ಮರುಕಳಿಸುವುದೇ ಎಂಬ ಆತಂಕ ಹುಟ್ಟಿದೆ. ಅಟ್ಲಾಂಟಿಕ್ ಸಾಗರದಲ್ಲಿ ಸಂಚರಿಸುತ್ತಿದ್ದ ಡಚ್ ಕ್ರೂಸ್ ಹಡಗು MV Hondius ನಲ್ಲಿ ಹಂಟಾ ವೈರಸ್ (Hantavirus) ಸೋಂಕು ಪತ್ತೆಯಾಗಿದ್ದು, ಸದ್ಯ ಜಾಗತಿಕವಾಗಿ ಆತಂಕ ಸೃಷ್ಟಿಯಾಗಿದೆ. ಹಡಗಿನಲ್ಲಿ ಏಳು ಮಂದಿಗೆ ಸೋಂಕು ದೃಢಪಟ್ಟಿದೆ ಅಥವಾ ಶಂಕಿಸಲಾಗಿದೆ, ಇವರಲ್ಲಿ ಮೂವರು ಸಾವನ್ನಪ್ಪಿದ್ದಾರೆ. ಸೋಂಕಿತ ಹಡಗಿನಲ್ಲಿ ಇಬ್ಬರು ಭಾರತೀಯ ಪ್ರಜೆಗಳು ಇದ್ದಾರೆ ಎಂದು ವರದಿಯಾಗಿದೆ. ಸದ್ಯ ಈ ವೈರಸ್ ವಿಶ್ವದಲ್ಲಿ ಜನರಲ್ಲಿ ಭೀತಿ ಹೆಚ್ಚಿಸಿದ್ದ ಕೋವಿಡ್ ನೆನೆಪಿಸಿದೆ. ಹಾಗೆಯೇ ಹಂಟಾ ವೈರಸ್ ಕೋವಿಡ್ಗಿಂತ ಅಪಾಯಕಾರಿಯೇ ಎಂಬ ಪ್ರಶ್ನೆ ಹುಟ್ಟಿದೆ.
ಕೋವಿಡ್ ಸಂದರ್ಭದಲ್ಲಿ ಸಾಂಕ್ರಾಮಿಕ ಹರಡುವುದನ್ನು ನಿಯಂತ್ರಿಸಲು ಸಾಧ್ಯವಾಗದೆ ವಿಶ್ವದ ಹಲವು ದೇಶಗಳಲ್ಲಿ ಲಾಕ್ಡೌನ್ ಹೇರುವಂತಾಗಿತ್ತು. ಹಲವು ಮಂದಿ ಕ್ವಾರಂಟೈನ್ಗೆ ಒಳಗಾಗಬೇಕಾಗುತ್ತದೆ. ಅಲ್ಲಲ್ಲಿ ಸಾವು, ಆರ್ಥಿಕ ಬಿಕ್ಕಟ್ಟು, ನಿರುದ್ಯೋಗ ಎಲ್ಲವೂ ಅಪ್ಪಳಿಸಿತ್ತು. ಇದೀಗ ಅಂತಹ ಸ್ಥಿತಿ ಮರುಕಳಿಸುವುದೇ ಎಂಬ ಆತಂಕ ಹುಟ್ಟಿದೆ.
ಇದನ್ನು ಓದಿದ್ದೀರಾ? ರಾಜ್ಯದಲ್ಲಿ ಕೋವಿಡ್ ಸೋಂಕಿನಿಂದ ಯಾವುದೇ ಸಾವು ಸಂಭವಿಸಿಲ್ಲ: ಸಿಎಂಗೆ ಆರೋಗ್ಯ ಇಲಾಖೆ ಮಾಹಿತಿ
ಈ ಬಗ್ಗೆ ವಿಶ್ವ ಆರೋಗ್ಯ ಸಂಸ್ಥೆ (WHO) ಮಾಹಿತಿ ನೀಡಿದ್ದು, ಹಂಟಾ ವೈರಸ್ ಅಪಾಯವು ತುಂಬಾ ಕಡಿಮೆ ಎಂದು ಸ್ಪಷ್ಟಪಡಿಸಿದೆ. “ಇದು ಕೋವಿಡ್ ಸಾಂಕ್ರಾಮಿಕ ರೋಗದ ಆರಂಭವಲ್ಲ. ಇದು ತುಂಬಾ ವಿಭಿನ್ನವಾಗಿ ಹರಡುತ್ತದೆ” ಎಂದು WHO ಯ ಸಾಂಕ್ರಾಮಿಕ ಮತ್ತು ಸಾಂಕ್ರಾಮಿಕ ನಿರ್ವಹಣೆಯ ನಿರ್ದೇಶಕಿ ಮಾರಿಯಾ ವ್ಯಾನ್ ಕೆರ್ಖೋವ್ ಸ್ಪಷ್ಟಪಡಿಸಿದ್ದಾರೆ.
ಕೋವಿಡ್ vs ಹಂಟಾವೈರಸ್
ಕೊರೊನಾ ವೈರಸ್ SARS-CoV-2 ವೈರಸ್ನಿಂದ ಉಂಟಾಗುತ್ತದೆ. ಕೋವಿಡ್ ಮುಖ್ಯವಾಗಿ ಉಸಿರಾಟದ ಮೇಲೆ ಪರಿಣಾಮ ಬೀರುತ್ತದೆ. ಆದರೆ ಹಂಟಾ ವೈರಸ್ ಒಂದು ಪ್ರಾಣಿಯಿಂದ ಹರಡುವ ಕಾಯಿಲೆ. ಸೋಂಕಿತ ಇಲಿಗಳ (Rodents) ಮೂತ್ರ, ಮಲ ಅಥವಾ ಲಾಲಾರಸದಿಂದ ಹಂಟಾ ವೈರಸ್ ಹರಡುತ್ತದೆ. ಸಾಮಾನ್ಯವಾಗಿ ಮನೆಗಳಲ್ಲಿ ಕ್ಯಾಬಿನ್ಗಳು ಅಥವಾ ಶೆಡ್ಗಳ ಸುತ್ತಲೂ ಸೋಂಕಿತ ಇಲಿಗಳು ಇರುವಲ್ಲಿ ಹಂಟಾ ವೈರಸ್ ಹರಡಿರುವ ಸಾಧ್ಯತೆ ಇರುತ್ತದೆ. ಈ ಹಂಟಾ ವೈರಸ್ ಮಾನವನಿಂದ ಮಾನವನಿಗೆ ಹರಡುವುದು ಅತ್ಯಂತ ಅಪರೂಪ. ಹಂಟಾ ವೈರಸ್ನ ಹಲವು ತಳಿಗಳಲ್ಲಿ ಆಂಡೆಸ್ ತಳಿ (Andes Virus) ಮಾತ್ರ ಸೋಂಕಿಗೆ ಕಾರಣವಾಗುತ್ತದೆ. ಇದು ಒಬ್ಬ ಮನುಷ್ಯನಿಂದ ಇನ್ನೊಬ್ಬ ಮನುಷ್ಯನಿಗೆ ಹರಡುತ್ತದೆ. ಈ ಹಡಗಿನಲ್ಲಿ ಪತ್ತೆಯಾಗಿರುವುದು ಆಂಡೆಸ್ ವೈರಸ್ ಆಗಿದೆ.
ಕೋವಿಡ್, ಹಂಟಾ ಲಕ್ಷಣಗಳಲ್ಲಿ ವ್ಯತ್ಯಾಸ
ಎರಡೂ ಸೋಂಕುಗಳ ಆರಂಭಿಕ ಲಕ್ಷಣಗಳಲ್ಲಿ ಹೆಚ್ಚಿನ ವ್ಯತ್ಯಾಸವಿಲ್ಲ. ಕೊರೊನಾ ವೈರಸ್ನಿಂದ ಬಳಲುತ್ತಿರುವವರು ಒಣ ಕೆಮ್ಮು, ಜ್ವರ, ಉಸಿರಾಟದ ತೊಂದರೆ, ಸ್ನಾಯುಗಳ ಆಯಾಸ ಮತ್ತು ವಾಸನೆ ನಷ್ಟದಂತಹ ಲಕ್ಷಣಗಳನ್ನು ಹೊಂದಿರುತ್ತಾರೆ. ತಜ್ಞರ ಪ್ರಕಾರ ಹಂಟಾ ವೈರಸ್ ಸಾಮಾನ್ಯ ಜ್ವರದಂತಹ ಲಕ್ಷಣಗಳನ್ನು ಹೊಂದಿರುತ್ತದೆ. ಜ್ವರ, ಶೀತ, ಸ್ನಾಯು ನೋವು ಮತ್ತು ತಲೆನೋವು ಹಂಟಾ ವೈರಸ್ ಸೋಂಕಿತರಲ್ಲಿ ಕಂಡುಬರುತ್ತದೆ. ಎರಡೂ ತೀವ್ರವಾದಂತೆ ಲಕ್ಷಣಗಳು ಬದಲಾಗುತ್ತವೆ. ಕೊರೊನಾ ವೈರಸ್ನಿಂದಾಗಿ ಉಸಿರಾಟದ ಕಾಯಿಲೆ ಹೆಚ್ಚಾಗುತ್ತದೆ. ಹಂಟಾ ವೈರಸ್ ಸೋಂಕಿತರಿಗೆ ತೀವ್ರ ಉಸಿರಾಟದ ತೊಂದರೆ ಮತ್ತು ಮೂತ್ರಪಿಂಡದ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ.
ಮೊದಲು ಲಕ್ಷಣ ಕಾಣಿಸಿಕೊಳ್ಳಲು ಎಷ್ಟು ಸಮಯ ಬೇಕು?
ಎರಡು ಸೋಂಕುಗಳ ನಡುವಿನ ಪ್ರಮುಖ ವ್ಯತ್ಯಾಸವೆಂದರೆ ಅವುಗಳ Incubation period. ಅಂದರೆ ವೈರಸ್ ದೇಹವನ್ನು ಪ್ರವೇಶಿಸಿದ ಸಮಯಕ್ಕೂ, ಕಾಯಿಲೆಯ ಲಕ್ಷಣಗಳು ಮೊದಲು ಕಾಣಿಸಿಕೊಳ್ಳುವ ಸಮಯಕ್ಕೂ ನಡುವಿನ ಅವಧಿ. ಕೋವಿಡ್ನಲ್ಲಿ ಇನ್ಕ್ಯುಬೇಷನ್ ಅವಧಿಯು ಬದಲಾಗುತ್ತದೆ. ಎರಡರಿಂದ 14 ದಿನಗಳು ಅಥವಾ ಸರಾಸರಿ ಐದರಿಂದ ಆರು ದಿನಗಳಾಗುತ್ತದೆ. ಅಂದರೆ ಒಮ್ಮೆ ಕೊರೊನಾ ವೈರಸ್ ಸೋಂಕಿಗೆ ಒಳಗಾದ ನಂತರ, ರೋಗಲಕ್ಷಣಗಳನ್ನು ಕಾಣಿಸಿಕೊಳ್ಳಲು ಕನಿಷ್ಠ 2 ಗರಿಷ್ಠ 14 ದಿನಗಳು ಬೇಕಾಗಬಹುದು.
ಹಂಟಾ ವೈರಸ್ನ ಇನ್ಕ್ಯುಬೇಷನ್ ಅವಧಿಯು ಒಂದರಿಂದ ಮೂರು ವಾರಗಳವರೆಗೆ ಆಗಿದೆ. ಹಂಟಾ ವೈರಸ್ ಪಲ್ಮನರಿ ಸಿಂಡ್ರೋಮ್ (ವೈರಸ್ ಶ್ವಾಸಕೋಶ ತಲುಪುವುದು) ಹೊಂದಿರುವವರಿಗೆ ಒಂದರಿಂದ ಎಂಟು ವಾರಗಳ ನಡುವೆ ರೋಗಲಕ್ಷಣಗಳು ಕಂಡುಬರುತ್ತದೆ. ಮೂತ್ರಪಿಂಡದ ಸಿಂಡ್ರೋಮ್ ಹೊಂದಿರುವವರಿಗೆ ಒಂದು ಅಥವಾ ಎರಡು ವಾರಗಳಲ್ಲಿ ಲಕ್ಷಣ ಕಂಡುಬರುತ್ತದೆ.
ಇದನ್ನು ಓದಿದ್ದೀರಾ? ಕೇರಳಕ್ಕೆ ಮತ್ತೆ ವಕ್ಕರಿಸಿದ ‘ನಿಫಾ ವೈರಸ್’; ಇಬ್ಬರ ಸಾವು ದೃಢಪಡಿಸಿದ ಕೇಂದ್ರ ಆರೋಗ್ಯ ಸಚಿವ
ಕೋವಿಡ್ಗಿಂತ ಹಂಟಾ ಅಪಾಯಕಾರಿಯೇ?
ಕೋವಿಡ್ ಮತ್ತು ಹಂಟಾ ವೈರಸ್ ಹರಡುವ ವಿಧಾನ ಮತ್ತು ಅದರ ಅಪಾಯ ಭಿನ್ನವಾಗಿವೆ. ಕೋವಿಡ್ ಮೊದಲು ಕಾಣಿಸಿಕೊಂಡಾಗ, ಸೋಂಕು ಲಾಲಾರಸದಿಂದ (ಉಗುಳು) ಮಾತ್ರ ಹರಡುತ್ತದೆ ಎಂದು ನಂಬಲಾಗಿತ್ತು. ಆದರೆ ಕೋವಿಡ್ ಗಾಳಿಯ ಮೂಲಕ, ಉಸಿರಾಟದ ಮೂಲಕ, ಸಾಮಾನ್ಯ ಶೀತದಂತೆ ಹರಡುತ್ತದೆ ಎಂದು ಶೀಘ್ರದಲ್ಲೇ ಕಂಡುಹಿಡಿಯಲಾಯಿತು. ಆದರೆ ಹಂಟಾ ವೈರಸ್ ಹಾಗಲ್ಲ. ಹೆಚ್ಚಿನ ಪ್ರಕರಣಗಳಲ್ಲಿ ಇಲಿಯಿಂದ ಮನುಷ್ಯರಿಗೆ ಹರಡುತ್ತದೆ. ಇಲಿಗಳ ಮಲದ ಮೂಲಕ ಹರಡುತ್ತದೆ. ಆದರೆ ಆಂಡೆಸ್ ತಳಿ ಮನುಷ್ಯರ ನಡುವೆ ಹರಡಬಹುದು. ಲಾಲಾರಸದಿಂದ, ಬಹಳ ನಿಕಟ ಮತ್ತು ನೇರ ಸಂಪರ್ಕದಿಂದ ಈ ವೈರಸ್ ಹರಡುತ್ತದೆ. ಆದ್ದರಿಂದ ಕೋವಿಡ್ನಂತೆ ಹಂಟಾ ವೈರಸ್ ದೊಡ್ಡ ಸಾಂಕ್ರಾಮಿಕ ರೋಗವಾಗುವ ಸಾಧ್ಯತೆ ಕಡಿಮೆ.
ಆದರೆ ಹೆಚ್ಚು ಅಪಾಯಕಾರಿ ಸೋಂಕು ಯಾವುದು ಎಂಬ ಪ್ರಶ್ನೆ ಬಂದರೆ ಅದರ ಉತ್ತರ ಹಂಟಾ ವೈರಸ್. 2020ರಲ್ಲಿ ಕೋವಿಡ್ ಪ್ರಕರಣದಲ್ಲಿ ಮರಣ ಪ್ರಮಾಣ ಶೇ. 1.7 ಎಂದು ಅಂದಾಜಿಸಲಾಗಿದೆ. ಒಂದರಿಂದ 14 ವರ್ಷ ವಯಸ್ಸಿನ ಮಕ್ಕಳಲ್ಲಿ ಶೇ. 0.01, 65 ರಿಂದ 74 ವರ್ಷ ವಯಸ್ಸಿನವರಲ್ಲಿ ಶೇ. 4.7, 75 ರಿಂದ 84 ವರ್ಷ ವಯಸ್ಸಿನವರಲ್ಲಿ ಶೇ. 12, ಮತ್ತು 85 ವರ್ಷಕ್ಕಿಂತ ಮೇಲ್ಪಟ್ಟವರಲ್ಲಿ ಶೇ. 23.6 – ಹೀಗೆ ವಯಸ್ಸಿನ ಪ್ರಕಾರ ಅಗಾಧ ವ್ಯತ್ಯಾಸಗಳಿವೆ.
ಮತ್ತೊಂದೆಡೆ ಹಂಟಾ ವೈರಸ್ ಹೆಚ್ಚು ಗಂಭೀರವಾಗಿದೆ. ಆಂಡೆಸ್ ತಳಿಯು ವಿಶೇಷವಾಗಿ ಮಾರಕವಾಗಿದ್ದು, ಸೋಂಕಿತರಲ್ಲಿ ಸುಮಾರು ಶೇ. 40ರಷ್ಟು ಮಂದಿ ಸಾವನ್ನಪ್ಪಿದ್ದಾರೆ. ನೈಋತ್ಯ ಯುಎಸ್ನಲ್ಲಿ ಕಂಡುಬರುವ ತಳಿಯನ್ನು ಸಿನ್ ನೊಂಬ್ರೆ ತಳಿ ಎಂದೂ ಕರೆಯಲಾಗುತ್ತದೆ. 1993ರಲ್ಲಿ ಯುಎಸ್ನಲ್ಲಿ ಪತ್ತೆಯಾದ ಹಂಟಾ ವೈರಸ್ನಿಂದಾಗಿ ಸೋಂಕು ತಗುಲಿದ ಶೇ.25ರಷ್ಟು ಮಂದಿ ಸಾವನ್ನಪ್ಪಿದ್ದಾರೆ. ಅಂದರೆ ಹಂಟಾ ಸಾಂಕ್ರಾಮಿಕವಾಗಿ ಹರುಡುವುದು ಕಡಿಮೆ, ಆದರೆ ಸೋಂಕು ತಗುಲಿದರೆ ಅಪಾಯಕಾರಿ.
ಹಂಟಾ ಮತ್ತು ಕೋವಿಡ್: ಚಿಕಿತ್ಸೆಯೇನು?
ಕೊರೊನಾ ವೈರಸ್ ಸಾಂಕ್ರಾಮಿಕ ಎಂದು ತಿಳಿದಾಗ ತಜ್ಞರು ಅದಕ್ಕೆ ಲಸಿಕೆ ಕಂಡುಹಿಡಿಯಲು ಮುಂದಾದರು. ಆದರೆ ಅದು ಎಷ್ಟು ಪರಿಣಾಮಕಾರಿ ಎಂಬುದು ಇಂದಿಗೂ ಪ್ರಶ್ನೆಯಾಗಿಯೇ ಉಳಿದಿದೆ. ಆದರೆ ಹಂಟಾ ವೈರಸ್ಗೆ ಈವರೆಗೂ ಯಾವುದೇ ಚಿಕಿತ್ಸೆ ಇಲ್ಲ.
ಒಟ್ಟಾರೆಯಾಗಿ ಕೊರೊನಾ ವೈರಸ್ ಮತ್ತು ಹಂಟಾ ವೈರಸ್ ಪರಸ್ಪರ ಬಹಳ ಭಿನ್ನ. ಅದಕ್ಕೂ ಮುಖ್ಯವಾಗಿ ಹಂಟಾದಿಂದ ಕೋವಿಡ್ ತರಹದ ಸಾಂಕ್ರಾಮಿಕ ರೋಗ ಉಂಟಾಗದು. ನ್ಯೂ ಮೆಕ್ಸಿಕೊ ವಿಶ್ವವಿದ್ಯಾಲಯದ ಆರೋಗ್ಯ ವಿಜ್ಞಾನ ಕೇಂದ್ರದ ಅಸೋಸಿಯೇಟ್ ಪ್ರಾಧ್ಯಾಪಕ ಸ್ಟೀವನ್ ಬ್ರಾಡ್ಫ್ಯೂಟ್ ನ್ಯೂಯಾರ್ಕ್ ಟೈಮ್ಸ್ಗೆ ಹೇಳಿದಂತೆ: “ಜಾಗರೂಕರಾಗಿರುವುದು ಒಳ್ಳೆಯದು. ಆದರೆ ಆತಂಕಕ್ಕೆ ಒಳಗಾಗುವ ಅಗತ್ಯವಿಲ್ಲ”
