ಮುಂಬೈ ಇಂಡಿಯನ್ಸ್ ತಂಡದ ಬ್ಯಾಟರ್ ತಿಲಕ್ ವರ್ಮಾ ಅವರನ್ನು ವರ್ಣಭೇದ ನಿಂದನೆಗೊಳಪಡಿಸಿದ ಪಂಜಾಬ್ ಕಿಂಗ್ಸ್ ವೇಗಿ ಅರ್ಷದೀಪ್ ಸಿಂಗ್ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು, ಹಾಗೂ ಅವರನ್ನು ಐಪಿಎಲ್ ಋತುವಿನಿಂದ ಅಮಾನತು ಮಾಡಬೇಕು ಎಂದು ಭಾರತದ ಮಾಜಿ ಸ್ಪಿನ್ನರ್ ಲಕ್ಷ್ಮಣ್ ಶಿವರಾಮಕೃಷ್ಣನ್ ಬಿಸಿಸಿಐಗೆ ಆಗ್ರಹಿಸಿದ್ದಾರೆ.
ಧರ್ಮಶಾಲಾದಲ್ಲಿ ನಡೆದಿದ್ದ ಪಂದ್ಯಕ್ಕೂ ಮುನ್ನ, ಮೇ 14ರ ಗುರುವಾರದಂದು ಅರ್ಷದೀಪ್ ಸಿಂಗ್ ತಮ್ಮ ಸ್ನ್ಯಾಪ್ಚಾಟ್ನಲ್ಲಿ ವಿಡಿಯೋ ಒಂದನ್ನು ಹಂಚಿಕೊಂಡಿದ್ದರು. ಈ ವಿಡಿಯೋದಲ್ಲಿ ಅರ್ಷದೀಪ್, ತಿಲಕ್ ವರ್ಮಾ ಅವರನ್ನು ನೋಡಿ “ಓಯ್ ಅಂಧೇರೆ, ಸನ್ಸ್ಕ್ರೀನ್ ಲಗಾಯಾ?” (ಹೇ ಕರಿಯಾ, ಸನ್ಸ್ಕ್ರೀನ್ ಹಚ್ಚಿದ್ದೀಯಾ?) ಎಂದು ವ್ಯಂಗ್ಯವಾಗಿ ಕೇಳಿದ್ದರು. ಇದಷ್ಟೇ ಅಲ್ಲದೆ, ತಿಲಕ್ ಅವರ ತಂಡದ ಸಹಪಾಠಿ ನಮನ್ ಧೀರ್ ಅವರನ್ನು ಕ್ಯಾಮೆರಾಗೆ ತೋರಿಸಿ, ಇವರು ಪಂಜಾಬ್ನ ‘ನಿಜವಾದ ನೂರ್’ (ಬೆಳಕು/ಕಾಂತಿ) ಎಂದು ಹೇಳಿದ್ದರು. ಈ ವಿಡಿಯೋ ಪ್ರಸ್ತುತ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವಿವಾದಕ್ಕೆ ಕಾರಣವಾಗಿದೆ.
ಕೆಲವರು ಇದನ್ನು ಕೇವಲ ತಮಾಷೆ ಎಂದು ಸಮರ್ಥಿಸಿಕೊಳ್ಳುತ್ತಿರುವ ಬಗ್ಗೆ ‘ಎಕ್ಸ್’ ವೇದಿಕೆಯಲ್ಲಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಶಿವರಾಮಕೃಷ್ಣನ್, “ಕ್ರಿಕೆಟ್ ಇನ್ನು ಮುಂದೆ ಕೇವಲ ಆಟವಾಗಿ ಉಳಿದಿಲ್ಲ, ಇದೊಂದು ವೃತ್ತಿಯಾಗಿದೆ. ಆಟಗಾರರು ಇದನ್ನು ವೃತ್ತಿಪರತೆಯಿಂದ ನೋಡಬೇಕು” ಎಂದು ಹೇಳಿದ್ದಾರೆ. ಕಿರಿಯ ಆಟಗಾರರು ದೊಡ್ಡ ಹೆಸರಿನ ಆಟಗಾರರ ವಿರುದ್ಧ ದೂರು ನೀಡಲು ಅಂಜುತ್ತಾರೆ ಎಂಬ ಸೂಕ್ಷ್ಮ ವಿಷಯವನ್ನು ಅವರು ಪ್ರಸ್ತಾಪಿಸಿದ್ದಾರೆ. ಒಂದು ವೇಳೆ ಬಿಸಿಸಿಐ ಈ ಬಗ್ಗೆ ಕಠಿಣ ದಂಡ ಹಾಗೂ ನಿಷೇಧದ ಕ್ರಮ ಕೈಗೊಂಡರೆ, ತಮ್ಮನ್ನು ಹಿಂದೆ ವರ್ಣಭೇದ ನಿಂದನೆಗೊಳಪಡಿಸಿದ ವ್ಯಕ್ತಿಗಳ ಹೆಸರನ್ನು ಬಹಿರಂಗಪಡಿಸಲು ತಾವು ಸಿದ್ಧ ಎಂದು ಅವರು ಸವಾಲು ಹಾಕಿದ್ದಾರೆ.
ಇದನ್ನು ಓದಿದ್ದೀರಾ? 8 ಎಸೆತ, 6 ಸಿಕ್ಸರ್, 13 ಎಸೆತಗಳಲ್ಲಿ 50: LSG ವಿರುದ್ಧ ಅಬ್ಬರಿಸಿ ಇತಿಹಾಸ ಬರೆದ ಉರ್ವಿಲ್ ಪಟೇಲ್
ಈ ಘಟನೆಯು ಬಿಸಿಸಿಐ ಮುಂದೊಂದು ದೊಡ್ಡ ಸವಾಲನ್ನು ಒಡ್ಡಿದೆ. ಈ ಋತುವಿನ ಆರಂಭದಲ್ಲೇ ಬಿಸಿಸಿಐ, ಮೈದಾನದ ಹೊರಗಿನ ನಡವಳಿಕೆ ಹಾಗೂ ಸಾಮಾಜಿಕ ಜಾಲತಾಣಗಳ ಬಳಕೆಯ ಬಗ್ಗೆ ಐಪಿಎಲ್ ಫ್ರಾಂಚೈಸಿಗಳಿಗೆ 7 ಪುಟಗಳ ಕಟ್ಟುನಿಟ್ಟಿನ ಮಾರ್ಗಸೂಚಿಯನ್ನು ನೀಡಿತ್ತು. ವಿಶೇಷವೆಂದರೆ, ಇದೇ ತಿಂಗಳ ಆರಂಭದಲ್ಲಿ ಅರ್ಷದೀಪ್ ಹಂಚಿಕೊಂಡಿದ್ದ ಇನ್ನೊಂದು ವ್ಲಾಗ್ನಲ್ಲಿ ಸಹ-ಆಟಗಾರ ಯಜುವೇಂದ್ರ ಚಾಹಲ್ ಇ-ಸಿಗರೇಟ್ ಸೇದುತ್ತಿರುವ ದೃಶ್ಯ ಸೆರೆಯಾಗಿತ್ತು. ಇದು ಕೂಡ ಸಾಕಷ್ಟು ವಿವಾದಕ್ಕೆ ಎಡೆಮಾಡಿಕೊಟ್ಟಿತ್ತು.
ಪ್ರಸ್ತುತ ಐಪಿಎಲ್ ನೀತಿಸಂಹಿತೆಯ ಪ್ರಕಾರ, ಆಟದ ಸ್ಫೂರ್ತಿಗೆ ಧಕ್ಕೆ ತರುವಂತಹ ಯಾವುದೇ ವರ್ತನೆಯನ್ನು ಮ್ಯಾಚ್ ರೆಫರಿ ಅಥವಾ ಬಿಸಿಸಿಐ ಶಿಸ್ತು ಸಮಿತಿ ಪರಿಶೀಲನೆಗೆ ಒಳಪಡಿಸಬಹುದು. 2026ರ ಐಪಿಎಲ್ ಋತುವು ಅಂತಿಮ ಘಟ್ಟದಲ್ಲಿರುವ ಈ ಸಂದರ್ಭದಲ್ಲಿ, ಬಿಸಿಸಿಐ ಇದನ್ನು ಕೇವಲ ಒಂದು ಖಾಸಗಿ ತಮಾಷೆ ಎಂದು ಪರಿಗಣಿಸುತ್ತದೆಯೋ ಅಥವಾ ವೃತ್ತಿಪರ ನಿಯಮ ಉಲ್ಲಂಘನೆ ಎಂದು ಕಠಿಣ ಕ್ರಮ ಕೈಗೊಳ್ಳುತ್ತದೆಯೋ ಎಂಬುದನ್ನು ಕಾದುನೋಡಬೇಕಾಗಿದೆ.
