ಎರಡು ದಶಕಗಳ ಹಿಂದೆ ಸಾಫ್ಟ್‌ವೇರ್ ಎಂಜಿನಿಯರ್ ಆಗಿ ಹೈದರಾಬಾದ್ ತೊರೆದು ಅಮೆರಿಕ ಸೇರಿದ್ದ ವಿಕ್ರಮ್ ರೆಡ್ಡಿ ಸುದಿನಿ, ತಮ್ಮೊಂದಿಗೆ ಈಡೇರದ ಕ್ರಿಕೆಟಿಗನಾಗುವ ಕನಸನ್ನೂ ಹೊತ್ತೊಯ್ದಿದ್ದರು. ಹೈದರಾಬಾದ್‌ನ ಸ್ಥಳೀಯ ಲೀಗ್‌ಗಳಲ್ಲಿ ಆಡಿದ್ದ ವಿಕ್ರಮ್ ಅವರಿಗೆ ಉನ್ನತ ಮಟ್ಟದ ಕ್ರಿಕೆಟ್ ಆಡಲಾಗದ ಕೊರಗು ಕಾಡಿತ್ತು. ಆದರೆ, ಇದೀಗ ಅವರ ಆ ಕನಸನ್ನು ಮಗ ನಿತೀಶ್ ರೆಡ್ಡಿ ಸುದಿನಿ ಸಾಕಾರಗೊಳಿಸಿದ್ದಾರೆ.
19 ವರ್ಷದೊಳಗಿನವರ ವಿಶ್ವಕಪ್‌ನಲ್ಲಿ ಬಲಿಷ್ಠ ನ್ಯೂಜಿಲೆಂಡ್ ವಿರುದ್ಧ ಅಜೇಯ 117 ರನ್ ಸಿಡಿಸುವ ಮೂಲಕ 18ರ ಹರೆಯದ ನಿತೀಶ್ ಇತಿಹಾಸ ನಿರ್ಮಿಸಿದ್ದಾರೆ. ಈ ಮೂಲಕ ಐಸಿಸಿ ವಿಶ್ವಕಪ್ ಟೂರ್ನಿಯಲ್ಲಿ (U-19) ಶತಕ ಬಾರಿಸಿದ ಅಮೆರಿಕದ (USA) ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೂ ಅವರು ಪಾತ್ರರಾಗಿದ್ದಾರೆ. ಮೈದಾನದಲ್ಲಿ ಮಗ ಹೆಲ್ಮೆಟ್ ತೆಗೆದು ಶತಕ ಸಂಭ್ರಮಿಸಿದಾಗ, ಗ್ಯಾಲರಿಯಲ್ಲಿ ಕುಳಿತಿದ್ದ ತಂದೆ ವಿಕ್ರಮ್ ಮತ್ತು ತಾಯಿ ಸ್ವಾತಿ ಅವರ ಕಣ್ಣಲ್ಲಿ ಆನಂದಬಾಷ್ಪ ಹರಿಯಿತು.
ಹೈದರಾಬಾದ್ ನಂಟು ಮತ್ತು ತಾಲೀಮು
“ನಾನು 1999ರಲ್ಲಿ ಹೈದರಾಬಾದ್ ಬಿಟ್ಟೆ. ನನ್ನ ಕ್ರಿಕೆಟ್ ಕನಸನ್ನು ಮಗನ ಮೂಲಕ ಈಡೇರಿಸಿಕೊಳ್ಳುವ ಹಠವಿತ್ತು. ನಿತೀಶ್ 13ನೇ ವಯಸ್ಸಿನಲ್ಲೇ ಟೆನಿಸ್ ಬಾಲ್ ಮೂಲಕ ಕ್ರಿಕೆಟ್ ಆರಂಭಿಸಿದ,” ಎಂದು ವಿಕ್ರಮ್ ಹೇಳಿದ್ದಾರೆ.
ವಿಶೇಷವೆಂದರೆ, ಅಮೆರಿಕದಲ್ಲಿ ಬೆಳೆದರೂ ನಿತೀಶ್ ತಮ್ಮ ಬೇರನ್ನು ಮರೆತಿಲ್ಲ. ವಿಕ್ರಮ್ ಅವರು ಪ್ರತಿ ವರ್ಷ ಮಗನನ್ನು ಹೈದರಾಬಾದ್‌ಗೆ ಕರೆತಂದು ಉಪ್ಪಲ್‌ನಲ್ಲಿರುವ ಅಶ್ವಿನ್ ಕ್ರಿಕೆಟ್ ಅಕಾಡೆಮಿಯಲ್ಲಿ ತರಬೇತಿ ಕೊಡಿಸುತ್ತಿದ್ದರು. ಅಲ್ಲಿನ ಟರ್ಫ್ ವಿಕೆಟ್‌ಗಳು ಮತ್ತು ಕೆಂಪು ಮಣ್ಣಿನ ಪಿಚ್‌ಗಳಲ್ಲಿನ ಅಭ್ಯಾಸ, ಸ್ಪಿನ್ ಬೌಲಿಂಗ್ ಎದುರಿಸಲು ಹಾಗೂ ಸ್ವೀಪ್, ರಿವರ್ಸ್ ಸ್ವೀಪ್ ಹೊಡೆತಗಳನ್ನು ಕರಗತ ಮಾಡಿಕೊಳ್ಳಲು ನೆರವಾಗಿದೆ ಎಂದು ನಿತೀಶ್ ಸ್ಮರಿಸುತ್ತಾರೆ. ವಿನ್ಸೆಂಟ್ ವಿನಯ್ ಕುಮಾರ್ ಸೇರಿದಂತೆ ಅಲ್ಲಿನ ಕೋಚ್‌ಗಳಿಗೆ ಅವರು ಧನ್ಯವಾದ ಅರ್ಪಿಸಿದ್ದಾರೆ.
ಇದನ್ನು ಓದಿದ್ದೀರಾ? ಸೈನಾ ನೆಹ್ವಾಲ್ | ‘ಹಿಸ್ಸಾರ್’ನಿಂದ ವಿಶ್ವದ ನಂಬರ್ 1 ಪಟ್ಟ ಪಡೆದ ಛಲಗಾರ್ತಿ
ಕ್ರಿಸ್ ಗೇಲ್ ಸ್ಫೂರ್ತಿ
ವೆಸ್ಟ್ ಇಂಡೀಸ್‌ನ ದೈತ್ಯ ಆಟಗಾರ ಕ್ರಿಸ್ ಗೇಲ್ ಅವರನ್ನು ನಿತೀಶ್ ತಮ್ಮ ಸ್ಫೂರ್ತಿಯಾಗಿ ಪರಿಗಣಿಸುತ್ತಾರೆ. “ಗೇಲ್ ಅವರ ಸಿಕ್ಸರ್ ಹೊಡೆಯುವ ಶೈಲಿ ನನಗೆ ಇಷ್ಟ. ಬ್ಯಾಟಿಂಗ್ ಮಾಡುವಾಗ ಏಕಾಗ್ರತೆಗಾಗಿ ನಾನು ನನ್ನೊಂದಿಗೆ ನಾನೇ ಮಾತನಾಡಿಕೊಳ್ಳುತ್ತೇನೆ,” ಎಂದು ನಿತೀಶ್ ತಮ್ಮ ಯಶಸ್ಸಿನ ಗುಟ್ಟನ್ನು ಬಿಟ್ಟುಕೊಟ್ಟಿದ್ದಾರೆ.
ಮುಂದಿನ ಗುರಿ ಎಂಎಲ್‌ಸಿ (MLC)
ವಿರಾಟ್ ಕೊಹ್ಲಿ, ಶುಭಮನ್ ಗಿಲ್ ಅವರಂತೆ ಅಂಡರ್-19 ಹಂತದಿಂದ ಹಿರಿಯರ ತಂಡಕ್ಕೆ ಏರುವ ಗುರಿಯನ್ನು ನಿತೀಶ್ ಹೊಂದಿದ್ದಾರೆ. ಪ್ರಸ್ತುತ ಅಟ್ಲಾಂಟಾದಲ್ಲಿ ನೆಲೆಸಿರುವ ಅವರು, ಅಮೆರಿಕದ ಹಿರಿಯರ ತಂಡವನ್ನು ಪ್ರತಿನಿಧಿಸುವುದು ಮತ್ತು ಮೇಜರ್ ಲೀಗ್ ಕ್ರಿಕೆಟ್ (MLC) ನಲ್ಲಿ ಆಡುವ ಕನಸು ಕಂಡಿದ್ದಾರೆ. ಅಟ್ಲಾಂಟಾ ಲೈಟ್ನಿಂಗ್ ಪರ ಮೈನರ್ ಲೀಗ್ ಆಡಿರುವ ಅವರು, ಅಮೆರಿಕದಲ್ಲಿ ಕ್ರಿಕೆಟ್ ವೇಗವಾಗಿ ಬೆಳೆಯುತ್ತಿದ್ದು, ತಮಗೆ ಉತ್ತಮ ಭವಿಷ್ಯವಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
