ಪ್ಲ್ಯಾಸ್ಟಿಕ್ ಸರ್ಜರಿ ʼಇಂದಿನ ಆಧುನಿಕ ವಿಜ್ಞಾನʼ ಅಲ್ಲ; ಭಾರತದಲ್ಲಿ ಸಹಸ್ರಾರು ವರ್ಷಗಳಿಂದಲೂ ಇದ್ದ ಜ್ಞಾನ. ಸುಶ್ರುತರು ಅಡಿಪಾಯ ಹಾಕಿದರು, ಶ್ರೀರಂಗಪಟ್ಟಣದ ಘಟನೆಯು ಅದನ್ನು ಪಶ್ಚಿಮ ದೇಶಗಳಿಗೆ ಪರಿಚಯಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿತು. ಟಿಪ್ಪು ಸುಲ್ತಾನ್ ಸ್ವತಃ ಸರ್ಜರಿ ಮಾಡಿಸಿಲ್ಲವಾದರೂ ಆ ಕಾಲದಲ್ಲಿ ಇಂತಹ ಚಿಕಿತ್ಸೆಗಳು ಭಾರತದಲ್ಲಿ ಸಾಮಾನ್ಯವಾಗಿದ್ದವು.
ಶ್ರೀರಂಗಪಟ್ಟಣ ಪ್ಲ್ಯಾಸ್ಟಿಕ್ ಸರ್ಜರಿ ಎಂದರೆ ಇಂದಿನ ಆಧುನಿಕ ವಿಜ್ಞಾನವೆಂದು ನಾವು ಭಾವಿಸುತ್ತೇವೆ. ಆದರೆ 2600 ವರ್ಷಗಳ ಹಿಂದಿನ ಭಾರತೀಯ ಜ್ಞಾನ ಮತ್ತು 1799ರ ಟಿಪ್ಪು ಸುಲ್ತಾನ್ ಕಾಲದಲ್ಲೇ ಶ್ರೀರಂಗಪಟ್ಟಣ ಪ್ಲ್ಯಾಸ್ಟಿಕ್ ಸರ್ಜರಿಯಂತಹ ವೈದ್ಯಕೀಯ ಕ್ಷೇತ್ರಕ್ಕೆ ಸಾಕ್ಷಿಯಾಗಿತ್ತು.
ಪ್ಲ್ಯಾಸ್ಟಿಕ್ ಸರ್ಜರಿಯ ಪಿತಾಮಹ ಡಾ. ಸುಶ್ರುತ. ಇದು ಸುಶ್ರುತನಿಂದ ಶುರುವಾದ ಕಲೆ. ಅವರು ಸುಶ್ರುತ ಸಂಹಿತೆಯಲ್ಲಿ ʼನಾಸಾ ಸಂಧಾನʼ ಅಂದರೆ ಮೂಗು ಮರು ನಿರ್ಮಾಣದ ವಿಧಾನವನ್ನು ವಿವರಿಸಿದ್ದಾರೆ. ಹಣೆಯಿಂದ ಚರ್ಮದ ಪಟ್ಟಿ ತೆಗೆದು ಹೊಸ ಮೂಗು ಕಟ್ಟುವ ಈ ತಂತ್ರಗಾರಿಕೆ(ಟೆಕ್ನಿಕ್) ಜಗತ್ತಿನಲ್ಲೇ ಮೊದಲನೆಯದು.
ಟಿಪ್ಪು ಕಾಲದಲ್ಲಿ ಏನಾಗುತ್ತಿತ್ತು?
ಶ್ರೀರಂಗಪಟ್ಟಣದಲ್ಲಿ 1799ರ 4ನೇ ಆಂಗ್ಲೋ-ಮೈಸೂರು ಯುದ್ಧ ನಡೆಯಿತು. ಬ್ರಿಟಿಷರ ರಾಕೆಟ್ ಮತ್ತು ಫಿರಂಗಿ ದಾಳಿಯಿಂದ ಟಿಪ್ಪುವಿನ ಅನೇಕ ಸೈನಿಕರಿಗೆ ಮೂಗು, ಕಿವಿ, ಮುಖಕ್ಕೆ ತೀವ್ರ ಗಾಯಗಳಾಗಿದ್ದವು. ಆಗ ಟಿಪ್ಪುವಿನ ರಾಜ ವೈದ್ಯಶಾಲೆಯ ವೈದ್ಯರು ಸುಶ್ರುತನ ವಿಧಾನದಿಂದ ಚಿಕಿತ್ಸೆ ನೀಡಿದರು. ʼಕವಾಸ್ಜಿʼ ಎಂಬ ಸೈನಿಕನ ಮೂಗು ಸಂಪೂರ್ಣ ಹಾನಿಯಾಗಿತ್ತು. ವೈದ್ಯರು ಹಣೆಯ ಚರ್ಮದಿಂದ ಹೊಸ ಮೂಗು ಕಟ್ಟಿ ಆತನಿಗೆ ಮತ್ತೆ ಗೌರವಯುತ ಬದುಕು ನೀಡಿದರು. ಇದನ್ನೇ ʼಇಂಡಿಯನ್ ರೈನೋಪ್ಲ್ಯಾಸ್ಟಿʼ ಎಂದು ಕರೆಯಲಾಯಿತು. ಅಂತೆಯೇ ಕಿವಿ ಕತ್ತರಿಸಿದವರಿಗೆ ʼಕರ್ಣ ಸಂಧಾನʼ, ತುಟಿ ಸೀಳಿದವರಿಗೆ ʼಓಷ್ಟ ಸಂಧಾನʼ ಕೂಡ ಇಲ್ಲಿ ನಡೆಯುತ್ತಿತ್ತು.
ಜಗತ್ತಿಗೆ ಹರಡಿದ ಭಾರತೀಯ ಜ್ಞಾನ
ಬ್ರಿಟಿಷ್ ಸರ್ಜನ್ ಡಾ. ಜೋಸೆಫ್ ಕನ್ಸ್ಟಂಟೈನ್ ಕಾರ್ಪ್ಯೂ ಅವರು 1794ರಂದು ಪೂನಾದಲ್ಲಿ ನಡೆದ ಈ ಸರ್ಜರಿ ಕಂಡು ಬೆರಗಾದರು. 1814ರಲ್ಲಿ ಅವರು London Medical Gazetteನಲ್ಲಿ ʼMethod of Improving the Deformity of the Noseʼ ಎಂಬ ಲೇಖನ ಪ್ರಕಟಿಸಿದರು. ಅಲ್ಲಿಂದಲೇ ಈ ʼIndian Methodʼ ಯುರೋಪ್‌ಗೆ ಹೋಗಿ ಆಧುನಿಕ ಪ್ಲ್ಯಾಸ್ಟಿಕ್ ಸರ್ಜರಿಗೆ ಅಡಿಪಾಯವಾಯಿತು.
ಕವಾಸ್ಜಿ ಎಂಬ ವ್ಯಕ್ತಿಯ ಮೂಗು ಪುನರ್ನಿರ್ಮಾಣದ ಕಥೆ ಬ್ರಿಟಿಷ್ ವೈದ್ಯರ ಮೂಲಕ ಯುರೋಪ್‌ಗೆ ತಲುಪಿ, ಆಧುನಿಕ ಪ್ಲ್ಯಾಸ್ಟಿಕ್ ಸರ್ಜರಿಯ ಅಭಿವೃದ್ಧಿಗೆ ಪ್ರೇರಣೆಯಾಯಿತು.
ಪ್ರಸ್ತುತತೆ
ಜುಲೈ 15 ರಾಷ್ಟ್ರೀಯ ಪ್ಲ್ಯಾಸ್ಟಿಕ್ ಸರ್ಜರಿ ದಿನ. ಪ್ಲ್ಯಾಸ್ಟಿಕ್ ಸರ್ಜರಿ ಕೇವಲ ಸೌಂದರ್ಯಕ್ಕಲ್ಲ. ಅಪಘಾತ, ಸುಟ್ಟ ಗಾಯ, ಜನ್ಮಜಾತ ವಿರೂಪ ಸರಿಪಡಿಸುವ ಮಾನವೀಯ ಕೆಲಸ ಎಂಬುದನ್ನು ಈ ದಿನ ನೆನಪಿಸುತ್ತದೆ. ಶ್ರೀರಂಗಪಟ್ಟಣ ಕೇವಲ ಟಿಪ್ಪುವಿನ ರಾಜಧಾನಿಯಷ್ಟೇ ಅಲ್ಲ, ವೈದ್ಯಕೀಯ ಇತಿಹಾಸದ ಒಂದು ಪ್ರಮುಖ ಕೇಂದ್ರವೂ ಆಗಿತ್ತು ಎಂಬುದು ನಮ್ಮ ಹೆಮ್ಮೆ.. ಕವಾಸ್ಜಿ ಎಂಬ ವ್ಯಕ್ತಿಯ ಮೂಗು ಪುನರ್ನಿರ್ಮಾಣದ ಕಥೆ ಬ್ರಿಟಿಷ್ ವೈದ್ಯರ ಮೂಲಕ ಯುರೋಪ್‌ಗೆ ತಲುಪಿ, ಆಧುನಿಕ ಪ್ಲ್ಯಾಸ್ಟಿಕ್ ಸರ್ಜರಿಯ ಅಭಿವೃದ್ಧಿಗೆ ಪ್ರೇರಣೆಯಾಯಿತು.
ಪ್ಲ್ಯಾಸ್ಟಿಕ್ ಸರ್ಜರಿ ʼಇಂದಿನ ಆಧುನಿಕ ವಿಜ್ಞಾನʼ ಅಲ್ಲ; ಭಾರತದಲ್ಲಿ ಸಹಸ್ರಾರು ವರ್ಷಗಳಿಂದಲೂ ಇದ್ದ ಜ್ಞಾನ. ಸುಶ್ರುತರು ಅಡಿಪಾಯ ಹಾಕಿದರು, ಶ್ರೀರಂಗಪಟ್ಟಣದ ಘಟನೆಯು ಅದನ್ನು ಪಶ್ಚಿಮ ದೇಶಗಳಿಗೆ ಪರಿಚಯಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿತು. ಟಿಪ್ಪು ಸುಲ್ತಾನ್ ಸ್ವತಃ ಸರ್ಜರಿ ಮಾಡಿಸಿಲ್ಲವಾದರೂ ಆ ಕಾಲದಲ್ಲಿ ಇಂತಹ ಚಿಕಿತ್ಸೆಗಳು ಭಾರತದಲ್ಲಿ ಸಾಮಾನ್ಯವಾಗಿದ್ದವು.
ಇದನ್ನೂ ಓದಿದ್ದೀರಾ? ವಿಶ್ವದಲ್ಲಿಯೇ ಅತಿ ಹೆಚ್ಚು ಅಪಾರ್ಥಕ್ಕೆ ಒಳಗಾದ ದೇಶ ಇರಾನ್‌- ಪತ್ರಕರ್ತ ಸೌರಭ್‌ ಶುಕ್ಲಾ
ಹೀಗೆ ಭಾರತೀಯ ಜ್ಞಾನ ಪದ್ಧತಿ ಯಾವಾಗಲೂ ಮುಂದುವರಿದಿದೆ. ಇಂದಿನ ಆಧುನಿಕತೆಯ ಹಿಂದೆ ನಮ್ಮ ಪೂರ್ವಜರ ದೂರದೃಷ್ಟಿ ಮತ್ತು ವೈಜ್ಞಾನಿಕ ದಕ್ಷತೆ ಅಡಗಿದೆ. ಈ ಪರಂಪರೆಯನ್ನು ಗೌರವಿಸುವುದು ಮತ್ತು ಮುಂದುವರಿಸುವುದು ನಮ್ಮ ಜವಾಬ್ದಾರಿ.
ವಿಶೇಷ ವರದಿ: ಕೆ ಎಸ್ ಜಯಶಂಕರ್
