ಅಮೆರಿಕ ಓಪನ್ ಗ್ರ್ಯಾಂಡ್ ಸ್ಲ್ಯಾಮ್ ಟೆನಿಸ್ ಟೂರ್ನಿಯ ಪುರುಷರ ಸಿಂಗಲ್ಸ್‌ ಪಂದ್ಯದಲ್ಲಿ ಸ್ಪೇನ್‌ ಸ್ಟಾರ್‌ ಆಟಗಾರ ಕಾರ್ಲೋಸ್ ಅಲ್ಕರಾಜ್ ವಿಶ್ವದ ಅಗ್ರಮಾನ್ಯ ಆಟಗಾರ ಯಾನಿಕ್ ಸಿನ್ನರ್ ಅವರನ್ನು ಮಣಿಸಿ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿದ್ದಾರೆ.
ಭಾನುವಾರ ತಡ ರಾತ್ರಿ ನಡೆದ ಪಂದ್ಯದಲ್ಲಿ ವಿಶ್ವದ ಎರಡನೇ ಶ್ರೇಯಾಂಕಿತ ಆಟಗಾರ ಅಲ್ಕರಾಜ್ 6-2, 3-6, 6-1, 6-4 ಸೆಟ್‌ಗಳಿಂದ ಇಟಲಿಯ 24 ವರ್ಷದ ಸಿನ್ನರ್ ಅವರನ್ನು 2 ಗಂಟೆ 42 ನಿಮಿಷ ನಡೆದ ಹಣಾಹಣಿಯಲ್ಲಿ ಮಣಿಸಿದರು. ಈ ಮೂಲಕ ಸ್ಪೇನ್‌ನ ಅಲ್ಕರಾಜ್ ಆರನೇ ಗ್ರ್ಯಾನ್‌ ಸ್ಲ್ಯಾಮ್ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡರು.
ಫೈನಲ್‌ನಲ್ಲಿ ನಿರಾಸೆ ಅನುಭವಿಸಿದ ಸಿನ್ನರ್ 4ನೇ ಗ್ರ್ಯಾನ್‌ ಸ್ಲ್ಯಾಮ್ ಟೆನಿಸ್ ಟೂರ್ನಿಯನ್ನು ಗೆಲ್ಲುವ ಅವಕಾಶವನ್ನು ಕೈ ಚೆಲ್ಲಿದರು. ಅಲ್ಕರಾಜ್ 2024, 2025 ರಲ್ಲಿ ಫ್ರೆಂಚ್‌ ಓಪನ್ ಟೂರ್ನಿ, 2023, 2024 ರಲ್ಲಿ ವಿಂಬಲ್ಡನ್‌ ಚಾಂಪಿಯನ್ ಹಾಗೂ ಅಮೆರಿಕ ಓಪನ್ ಪ್ರಶಸ್ತಿಯನ್ನು 2022, 2025ರಲ್ಲಿ ಪಡೆದಿದ್ದಾರೆ.
ಇದನ್ನು ಓದಿದ್ದೀರಾ? ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್: ಇತಿಹಾಸ ನಿರ್ಮಿಸಿ ಪದಕ ಗೆದ್ದ ಸಾತ್ವಿಕ್‌–ಚಿರಾಗ್
ಸಿನ್ನರ್ ಬಾರಿ ಪ್ರಶಸ್ತಿ ಗೆಲ್ಲದಿದ್ದರೂ ಈ ವರ್ಷದ 4 ಗ್ರ್ಯಾನ್‌ ಸ್ಲ್ಯಾಮ್ ಫೈನಲ್‌ಗಳನ್ನು ಆಡಿದ ದಾಖಲೆ ಹೊಂದಿದ್ದಾರೆ. ಈ ಮೂಲಕ ಇವರು ಒಂದು ವರ್ಷದಲ್ಲಿ ನಾಲ್ಕು ಗ್ರ್ಯಾಂಡ್ ಸ್ಲ್ಯಾಮ್ ಫೈನಲ್‌ಗಳನ್ನು ಆಡಿದ ವಿಶ್ವದ ನಾಲ್ಕನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದಕ್ಕೂ ಮೊದಲು, ರಾಡ್ ಲೇವರ್ (1969), ರೋಜರ್ ಫೆಡರರ್ (2006, 2007, 2008) ಮತ್ತು ನೊವಾಕ್ ಜೊಕೊವಿಕ್ (2015, 2021, 2023) ಈ ಸಾಧನೆ ಮಾಡಿದ್ದರು.
ಈ ಸೋಲಿನೊಂದಿಗೆ ಸಿನ್ನರ್ ಅವರ ಹಾರ್ಡ್ ಕೋರ್ಟ್‌ನಲ್ಲಿ 27 ಪಂದ್ಯಗಳ ಗೆಲುವಿನ ಸರಣಿಗೆ ತಡೆ ಬಿದ್ದಿದೆ. ಅಮೆರಿಕ ಓಪನ್ 2025 ಚಾಂಪಿಯನ್ ಆದ ಕಾರ್ಲೋಸ್ ಅಲ್ಕರಾಜ್‌ಗೆ ಭಾರೀ ಬಹುಮಾನ ದೊರಕಿದೆ. ಇವರು ಅಮೆರಿಕ ಓಪನ್ ಚಾಂಪಿಯನ್ ಪಟ್ಟವನ್ನು ಅಲಂಕರಿಸುತ್ತಿರುವಂತೆ 5 ಮಿಲಿಯನ್ ಅಮೆರಿಕ ಡಾಲರ್ (ಸುಮಾರು ರೂ. 42 ಕೋಟಿ) ಬಹುಮಾನ ಗೆದ್ದಿದ್ದಾರೆ. ರನ್ನರ್ ಅಪ್‌ ಯಾನಿಕ್ ಸಿನ್ನರ್ ಸುಮಾರು 2.5 ಮಿಲಿಯನ್ ಡಾಲರ್ (ಸುಮಾರು ರೂ. 22 ಕೋಟಿ) ಬಹುಮಾನ ಪಡೆದಿದ್ದಾರೆ.
ಈ ಬಾರಿ ಅಮೆರಿಕ ಓಪನ್‌ಗಾಗಿ ಆಯೋಜಕರು 90 ಮಿಲಿಯನ್ ಡಾಲರ್ (ಸುಮಾರು ರೂ. 750 ಕೋಟಿ) ಬಹುಮಾನ ಮೊತ್ತವನ್ನು ಘೋಷಿಸಿದ್ದರು. ಇದು ಕಳೆದ ಬಾರಿಗೆ ಹೋಲಿಸಿದರೆ ಶೇ. 20 ರಷ್ಟು ಹೆಚ್ಚಾಗಿದೆ. 2024ರಲ್ಲಿ ಯುಎಸ್‌ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿದ ಆಟಗಾರ 3.6 ಮಿಲಿಯನ್ ಯುಎಸ್‌ ಡಾಲರ್ ಪಡೆದಿದ್ದರು. ಬಹುಮಾನ ಮೊತ್ತ ಈ ಬಾರಿ ಸುಮಾರು ಶೇ 39 ರಷ್ಟು ಹೆಚ್ಚಾಗಿದೆ.
