ಚೆಂಡು ಕಂಡ ತಕ್ಷಣ ಬೌಂಡರಿ ದಾಟಿಸುವುದೇ ತನ್ನ ಮುಖ್ಯ ತಂತ್ರ ಎಂದು ಭಾವಿಸಿರುವ ಯುವ ಬ್ಯಾಟಿಂಗ್ ವಿಸ್ಮಯ ವೈಭವ್ ಸೂರ್ಯವಂಶಿ, ಐಪಿಎಲ್ 2026 ರಲ್ಲಿ ಅಬ್ಬರಿಸುತ್ತಿದ್ದಾರೆ. ಇತ್ತೀಚೆಗೆ ನಡೆದ ಅಂಡರ್ 19 ವಿಶ್ವಕಪ್ ಫೈನಲ್‌ನಲ್ಲಿ 175 ರನ್‌ಗಳ ಸ್ಫೋಟಕ ಇನಿಂಗ್ಸ್ ಆಡಿ ಭಾರತವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದ ಈ ಯುವ ಆಟಗಾರ, ಈಗ ಐಪಿಎಲ್‌ನಲ್ಲೂ ಅದೇ ಲಯವನ್ನು ಮುಂದುವರಿಸಿದ್ದಾರೆ.
ಬಿಹಾರದ ಸಮಷ್ಟಿಪುರದ 15 ವರ್ಷದ ಈ ಯುವ ಪ್ರತಿಭೆ ಈಗ ರಾಜಸ್ಥಾನ್ ರಾಯಲ್ಸ್ ತಂಡದ ಪಾಲಿನ ಬಹುಮುಖ್ಯ ಆಟಗಾರರಾಗಿದ್ದಾರೆ. ತನ್ನ ಸ್ಫೋಟಕ ಬ್ಯಾಟಿಂಗ್ ಮೂಲಕ ಬೌಲರ್‌ಗಳಿಗೆ ನಡುಕ ಹುಟ್ಟಿಸಿರುವ ವೈಭವ್, ಐಪಿಎಲ್ 2026 ರಲ್ಲಿ ಇದುವರೆಗೆ 6 ಪಂದ್ಯಗಳಿಂದ 41.00 ಸರಾಸರಿಯಲ್ಲಿ 246 ರನ್‌ಗಳನ್ನು ಕಲೆಹಾಕಿದ್ದಾರೆ. ಇವರ ಸ್ಟ್ರೈಕ್ ರೇಟ್ 236.54 ಆಗಿದ್ದು, ಇದುವರೆಗೆ ರಾಜಸ್ಥಾನ್ ರಾಯಲ್ಸ್ ತಂಡದ ಅತ್ಯಧಿಕ ರನ್ ಗಳಿಸಿದ ಆಟಗಾರ ಎಂಬುದಕ್ಕೆ ಸಾಕ್ಷಿಯಾಗಿದೆ.
ದೂರದರ್ಶನದ ಜೊತೆ ಮಾತನಾಡಿದ ವೈಭವ್, “ನಾನು ಮೈದಾನದಲ್ಲಿ ಎಷ್ಟು ಹೊತ್ತು ಇರುತ್ತೇನೆಯೋ, ಅಷ್ಟು ಹೊತ್ತು ಪ್ರಬಲವಾಗಿ ಆಡಿ ಎದುರಾಳಿಗಳ ಕೈಯಿಂದ ಪಂದ್ಯವನ್ನು ಕಸಿದುಕೊಳ್ಳಬಲ್ಲೆ,” ಎಂದು ತನ್ನ ಆತ್ಮವಿಶ್ವಾಸವನ್ನು ವ್ಯಕ್ತಪಡಿಸಿದ್ದಾರೆ. “ನಾನು ನನ್ನ ತಂದೆಯ ಜೊತೆ ಮಾತನಾಡಿದೆ. ಅವರ ಅರ್ಧ ಕನಸು ಈಗಾಗಲೇ ನನಸಾಗಿದೆ, ಇನ್ನು ಅರ್ಧ ಬಾಕಿ ಇದೆ ಎಂದು ಅವರು ಹೇಳಿದರು. ಸೀನಿಯರ್ ತಂಡಕ್ಕಾಗಿ ವಿಶ್ವಕಪ್ ಆಡುವುದು ಹಾಗೂ ಭಾರತಕ್ಕಾಗಿ ಗೆಲುವು ತಂದುಕೊಡುವುದೇ ನನ್ನ ಮುಖ್ಯ ಗುರಿ,” ಎಂದು ವೈಭವ್ ಹೇಳಿದ್ದಾರೆ.
ಇದನ್ನು ಓದಿದ್ದೀರಾ? ಇದು IPL ಇತಿಹಾಸದ ಅತ್ಯುತ್ತಮ ಕ್ಯಾಚ್; ಶ್ರೇಯಸ್ ಕ್ಯಾಚ್ ಕಂಡು ಕಕ್ಕಾಬಿಕ್ಕಿಯಾದ ರೋಹಿತ್, ಸೂರ್ಯ
ವೈಭವ್ ಐಪಿಎಲ್ ಅಂಕಿಅಂಶಗಳನ್ನು ಗಮನಿಸಿದರೆ, ತನ್ನ ವೃತ್ತಿಜೀವನದಲ್ಲಿ ಇದುವರೆಗೆ 13 ಐಪಿಎಲ್ ಪಂದ್ಯಗಳನ್ನು ಆಡಿರುವ ವೈಭವ್, 38.30 ಸರಾಸರಿ ಹಾಗೂ 220.35 ಸ್ಟ್ರೈಕ್ ರೇಟ್‌ನಲ್ಲಿ ಒಟ್ಟು 498 ರನ್‌ಗಳನ್ನು ಗಳಿಸಿದ್ದಾರೆ. ಈ ಸಾಧನೆಯಲ್ಲಿ ಒಂದು ಶತಕ ಹಾಗೂ ಮೂರು ಅರ್ಧಶತಕಗಳು ಸೇರಿವೆ. ಒಟ್ಟು 226 ಚೆಂಡುಗಳನ್ನು ಎದುರಿಸಿರುವ ಅವರು 42 ಬೌಂಡರಿಗಳು ಹಾಗೂ 44 ಸಿಕ್ಸರ್‌ಗಳನ್ನು ಸಿಡಿಸಿದ್ದಾರೆ.
ಈ ಯುವ ಆಟಗಾರನ ಪ್ರತಿಭೆಯ ಬಗ್ಗೆಯೂ ಮಾತನಾಡಿದ ಮಾಜಿ ಕ್ರಿಕೆಟಿಗ ಇರ್ಫಾನ್ ಪಠಾಣ್, ಅವರನ್ನು ಒಬ್ಬ “ವಿಶೇಷ ಆಟಗಾರ” ಎಂದು ಬಣ್ಣಿಸಿದ್ದಾರೆ. ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿರುವ ಪಠಾಣ್, “ವೈಭವ್ ಸೂರ್ಯವಂಶಿಗಾಗಿ ಎದುರಾಳಿ ತಂಡದಲ್ಲಿ ದೊಡ್ಡ ಹೆಸರಿನ ಬೌಲರ್‌ಗಳು ಬೇಕು ಎಂಬ ವಾದ ಮತ್ತೆ ನಿಜವಾಗುತ್ತಿದೆ. ಈ ಹುಡುಗ ಒಬ್ಬ ವಿಶೇಷ ಪ್ರತಿಭೆ ಹಾಗೂ ಮುಂದಿನ ಹಲವು ವರ್ಷಗಳ ಕಾಲ ಉನ್ನತ ಮಟ್ಟದಲ್ಲಿ ಆಡುವ ಸಾಮರ್ಥ್ಯ ಹೊಂದಿದ್ದಾನೆ” ಎಂದು ಶ್ಲಾಘಿಸಿದ್ದಾರೆ.
