ಭಾರತದ ಟಿ20 ವಿಶ್ವಕಪ್ ಗೆಲುವಿನಲ್ಲಿ ರುವಾರಿ ಎಂದೇ ಮಿಂಚುತ್ತಿರುವ ಸಂಜು ಸ್ಯಾಮ್ಸನ್, ತಮ್ಮ ಐಪಿಎಲ್ ಪಯಣದಲ್ಲಿ ಹೊಸ ಅಧ್ಯಾಯ ಆರಂಭಿಸಲು ಸಜ್ಜಾಗಿದ್ದಾರೆ. ಕಳೆದ ಕೆಲವು ಸೀಸನ್‌ಗಳಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಮುನ್ನಡೆಸಿದ್ದ ಈ ವಿಕೆಟ್‌ಕೀಪರ್-ಬ್ಯಾಟರ್, ಈಗ ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡ ಸೇರಿದ್ದಾರೆ. ಅವರು, ಸಿಎಸ್‌ಕೆಯಲ್ಲಿ ನಾಯಕ ರುತುರಾಜ್ ಗಾಯಕ್ವಾಡ್ ಅಡಿಯಲ್ಲಿ ಆಡಲಿದ್ದಾರೆ. ಮಾಜಿ ಟೀಮ್ ಇಂಡಿಯಾ ನಾಯಕ ಎಂ.ಎಸ್ ಧೋನಿ ಇನ್ನೂ ತಂಡದ ಭಾಗವಾಗಿರುವುದರಿಂದ, ವಿಕೇಟ್‌ಕೀಪರ್‌ ಸ್ಥಾನದಲ್ಲಿ ಧೋನಿ ಇರುತ್ತಾರೆಯೇ ಅಥವಾ ಸಂಜು ಇರುವರೇ ಎಂಬ ಚರ್ಚೆಗಳು ನಡೆಯುತ್ತಿವೆ.
ಈ ಚರ್ಚೆಗಳ ನಡುವೆಯೇ ಸಿಎಸ್‌ಕೆಯ ಮುಂದಿನ ಯೋಜನೆಗಳ ಕುರಿತು ಮಾತನಾಡಿದರುವ ಭಾರತ ಕ್ರಿಕೆಟ್‌ ತಂಡದ ಮತ್ತೊಮ್ಮ ಮಾಜಿ ನಾಯಕ ಅನಿಲ್ ಕುಂಬ್ಳೆ, “ಐಪಿಎಲ್‌ಗೂ ಮುನ್ನ ಸ್ಯಾಮ್ಸನ್ ಅವರ ಇತ್ತೀಚಿನ ಫಾರ್ಮ್ ಮತ್ತು ಆತ್ಮವಿಶ್ವಾಸವು ಅವರ ಪ್ರಮುಖ ಧನಾತ್ಮಕ ಅಂಶಗಳಾಗಿವೆ. ಸಂಜು ಅವರ ಪ್ರದರ್ಶನವು ಭಾರತೀಯ ಕ್ರಿಕೆಟ್‌ ನಾಯಕತ್ವದಲ್ಲಿನ ವ್ಯಾಪಕ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ. ಅಂತೆಯೇ, ಸಿಎಸ್‌ಕೆ ತಂಡವನ್ನು ಬಲಪಡಿಸುತ್ತದೆ” ಎಂದು ಹೇಳಿದ್ದಾರೆ.
“ಒಂದು ಪೀಳಿಗೆಯಿಂದ ಇನ್ನೊಂದು ಪೀಳಿಗೆಗೆ ಐಕಾನ್‌ಗಳು ಬದಲಾಗುತ್ತಿದ್ದಾರೆ. ಭಾರತೀಯ ಕ್ರಿಕೆಟ್‌ನಲ್ಲಿ ಸುನಿಲ್ ಗವಾಸ್ಕರ್ ಅವರಿಂದ ಸಚಿನ್ ಅವರಿಗೆ, ನಂತರ ವಿರಾಟ್ ಕೊಹ್ಲಿ ಅವರಿಗೆ ಜವಾಬ್ದಾರಿಯ ದಂಡ ಹಸ್ತಾಂತರವಾಗಿದೆ. ಎಂಎಸ್ ಧೋನಿ ಕೂಡ ಆ ಯುಗದ ಭಾಗವಾಗಿದ್ದರು. ರಾಹುಲ್ ದ್ರಾವಿಡ್ ಮತ್ತು ಸೌರವ್ ಗಂಗೂಲಿ ಅವರ ನಂತರ ಧೋನಿ ಮತ್ತು ವಿರಾಟ್ ಕೊಹ್ಲಿ ಅಧಿಪತ್ಯ ಸಾಧಿಸಿದರು. ಆ ಅರ್ಥದಲ್ಲಿ, ಸಂಜು ಸಿಎಸ್‌ಕೆಗೆ ಬಂದಿರುವುದು ಉತ್ತಮ ನಡೆ” ಎಂದಿದ್ದಾರೆ.
“ಐಪಿಎಲ್‌ಗೂ ಮುನ್ನ ಅವರ ಅದ್ಭುತ ಫಾರ್ಮ್ ಮತ್ತು ಭಾರತಕ್ಕಾಗಿ ಸತತ ಮೂರು ಇನ್ನಿಂಗ್ಸ್‌ಗಳ ಮೂಲಕ ವಿಶ್ವಕಪ್ ಗೆದ್ದುಕೊಟ್ಟಿರುವುದು ಈ ನಿರ್ಧಾರಕ್ಕೆ ಮತ್ತಷ್ಟು ಮೆರುಗು ನೀಡಿದೆ” ಎಂದು ಕುಂಬ್ಳೆ ಹೇಳಿದ್ದಾರೆ.
“ಸ್ಯಾಮ್ಸನ್ ಅವರ ಮೌಲ್ಯವು ಕೇವಲ ಅವರ ಪ್ರದರ್ಶನಕ್ಕೆ ಸೀಮಿತವಾಗಿಲ್ಲ. ಅವರ ಹಿನ್ನೆಲೆ ಮತ್ತು ತಮಿಳುನಾಡಿನೊಂದಿಗಿನ ಸಂಬಂಧವೂ ಅಭಿಮಾನಿಗಳೊಂದಿಗೆ ಫ್ರಾಂಚೈಸಿಯ ಸಂಬಂಧವನ್ನು ಗಟ್ಟಿಗೊಳಿಸಬಹುದು. ಅವರು ಕೇರಳದಲ್ಲಿ ಜನಿಸಿದವರು, ತಮಿಳು ಮಾತನಾಡುತ್ತಾರೆ, ಆದ್ದರಿಂದ ಅಭಿಮಾನಿಗಳೊಂದಿಗೆ ನೇರ ಸಂಪರ್ಕವಿರುತ್ತದೆ. ಅವರು ವಿಕೆಟ್‌ಕೀಪರ್-ಬ್ಯಾಟರ್ ಆಗಿರುವುದರಿಂದ ಎಂಎಸ್ ಧೋನಿ ಅವರ ಮಾದರಿಯಲ್ಲೇ ಇದ್ದಾರೆ. ಅವರ ಅನುಭವ ಸಿಎಸ್‌ಕೆಗೆ ಅಮೂಲ್ಯವಾಗಲಿದೆ” ಎಂದಿದ್ದಾರೆ.
ಈ ಲೇಖನ ಓದಿದ್ದೀರಾ?: ಟೀಕೆಗಳ ಸುಳಿಯಲ್ಲೂ ಮಿನುಗಿದ ಕೇರಳದ ತಾರೆ: ಸಂಜು ಸ್ಯಾಮ್ಸನ್ ಎಂಬ ಛಲದಂಕಮಲ್ಲ
ಸಿಎಸ್‌ಕೆಯ ನಾಯಕತ್ವದ ರಚನೆಯು ಇತ್ತೀಚಿನ ವರ್ಷಗಳಲ್ಲಿ ಆಗಾಗ್ಗೆ ಬದಲಾವಣೆಗಳನ್ನು ಕಂಡಿದೆ. ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿ ನಾಯಕತ್ವದ ಅನುಭವ ಹೊಂದಿರುವ ಸಂಜು ಇಂತಹ ಸಂದರ್ಭಗಳಲ್ಲಿ ಸಿಎಸ್‌ಕೆಗೆ ಸ್ಥಿರತೆ ತರಲು ಸೂಕ್ತ ವ್ಯಕ್ತಿಯಾಗಿದ್ದಾರೆ. ಸಂಜು ಅವರಿಗೆ ಇದು ಪರಿಪೂರ್ಣ ಪಾತ್ರ. ಅವರು ಉಪನಾಯಕನಂತೆ ಜವಾಬ್ದಾರಿಗಳನ್ನು ನಿಭಾಯಿಸಬಹುದು. ಅವರು ದೀರ್ಘಕಾಲ ರಾಜಸ್ಥಾನವನ್ನು ಮುನ್ನಡೆಸಿದ್ದರಿಂದ ನಾಯಕತ್ವ ಅವರಿಗೆ ಸಹಜವಾಗಿಯೇ ಬರುತ್ತದೆ. ಕಳೆದ ವರ್ಷ ರುತುರಾಜ್ ಗಾಯಗೊಂಡಾಗ ಧೋನಿ ಜವಾಬ್ದಾರಿ ವಹಿಸಬೇಕಾಯಿತು. ಅದಕ್ಕೂ ಮೊದಲು ರವೀಂದ್ರ ಜಡೇಜಾ ನಾಯಕರಾಗಿದ್ದಾಗಲೂ ಧೋನಿ ಮಧ್ಯದಲ್ಲೇ ನಾಯಕತ್ವಕ್ಕೆ ಮರಳಿದ್ದರು. ಹೀಗಾಗಿ ಧೋನಿ ನಂತರ ಮುಂದಿನ ನಾಯಕ ಯಾರು ಎಂಬ ಸವಾಲು ಯಾವಾಗಲೂ ಇತ್ತು. ಈಗ, ಸವಾಲಿಗೆ ಸಂಜು ಉತ್ತರವಾಗಲಿದ್ದಾರೆ” ಎಂದು ಕುಂಬ್ಳೆ ಹೇಳಿದ್ದಾರೆ.
“ರುತುರಾಜ್ ಅವರನ್ನೇ ನಾಯಕನಾಗಿ ಗುರುತಿಸಲಾಗಿದೆ. ಸಂಜು ತಂಡಕ್ಕೆ ಬಂದರೂ ರುತುರಾಜ್ ನಾಯಕರಾಗಿ ಮುಂದುವರಿಯುತ್ತಿರುವುದು ಒಳ್ಳೆಯದು. ಈ ಸೀಸನ್‌ನ ಯಾವುದೋ ಒಂದು ಹಂತದಲ್ಲಿ ಧೋನಿ ಅವರು ಸಂಜು ಅವರಿಗೆ ಕೀಪಿಂಗ್ ಜವಾಬ್ದಾರಿಯನ್ನು ಬಿಟ್ಟುಕೊಟ್ಟರೆ ನನಗೆ ಆಶ್ಚರ್ಯವಿಲ್ಲ. ಒಂದು ವೇಳೆ ರುತುರಾಜ್ ಅಲಭ್ಯರಾದರೆ, ಧೋನಿಗಿಂತ ಹೆಚ್ಚಾಗಿ ಸಂಜು ಅವರೇ ನಾಯಕತ್ವ ವಹಿಸಿಕೊಳ್ಳುವ ಸಾಧ್ಯತೆ ಇದೆ” ಎಂದು ಕುಂಬ್ಳೆ ತಿಳಿಸಿದ್ದಾರೆ.
